မန္တလေးတိုင်း၊ သာစည်မြို့နယ်ထဲမှာ ကျပ်သိန်းပေါင်း ၁ သိန်းကျော် တန်ဖိုးရှိတဲ့ မူးယစ်ဆေးဝါးနဲ့ စိတ်ပြောင်းဆေးဝါးတွေ ဖမ်းဆီးရမိတယ်လို့ စစ်ကောင်စီဩဇာခံ မူးယစ်ဆေးထိန်းချုပ်ရေးဗဟိုကော်မတီက ထုတ်ပြန်ပါတယ်။
သာစည်မြို့နယ်၊ ကျွဲတပ်ဆုံစစ်ဆေးရေးစခန်းကို ရှောင်ကွင်းပြီး မူးယစ်ဆေးဝါးတွေ သယ်ဆောင်မယ်ဆိုတဲ့ သတင်းပေးပို့ချက်အရ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်တွေပါတဲ့ ပူးပေါင်းအဖွဲ့ဟာ ဧပြီ ၁၉ ရက်နေ့ မနက်ပိုင်းက စောင့်ဖမ်းခဲ့တာလို့ ထုတ်ပြန်ထားပါတယ်။
သာစည်မြို့နယ်၊ ယင်းမာပင်ကျေးရွာကနေ တောင်ဂွကျေးရွာသွားလမ်းမှာ ဝေဠုသုတ မောင်းနှင်ပြီး သူရအောင် လိုက်ပါလာတဲ့ NISSAN CABSTAR မော်တော်ယာဉ်ကိုရှာဖွေရာမှာ ကားပေါ်မှာ ပုလင်းခွံအိတ်တွေနဲ့ ဖုံးအုပ်သယ်ဆောင်လာတဲ့ မူးယစ်ဆေးတွေ ဖမ်းမိခဲ့တာလို့ ဆိုပါတယ်။
စိတ်ကြွရူးသွပ်ဆေးပြား ၆ ဒသမ ၁၈ သန်း၊ ကက်တမင်း ၁၀ ကီလိုနဲ့ စိတ်ပြောင်းဆေးဝါး(Happy water) ၄ ဒသမ ၁၂ ကီလိုတို့ကို သိမ်းဆည်းရမိခဲ့ပြီး ကာလဒေသတန်ဖိုး ကျပ်သိန်းပေါင်း ၁ သိန်းကျော် ရှိပါတယ်။
စစ်ဆေးဖော်ထုတ်ချက်အရ သိမ်းဆည်းရမိတဲ့ မူးယစ်ဆေးဝါးတွေကို ရှမ်းပြည်နယ်တောင်ပိုင်းကနေ မန္တလေးတိုင်းကိုသယ်ဆောင်လာတာလို့ သိရပြီး ကွင်းဆက်တွေကိုလည်း စစ်ဆေးဖော်ထုတ်နေတယ်လို့ ဆိုပါတယ်။
ရန်ကုန်တိုင်း၊ မင်္ဂလာဒုံမြိုနယ်၊ သင်္ဃန်းကျွန်းကြီးကျေးရွာအုပ်စု၊ ဇေကမ္ဘာကျောက်လမ်းထိပ်၊ စက်သုံးဆီအရောင်းဆိုင်နားက ခြံဝင်းမှာ မတ် ၂၄ ရက် ညနေ ၆ နာရီလောက်က ရဟန်းအယောင်ဆောင် ၃ ယောက်ကို ဖမ်းဆီးရမိခဲ့တယ်လို့ မြို့ခံတွေက ပြောပါတယ်။
အသက် ၂၅ နှစ်အရွယ်ရှိ ရဟန်းယောင်ဆောင် ၃ ယောက်ဟာ မြောက်ဥက္ကလာပမြို့နယ်၊ (ဌ)ရပ်ကွက်၊ စိန်ချယ်လမ်းက အဆောင်တစ်ခုတည်းမှာ ငှားရမ်းနေထိုင်သူတွေ ဖြစ်တယ်လို့ သိရပါတယ်။
မြို့ခံတဦးက "ဒီနားတွေ့တာက ၇ ခါ ၈ ခါလောက် ရှိနေပြီ။ အဲဒီခြံက ခြုံတွေထဲ ဝင်ဝင်သွားတာ။ ပြန်ထွက်လာတော့ ပုဆိုးနဲ့ အင်္ကျီနဲ့ပဲ။ အဲဒီနေ့ ညနေက သူတို့ ခြံထဲလည်းဝင်ရော ရဲက အရပ်ဝတ်နဲ့ ဝင်ဖမ်းတာ။ အကုန်လုံးကို သင်္ဃန်းကျွန်းကြီးရပ်ကွက်ရုံးကို အရင်ခေါ်သွားတာ။ အဲဒီကနေ စခန်းပို့လိုက်ကြတာ" လို့ ဆိုပါတယ်။
ဖမ်းမိသူ ၃ ဦးမှာ ပဲခူးတိုင်းမှတ်ပုံတင်ကိုင်ဆောင်ထားသူ ၁ ယောက်နဲ့ ဧရာဝတီမှတ်ပုံတင် ကိုင်ဆောင်ထားသူ ၂ ယောက် ဖြစ်ပြီး မေတ္တာအေးတောရကျောင်းတိုက်အမည် စာအိတ်တွေနဲ့ YBS ပေါ်မှာ ရဟန်းအယောင်ဆောင် လိုက်လံတောင်းခံကြသူတွေလို့ သိရပါတယ်။
ဖမ်းမိသူတွေနဲ့အတူ ရဟန်းလွယ်အိတ် ၃ လုံး၊ လက်ကိုင်ဖုန်း ၂ လုံး၊ ငွေသား ကျပ် ၄၀၀၀၀ လောက် နဲ့ သင်္ဃန်း ၃ စုံတို့ သိမ်းဆည်းရမိပြီး မင်္ဂလာဒုံရဲစခန်းမှာ အမှုဖွင့်စစ်ဆေးနေတယ်လို့ သိရပါတယ်။
မတ် ၁၉ ရက် ညပိုင်းကလည်း သင်္ဃန်းကျွန်းကြီးကျေးရွာ၊ သန္တိသုခလမ်းရှိ အဆောင် ၂ ခုမှာ ရဟန်းအယောင်ဆောင် ၆ ယောက် ဖမ်းဆီးရမိခဲ့ပါတယ်။
