ရခိုင်ပြည်နယ် စစ်တွေမြို့နယ်မှာ ဒေသခံအချို့ကို ရခိုင်အမျိုးသားလွတ်မြောက်ရေး ပါတီ (ALP/ALA) က ဖမ်းဆီးပြီး ငွေညှစ်ခဲ့တယ်လို့ ဒေသခံတွေဆီက သိရပါတယ်။

စစ်တွေပြည်သူ့ဆေးရုံမှာ လူနာသတင်းလာမေးတဲ့ ပေါက်တောမြို့နယ် ကန်ပြင်ကျေးရွာက အသက် ၅၀ နှစ်အရွယ် ဦးညီးချေကို စစ်တွေမြို့ ကယ်ဆယ်ရေး အကွက် ၂ က လက်​ဖက်ရည်ဆိုင် ထိုင်နေချိန် ဧပြီ ၁၅ ရက် ညနေ ၃ နာရီကျော်လောက်မှာ ALP အဖွဲ့ဝင် ၆ ယောက်က ပစ္စတို တလက်ကိုင်ဆောင်ကာ ဖမ်းဆီးပြီး အနက်ရောင်ကားတစီးနဲ့ ခေါ်ဆောင်သွားကြတယ်လို့ ကန်ပြင်ကျေးရွာဒေသခံတယောက်က ပြောပါတယ်။

အဲဒီ ALP ရုံးကို ဧပြီ ၂၀ ရက်နေ့ ညနေ ၄ နာရီလောက်မှာလည်း ကန်ပြင်ကျေးရွာက ကျောင်းထိုင် ဆရာတော်အပါဝင် ရပ်မိရပ်ဖတွေ လိုက်သွားပြီး သွားရောက်ညှိနှိုင်းရာ သိန်း ၇၀၀ ကျပ် တောင်းပေမယ့် သိန်း ၃၅၀ ကျပ်နဲ့ ညှိနှိုင်းငွေပေးချေပြီး ပြန်လည်ထုတ်ယူခဲ့ရတယ်လို့ ဆိုပါတယ်။

စစ်တွေမြို့ ပေါ်က အရက်ဆိုင် တဆိုင်ကိုလည်း ဧပြီ ၂၀ ရက် ည ၁၀ နာရီလောက်မှာ ALP အဖွဲ့ဝင် ၂၀ လောက်ရောက်လာပြီး ပြည်သူ ၇ ယောက်ကို ဖမ်းဆီးကာ ရုံးကို ခေါ်သွားပြီးရိုက်နှက်ခဲ့ကာ တစ်ယောက်ကို ငွေကျပ် ၂ သိန်းစီ တောင်းပြီး ပြန်လွှတ်ပေးခဲ့တယ်လို့ စစ်တွေမြို့ ဒေသခံတယောက်က ပြောပါတယ်။

ဒါ့အပြင် အရက်ဆိုင်ပြန်ဖွင့်မယ်ဆိုရင် ALP ရုံးကို လစဥ်ကြေး ၂သိန်းကျပ် ပေးသွင်းရမယ်လို့ ပြောဆိုပြီး တခြား အရက်ဆိုင်တွေကို လစဥ်ကြေး ၂ သိန်းကျပ်စီကောက်ခံတယ်လို့ စုံစမ်းသိရတယ်လို့ ဆိုပါတယ်။

ဖြစ်စဥ်နဲ့ပတ်သက်လို့ ALP သတင်းပြန်ပြန်ကြားရေးဌာန တာဝန်ရှိသူ တဦးက “အဲဒီ ဖြစ်စဥ်နဲ့ပတ်သက်လို့ကတော မသိရှိရသေးတာကြောင့် စုံစမ်းကြည့်ဖို့ ကြံနေတုန်းပါ။ ဆရာမကြီး လည်း မသိသေးပါ။ ဆရာမကြီး (ဒေါ်စောမြရာဇာလင်း)ကလည်း အဲဒီဖြစ်စဥ်တွေကို ခွင့် မလွှတ်ပါ။ အဲဒီ လုပ်ရပ်တွေကိုလည်း မကြိုက်ပါ။ လုပ်လိမ့်မယ်လို့လည်း မထင်ပေမယ့် မသိရ သေးပါဘူး” လို့ ပြောပါတယ်။

ALP/ALA အဖွဲ့ဝင်တွေဟာ စစ်တွေမြို့၊ စက်ရုံစုရပ်ကွက်မှာ အထိုင်ချတပ်စွဲထားပြီး ပြည်သူတွေကို မတရားဖမ်းဆီးနှိပ်စက်ကာ ငွေညှစ်တာတွေ ဆက်တိုက်ပြုလုပ်နေတာကြောင့် ဇန်နဝါရီ ၄ ရက်မှာ ALP ပါတီ ခေါင်းဆောင်ပိုင်းထဲက ၃ ယောက် သေနတ်နဲ့ ပစ်ခတ် သတ်ဖြတ်ခံခဲ့ရတယ်လို့ ဒေသခံတွေဆီက သိရပါတယ်။

စစ်ကိုင်းတိုင်း ဒီပဲယင်းမြို့နယ်၊ ရေဦးမြို့နယ်၊ တန့်ဆည်မြို့နယ် ဒေသခံအများစုအသုံးပြုတဲ့ လမ်းပိုင်းကို ဧပြီ ၉ ရက်က မနက် ၇ နာရီလောက်မှာ စစ်ကောင်စီက ဘူဒိုဇာနဲ့ ဖျက်ဆီးသွားတယ်လို့ ဒေသခံတွေက ပြောပါတယ်။

“ကျနော်တို့ ညောင်လှရွာနဲ့ ၆ မိုင်‌ဝေးတဲ့ မူးစုံတံတားအနီးက လမ်းကို ဘူဒိုဇာနဲ့မြေတွေ ကုတ်ဖယ်ပြီး ဖျက်ဆီးသွားကြတယ်။ ဘာလို့ စစ်ကောင်စီက ဒီလိုလုပ်ရတာဆိုတော့ ဒေသခံပြည်သူတွေ သွားလာရေး ခက်ခဲအောင်လုပ်နေတာ။ အခုလို လုပ်လို့ သူတို့ကအောင်မြင်ပြီလို့ စစ်ကောင်စီဘက်က ထင်ကောင်းထင်နေလိမ်မယ်။ ပြည်သူက သူတို့ရှေ့ကဖျက်ရင် နောက်ကပြင်ဖို့ရာ အစဉ်သင့်ပဲ။ ကျနော်တို့ဒေသခံတွေကတော့ အရင်ကတည်းကမှ ရွာတွေကို မီးရှို့ဖျက်ဆီးလို့ သူ‌တို့ကို ရွံနေကြတာ။ အခုလို လမ်းပါဖျက်ဆီးတော့ ရွံပြီးရင်ရွံပဲ ဆရာရေ” လို့ ညောင်လှရွာ ဒေသခံတဦးက ပြောပါတယ်။

စစ်ကောင်စီဖျက်ဆီးခဲ့တဲ့ လမ်းပိုင်းဟာ ရေဦး၊ တန့်ဆည်၊ ဒီပဲယင်းမြို့နယ်တွေက ဒေသခံတွေသာမက ကလေး၊ တမူးကိုသွားတဲ့ ခရီးသည်ကားနဲ့ ကုန်ကားတွေလည်း သွားလာနေတဲ့လမ်းပိုင်းလည်း ဖြစ်ပါတယ်။ 

အဆိုပါလမ်းမှာ ခရီးသည်တင်ကားနဲ့ ကုန်တင်ကာအစီးရေ ၁၀၀ ကျော် နေစဉ်သွားလာနေကြတယ်လို့ ဒေသခံတွေက ပြောပါတယ်။

ရေဦးပြည်သူ့ကာကွယ်ရေးတပ်ဖွဲ့ဝင်တဦးက “စစ်ကောင်စီက အခုလို ဒီလမ်းပိုင်းကို ဖျက်ဆီးရတာက သူတို့ (-) တွေ အထိုင်ချတပ်စွဲနေတဲ့ ဒီပဲယင်းမြို့၊ ရေဦးမြို့၊ တန်ဆည်မြို့တွေကို ဒေသခံတွေက ဖြတ်သန်းမောင်နှင်တာ မရှိတာရယ်၊ အဲဒီမြို့တွေကို ရှောင်ကွင်းမောင်းတာလုပ်လို့ အခုလို ဖျက်ဆီးတာဖြစ်နိုင်တယ်ဗျ” လို့ ပြောပါတယ်။

ဒီပဲယင်းမြို့နယ်အတွင်း လမ်းဖျက်ဆီးတဲ့ စစ်ကောင်စီတပ်ဟာ ရေဦးမြို့ပေါ် ရောက်ရှိသွားပြီဖြစ်ကာ နောက်နေ့တွေမှာလည်း တန့်ဆည်မြို့နယ်ဘက်ကို ထပ်မံ စစ်ကြောင်းထိုးကာ လမ်းတွေကို ဖျက်ဆီးသွားမယ်ဆိုပြီး သတင်းတွေ ပျံ့နေတယ်လို့ ဒေသခံတွေက ပြောပါတယ်။

စစ်ကိုင်းတိုင်း ကျွန်းလှမြို့မှာ စစ်ကောင်စီတပ်ဖွဲ့ဝင်တွေက  ဆိုင်ကယ်နှစ်ယောက်စီးနှင်းသူတွေကို ဖမ်းဆီးငွေညှစ် ဒဏ်ရိုက်နေတယ်လို့ သိရပါတယ်။

စစ်ကောင်စီလက်အောက်ခံ အထွေထွေအုပ်ချုပ်ရေးဦးစီးဌာနက ဧပြီ ၉ ရက်မှာ ဆိုင်ကယ်တစီးအား အမျိုးသား နှစ်ဦး စီးနှင်မောင်းနှင်ခွင့်ကို ပိတ်ပင်ထားပြီးနောက် မြို့ဝင် ထွက်ဂိတ်မှာ စစ်ကောင်စီတပ်နဲ့ ပျူစောထီးတပ်ဖွဲ့ဝင်တွေက ဆိုင်ကယ်တွေ ဖမ်းဆီးငွေညှစ်နေတာလို့ ဒေသခံတွေက ပြောပါတယ်။

“ဆိုင်ကယ်တစီးကို အမျိုးသားနှစ်ဦး စီးနှင်ခွင့် ပိတ်ထားတယ်။ ထွေအုပ်က ၉ ရက်နေ့က စာထုတ်ပြီး နောက်ရက်မှာ မြို့အဝင်အထွက်ဂိတ်မှာဖမ်းတော့တာပဲ။ စစ်တပ်၊ ရဲ နဲ့ ပျူစောထီးတွေ အုပ်စုက ဖမ်းတာ။ အဓိက အဖမ်းခံရတာကတော့ နယ်ကလူတွေ အဖမ်းခံရတာများတယ်” လို့ ဒေသခံတဦးက ပြောပါတယ်။

စစ်ကောင်စီ ထုတ်ပြန်ထားတဲ့ အမျိုးသားနှစ်ဦး မစီးရ အမိန့်တားမြစ်ချက်ကို မသိတဲ့ ကျေးရွာ နေသူတွေကို ကျွန်းလှ မြို့ဝင်မြို့ထွက် စစ်ဆေးရေးဂိတ်မှာ စစ်ကောင်စီတပ်ဖွဲ့ဝင်တွေနဲ့ ပျုစောထီးအဖွဲ့က ဖမ်းဆီးငွေညှစ်တာတွေ ပြုလုပ်နေတာပါ။

"အချို့နယ်က လူတွေက ဆိုင်ကယ်အမျိုးသား နှစ်ယောက် မစီးရဘူး ဆိုတဲ့ အမိန့်ကို မသိကြဘူး။ နှစ်ယောက်စီးပြီး မြို့တက်လာရင် မြို့ဝင်ဂိတ်မှာ အဖမ်းခံရတာပဲ။ ကျနော့် အသိတစ်ယောက်ဆို ဆိုင်ကယ်နှစ်ယောက်စီးလာလို့ ဖမ်းတာ ငါးသောင်း ပေးပြီးပြန်ရွေးရတယ်။ အချို့တွေလည်း ဆိုင်ကယ်အသိမ်းခံရတာ၊ ရိုက်နှက်ခံရတာတွေ ရှိတယ်လို့လည်း ကြားရတယ်" လို့ ကျွန်းလှ ဒေသခံတဦးက ပြောပါတယ်။

စစ်ကောင်စီတပ် ပျူစောထီးပူးပေါင်းတပ်ဖွဲ့တို့က ကျွန်းလှမြို့ဝင် မြို့ထွက်ဂိတ်ကို ပြီးခဲ့တဲ့ မတ် ၁ ရက်မှ ၁၀ ရက်အထိ ဝင်ထွက်ခွင့် ပိတ်ပင်ခဲ့ပါသေးတယ်။