မန္တလေးမြို့ ချမ်းမြသာစည်မြို့နယ် ဦးပွါးခုံးကျော် အနောက်ဘက်အဆင်းရှိ တပတ်ရစ်ဖုန်းအဟောင်းအရောင်းဆိုင်တဆိုင်မှာ အောက်တိုဘာ ၂၅ ရက် နေ့ခင်းပိုင်းက ဓားပြတိုက်ခံခဲ့ရပါတယ်။
အမည်မသိ လူ ၉ ယောက်လောက် တုတ်၊ ဓား လက်နက်တွေနဲ့ ရောက်လာပြီး ငွေကျပ်သိန်း ၇၀၀ တန်ဖိုးရှိ ဖုန်း အလုံး ၁၀၀ ကျော်ကို ယူဆောင်သွားတယ်လို့ သိရပါတယ်။
“မိုးရွာတုန်းဖြစ်သွားတာ အကုန် ဓားတွေရောပါတယ်။ ဆိုင်က ကလေးတယောက် မျက်နှာ လက်သီးနဲ့ တချက်အထိုးခံလိုက်ရတယ်။ မိုးရွာနေတော့ ဘာမှမမြင်လိုက်ရဘူး” လို့ ဓားပြတိုက်ခံခဲ့ရတဲ့ ဆိုင်ပိုင်ရှင်က လူမှုကွန်ရက်မှာ ရေးသားထားပါတယ်။
ဒါ့အပြင် ၆၉ လမ်း ၃၈ လမ်းနဲ့ ၃၉ လမ်းက ဖုန်းဆိုင်တခုမှာလည်း သေနတ်အတုနဲ့ ဓားပြလာတိုက်ရာ ပတ်ဝန်းကျင်က သေနတ်အတုမှန်း သိရှိပြီး ဝိုင်းဝန်းဖမ်းဆီးခဲ့တဲ့ ဖြစ်စဉ်တခုဖြစ်ခဲ့ပါတယ်။
ကချင်ပြည်နယ်၊ မြစ်ကြီးနားမြို့၊ မြို့သစ်ရပ်ကွက်မှာရှိတဲ့ ဖုန်းအရောင်းဆိုင်တဆိုင်ကနေ ကာလတန်ဖိုး စုစုပေါင်း ကျပ် သိန်း ၃၀၀ လောက်တန်ဖိုးရှိတဲ့ ဖုန်း ၁၈ လုံးလောက် သေနတ်ထောက် ဓားပြတိုက်ခံခဲ့ရတယ်လို့ ဆိုင်ပိုင်ရှင်ထံက သိရပါတယ်။
မေ ၂၇ ရက် မနက် ၉ နာရီကျော်က iPhone အမျိုးအစားတွေ ရောင်းတဲ့ “ i Center” မိုဘိုင်းဖုန်းအရောင်းဆိုင်မှာ ဆိုင်ကယ်ဦးထုပ်ဆောင်းထားတဲ့ အမျိုးသား နှစ်ယောက်က ဆိုင်ကယ်နဲ့ရောက်လာပြီး ပိုင်ရှင်အပြင်သွားနေချိန် ဆိုင်ဝန်ထမ်းဆီက ဓားပြတိုက်ခဲ့တာလို့ ဆိုင်ရှင်က ပြောပါတယ်။
“လူ နှစ်ယောက် ကျနော်နာမည် မေးပြီး လာကြတာ။ ဆိုင်က ကောင်လေးက ကျနော်အသိလို့ ထင်ပြီး ဖုန်းတွေ ထုတ်ပြတယ်။ နောက်တော့ ကောင်လေးကို တိပ်တွေနဲ့ လက်ကို ပတ်ပြီး ဆိုင်နောက်မှာ ထားထားတယ်။ ပါလာတဲ့နောက်တယောက်က ကျောပိုးအိတ်ထဲ ဖုန်းတွေ အကုန်ထည့်ပြီး ယူသွားတာ။ သေနတ်ကတော့ ပစ္စည်တို အစစ်လို့ ယူဆရတာပဲ။ ဆိုင်က CCTV ကလည်း ပျက်နေတာ။ ဝန်ထမ်းတွေက ပုံမှန်ဆို ၃ ယောက်လောက်ရှိတာ။ အခု ရဲစခန်းမှာ တိုက်ချက်ဖွင့်ထားတယ်။”
မေ ၂၆ ရက်မနက်ကလည်း မြစ်ကြီးနားမြို့၊ စီတာပူရပ်ကွက်မှာ အမျိုးသား တယောက် ဆိုင်ကယ် လုယက်ခံရပြီး လည်ပင်း ဓားထိုးခံရကာ သေဆုံးသွားခဲ့ပြီး မတ် ၂၄ ရက်ကလည်း ရမ်ပူရပ်ကွက်မှာ သံတိုသံစလိုက်ဝယ်တဲ့ အမျိုးသမီး တယောက်ကို လုယက်ရာမှ ဓားနဲ့ထိုးခဲ့လို့ သေဆုံးခဲ့တယ်လို့ ရပ်ကွက်ဒေသခံတွေက ပြောပါတယ်။
