ချင်းပြည်နယ်၊ ဖလမ်းမြို့နယ်ရှိ စစ်ကောင်စီရဲ့ သီးဘွာလ်စခန်းတိုက်ပွဲ ရှေ့တန်းစစ်မြေပြင်အတွင်း ချင်းအမျိုးသားကာကွယ်ရေးတပ်ဖွဲ့ (CNDF) က စနိုက်ပါသေနတ်နဲ့ ပစ်ခတ်ခဲ့တာကြောင့် စစ်ကောင်စီတပ်ဖွဲ့ဝင် ၂ ဦး သေဆုံးသွားတယ်လို့ CNDF က ထုတ်ပြန်ပါတယ်။

နိုဝင်ဘာ ၂၀ ရက် မနက် ၁၁ နာရီခွဲလောက်မှာ CNDF လက်ဖြောင့်တပ်သားတွေက ပစ်ခတ်ခဲ့တာဖြစ်ပြီး စစ်သား ၂ ဦး နေရာမှာတင် သေဆုံးသွားကာ ကျည်ဆန် ၂၀၀ ကျော်ကိုလည်း သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြပါတယ်။

မနေ့မနက် ၁၀ နာရီလောက်ကလည်း စစ်တပ်က ရဟတ်ယာဉ် ၂ စင်းနဲ့ သီးဘွာလ်စစ်စခန်းအတွက် စားနပ်ရိက္ခာတွေနဲ့ စစ်လက်နက်အကူအညီတွေ ပေးပို့သွားတယ်လို့ သိရပြီး တိုက်ခိုက်ရေးရဟတ်ယာဉ် Mi 35 တစင်းနဲ့ CNDF နဲ့ ပူးပေါင်းတပ်ဖွဲ့တွေကိုလည်း ပစ်ခတ်ခဲ့တယ်လို့ သိရပါတယ်။

တိုက်ခိုက်မှုနဲ့ပတ်သက်ပြီး CNDF နဲ့ ပူးပေါင်းတပ်ဖွဲ့ဘက်က ထိခိုက်မှုတစုံတရာမရှိခဲ့ကြောင်း အဲ့ဒီထုတ်ပြန်ချက်မှာ ဖော်ပြထားပါတယ်။

CNDF ပူးပေါင်းတပ်ဖွဲ့တွေက စစ်ကောင်စီတပ်ဖွဲ့ရဲ့  သီးဘွာလ်စခန်းကို သိမ်းပိုက်နိုင်ရေး တိုက်ခိုက်နေတာ ၇ ရက် ကြာမြင့်ခဲ့ပြီဖြစ်ပြီး စစ်ကောင်စီတပ်ဘက်က နေ့စဉ် လေကြောင်းပစ်ကူနဲ့ ပစ်ခတ်နေပါတယ်။

ပြီးခဲ့တဲ့ နိုဝင်ဘာ ၁၅ ရက်မှ ၁၉ ရက်နေ့အထိ ၅ ရက်တာ တိုက်ပွဲအတွင်းမှာ‌ စစ်ကောင်စီတပ်ဖွဲ့က အရာရှိအဆင့် အပါအဝင် အနည်းဆုံး ၃၀ ကျော်သေဆုံးခဲ့ပြီး CNDF က ဒရုန်းနဲ့ ဗုံးသီးချတိုက်ခိုက်မှု အကြိမ်ရေ ၃၀၀ ကျော် ပြုလုပ်ခဲ့တာကြောင့် စစ်ကောင်စီတပ်စခန်းအတွင်းရှိ အဆောက်အဦတချို့ ထိခိုက်ပျက်စီးတာတွေ ရှိခဲ့တယ်လို့ သိရပါတယ်။

သီးဘွာလ်စစ်ခန်းတိုက်ပွဲမှာ ဆက်လက်ပြင်းထန်နေပြီး CNDF ဘက်က ဒေသတွင်း CDF တပ်ဖွဲ့တွေ အပါအဝင် တော်လှန်ရေးအင်အားစုတွေက အကူအညီပေးခဲ့တယ်လို့ သိရပါတယ်။

ဖလမ်းမြို့နယ်တိုက်ပွဲမှာ ကျဆုံးခဲ့သူတွေအတွက် လေးစားဂါရဝပြုကြောင်း ဒေသခံ ချင်းအမျိုးသား ကာကွယ်ရေးတပ် (CNDF) က ထုတ်ပြန်လိုက်ပါတယ်။

ချင်းပြည်နယ်၊ ဖလမ်းမြို့နယ်မှာ ဇွန်လ ၂၉ ရက်နေ့ မနက် ၇ နာရီခွဲလောက်က စတင်ကာ CNDF နဲ့ စစ်ကောင်စီအကြမ်းဖက်တပ်တို့ကြား အချိန်နှစ်နာရီခန့်အကြာ တိုက်ပွဲတခု ဖြစ်ပွားခဲ့ပါတယ်။ 

အဆိုပါတိုက်ပွဲအတွင်း စစ်ကောင်စီအကြမ်းဖက်တပ်ဘက်က အနည်းဆုံး ၂၀ လောက် သေဆုံးခဲ့ပြီး ဒေသခံ CNDF ဘက်ကတော့ ၅ ဦးကျဆုံးခဲ့တာပါ။ 

ကျဆုံးသူတွေက ဆလိုင်းနိုင်အောင် (၂၂ နှစ်)၊ ဆလိုင်းကျော်ဆန်းဝင်း (၂၃ နှစ်)၊ ဆလိုင်းတီလ်ဟုပ် (၄၁ နှစ်)၊ ဆလိုင်းဗန်ဘွဲ့ (၂၂ နှစ်) နဲ့ ဆလိုင်းထောင်းဇဲလ် (၂၂ နှစ်) တို့ဖြစ်ပါတယ်။ 

မိမိလူမျိုးနဲ့ တိုင်းပြည်အတွက် အသက်စွန့်သွားတဲ့ CNDF တပ်ဖွဲ့ဝင်တွေကို လေးစားဂါရဝပြုကြောင်းနှင့် မိသားစုနဲ့ထပ်တူဝမ်းနည်းကြောင်း ဒီကနေ့ ရက်စွဲနဲ့ CNO လူမှုကွန်ရက်စာမျက်နှာက ကြေညာထုတ်ပြန်လိုက်ပါတယ်။ 

ချင်းပြည်နယ်အတွင်း Chin National Army, Chinland Defense Force-CDF, Chin National Defence Force-CNDF နဲ့ Zomi Federal Union-ZFU တို့က စစ်အာဏာရှင်ကို အတူတကွ လက်တွဲကာ တိုက်ထုတ်နေကြတာဖြစ်ပါတယ်။