close

ဖမ်းဆီးအမှုဖွင့်

close

June 1, 2022

ဖေ့စ်ဘွတ်ခ်ပို့စ်Share မှုဖြင့် ပေါင်းတလည်မြို့နေ အသက် ၁၄ နှစ်အရွယ် မိန်းကလေးငယ်ကို စစ်ကောင်စီက ဖမ်းဆီးအမှုဖွင့်

ပဲခူးတိုင်း၊ ပြည်မြို့နယ်၊ ပေါင်းတလည်မြို့မှာနေတဲ့ မမိုးချမ်းမြေ့ခင်အမည်ရှိ အသက် ၁၄ နှစ်အရွယ် မိန်းကလေးတယောက်ကို စစ်ကောင်စီက သူနေထိုင်ရာ အိမ်ကနေ မေလ ၂၈ ရက်က လာရောက်ဖမ်းဆီးသွားတယ်လို့ မြို့ခံတွေထံက သိရပါတယ်။  

မမိုးချမ်းမြေ့ခင်ကို ဖေ့စ်ဘွတ်ခ်လူမှုကွန်ရက်မှာ ပို့စ်တခု Share မှုနဲ့  စစ်ကောင်စီက စွပ်စွဲပြီး  ပေါင်းတလည်ရဲစခန်းမှာ ဖမ်းဆီးထားကာ လတ်တလော ရာဇသတ်ကြီး ပုဒ်မ ၅၀၅(က) နဲ့ အမှုဖွင့်ထားပါတယ်။

မိန်းကလေးရဲ့ မိဘတွေနဲ့နီးစပ်တဲ့ပေါင်းတလည်မြို့ခံတယောက်က “သူ့မိဘတွေက သာမန် ပြည်သူတွေဖြစ်ပြီး ဘယ်ပါတီဝင်မှ မဟုတ်ကြပါဘူး၊ ဆန္ဒပြပွဲတွေလည်း တခါမှ မပါဘူးပါဘူး။ သူ့ကိုဖမ်းသွားတာ အခုဆိုရင် ၃ ရက်ရှိပြီ။ လာဖမ်းတာက ရဲတွေ၊ အရပ်ဝတ်တွေနဲ့ လာဖမ်းသွားတာ။ အသက်ကအခုမှ ၁၄ နှစ်လောက်ပဲရှိဦးမယ်။ တကယ်ကျောင်း ဆက်တိုက်တက်ရမယ်ဆိုရင်အခုက ၈ တန်းပေါ့။ ကလေးမလေးကတော့ ဘာကို Share မိလိုက်ပြီး ဘယ်သူက သတင်းပေးလိုက်လို့လည်း မသိ အခုတော့ ပေါင်းတလည်ရဲစခန်းမှာ ဖမ်းထားတယ်” လို့ ပြောပါတယ်။  

ဖမ်းဆီးခံနေရတဲ့ မိန်းကလေးပြန်လည်လွတ်မြောက်လာဖို့အတွက် ပေါင်းတလည်ရဲတပ်ဖွဲ့က ငွေကျပ်သိန်း ၆၀ တောင်းနေတယ်လို့လည်း သူ့မိဘရဲ့ မိတ်ဆွေဖြစ်သူက  ဆက်ပြီးပြောပါတယ်။ 

“သိန်း ၆၀ ပေးရင် ပြန်လွတ်ပေးမယ်လည်းပြောတယ်။ မနက်ဖန်ကို ပြည်ထောင်ကို ပိုမယ်လို့လည်း ပြောနေတော့ သူ့မိဘတွေ ဘာကိုယုံကြည်ရမှန်းမသိဘူး။ တတ်နိုင်ကြတာတော့မဟုတ်ဘူး။ ကိုယ့်သမီးက အပျိုပေါက်လေးဆိုတော့ တကယ်လွတ်မယ်ဆိုရင် မရှိရှိတာရှာရမှာပေါ့ တတ်နိုင်သူတွေတော့မဟုတ်ကြပါဘူး။ သားသမီးဇောဆိုတော့လည်း ဝိုင်းပြီး အကြံတောင်း အကူအညီတောင်းနေလို့၊ တကယ်ငွေပေးပြီးမှ လွှတ်မပေးရင် ဘယ်နှဲ့ လုပ်မလဲ။ ဘယ်သူ့ကိုမှလည်း တိုင်လို့ရတာမဟုတ်ဘူး၊ ရဲကပြောတာတော့ စစ်ကောင်စီကိုပေးရမှာလို့ပြောတာပဲ။”

ငွေကျပ်သိန်း ၆၀ တောင်းနေခံတဲ့ ကိစ္စနဲ့ ပတ်သက်ပြီး ပေါင်းတလည်ရဲတပ်ဖွဲ့ထံကို ဆက်သွယ် မေးမြန်းနိုင်ခြင်းမရှိသေးပါဘူး။ ရန်ကုန်အပါအဝင် ဒေသတချို့မှာတော့ စစ်ကောင်စီတပ်တွေက ကျောင်းသားလူငယ်တွေကို ဖမ်းဆီးပြီး ငွေညှစ်ပြန်လွှတ်ပေးတဲ့ ဖြစ်ရပ်တွေ ရှိနေတာ ဖြစ်ပါတယ်။

ပြီးခဲ့တဲ့ မေ ၂၅ ရက်ကလည်း  ပေါင်းတလည်မြို့မှာနေတဲ့ အသက်မပြည့်သေးတဲ့ လပြည့်ဆိုတဲ့ လူငယ်တယောက်ကို စစ်ကောင်စီက အခုလိုပဲ ဖေ့စ်ဘွတ်ခ်မှာ ပို့စ်တခု share လိုက်တာကြောင့် ဖမ်းစီးထားပြီး  ပုဒ်မ ၅၀၅ (က)နဲ့ အမှုဖွင့်ထားတယ်လို့ သိရပါတယ်။ 

အာဏာသိမ်းစစ်ကောင်စီဟာ လူမှုကွန်ရက်တွေပေါ်မှာ ပြည်သူလူလူတွေတင်တဲ့  ပို့စ်တွေကို စောင့်ကြည့်နေပြီး NUG ၊ PDF နဲ့ ပတ်သက်တဲ့ ပို့စ်တွေကို Share တာ မှတ်ချက်ရေးတာ၊ Like ပေးတာတွေလုပ်တဲ့  အကောင့်ပိုင်ရှင်တွေကို နေ့စဉ်လိုလို  လိုက်လံရှာဖွေ ဖမ်းဆီး အမှုဖွင့်နေတာ ဖြစ်ပါတယ်။ 

9 hours Ago

May 26, 2020

တောင်ကုတ်စည်ပင်ကော်မတီဥက္ကဋ္ဌ၏ ညီဖြစ်သူအား အကြမ်းဖက်ဥပဒေဖြင့် ဖမ်းဆီးအမှုဖွင့်

ရခိုင်ပြည်နယ်၊ တောင်ကုတ်မြို့ စည်ပင်သာယာရေးကော်မတီဥက္ကဋ္ဌ ဦးဇေယျကျော်ရဲ့ ညီဖြစ်သူ ကိုစည်သူကျော်ဇံ (ခ) ကိုမိုက်ကယ်ကို မေလ ၂၅ ရက်နေ့က တောင်ကုတ်ရဲစခန်းမှ တာဝန်ရှိသူတွေက နေအိမ်သို့လာရောက် ခေါ်ဆောင်သွားပြီး  အကြမ်းဖက်ဥပဒေ ပုဒ်မ-၅၀(စျ)နဲ့ အမှုဖွင့်ထားတယ်လို့ ဦးဇေယျကျော်ရဲ့ အကျိုးဆောင်ရှေ့နေ ဒေါ်င်္သိဂီမောင် က  ပြောပါတယ်။ အကျိုးဆောင်ရှေ့နေ ဒေါ်င်္သိဂီမောင် က “ဦးဇေယျကျော်တို့ကို စုံစမ်းနေတဲ့ အချိန်မှာပဲ ကိုမိုက်ကယ်ကိုလာဖမ်းသွားတယ်၊ စစ်ဆေးမေးမြန်းစရာရှိတယ်ဆိုပြီးတော့ လာခေါ် သွားတာ။ လာခေါ်သွားပြီးတော့ မနေ့ကညနေ ၄ နာရီခွဲလောက်မှာ တောင်ကုတ်မြို့မရဲစခန်းက နေပြီးတော့ ယာယီစခန်းမှူး တရားလိုလုပ်ပြီးတော့ အကြမ်းဖက်ဥပဒေ ပုဒ်မ-၅၀(စျ)နဲ့ ချုပ်ရမန် တောင်းခံထားတယ်ပေါ့၊ အဲဒီချုပ်ရမန်မှာက တောင်ကုတ်ရဲစခန်းမှာပဲ ချုပ်နှောင်ခွင့်ပြုပါ ဆိုပြီးတော့ ရမန်တောင်းခံထားပေမယ့် ဒီနေ့မနက်ကျတော့ သူ့မိတ်ဆွေ အပေါင်းအသင်းတွေက သွားပြီးတော့ ထမင်းသွားပို့တာတို့၊ မုန့်သွားပို့တာတို့ကျတော့ ကိုမိုက်ကယ်က တောင်ကုတ်ရဲစခန်း အချုပ်ထဲမှာ မရှိတော့ဘူးဆိုပြီး တွေ့ခွင့်မရခဲ့ဘူး”လို့ ပြောပါတယ်။ တောင်ကုတ်စည်ပင်ကော်မတီဥက္ကဋ္ဌ ဦးဇေယျကျော် အပါအဝင် ၃ ဦးကို မေလ ၁၁ ရက်နေ့က အကြမ်းဖက် တိုက်ဖျက်ရေး ဥပဒေ ပုဒ်မ-၅၀(က) အမှုဖွင့်လှစ်ခံရပြီး ချုပ်ရမန် ၁၄ ရက် ရယူကာစစ်ဆေးခဲ့တာပါ။ ဒါပေမဲ့ သက်သေ အထောက်အထားမတွေ့ရှိရတဲ့အတွက် ပြန်လည်လွှတ်ပေး လိုက်တာကို စုံစမ်းသိရှိရပေမဲ့ မိသားစုဝင် တွေကို ဆက်သွယ်လာတာမရှိသေးဘူးလို့လည်း ဦးဇေယျကျော်ရဲ့ အကျိုးဆောင်ရှေ့နယ် ဒေါ်င်္သိဂီမောင်က ပြောပါတယ်။ “ကိုဇေယျကျော်တို့ ၁၁ ရက်နေ့က ရမန်ယူထားတာ ၂၄ ရက်နေ့က ပြည့်တာပေါ့၊ အဲဒါ ၂၄ ရက်နေ့က တနင်္ဂနွေဖြစ်တဲ့အတွက် ၂၅ ရက်နေ့မှာ ရုံးချိန်းဆိုတော့ မိသားစုဝင်တွေက ရုံးချိန်းကိုလာစောင့်နေတယ်၊ ဒါပေမဲ့ သူတို့ချုပ်ရမန်တောင်းခံတဲ့ စခန်းမှူးကနေပြီးတော့ သူတို့ကို ပုဒ်မ-၅၀(က)နဲ့ ပတ်သက်ပြီးတော့ လုံလောက်တဲ့သက်သေအထောက်အထား မတွေ့ရှိတဲ့ အတွက်ကြောင့်မို့လို့ သူတို့ကို ကိုယ်ပိုင်ခံဝန်နဲ့လွှတ်လိုက်တယ်ဆိုပြီးတော့ တောင်ကုတ်မြို့နယ် တရားရုံးကို စာတင်ပါတယ်။ အဲဒီလို ကိုယ်ပိုင်ခံဝန်နဲ့ လွှတ်လိုက်တယ်လို့ပြောပေမဲ့လည်း ရုံးထုတ်တာလည်းမရှိတဲ့အတွက် တောင်ကုတ်မြို့မရဲစခန်းကိုသွားပြီး စုံစမ်းတဲ့အခါမှာလည်း တောင်ကုတ်ရဲစခန်းက လွှတ်တယ်ဆိုတာကိုသူတို့လည်း ကြားသိရတယ်။ ဒါပေမဲ့ အခု လောလောဆယ် အနေအထားမှာတော့ ဘယ်ကိုရောက်နေတယ်၊ ဘယ်မှာရှိတယ်ဆိုတာကိုတော့ ကျနော်တို့ မသိဘူး၊ ကျနော်တို့ ပြောလည်း မပြောပြနိုင်ဘူးဆိုပြီး အဲဒီလိုပဲပြောလိုက်တယ်”လို့ ပြောပါတယ်။ ကိုစည်သူကျော်ဇံကို ဖမ်းဆီး စစ်ဆေးနေတာမှန်ပေမဲ့ အမှုနဲ့ပတ်သက်ပြီးတော့ အသေးစိတ်ကိုတော့ စစ်ဆေးနေဆဲ ဖြစ်တာကြောင့်ပြောဆိုလို့မရသေးဘူးလို့ တောင်ကုတ်မြို့နယ်ရဲတပ်ဖွဲ့မှူး ရဲမှူးသန်းနိုင်က ပြောပါတယ်။ “စည်ပင်ဥက္ကဋ္ဌ ညီကို ဖမ်းထားတာမှန်ပါတယ်။ မေလ ၂၅ ရက်နေ့ နေ့လည်က ဖမ်းထားတာပါ၊ အမှုနဲ့ ပတ်သက်ပြီးတော့ စစ်ဆေးစရာရှိလို့ဖမ်းထားတာပါ၊ အဲဒါတွေကတော့ ပြောလို့မရသေးဘူး၊ သတင်းအရဖမ်းဆီးတာပေါ့၊ မဟုတ်ရင်တော့ ပြန်လွှတ်ပေးမှာပေါ့၊ သူကိုတောင်ကုတ် ရဲစခန်းမှာပဲ ချုပ်ထားတယ်” အကြမ်းဖက်တိုက်ဖျက်ရေးဥပဒေ ပုဒ်မ-၅၀(ဈ) အရ ထောင်ဒဏ် (၁၀)နှစ်မှ ထောင်ဒဏ်တစ်သက်ထိချမှတ်နိုင်ပြီး ငွေဒဏ်လည်း ချမှတ်နိုင်တယ်လို့ သိရပါတယ်။ သတင်း- နောင်နောင် 
2 years Ago
Up