တနင်္သာရီတိုင်း၊ သရက်ချောင်းမြို့နယ်၊ ရန်တောင်ကျေးရွာက ဖမ်းဝရမ်းထုတ်ခံရတဲ့ အမျိုးသားတယောက်ကို စစ်ကောင်စီတပ်က မေ ၁၁ ရက် ညနေပိုင်းမှာ သေနတ်နဲ့ ပစ်သတ်ခဲ့တယ်လို့ ရွာခံတွေက ပြောပါတယ်။
ပစ်သတ်ခံရသူဟာ အသက် ၄၀ ခန့်ရှိ ကိုတင်ရှိန်ဖြစ်ပြီး သူ့ရဲ့ဇနီးလောင်းဖြစ်သူနဲ့ ညောင်ဇင်ကျေးရွာမှာ မေ ၁၀ ရက် မနက်ပိုင်းက ဖမ်းဆီးခံခဲ့ရတာပါ။
ရွာခံလူငယ်တဦးကတော့ ကိုတင်ရှိန်ဟာ အကြမ်းဖက်မှုနဲ့ ဖမ်းဝရမ်းထုတ်ခံထားရသူဖြစ်ပြီး မင်္ဂလာဆောင်အတွက် စီစဥ်စရာရှိလို့ သွားရင်းကနေ ဖမ်းဆီးခံခဲ့ရတာလို့ ပြောပါတယ်။
“သူက PDF တွေနဲ့တွဲပြီး ဝရမ်းထုတ်ခံထားရတာ။ မင်္ဂလာဆောင်ကလည်း ရက်ပိုင်းအတွင်းမှာပဲ။ ပစ်သတ်တာကတော့ အိမ်ပြန်ခေါ်လာပြီးမှ ပစ်သတ်တာ။ မပစ်သတ်ခင်ကတည်းက ရိုက်ခံထားရလို့ လူက သွေးအန်နေပြီ။”
မေ ၁၀ ရက်မှာ ဖမ်းဆီးခံခဲ့ရတဲ့ ကိုတင်ရှိန်ကို ထားဝယ်မြို့ဆီ ခေါ်ဆောင်စစ်ဆေးပြီးမှ နောက်တရက် ညနေ ၅ နာရီလောက်မှာ နေအိမ်ကို ပြန်ခေါ်လာပြီး အိမ်ရှေ့မှာ ပစ်သတ်ခဲ့တာပါ။
ကား ၃ စီးနဲ့လာတဲ့ စစ်ကောင်စီတပ်ဖွဲ့ဝင်တွေဟာ ကိုတင်ရှိန်ကို ပစ်မသတ်ခင် သူ့မိသားစုဝင်တွေဆီက ပိုက်ဆံ သိန်း ၅၀ တောင်းခဲ့သေးတယ်လို့ သိရပါတယ်။
ရန်တောင်ရွာခံတဦးက “တောင်းတာက ကိုတင်ရှိန်အတွက်လား၊ သူ့ဇနီးလောင်းအတွက်လားဆိုတာ မသိရဘူး။ ပိုက်ဆံတော့ ပေးလိုက်ရတယ်” လို့ ပြောပါတယ်။
ကိုတင်ရှိန်ရဲ့ မိသားစုနဲ့ နီးစပ်တဲ့ တခြားရွာခံတဦးကတော့ စစ်ကောင်စီတပ်တွေဟာ နေအိမ်ထဲလည်း ထပ်မံဝင်ရောက်ရှာဖွေပြီး ပိုက်ဆံ သိန်း ၁၀၀ ကျော်နဲ့ ရွှေ ၁၆ ကျပ်သား ယူသွားတယ်လို့ ပြောပေမဲ့ ကာယကံရှင် မိသားစုဝင်တွေဆီကနေ အတည်ပြုချက် မရရှိသေးပါဘူး။
ထားဝယ်မြို့နဲ့ ၆ မိုင်လောက်သာဝေးပြီး ရန်တောင်ရွာနဲ့ ကပ်လျက်ရှိတဲ့ ညောင်ဇင်ကျေးရွာထဲကို မေ ၁၀ ရက် မနက် ၆ နာရီလောက်မှာ မြေသယ်ကားနှစ်စီး၊ ကားငယ်သုံးစီးနဲ့ ရောက်လာခဲ့တဲ့ စစ်ကောင်စီတပ်နဲ့ ပျူစောထီးအဖွဲ့ဝင် ၁၀၀ ခန့်ဟာ ကိုတင်ရှိန်တို့ ဇနီးမောင်နှံအပြင် အသက် ၂၅ နှစ်ဝန်းကျင် လူငယ်နှစ်ဦးနဲ့ အသက် ၆၀ ခန့်ရှိ အမျိုးသမီးတဦးကိုလည်း ဖမ်းဆီးသွားခဲ့ပါတယ်။
ဒါ့အပြင် စစ်ကောင်စီလက်အောက်ခံတပ်တွေဟာ နေအိမ်တွေထဲ ဝင်ရောက်ရှာဖွေပြီး ပိုက်ဆံနဲ့ ရွှေထည်တချို့ကိုလည်း ယူသွားတယ်လို့ ညောင်ဇင်ရွာခံ လူငယ်အမျိုးသားတဦးက ပြောပါတယ်။
“စဖမ်းတာက ၅၀ ကျော်တယ်။ တွေ့သမျှလူ ဖမ်းတာ။ အဲဒီလူတွေဆီကလည်း လက်ဝတ်လက်စားတွေ အကုန်ယူသွားတယ်။ အိမ်တွေထဲဝင်ရှာပြီး ယူသွားတာရောဆို သိန်း ၁,၀၀၀ ကျော်တယ်။ ကျနော့်အသိ အိမ်နှစ်အိမ်ကတောင် သိန်း ၅၀၀ ကျော်ဖိုးလောက် ပါသွားတာ။ ညနေ သူတို့ပြန်တော့ သူတို့ဖမ်းမယ့်စာရင်းထဲ ပါတဲ့သူတွေပဲ ခေါ်သွားတယ်။ ကျန်တဲ့ရွာခံတွေကိုတော့ ပြန်လွှတ်ခဲ့တယ်။”
ကိုတင်ရှိန်ရဲ့ ဇနီးလောင်း အပါအဝင် စစ်ကောင်စီတပ်က ဖမ်းဆီးသွားတဲ့သူတွေကတော့ ဒီကနေ့ မေ ၁၂ ရက်အထိ ပြန်မလွတ်လာသေးပါဘူး။
၂၀၂၂ ခုနှစ် စက်တင်ဘာ ၉ ရက် ညကလည်း စစ်ကောင်စီ တပ်ဖွဲ့ဝင် ၃၀ ကျော်ဟာ ညောင်ဇင်ကျေးရွာထဲက လူနေအိမ်တချို့ကို သေနတ်နဲ့ပစ်ခတ်ကာ နေအိမ်အတွင်း ဝင်ရောက်ရှာဖွေခဲ့ပြီး ဖုန်း၊ ပိုက်ဆံနဲ့ ရွှေထည်တချို့ကို ယူဆောင်သွားခဲ့ပါသေးတယ်။
ပဲခူးတိုင်းအနောက်ခြမ်း၊ သာယာဝတီခရိုင်၊ ကြို့ပင်ကောက်မြို့နယ်ရှိ စိုင်းဂေါင်းကျေးရွာအုပ်စု သာစည်ရွာအနီး ကားလမ်းဘေးမှာ မေ ၁၀ ရက် မွန်းလွဲ ၂ နာရီက ဒေသခံ ၄ ယောက်ကို PDF လို့စွပ်စွဲပြီး စစ်ကောင်စီတပ်က ဖမ်းဆီးခဲ့တယ်လို့ ဒေသခံတွေဆီကနေ သိရပါတယ်။
PDF လို့ စွပ်စွဲပြီး ဖမ်းဆီးခံရတဲ့ ၄ ယောက်ထဲက ၁ ယောက်ကို စစ်ကောင်စီတပ်က သေနတ်နဲ့ ပစ်သတ်ခဲ့ပြီး ကျန်တဲ့ အမျိုးသမီးတယောက်နဲ့ အမျိုးသား ၂ ယောက်ကိုတော့ ရိုက်နှက်ပြီး ဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။
စစ်ကောင်စီတပ်က ဖမ်းဆီးသတ်ဖြတ်ခံရသူဟာ ကိုမောင်မင်း ဆိုသူဖြစ်ပြီး ထွက်ပြေးလို့ သေနတ်နဲ့ပစ်သတ်ခံရတာလို့ ဆိုပါတယ်။
ဖမ်းဆီးခံရသူတွေဟာ လက်နက်ခဲယမ်းနဲ့ ဗုံးတွေတွေ့လို့ ဖမ်းတာလို့ ပြောဆိုနေကြပေမဲ့ စစ်ကောင်စီဘက်ကတော့ အခုလို ဖမ်းဆီးတာနဲ့ပတ်သက်ပြီး သတင်းထုတ်ပြန်တာ မတွေ့ရသေးပါဘူး။
သာယာဝတီခရိုင် PDF ဘက်ကလည်း အခု စစ်ကောင်စီဘက်က ဖမ်းဆီးထားတဲ့အပေါ်မှာ တပ်ဖွဲ့ဝင်တွေ ဟုတ်၊ မဟုတ် အတည်ပြုပြောဆိုတာ မရှိသေးပါဘူး။
