စစ်ကိုင်းတိုင်း၊ အလုံမြို့နယ်၊ ကြီးဗဒုံရွာက ရပ်ရွာလုံခြုံရေးအဖွဲ့ဝင် လူငယ်တဦးကို စစ်ကောင်စီတပ်က မတ်လ ၂၁ ရက်မှာ ဖမ်းဆီးပြီး သတ်ဖြတ်မီးရှို့ထားတဲ့ အလောင်းကို ဒေသခံတွေ ဒီနေ့ မတ်လ ၂၂ရက်မှာ တွေ့ရှိခဲ့တယ်လို့ ဒေသခံတွေဆီကနေ သိရပါတယ်။
အဆိုပါ ကြီးဗဒုံရွာဟာ နမခအခြေစိုက်စခန်းနဲ့ အနီးဆုံးမှာရှိတဲ့ ကျေးရွာတခုလည်း ဖြစ်ပါတယ်။
ဒေသခံရွာသားတဦးက “အသတ်ခံရတဲ့သူက ကိုသိန်းမင်း၊ အသက် ၃၀ ဝန်းကျင်လောက်ရှိမယ်ဗျ။ သတ်ပြီး မီးရှို့ထားတဲ့နေရာက ရွာရဲ့အနောက်မြောက်ဘက်က ပြောင်းရိုးပုံပေါ်တင်ပြီး မီးရှို့ထားခဲ့ကြတာ။ သူတို့ ရွာကနေထွက်သွားပြီးမှ ဒီအလောင်းကို ဒီနေ့ မတ်လ ၂၂ ရက်နေ့ မနက်ခင်းမှာ တွေ့ရှိခဲ့ရတာဗျ။ ဘာကြောင့်သတ်တာလဲဆိုတော့ သူတို့သတ်ချင်လို့ကို သတ်တာပဲဆရာရေ။ စစ်ကိုင်းမှာက ကုန်ဈေးနှုန်း တအားဈေးကြီး ဈေးတန်တာ။ လူ့အသက်က ဈေးမကြီးဘူး။ သတ်ချင်သလိုကို စစ်ကောင်စီက သတ်နေတော့တာဗျ။ ဒီအချိန်မှာ ဥပဒေစိုးမိုးမှု မရှိတော့ သူခိုး၊ ဓားပြရန်ကနေ ကာကွယ်နိုင်အောင် လူငယ်လေးတွေနဲ့ ရပ်ရွာလုံခြုံရေးအဖွဲ့လေးတွေ ရွာတိုင်းလိုလိုရှိတယ်။ ဒီလို အဖွဲ့ ဖွဲ့တာကိုလည်း စစ်ကောင်စီရော၊ PDF အဖွဲ့တွေရော နားလည်မှု အပြည့်ရှိစေချင်တယ်။ PDF ဘက်ကတော့ အခုလိုလုပ်တာ အပြည့်အဝ နားလည်ပေးပါတယ်။ စစ်ကောင်စီကတော့ ကလေး၊ လူကြီး၊ အဘိုး၊ အဘွား ဘာတခုမှ ချမ်းသာမပေးဘူး။ သူတို့စစ်ကြောင်းထဲ တွေ့သူမှန်သမျှ လူတွေတင်မကဘူး၊ အိမ်မွေးတိရစ္ဆာန်တွေပါ သတ်ဖြတ်နေတယ်” လို့ ပြောပါတယ်။
စစ်ကောင်စီတပ်ကတော့ အခု မတ်လ ၂၂ ရက် နေ့ခင်း ၁၁ နာရီလောက်မှာ အလုံမြို့နဲ့ ဘုတလင်မြို့ဘက် ဆက်သွယ်ထားတဲ့ ကားလမ်းမ ဘေးဝဲယာကို လုံခြုံရေးအပြည့်လိုက်ပါပြီး ဘူဒိုဇာ မြေထိုးစက်ကားတစီးနဲ့ မိုင်းရှင်းလင်းနေတယ်လို့လည်း ဘုတလင်ဒေသခံတွေက ပြောပါတယ်။
စစ်ကိုင်းတိုင်း၊ ပုလဲမြို့နယ်၊ ဇီးဖြူကုန်းရွာအနီးကို မတ် ၂၁ ရက် မနက် ၇ နာရီ မိနစ် ၄၀ လောက်မှာ စစ်ကောင်စီတပ်က MI 35 တစီးနဲ့ နာရီဝက်လောက် လေကြောင်းကနေ ပစ်ခတ်တိုက်ခိုက်ခဲ့တာကြောင့် ပြည်သူ့ကာကွယ်ရေးတပ်ဖွဲ့က ရဲဘော် ၄ ဦး ကျဆုံးပြီး ၅ ဦး ဒဏ်ရာရခဲ့တယ်လို့ သိရပါတယ်။
ဇီးဖြူကုန်းရွာမှာ ကာလရှည်ကြာ တပ်စွဲနေတဲ့ စစ်ကောင်စီစခန်းကို တော်လှန်ရေးအဖွဲ့က ဝင်ရောက်ပစ်ခတ် စခန်းသိမ်းတာကြောင့် အခုလို လာရောက်ပစ်ခတ်တာ ဖြစ်နိုင်တယ်လို့ ဒေသခံတွေက ပြောပါတယ်။
ဇီးဖြူကုန်းကျေးရွာဟာ စစ်တပ်ကို ထောက်ခံပူးပေါင်းပြီး တော်လှန်ရေးအဖွဲ့တွေကို တိုက်ခိုက်နေတဲ့ ပျူရွာဖြစ်တယ်လို့လည်း ဆိုပါတယ်။
MRDA မြန်မာ့တော်ဝင်နဂါးတပ်မတော် တာဝန်ရှိသူ ဗိုလ်နဂါးက “ဇီးဖြူကုန်းပျူရွာကို ကျနော်တို့ မနက် ၆ နာရီလောက်က ရွာထဲအထိ ဝင်ရောက်ပစ်ခတ်တိုက်ပွဲဖြစ်ခဲ့တာ ဟုတ်ပါတယ်။ တိုက်ပွဲက အခြေအနေကောင်းတယ်လို့လည်း ပြောလို့ရသလို မကောင်းဘူးလို့လည်း ပြောလို့ရတယ်။ အခြေအနေကောင်းတာက စစ်ကောင်စီ အထိုင်လုပ်ထားတဲ့ စခန်းကို ထိထိရောက်ရောက် ဝင်ရောက်ပစ်ခတ်နိုင်ခဲ့တယ်။ စခရော၊ ပျူရော အကျအဆုံး ၂၀ ကျော်အထိ ရှင်းလင်းနိုင်တဲ့အချိန်၊ စခန်းသိမ်းနိုင်မယ့် အချိန်ရောက်ခါနီးမှ နမခကနေ MI35 တစီးတက်လာပြီး ကျနော်တို့ရဲဘော်တွေ မနက်ခင်း ၈ နာရီလောက်မှာ နာရီဝက်လောက် လာပစ်ခံလိုက်ရတယ်။ လေယာဉ်နဲ့ပစ်လို့ ကျနော်တို့ ရဲဘော် ၄ ဦး ကျဆုံးခဲ့ရသလို ၅ ဦး မစိုးရိမ်ရဒဏ်ရာ ရရှိခဲ့တယ်။ အခုလို အောင်ခါနီးမှ လေယာဉ်နဲ့ အပစ်ခံရတာဆိုတော့ ကျနော်တို့ တော်လှန်ရေးအင်အားစုတွေအနေနဲ့ စစ်ကောင်စီလေယာဉ်ကို ပြန်လည်ခုခံနိုင်ဖို့ရာ လက်နက်အဓိကလိုအပ်တယ်ဆိုတာ သက်သေပဲဗျ။ အခု ကျနော့်ရဲဘော်လေးတွေ ကျဆုံးခဲ့ရတာလည်း မြေပြင်ကရန်သူနဲ့ သူပစ်၊ ကိုယ်ပစ် ပစ်ရင်း ကျဆုံးခဲ့ရတာ မဟုတ်ဘူးဗျ။ ဒီလေယာဉ်ပေါ်ကနေ လက်နက်ကြီးနဲ့ အပစ်ခံရပြီး အခုလို ကျဆုံးခဲ့ရတာ” လို့ ပြောပါတယ်။
အခုတိုက်ပွဲမှာ လက်နက် ၂ လက် ဆုံးရှုံးခဲ့ရတယ်လို့လည်း ဆိုပါတယ်။ အခုတိုက်ပွဲကို MRDA မြန်မာ့တော်ဝင်နဂါးတပ်မတော်၊ ပခုက္ကူခရိုင်တပ်ရင်း-၁ နဲ့ ပခုက္ကူခရိုင်တပ်ရင်း-၃ တို့ ပူးပေါင်းတိုက်ခိုက်ခဲ့တာလို့ သိရပါတယ်။
စစ်ကိုင်းတိုင်း၊ အရာတော်မြို့နယ်၊ ငွေတွင်းကျေးရွာနေ အသက် ၂၇ နှစ်အရွယ် အမျိုးသားတဦးကို စစ်ကောင်စီတပ်သားနဲ့ ပျူစောထီးတွေက ဇန်နဝါရီ ၃၀ ရက် ည ၈ နာရီလောက်မှာ ဖမ်းဆီးသွားပြီးနောက် ဒီနေ့မနက်မှာ အလောင်းကိုပြန်ပေးခဲ့တယ်လို့ ဒေသခံတွေဆီက သိရပါတယ်။
ငွေတွင်းကျေးရွာက အသက် ၂၇ နှစ်အရွယ် ကိုကျော်မင်းစိုး၊ ကိုရှစ်ဗိုလ်၊ ကိုကျော်နိုင်တို့ကို မေးမြန်းစရာရှိတယ်ဆိုပြီး စစ်သားနဲ့ ပျူစောထီးတွေက ဖမ်းဆီးခဲ့တာဖြစ်တယ်လို့ ကျေးရွာဒေသခံတဦးက ပြောပါတယ်။
“ဖမ်းသွားသူတွေထဲက တယောက်ကို ဒီမနက်မှာ မိသားစုကို အလောင်းလာပြန်ယူခိုင်းတယ်။ ကျန်နှစ်ယောက်ကိုတော့ ဖမ်းထားသေးတယ်။ ဒီလို ဖမ်းစစ်ပြီးရင် သူတို့ မသင်္ကာတဲ့သူတွေ လက်လွန်ပြီး သေတာတွေ ရှိပါတယ်။ မဟုတ်ရင်တောင် ရွာခံတွေကို အကြောင်းမဲ့ဖမ်းပြီးရင် ပိုက်ဆံနဲ့ ပြန်ရွေးခိုင်းလေ့ရှိပါတယ်။”
ငွေတွင်းကျေးရွာမှာ စစ်သား ၁၀ ယောက်ဝန်းကျင်၊ ပျူစောထီး ၅၀ ခန့်နဲ့ ပျူစောထီးစခန်း ပြုလုပ်ထားပြီး ကျေးရွာအတွင်းက PDF ထောက်ခံသူ၊ NLD ထောက်ခံသူတွေလို့ သူတို့ထင်တဲ့သူတွေကို မကြာခဏ ဖမ်းဆီးစစ်ဆေးတာမျိုးတွေ ပြုလုပ်လေ့ရှိတယ်လို့ ပြောပါတယ်။
ကိုကျော်မင်းစိုး အသတ်ခံရတာကို သိထားသူတွေနဲ့ နီးစပ်သူတွေရဲ့ ဖုန်းတွေကို ကျေးရွာအတွင်း ပျူစောထီးတွေက သိမ်းဆည်းသွားပြီး ရွာအဝင်အထွက်တွေကိုလည်း ကန့်သတ်ထားတယ်လို့ သိရပါတယ်။
စစ်ကိုင်းတိုင်း၊ ကနီမြို့နယ်မှာ ချင်းတွင်းမြစ်ကိုဆန်တက်ပြီး ပြည်သူမိသားစု လိုက်ပါလာတဲ့ စက်လှေကို စစ်ကောင်စီတပ်ဖွဲ့က ပစ်ခတ်ရာမှာ စက်လှေပေါ်ရှိ အမျိုးသမီးတယောက် နှလုံးသွေးလန့် သေဆုံးသွားတယ်လို့ ဒေသခံတွေက ပြောပါတယ်။
ဇန်နဝါရီ ၃၀ ရက် မနက်ပိုင်းက ယင်းမာပင်မြို့နယ်ကနေ ဆန်တက်လာတဲ့ မိသားစုလိုက်ပါလာတဲ့ စက်လှေကို စစ်ကောင်စီတပ်ဖွဲ့ ရေယာဉ်က ပစ်ခတ်ခဲ့တာဖြစ်ပြီး စက်လှေပေါ်ရှိ မိသားစုအနက် မမာမာဝင်းဆိုသူမှာ နေရာမှာတင် နှလုံးရောဂါဖောက်ပြီး သေဆုံးခဲ့တာလို့ သိရပါတယ်။
ဒေသခံတဦးက “သေဆုံးသူက ကနီမြို့နယ် ယင်းယိမ်ရွာကပါ။ ယင်းမာပင်ကနေ သူတို့ရွာကို စက်လှေနဲ့ ပြန်လာတာကို စစ်တပ်ရေယာဉ်က သေနတ်နဲ့ပစ်တာ။ အဲ့လိုပစ်တော့ နှလုံးရောဂါရှိလို့ ဆေးကုနေရသူက နှလုံးသွေးလန့် သေဆုံးသွားတယ်။ ဒါ အကြောင်းမဲ့ သက်သက် ရမ်းကားပစ်ခတ်တာ။ နောက်ပြီး အဲ့လိုသေလို့ ဘာတာဝန်ယူမှု ဘာတာဝန်ခံမှုမှ မရှိဘူး” လို့ ပြောပါတယ်။
ပစ်ခတ်မှုအပြီး သေဆုံးသူနဲ့ သူ့ရဲ့မိသားစုကို စစ်ကောင်စီတပ်ဖွဲ့က နေရပ်ကို စက်လှေ ဆက်လက်ဆန်တက်ခွင့်မပေးဘဲ သပြေတောကျေးရွာကနေ မြစ်ကြောင်းပြန်လှည့်ခိုင်းခဲ့တယ် လို့ သိရပါတယ်။
သေဆုံးသူ ရုပ်အလောင်းကိုတော့ ယင်းမာပင်မြို့နယ် ချင်းတွင်းမြစ်ဘေးရှိ ကျေးရွာတရွာမှာ သင်္ဂြိုဟ်လိုက်ရတယ်လို့ သိရပါတယ်။
လက်ရှိမှာ စစ်ကောင်စီတပ်ဖွဲ့ဟာ ချင်းတွင်းမြစ်ကြောင်းအတွင်း ဖြတ်သန်းသွားလာနေတဲ့ သူတို့တပ်ဖွဲ့ရဲ့ ထောက်ပို့ရေယာဉ်တွေအတွက် လုံခြုံရေးယူတဲ့အနေနဲ့ မြစ်ကြောင်းဘေးရှိ ကျေးရွာတွေမှာ တပ်စခန်းချတာတွေလည်း ရှိနေပါတယ်။
