မန္တလေး၊ အောင်မြေသာစံမြို့နယ်၊ အိုးဘိုအကျဉ်းထောင်ကနေ ၇၆ လမ်းအကြား (၁) လမ်း တလျှောက်ရှိ ပြည်သူတွေရဲ့ နေအိမ်တွေနဲ့ ဈေးဆိုင်ခန်းတွေကို စစ်ကောင်စီတပ်က  အင်အားသုံးပြီး အဓမ္မဖြိုဖျက်ခံခဲ့ရတယ်လို့ ဒေသခံတွေထံက သိရပါတယ်။ 

မူလလမ်းအကျယ်ကနေ  စီမံချက်အတွက်ဟု ဆိုကာ  ၁၅ အတွင်း ၃၆ ပေစီ ဖယ်ရှားပေးဖို့  သတိပေးစာ ပေးပို့ခံရပြီးတဲ့နောက် တစ်ပတ်ခန့်အကြာမှာပဲ လာရောက်ကာ အချိန်တစ်နာရီအတွင်း အမြန်ဆုံးရွှေ့ပေးဖို့ ခြိမ်းခြောက်ပြောဆိုပြီး ဖြိုဖျက်သွားတာလို့ အိမ်ဖျက်ခံရသူတွေထံက သိရပါတယ်။

စစ်ကောင်စီတပ်ဖွဲ့ဝင်တွေ၊ ရဲတွေနဲ့ အရပ်ဝတ်တွေက လက်နက်အပြည့်အစုံနဲ့ အဆိုပါ နေရာတဝိုက် ပိတ်ဆို့ကာ လုံခြုံရေးယူပြီး ဖြိုဖျက်ခဲ့တာလို့ သိရပါတယ်။ 

အိမ်ဖျက်ခံရသူတစ်ဦးက"သံလမ်းနားတဝိုက်က လက်လုပ်လက်စားတွေများတယ်။ နောက်ထပ် ကူးစရာအိမ်လည်းမရှိတော့ဘူး။ အဓိကကတော့ အဲ့နားမှာ လက်လုပ်လက်စားများတယ်။ ဆင်းရဲသားများတယ်ပေါ့၊ သံလမ်းရဲ့ အရှေ့ဘက်ကတော့ ပိုက်ဆံရှိတဲ့ အသိုင်းအဝိုင်းများတယ်။ သူတို့အပိုင်းထိကတော့ သူတို့က အဆင်ပြေမှာပါ" လို့ ပြောပါတယ်။ 

အိမ်ဖျက်တဲ့နေရာမှာ ရွှေကျင်ရပ်ကွက်ရှိ အမျိုးသားဒီမိုကရေစီအဖွဲ့ချုပ် ရပ်ကျေးရုံးဖွင့်လှစ်ရာ နေအိမ်လည်းပါသွားခဲ့သလို ရပ်ကွက်အတွင်းကျော်ကြားတဲ့ ဒလန်တစ်ယောက်ရဲ့ နေအိမ်လည်း ပါသွားတယ်လို့ သိရပါတယ်။

တချို့အိမ်တွေကတော့ မျက်နှာစာသာ ပါသွားပြီး တချို့အိမ်တွေကတော့ နေခိုင်စရာမရှိတော့တဲ့အထိ ဖြိုဖျက်ခံရရာမှာ ပါသွားတယ်လို့ သိရပါတယ်။

အဆိုပါ ရပ်ကွက်အတွင်းရှိ အန်အယ်လ်ဒီပါတီ အမာခံတွေရဲ့ နေအိမ်တွေနဲ့ တော်လှန်ရေးမှာ ပါတဲ့ ပြည်သူတွေရဲ့ နေအိမ်တွေကို ချိတ်ပိတ်ခံထားရတာလည်း ဖြစ်ပါတယ်။ 

အခုလို ဖြိုဖျက်တာဟာ အကျဉ်းဦးစီးအတွက် အရေးပေါ် စီမံချက်နဲ့ လုပ်ဆောင်တာဖြစ်နိုင်တယ်လို့ မန္တလေးမြို့ခံတွေက သုံးသပ်ပါတယ်။

ရန်ကုန်မြို့မှာ ဒီနေ့မနက် မြို့နယ်ရပ်ကွက်တွေထဲမှာ စစ်အာဏာရှင်ဆန့်ကျင်ရေး ဆန္ဒပြမှု တွေ ဆက်ရှိနေပါတယ်။ 

တဖက်မှာလည်း အာဏာသိမ်းစစ်ကောင်စီရဲ့ လက်နက်ကိုင်တပ်ဖွဲ့တွေက မြို့နယ်တွင်း လမ်းမတွေပေါ်မှာ ခုခံကာကွယ်ထားတဲ့ သဲအိတ်အတားအဆီးတွေကို လိုက်လံဖယ်ရှားရှင်းလင်းနေပါတယ်။ 

ဒီလို ရှင်းလင်းရာမှာ နီးစပ်ရာရပ်ကွက်တွေထဲက အရပ်သားတွေကို အင်အားသုံး ခေါ်ယူဖယ်ရှားခိုင်းနေတာကို တွေ့ရပါတယ်။ 

အရပ်သားတွေကို ခေါ်ယူပြီး လမ်းပေါ်အတားအဆီးတွေ ရှင်းလင်းဖယ်ရှားခိုင်းတာကို မနေ့ကတည်းက စစ်တပ်က အင်းစိန်၊ လှိုင်၊ သာကေတစတဲ့မြို့နယ်တွေမှာ စတင်ပြုလုပ်လာခဲ့ပါတယ်။ 

အင်းစိန် ကမ်းနားဘက်မှာတော့ တက္ကစီကားတွေကိုလည်း တားဆီးပြီး အရံအတား သဲအိတ်တွေကို သယ်သွားခိုင်းတယ်လို့ ဒေသခံတဦးက ပြောပါတယ်။

ဒီလို အရပ်သားတွေ ဖယ်ရှားရှင်းလင်းနေတာကို စစ်တပ်က ဓာတ်ပုံ ဗွီဒီယိုရိုက်ယူထားပြီး ဆူပူအုံကြွမှုကို မလိုလားတဲ့ ရပ်ကွက်နေပြည်သူတွေက အတားအဆီးတွေ ရှင်းလင်းနေရကြောင်း ဝါဒဖြန့်သတင်းတွေကို စစ်ကောင်စီ ထိန်းချုပ်ထားတဲ့ မြဝတီသတင်းတွေမှာ ထည့်သွင်းဖော်ပြခဲ့ပါတယ်။