ချင်းပြည်နယ် ဖလမ်းမြို့နယ်မှာ ဧပြီလ ၁၀ ရက်နေ့ မနက်ပိုင်းမှာ စစ်ကောင်စီတပ်စခန်း ၁ခု သိမ်းပိုက်ခံရပြီးနောက် လေကြောင်းတိုက်ခိုက်မှုတွေပြုလုပ်ခဲ့တယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

ဖလမ်းမြို့နယ်က စစ်ကောင်စီရဲ့ ဗာရ်းစခန်းကို ဧပြီ ၁၀ ရက် မနက် ၅ နာရီလောက်ကနေ စတင်တိုက်ခိုက်ခဲ့ပြီး အချိန် ၁ နာရီခွဲလောက်အကြာမှာ စခန်းတခုလုံးကို သိမ်းပိုက်မီးရှို့ဖျက်ဆီးနိုင်ခဲ့တယ်လို့ ချင်းအမျိုးသားအဖွဲ့ချုပ် CNDF/CNO ရဲ့ ပြောရေးဆိုခွင့်ရှိသူ ကိုကျူံးငိုင်းက ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ၁၆ ယောက်လောက်သေဆုံးပြီး ၁၁ ယောက်လောက်ကို အရှင်ဖမ်းမိထားကာ စခန်းမှာရှိတဲ့ လက်နက် ၁၉ လက်လောက်နဲ့ ခဲယမ်းတွေကို သိမ်းဆည်းနိုင်ခဲ့တယ်လို့ ဆိုပါတယ်။

“စခန်းသိမ်းပြီး နာရီဝက်လောက်အကြာမှာ ဂျက်ဖိုက်တာ ၁ စီးနဲ့ ၃ ကြိမ်လာတယ်။ ဗုံး ၆ ကြိမ်ချသွားတယ်။ ကျနော်တို့ဘက်က ရဲဘော်တယောက်ကတော့ လက်ပစ်ဗုံးဖြုတ်လိုက်တဲ့အချိန်မှာ ကိုယ့်ကိုယ်ကိုယ် မတော်တဆဖြစ်ပြီးတော့ ကျဆုံးခဲ့တယ်” လို့ ကိုကျူံးငိုင်းက ပြောပါတယ်။

ဒါ့အပြင် တိုက်ပွဲနဲ့ သက်ဆိုင်ခြင်းမရှိတဲ့ ဝေဘူလမြို့ကို မနက် ၁၁ နာရီလောက်က အကြောင်းမဲ့လေကြောင်းတိုက်ခိုက်ခဲ့တာကြောင့် ပြည်သူ ၉ ယောက်သေဆုံးကာ ၅ ယောက်လောက် ဒဏ်ရာရရှိခဲ့တယ်လို့ ဆိုပါတယ်။

မကွေးတိုင်း မင်းတုန်းမြို့နယ်မှာလည်း ဧပြီ ၁၀ ရက်နေ့ မနက်ပိုင်းက ကျောက်တိုင်ရဲစခန်း အနီးကပ်တိုက်ခိုက်ခံရပြီး ၂ ယောက်သေဆုံးကာ ၄ ယောက် အပြင်းထန် ဒဏ်ရာရရှိခဲ့တယ်လို့ Eagle Force ရဲ့ ပြန်ကြားရေးတာဝန်ခံ ကိုမြတ်က ပြောပါတယ်။ 

“ကျောက်တိုင်ရဲစခန်းမှာက စခ၊ ရခ ပူးပေါင်း ၁၅ ယောက်လောက်ရှိမယ်။ အဲဒါကို သရက်ခရိုင်တပ်ရင်း (၄) Eagle Force၊ ကျောင်းသားလက်ရုံးတပ်တော် SAF၊ လွတ်မြောက်ရေးတပ်တော် W.O.L.F တို့ ပူးပေါင်းပြီး အနီးကပ် ချည်းကပ်ပြီး ကျနော်တို့ဘက်က စတင် ပစ်ခတ်ခဲ့တာ။ သူတို့ဘက်ကလည်း ပြန်လည်ပစ်ခတ်တာတွေရှိပြီး လမ်းတဖက်ကနေ ပစ်ခတ်ရတာဆိုတော့ ခရီးသွားပြည်သူတွေရဲ့ ကားတချို့က တိုက်ပွဲ နားကပ်လာလို့ ပစ်ခတ်တဲ့ အရှိန်လျော့သွားပြီး သတ်မှတ်တဲ့အချိန်လွန်သွားပြီး ကျည်ဆန်လည်းမလုံလောက်တော့လို့ ပြန်လည်ဆုတ်ခွာခဲ့ကြတယ်။” 

စခန်းကို ဝင်ရောက်သိမ်းပိုက်ဖို့ သွားရောက်တိုက်ခိုက်ခဲ့တာဖြစ်ပြီး မသိမ်းပိုက်နိုင်ခဲ့ဘဲ မင်းတုန်းဇာတိ ရဲတပ်သားဇင်ဘိုကို အပါဝင် ၂ ယောက်သေဆုံး၊ ၄ ယောက် ဒဏ်ရာရရှိကာ မကွေးဆေးရုံကို သယ်သွားတယ် သတင်းကြားတယ်လို့ ပြောပါတယ်။

မကွေးတိုင်း မြိုင်မြို့နယ်မှာ ဧပြီ ၈ ရက်နေ့ ညနေက စစ်ကောင်စီစစ်ကြောင်း ဒရုန်းနဲ့ဗုံးကြဲတိုက်ခိုက်ခံရပြီး  ၆ ယောက်ထက်မနည်း အပြင်းထန် ဒဏ်ရာရရှိခဲ့တယ်လို့ မြိုင်မြို့နယ် ပကဖ ကနေ သိရပါတယ်။

မြိုင်မြို့နယ် ညောင်ရွာကျေးရွာမှာ စစ်ကောင်စီရဲ့ အင်အား ၈၀ လောက်ပါတဲ့ ဘီလူးစစ်ကြောင်းကို ဧပြီ ၈ ရက် ညနေ ၅ နာရီ ၅၃ မိနစ်မှာ ဒရုန်းနဲ့ အီနာဂါဗုံးသီး ၂၈ လုံး ဖြုတ်ချတိုက်ခိုက်ခဲ့တာလို့ မြိုင်ပကဖ တပ်ရင်း ၁ တပ်ရင်းမှူး ဗိုလ်လက်ယာက ဒီဗွီဘီကို ပြောပါတယ်။

စစ်ကြောင်းကတော့ ပုလဲမြို့နယ် ပန်းရွာကို Mi35 တိုက်ခိုက်ရေးရဟတ်ယာဥ်နဲ့ ပစ်ခတ်ပြီး ထောက်ပို့ ရဟတ်ယဥ် ၂ စီးနဲ့ လာချသွားတဲ့ စစ်ကြောင်းဖြစ်ပြီး ဘီးလူးစစ်ကြောင်းလို့ အမည်ပေးထားတယ်လို့ ဆိုပါတယ်။

အဲဒီတိုက်ခိုက်မှုကို မြိုင်ပကဖ တပ်ရင်း ၁၊ ၂၊ သူရိန်တပ်ဖွဲ့နဲ့ Black Cobra တပ်ဖွဲ့တို့ ပူးပေါင်းတိုက်ခိုက်ခဲ့တာဖြစ်ပြီး စစ်ကောင်စီဘက်က ၆ ယောက်အပြင်းထန် ဒဏ်ရာရရှိကာ ပြည်သူ့ကာကွယ်ရေးတပ်က ရဲဘော်တွေ ထိခိုက်မှုမရှိခဲ့ဘူးလို့ ဗိုလ်လက်ယာက ပြောပါတယ်။

အဲဒီစစ်ကြောင်းဟာ မြိုင်မြို့နယ် အိုင်းမကျေးရွာကိုလည်း ဧပြီ ၈ ရက် မနက်မှာ  မီးရှို့ဖျက်ဆီးခဲ့တာကြောင့် နေအိမ် ၁၈ လုံး မီးလောင်ကျွမ်းခဲ့တယ်လို့ ဒေသခံတွေက ပြောပါတယ်။

တိုက်ခိုက်မှုအတွင်း စစ်ကောင်စီဘက်က ထိခိုက်သေဆုံးတဲ့အခြေနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

ချင်းပြည်နယ်၊ မကွေးတိုင်းနဲ့ စစ်ကိုင်းတိုင်းတွေမှာ စစ်ကောင်စီရဲ့ မြေပြင်စစ်ကြောင်းတွေကို ပြည်သူ့ကာကွယ်ရေးတပ်ဖွဲ့တွေက တိုက်ခိုက်လို့ အထိနာနေတာကြောင့် စစ်ကောင်စီဘက်က လေကြောင်းတိုက်ခိုက်တာတွေ ဆက်တိုက်ပြုလုပ်လာနေတယ်လို့ တော်လှန်ရေးတပ်ဖွဲ့တွေဆီကနေ သိရပါတယ်။

ချင်းပြည်နယ် ဖလမ်းမြို့နယ်မှာ မတ် ၁၂ ရက်နေ့ကနေ ၁၉ ရက်နေ့အထိ စစ်ကောင်စီစစ်ကြောင်း တိုက်ခိုက်ခံရပြီး သေဆုံးဒဏ်ရာရရှိသူ များပြားကာ လက်နက်ခဲယမ်းတွေ သိမ်းဆည်းရရှိခဲ့တယ်လို့ ချင်းအမျိုးသားအဖွဲ့ချုပ် (CNO) က မတ် ၂၁ ရက်မှာ ထုတ်ပြန်ပါတယ်။

ကလေးမြို့နယ်ကနေ ချင်းပြည်နယ် ဖလမ်းမြို့နယ်ကို တက်လာတဲ့ စစ်ကောင်စီစစ်ကြောင်းကို မတ် ၁၂ ရက်နေ့က ဗာလုံကျေးရွာအကျော်မှာ တိုက်မိုင်းနဲ့ တိုက်ခိုက်ခဲ့ရာ စစ်ကောင်စီတပ်သား ၁ ယောက်သေဆုံးပြီး အများအပြား ဒဏ်ရာရရှိခဲ့တယ်လို့ CNO ရဲ့ ပြန်ကြားရေးတာဝန်ခံက ပြောပါတယ်။

အဲဒီစစ်ကြောင်းကို မတ် ၁၄ ရက်နေ့မနက်ကလည်း ဇောင်လေးကျေးရွာအလွန်မှာ ၂ ကြိမ် မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၄ ယောက်လွင့်ထွက်သွားပြီး ၁၂ ဘီကား ၁ စီးလည်း သုံးမရအောင်ပျက်စီးသွားလို့ လမ်းမှာချန်ထားခဲ့ကြတယ်လို့ ဆိုပါတယ်။

ဇောင်လေးကျေးရွာနဲ့ ထင်ရှူးစခန်းကြားမှာလည်း မတ် ၁၄ ရက် ညနေ ၅ နာရီလောက်က ကြားဖြတ်တိုက်ခိုက်ခဲ့ရာ ၄၅ မိနစ်လောက်ထိတွေ့တိုက်ပွဲ ဖြစ်ပွားခဲ့ပြီး စစ်ကောင်စီဘက်က ၈ ယောက်သေဆုံးကာ အများအပြား ဒဏ်ရာရရှိခဲ့တယ်လို့ ပြောပါတယ်။

ပါရ်သဲကျေးရွာနားမှာလည်း မတ် ၁၇ ရက်နေ့ ညနေ ၄ နာရီ ၄၅ မိနစ်လောက်က စစ်ကောင်စီစစ်ကြောင်းကို ချုံခိုတိုက်ခိုက်ခဲ့သလို ည ၇ နာရီလောက်မှာလည်း ထပ်မံတိုက်ခိုက်ခဲ့တာကြောင့် စစ်ကောင်စီတပ်သား ၃ ယောက်သေဆုံးကာ အများအပြား ဒဏ်ရာရရှိခဲ့တယ်လို့ ဆိုပါတယ်။

ပါရ်သဲ ကျေးရွာအကျော်မှာ မတ် ၁၈ ရက်နေ့ မွန်းလွဲ ၁ နာရီ ၄၀ မိနစ်လောက်ကနေ ညနေ ၄ နာရီခွဲအထိ ၃ ကြိမ်ဖြတ်တောက်တိုက်ခိုက်ခဲ့လို့ စစ်ကောင်စီဘက်က ၅ ယောက်သေဆုံးကာ အများအပြား ဒဏ်ရာရရှိခဲ့တယ်လို့ ပြောပါတယ်။

အဲဒီစစ်ကြောင်းကို ကြောင်ဟဲနဲ့ စီဇာမွာလ်ကျေးရွာကြားမှာလည်း မတ် ၁၉ ရက်နေ့က ပဒေသာရှေ့ထွက်မိုင်း ၇ လုံးအပြင် လက်နက်ငယ်တွေနဲ့ ပစ်ခတ်တိုက်ခိုက်ခဲ့လို့ စစ်ကောင်စီဘက်က ထိခိုက်သေဆုံးသူရှိနိုင်ပေမယ့် အတိကျမသိရသေးဘူးလို့ ဆိုပါတယ်။

အဲဒီတိုက်ပွဲတွေအတွင်းကနေ စစ်ကောင်စီစစ်ကြောင်းဆီက ကျည်ဆန် ၁၇၀ တောင့်၊ လက်ပစ်ဗုံး၊ နင်းမိုင်နဲ့ အီနာဂါဗုံးသီးတွေ သိမ်းဆည်းရရှိခဲ့တယ်လို့ ပြောပါတယ်။

အဲဒီတိုက်ခိုက်မှုတွေကို ချင်းအမျိုးသားတပ်ဦး (CNA) နဲ့ CDF Hualngorm တို့နဲ့အတူ ပူးပေါင်းတိုက်ခိုက်ခဲ့တာဖြစ်ပြီး ပြည်သူ့ကာကွယ်ရေးတပ်ဖွဲ့ ရဲဘော်တွေ ထိခိုက်မှုမရှိခဲ့ဘူးလို့ ဆိုပါတယ်။

အဲဒီစစ်ကြောင်းဟာ ကလေး-ဖလမ်းလမ်းမကြီးတလျှောက်က ကျေးရွာတွေကို ဝင်ရောက်မွှေနှောက်ပြီး အဖိုးတန်ပစ္စည်းတွေနဲ့ ငွေကြေးတွေကို ခိုးယူကာ အိမ်မွေးတိရစ္ဆာန်တွေကိုလည်း စိတ်ကြိုက် သတ်ဖြတ်စားသောက်ခဲ့ကြတယ်လို့ ပြောပါတယ်။

ဖလမ်း-ဟားခါးလမ်းမကြီးမှာလည်း မတ် ၂၁ ရက်နေ့ကစပြီး တိုက်ပွဲတွေ ထပ်မံဖြစ်ပွားလာနိုင်တာကြောင့် ပြည်သူတွေအနေနဲ့ အဲဒီလမ်းပိုင်းကို လုံးဝအသုံးမပြုကြဖို့ သတိပေး တားမြစ်ထားပါတယ်။

ချင်းပြည်နယ် မတူပီမြို့နယ်မှာလည်း မတ် ၂၀ ရက်နဲ့ ၂၁ ရက်နေ့တွေမှာ ရိက္ခာတွေလာပို့တဲ့ စစ်ကောင်စီစစ်ကြောင်း တိုက်ခိုက်ခံရပြီး ၁၂ ယောက်သေဆုံးကာ အများအပြား ဒဏ်ရာရရှိခဲ့တယ်လို့ CDF-မတူပီကနေ သိရပါတယ်။

မတူပီ-ပလက်ဝလမ်းပေါ်က ထယ်ဘွေးစခန်းကို စားနပ်ရိက္ခာလာဖြည့်တဲ့ စစ်ကောင်စီ ခလရ ၃၀၄ တပ်ရင်းက ကား ၃ စီးနဲ့ အင်အား ၈၀ လောက်ပါတဲ့ စစ်ကောင်စီစစ်ကြောင်းကို မတူပီ-ပလက်ဝလမ်း ၆ မိုင်မှာ မတ် ၂၀ ရက် မနက် ၁၀ နာရီလောက် စောင့်ကြို တိုက်ခိုက်ခဲ့တယ်လို့ CDF-မတူပီရဲ့ ပြန်ကြားရေးတာဝန်ခံ ဆလိုင်းချင်းက ဒီဗွီဘီကို ပြောပါတယ်။

ဒါ့အပြင် အဲဒီစစ်ကြောင်းကို မွန်းလွဲ ၁ နာရီလောက်က ၇ မိုင်နဲ့ ၈ မိုင်ကြားမှာ ၁ ကြိမ်တိုက်ခိုက်ခဲ့ ပြီး မတ် ၂၁ ရက် မနက် ၉ နာရီခွဲလောက်ကလည်း ၉ မိုင်နဲ့ တွီရှစ်ရွာအဝင်မှာ တိုက်ခိုက်ခဲ့တာလို့ ဆိုပါတယ်။

အဲဒီတိုက်ခိုက်မှုတွေအတွင်းမှာ စစ်ကောင်စီဘက်က ၁၂ ယောက် သေဆုံးခဲ့ကာ CDF-မတူပီက ရဲဘော်တွေ ထိခိုက်မှုမရှိခဲ့ဘူးလို့ ဆလိုင်းချင်းက ပြောပါတယ်။

မတူပီ-ဟားခါးလမ်းပေါ်မှာ အထိုင်ချတပ်စွဲထားတဲ့ စစ်ကောင်စီရဲ့ ဗျူဟာတပ်စခန်းက လက်နက်ကြီးတွေနဲ့ ရမ်းကားပစ်ခတ်တာကြောင့် မတူပီ-ပလက်ဝ လမ်းပေါ်က ဝလီပီကျေးရွာကို ကျရောက်ပေါက်ကွဲခဲ့တယ်လို့ ဆိုပါတယ်။

မတူပီမြို့နယ်မှာ မတ် ၁၄ ရက်နေ့ ညနေပိုင်းကလည်း စစ်ကောင်စီစစ်ကြောင်းတိုက်ခိုက်ခံရပြီး ၁၀ ယောက်သေဆုံးကာ အများအပြား ဒဏ်ရာရရှိခဲ့တယ်လို့ CDF-မတူပီကနေ သိရပါတယ်။

တိုက်ခိုက်မှုဖြစ်စဉ်တွေမှာ စစ်ကောင်စီဘက်က ထိခိုက်သေဆုံးတဲ့အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။