ပါကစ္စတန်နိုင်ငံ ဆင်းဒ်ဟ်ပြည်နယ်က ဆားဝှမ်မြို့မှာ စက်တင်ဘာ ၁၂ ရက်က တိုက်ခတ်ခဲ့တဲ့ ဖုန်မုန်တိုင်းဟာ လတ်တလော ရေကြီးမှုကြောင့် အိုးမဲ့အိမ်မဲ့ဖြစ်ခဲ့ရသူတွေ လမ်းဘေးမှာ စခန်းချနေတဲ့ ရွက်ဖျင်တဲ ရာချီကို လွင့်စဉ်သွားစေခဲ့ပါတယ်။

ဆင်းဒ်ဟ်ပြည်နယ်မှာ မိုးပိုလာမယ်လို့ မျှော်လင့်ရပြီး ရွက်ဖျင်တဲတွေမှာ နေကြတဲ့ စစ်ဘေးရှောင်တွေအတွက် ခြိမ်းခြောက်မှုအသစ်တစ်ခု ဖြစ်လာနိုင်တယ်လို့ ပါကစ္စတန် မိုးလေဝသဌာနက တနင်္လာနေ့မှာ ပြောခဲ့ပါတယ်။

လေပြင်းတိုက်ခတ်လို့ ရွက်ဖျင်တဲတွေ ပြုတ်ကျပြီး တိမ်ကင်းစင်တဲ့ ကောင်းကင်အောက်မှာ ထိုင်နေကြတယ်လို့ မုန်တိုင်းဒဏ်ခံခဲ့ရသူတွေထဲက တစ်ဦးက ရိုက်တာသတင်းဌာနကို ပြောပါတယ်။ 

တနိုင်ငံလုံးမှာ မိုးရေချိန် ၁၅.၄ လက်မ၊ ဒါမှမဟုတ် ဇူလိုင်နဲ့ သြဂုတ်လတွေမှာ နှစ် ၃၀ ပျမ်းမျှမိုးရေချိန်ထက် ၁၉၀ ရာခိုင်နှုန်းနီးပါး မိုးရွာခဲ့ပြီး ဆင်းဒ်ဟ်ပြည်နယ်ကတော့ ပျမ်းမျှထက် ၄၆၆ ရာခိုင်နှုန်း မိုးပိုရွာခဲ့တာပါ။

ပါကစ္စတန်နိုင်ငံမြောက်ပိုင်းက တောင်ထူထပ်တဲ့ဒေသမှာ မုတ်သုံမိုးရွာပြီး ရေခဲတောင်တွေ အရည်ပျော်ခဲ့လို့ လူ ၃၃ သန်းလောက် ရေလွှမ်းမိုးခံခဲ့ရပြီး လူ ၁၄၀၀ နီးပါး သေဆုံးခဲ့ပါတယ်။

နေအိမ်တွေ၊ ကားလမ်းတွေ၊ ရထားလမ်းတွေ၊ တိရစ္ဆာန်တွေနဲ့ ကောက်ပဲသီးနှံတွေ ပျက်စီးဆုံးရှုံးမှု တန်ဖိုး ခန့်မှန်းခြေ အမေရိကန်ဒေါ်လာ ၃၀ ဘီလီယံလောက် ဆုံးရှုံးခဲ့ပါတယ်။

ပါကစ္စတန်နိုင်ငံရဲ့ ပြန်လည်တည်ဆောက်ရေးဆိုင်ရာ လိုအပ်ချက်တွေကို အကဲဖြတ်ဖို့ ကုလသမဂ္ဂအေဂျင်စီတွေက စတင် ဆောင်ရွက်နေပါပြီ။