အမေရိကန်ပြည်ထောင်စု၊ ဖလော်ရီဒါပြည်နယ်၊ အော်လန်ဒိုမြို့အနီးက လူသတ်မှုဖြစ်တဲ့နေရာမှာ သတင်းယူနေတဲ့ ရုပ်မြင်သံကြားသတင်းထောက်နှစ်ယောက်ကို သေနတ်သမားတဦးက ပစ်ခတ်ခဲ့လို့ တဦးသေဆုံးပြီး တခြားတဦး ဒဏ်ရာရရှိခဲ့ကြောင်း အာဏာပိုင်တွေက ဖေဖော်ဝါရီ ၂၂ ရက်မှာ ပြောပါတယ်။

ပစ်ခတ်မှုအပြီး မကြာခင်မှာပဲ ကေ့သ်မဲလ်ဗင်မော့ဆက်စ်လို့ အမည်ရတဲ့ အသက် ၁၉ နှစ်အရွယ် သံသယရှိသူကို ဖမ်းဆီးခဲ့ပါတယ်။

မော့ဆက်စ်ကို အသက် ၉ နှစ်အရွယ် မိန်းကလေးတဦးနဲ့ သေဆုံးသွားတဲ့ အသက် ၂၀ နှစ်အရွယ် အမျိုးသမီးတဦးတို့ကို ပစ်ခတ်ခဲ့မှုတွေနဲ့ စွပ်စွဲထားကြောင်း အောရိန့်ချ်ကောင်တီ ရဲအရာရှိ ဂျွန်မီနာက သတင်းစာရှင်းလင်းပွဲမှာ ပြောပါတယ်။

အော်လန်ဒိုမြို့ ဆင်ခြေဖုံးရှိ ပိုင်းဟေးလ်စ်မှာ ပစ်သတ်ခံရတဲ့ သတင်းထောက် နှစ်ဦးဟာ ဖလော်ရီဒါပြည်နယ်အလယ်ပိုင်း ကေဘယ်လ်တီဗွီ Spectrum News 13 အတွက် သတင်းယူနေတဲ့ သတင်းထောက်တဦးနဲ့ ဓာတ်ပုံဆရာတဦးတို့ဖြစ်‌ကြောင်း မီနာက ပြောပါတယ်။

မော့ဆက်စ်ကို ဂျာနယ်လစ်တွေ တိုက်ခိုက်ခံရမှုအတွက်ရော တချိန်တည်းမှာပဲ အနီးနားရှိ နေအိမ်ထဲက ၉ နှစ်အရွယ် မိန်းကလေးငယ်ကို သေနတ်နဲ့ ပစ်ခတ်ခဲ့တာ၊ သူ့မိခင်ကို ဒဏ်ရာရစေခဲ့တာတွေအတွက်လည်း စွဲချက်တင်ထားကြောင်း ရဲအရာရှိ ဂျွန်မီနာက ပြောပါတယ်။

နှစ်ရှည်ဖမ်းဆီးခံခဲ့ရဖူးတဲ့  သံသယရှိသူဟာ အစောပိုင်း နာရီပိုင်းလောက်က ကားတစီးထဲမှာ အသက် ၂၀ အရွယ် အမျိုးသမီးကို ပစ်သတ်ခဲ့မှုနဲ့ စွဲချက်တင်ထားပြီးကြောင်း မီနာက ပြောပါတယ်။

ပစ်ခတ်မှုတိုင်းအတွက် အကြောင်းရင်းကိုမသိရသေးပေမဲ့ မော့ဆက်စ်ဟာ ပထမဆုံး ပစ်ခတ်ခံရသူနဲ့ ရင်းနှီးကျွမ်းဝင်သူတဦး ဖြစ်မယ်လို့ ယူဆရကြောင်း မီနာက ဆိုပါတယ်။

သတင်းသမားနှစ်ဦးကတော့ သတင်းထောက်တွေဖြစ်နေလို့ ပစ်မှတ်ထားခံတာဟုတ်မဟုတ်နဲ့ သေနတ်သမားဟာ အမျိုးသမီးနဲ့ သူ့ရဲ့ ၉ နှစ်အရွယ် သမီးငယ်တို့ရဲ့ နေအိမ်ထဲကို ဘာကြောင့် ဝင်ရောက်ခဲ့သလဲ ဆိုတာတွေကို မသိရသေးဘူးလို့ ရဲအရာရှိ ဂျွန်မီနာက ပြောပါတယ်။

အမေရိကန်ပြည်ထောင်စု၊ ဖလော်ရီဒါပြည်နယ်မှ အကျဉ်းသားဟောင်းတွေကို တရားမဝင်မဲပေးမှုနဲ့ ဖမ်းဆီးလိုက်တဲ့  ရုပ်သံဗွီဒီယိုကို  Tampa Bay Times  သတင်းဌာနက ထုတ်ပြန်ခဲ့ပါတယ်။ 

ဒီဗီဒီယိုတွေကို သြဂုတ် ၁၈ ရက်က ရဲအရာရှိတွေရဲ့ ခန္ဓာကိုယ်မှာ တပ်ဆင်ထားတဲ့ ဘော်ဒီကင်မရာကနေ ရိုက်ကူးထားတာပါ။ 

၂၀၂၀ ရွေးကောက်ပွဲမှာ တရားမဝင် မဲပေးမှုနဲ့ လူ အယောက် ၂၀  ဖမ်းဆီးခံရကြောင်း ပြည်နယ်အုပ်ချုပ်ရေးမှူး ဒီဆန်းတပ်စ်က  သတင်းစာရှင်းလင်းပွဲမှာ ကြေညာခဲ့ပါတယ်။

ဖမ်းဆီးခံရသူအားလုံးဟာ လူသတ်မှု သို့မဟုတ် လိင်မှုဆိုင်ရာ ရာဇ၀တ်မှုတွေနဲ့ ပြစ်ဒဏ် ချမှတ်ခံထားရသူတွေဖြစ်တယ်လို့ အုပ်ချုပ်ရေးမှူးက ပြောပါတယ်။ 

သူတို့မှာ မဲပေးပိုင်ခွင့် မရှိလို့ သူတို့လုပ်ရပ်အတွက် တန်ကြေးပြန်ပေးရမှာဖြစ်တယ်လို့  ဒီဆန်းတပ်စ် က ပြောပါတယ်။ 

အခုဖမ်းဆီးမှုဟာ ၂၀၂၄ ခုနှစ်မှာ သမ္မတလောင်းပြိုင်ဘက်အဖြစ် ရှုမြင်ခံထားရတဲ့ ရီပတ်ဘလစ်ကန် အုပ်ချုပ်ရေးမှူး ဒီဆန်းတပ်စ်ရဲ့ တိုက်တွန်းချက်နဲ့ အခုနှစ်အစောပိုင်းမှာ တည်ထောင်ခဲ့တဲ့ ရွေးကောက်ပွဲ ရာဇ၀တ်မှုတွေနဲ့ လုံခြုံရေးဌာနရဲ့ ပထမဆုံး ဖမ်းဆီးအရေးယူမှုဖြစ်ပါတယ်။

ဒီကိစ္စ ရွေးကောက်ပွဲ ရဲတပ်ဖွဲ့ရုံးကို မှတ်ချက်ပေးဖို့ တောင်းဆိုထားပေမဲ့ ချက်ချင်း မတုံ့ပြန်ခဲ့ပါဘူး။

ဒီဌာန ပေါ်ပေါက်လာတာဟာ ၂၀၂၀ ရွေးကောက်ပွဲဟာ လိမ်လည်လှည့်ဖြားမှုတွေ ရှိနေတယ် ဆိုတဲ့ သမ္မတဟောင်း ဒေါ်နယ်ထရမ့်ရဲ့ အခြေအမြစ် မရှိတဲ့ ပြောဆိုမှုတွေကြောင့် ပိုပြီးတင်းကျပ်တဲ့ မဲပေးခြင်းဆိုင်ရာဥပဒေတွေအတွက် နိုင်ငံတဝန်းရှိ ရီပတ်ဘလီကန်တွေက ကျယ်ကျယ်ပြန့်ပြန့် တွန်းအားပေးမှု တစ်စိတ်တစ်ပိုင်းလည်း ဖြစ်ပါတယ်။ 

ဒီစုံစမ်းစစ်ဆေးမှုတွေဟာ မဲဆန္ဒရှင်တွေ အထူးသဖြင့် အသားအရောင်ရှိသူတွေကို ခြိမ်းခြောက်နိုင်တယ်လို့ ဒီမိုကရက်တွေနဲ့ အရပ်ဘက် အခွင့်အရေး လှုပ်ရှားတဲ့အဖွဲ့တွေက ပြောပါတယ်။ 

တချို့အမှုတွေမှာတော့ တရားခံတွေက သူတို့ဟာ မဲပေးလို့မရဘူး ဆိုတာကို ဒေသဆိုင်ရာ တာဝန်ရှိသူတွေက သူတို့ဆီ အကြောင်းကြားခြင်းမရှိဘူးလို့ ဆိုပါတယ်။