အဘစိမ်းမောင်တို့ အမြဲစိမ်းအုပ်စုနဲ့ စိမ်းသရဖူစိမ်းဆရာတော့်ကျောင်းမှာ ဆုံကြရပြန်ပါသဗျ။ မိုးမကျမီ ကျောင်းထဲက အမှိုက်သရိုက်တွေရှင်းတန်တာရှင်း၊ မီးရှို့တန်တာရှို့ ဘာညာပေါ့ ခင်ဗျာ။ တက်ညီလက်ညီပါ။

အရောင်စုံ အကြိုက်စုံလူတွေ ညီညာဖြဖြ လုပ်အားဒါနပြုနေကြတာမြင်ရတော့ အားရစရာ။ ဒီလူတွေအားလုံး ' ဓမ္မ ' ဘက်မှာ ရပ်တည်ကြရင်တော့ ရပ်ရွာအတွက်သာမက နိုင်ငံအတွက်ပါ အပေါင်းလက္ခဏာပေါ့ကွာလို့ အဘစောမူးသာက ခပ်ဆဆ ပြောပါတယ်။

ခုထက်ထိ စုံလုံးကန်းပြီး ' အစွန်းရောက် ' နေကြတဲ့အုပ်စုတွေ ' တရားတဲ့ဘက် ' ကိုရောက်ရှိလာရင်တော့ ' ပွဲ ' ဟာ မြန်မြန်ပြီးမှာပေါ့ဟာလို့လည်း အဘလုံးတုံးက ချိန်ချိန်ဆဆ ဝင်ပြောပါသဗျ။

တံမြက်စီးလှည်းတဲ့သူကလှည်း၊ ကျုံးတဲ့သူကကျုံးနဲ့ မခိုမကပ် တက်ညီလက်ညီလုပ်ကြရင်း လက်စသတ်ပြီးတဲ့အခါ အဘစောမူးသာနဲ့ အဘလုံးတုံးတို့ကတောင် ကျောင်းဝင်းထဲက စေတီလေးမှာ ဘုရားဝတ်ပြုရင်းနဲ့ တရားထိုင်နေကြပါတယ်။ ဖေကြီးလည်း အဘတွေနဲ့ မနီးမဝေးမှာထိုင်ရင်း စောင့်နေပါတယ်။

ခဏနေတော့ အဲသည်အနားကို စိမ်းသရဖူစိမ်းဆရာတော်နဲ့ စိမ်းဆိုမှစိမ်း ဒကာတော်တချို့ ရောက်လာကာ ဟိုအဘနှစ်ဦးကိုကြည့်ပြီး ပြုံးစိစိလုပ်နေကြပါတယ်။ ခဏအကြာမှာပဲ အဘစောမူးသာနဲ့ အဘလုံးတုံးတို့ တရားထိုင်နေတာ ပြီးဆုံးလို့ မျက်လုံးဖွင့်ကြတဲ့အခါ အစိမ်း အုပ်စုကို မြင်လိုက်ရပါတော့တယ်။

" အမယ် . . မူးသာနဲ့ လုံးတုံးတို့ . . 'တရား 'တွေဘာတွေ ထိုင်လို့ပါလားကွ . . ဟ ဟ "

" တင်ပါ့ဘုရား . . . အခုအချိန်မှာ အားကိုးစရာဆိုလို့ ' တရား ' ပဲ ရှိတာမို့ ' တရားပဲအား ထုတ်' နေခြင်းသာ အကောင်းဆုံးမဟုတ်လား"

" အိမ်း . . . အချိန်ပြည့် ' တရားအားထုတ်' နိုင်ရင်တော့ အကောင်းဆုံးပေါ့ကွာ "

"တင်ပါ့ဘုရား . . . တပည့်တော်တို့ကတော့ အချိန်ပြည့် ' တရားအားထုတ် ' နိုင်တဲ့လူတွေ မဟုတ်ပါဘူး။"

"အချိန်ပြည့်အားထုတ်နိုင်အောင် ကြိုးစားရမှာပေါ့ကွာ . . . "

" တင်ပါ့. . . အချိန်ပြည့် ' တရားအားထုတ်' ခဲ့တဲ့၊ ခုထက်ထိလည်း ' တရားအားထုတ် ' နေတဲ့ စစ်ခေါင်းဆောင်တွေကို ချီးကျူးပါတယ် ဘုရား "

" ဟေ . . . . . . "

ဖေကြီးတို့သုံးဦးသား ကြိတ်ပြုံးနေကြချိန်မှာ အစွန်းရောက်အစိမ်းအုပ်စုကား မျက်နှာတည်တည် ရုပ်တည်တည်နဲ့ မသိသလို ဟန်ဆောင်ကာမူပို လုပ်နေကြပါလေတော့၏။

(ခ)

ရေနွေးကြမ်းဝိုင်းမှာ ထိုင်ကြတော့ အဘစောမူးသာနဲ့ အဘလုံးတုံးတို့ကား ' တရားအားထုတ်ခြင်း ' ကိစ္စကို ဆက်ရန်ကြံနေကြပုံရပါ၏။ အစိမ်းအုပ်စုကလည်း ဖာထေးလို့ ' ချေပဖို့ ' ကြံစည်နေကြတဲ့ပုံပါလေ။

သို့ဖြင့် တရုတ် နိုင်ငံတော်ကောင်စီဝင် နိုင်ငံခြားရေးဝန်ကြီး ချင်ဂန်းဆိုသူ မြန်မာပြည်ကိုရောက်ရှိလာပြီး သမ္မတဟောင်း ဦးသိန်းစိန်နဲ့ တွေ့ပုံ၊ ဗိုလ်ချုပ်မှူးကြီးဟောင်း ဦးသန်းရွှေနဲ့ တွေ့ဆုံကြပုံတွေကို အဘစိမ်းမောင်တို့က မစားရဝခမန်း အားရပါးရ ပြောကြားလာပါ၏။

" ' မိတ်ဆွေပေါက်ဖော် ' ဆိုတဲ့အတိုင်း ငါ တို့နိုင်ငံကို အမြဲတမ်းကူညီနေခဲ့တာကွ "

" အင်း . . . . ဆက်ပါအုံး စိမ်းမောင်ရ "

အဘစောမူးသာက ထောက်ပေးတော့ အဘစိမ်းမောင်က ပို၍တက်ကြွသွားကာ ပို၍ ' အားပါ ' လာပါလေတော့၏။

" အခု ' နိုင်ငံရေးအကျပ်အတည်း ' ကို ကူညီဖို့ ဦးသန်းရွှေနဲ့ ဦးသိန်းစိန်တို့ကို တွေ့ပြီး ဂါရဝပြုကာ တိုက်တွန်းတာ ဖြစ်လိမ့်မယ် "

" ဟားဟား ဟားဟား ဟားဟား . . . . . "

" ဘာ ထရယ်တာလဲ မူးသာ . . . "

" သဘောကျလို့ပါ စိမ်းမောင်ရာ "

ပြီးတော့ အဘစောမူးသာက စကားဆက်ပါ၏။ ရပ်ရွာလူထုက ရွေးချယ်တင်မြှောက်ထားတဲ့သူကြီး၊ ရပ်ရွာကိုချစ်ပြီး ရပ်ရွာကချစ်တဲ့သူကြီး၊ ရပ်ရွာအကျိုးကို  အချိန်ပြည့်သယ်ပိုးထမ်း ရွက်နေတဲ့သူကြီးကို မတရားဖမ်းဆီးချုပ်နှောင်ထားပြီး  ' တရားမဝင်သူကြီး ' တက်လုပ်နေတဲ့ ကောင်ကို တစ်ရွာလုံးက တွန်းလှန်နေကြလို့' ထွက်ပေါက် ' ပိတ်နေပြီဖြစ်တဲ့အချိန်မှာ အဲသည် ' တရားမဝင်သူကြီး ' ရဲ့ ခေါင်းကိုင်ဖခင်ကြီးတွေလည်း ' နေစရာ ' မရှိတော့ပါကြောင်းတဲ့ ခင်ဗျ။

'မိမဆုံးမ၊ ဖမဆုံးမ၊ ဆရာမဆုံးမ' ကြင်စိုးသာ၀ မအလလက်ထက်မှာ အဲသည် တိုင်းပြည့်ဘဏ္ဍာတွေကို စိတ်ရှိတိုင်းခိုးဝှက်ကာ မျိုးရိုးစဉ်ဆက် ဆယ်သက်စားမကုန် 'သန်းကြွယ်သူဋ္ဌေး ' တွေလုပ်ပြီး ငြိမ့်နေကြတဲ့ 'အငြိမ်းစားအဘတွေ ' လည်း ' အိပ်မပျော်သောညများ ' ကို နေ့စဉ် ဖြတ်သန်းနေကြရပြီး 'လုံခြုံမှု ' လုံး၀ မရှိတော့ကြောင်း။

အဲဒါကြောင့် သူတို့လည်း နောက်ဆုံးကောက်ရိုးမျှင်အဖြစ် ' တရားအားထုတ် ' ခြင်းကို ဆ ထက်တိုးကာ ပြုလုပ်နေကြရပြီဖြစ်ကြောင်း၊ သူတို့ရဲ့ ' နောက်ဆုံးအချိန် ' ဟာလည်း အလွန့်အလွန်ကို နီးကပ်နေပြီဖြစ်ကြောင်း၊ စေတနာရှေ့ထားကာ အချက်အလက်နဲ့တကွ အသေအချာ ရှင်းပြနေပါလေ၏။

အစိမ်းအုပ်စုကား ရှုတည်တည် ကြောင်အမ်းအမ်း အတတ နှုတ်ဆိတ်နေကြပါလေ၏။ သူ တို့မှာလည်း ' အမှန်တရား ' ကို သိနေကြပုံရသော်ငြား ' မတရားမှု ' ကို မြင်နေကြပုံ ရသော်ငြား ' အစွန်းရောက်စိတ် ' မှာ နစ်ဝင်နေကြပုံရပြီး ခုထိတော့ ' ဘောမ ' နေကြဆဲဟု အဘလုံးတုံးက မျက်ဝန်းစကားနဲ့ လှမ်းပြီး  ဖေကြီးကို ပြောနေပါလေ၏။

" မအလကို ပြည်တွင်းမှာ လူနည်းစုက ဝိုင်းပြီး ' ဘောမ ' နေကြချိန်မှာ မအလကလည်း ပထွေးဖြစ်တဲ့ပေါက်ဖော်ကြီးကို ပြန်ပြီး 'ဘောမ ' နေရတဲ့ဘ၀ . . အာဟ . . . အာဟ "

" ဟားဟား ဟားဟား ဟားဟား . . . . . . "

ရုတ်တရက်ကြီး ရယ်ချလိုက်သူမှာ အဘစော မူးသာတို့ စစ်ပြန်ကြီးအဘလုံးတုံးတို့ ဖေကြီး တို့မဟုတ်မူဘဲ အဘစိမ်းမောင်၏သမက် 'ကိုနိုင် ' ဖြစ်နေလေရာ အဘစိမ်းမောင်၏ မျက်စောင်းမှာ ချစ်လှစွာသော သမီးပေး သမက်ကြီးအပေါ်သို့ တန်းကနဲ ဒိုင်းကနဲ ကျရောက်သွားပါ လေတော့၏ ခင်ဗျာ။

(ဂ)

အဘစောမူးသာတို့ အဘလုံးတုံးတို့နဲ့ စိတ်တူကိုယ်တူ ' ကိုနိုင် ' မှာ မျက်နှာပိုးသတ်ခဲ့ လေသော်ငြား မျက်နှာပေါ်က ' အရယ်ရိပ် ' ကား ပျောက်မသွားသေးပါ။

အစိမ်းအုပ်စုအတွင်းမှာ မိသားစုဝင်ဖြစ်ခဲ့သော်ငြား ရွေးကောက်ပွဲကာလတွေဆီက တီရှပ် ' အနီရောင် ' ကိုသာ မြတ်မြတ်နိုးနိုး ဝတ်ဆင်ခဲ့သူ။ ယောက္ခမက ကြည့်မရခဲ့သူ။ သို့ပေမဲ့ ကိုနိုင်ကား ' ဓမ္မ ' ဘက်မှာသာထာဝစဉ် ရပ်တည်ခဲ့ပြီး ' အမှန်တရား ' ကို ချစ်မြတ်နိုးသူ ဖြစ်ပါလေ၏။

" ဟေ့ကောင် မောင်နိုင် "

" ဘာလဲ အဖေ "

" မင်း ဘာလို့ ထပြီး ရယ်တာလဲ "

" အဲ . . . ဟဲ ဟဲ . . . အဘမူးသာ့စကားကို သဘောကျလို့ပါ အဖေ "

" ဟေ . . . မင်း . . . မင်း . . . ငါပြောနေတာတွေကော သဘောမကျဘူးလား "

" အားပါးပါး . . သဘောကျတာပေါ့အဖေ "

" အေး . . . ငါပြောတာကို သဘောကျရင်လည်း နောက်ဆို အဲသလိုပဲ ထရယ်ပေး "

" ဝါး . . . ဟားဟား ဟားဟား ဟားဟား "

စကားတွေက ဘယ်ရောက်လို့ ဘယ်ပေါက်ကုန်ပြီမှန်း အဘစိမ်းမောင်တို့ မသိကြတော့ပါလေ။ အဘလုံးတုံးက အဘစောမူးသာကိုမျက်စပစ်ပြလိုက်လေရာ အဘစောမူးသာက ရေနွေးတစ်ခွက်မော့သောက်ကာ အကြံထုတ် နေပုံကို မြင်ရပါလေ၏။

ခဏကြာ တိတ်ဆိတ်သွားသည့် စကားဝိုင်းကို အဘစောမူးသာက သူရဲ့ လက်တန်းအဆိုဖြင့် တပ်လှန့်လိုက်ပါလေတော့၏ ခင်ဗျာ။

အဆိုတော် မာမာအေး၏ ' ကျွဲမ ' အလိုက်ကလေးနဲ့ ခင်ဗျ။

" အဘမျက်နှာကို ပြရန်မလို . . . တရုတ်မဖင်ကို ကြည့်တော်မူပါ အစ်ကို "

" ငရွှီးနဲ့မတန်ပါ ဆိုချင် ဆို . . . အသားစပ်စပ်နဲ့လူကိုသာ ' ဂါ ' ချင်တယ် ရှင့် "

" ဗိုလ်ခြေတထောင်မှာ တယောက်လောက်တော့ ' တွဲ ' လောက်ပါရဲ့ "

" ဘောမ . . ဘောမ . . ဘောမ အသားကုန်"

" ဝါး ဟားဟား ဟားဟား ဟားဟား . . . . "

အဘစိမ်းမောင်ကား ရှူးရှူးရှားရှားနဲ့ ထထွက်သွားသည်ကိုမြင်ကြရလေရာ ပိုလို့ ပင်ရယ်ဖို့ကောင်းလှပါပေတော့၏။ ထိုရယ်သံထဲမှာ အဘစိမ်းမောင့်သားမက် ကိုနိုင်ရဲ့ အသံမှာ အကျယ်ဆုံးဖြစ်ပါလေတော့၏။

အဘစိမ်းမောင်နဲ့ သူ့လူတွေ သိပ်မဝေးသေးခင်မှာပဲ စစ်ပြန်ကြီးအဘလုံးတုံးရဲ့ အောင်မြင်ခန့်ငြားလှတဲ့ ဘယ်သံဝါဝါကြီး ထပ်မံပေါ်ထွက်လာပြန်ပါလေတော့၏ ခင်ဗျာ။

" ဒို့အဖိုးလည်း တရုတ် . . ဒို့အဘေးလည်း

တရုတ် . . . ဒို့များလည်း တရုတ်ပေ . . .

ရေခြား မြေခြား နေကြ လူညာတွေအား

လေ . . . ဒို့ ' တရားအားထုတ် ' ကြပေ .

. . . အာဏာရှင် မျိုးဆက်တွေ . . . "

ဖေကြီး (လေရှီး)

(က)

ရွာတောင်ဘက်အစွန်က ဘုန်းကြီးကျောင်းကို လိုက်ခဲ့ဦးဟ ဆိုတော့လည်း ထုံးစံအတိုင်း မျက်ခုံးခပ်လှုပ်လှုပ် မျက်နှာခပ်ပူပူနဲ့ပဲ လိုက်ခဲ့ရပြန်တာပါပဲခင်ဗျာ။ နှစ်သစ်ကူး သင်္ကြန်ကာလ အထူးတရားပွဲအတွက်ဆိုလား ဘာလား၊ အဲသည်ကိစ္စအတွက် အစည်းအဝေးဆိုလား ဘာလားပါပဲ။

မြန်မာပြည်မှာ ရှာမှရှားလေမယ့် ဘုန်းကြီးကျောင်းအုတ်တံတိုင်း အစိမ်းရောင်ကြီးက ခပ်လှမ်းလှမ်းကနေပြီး ခပ်စိမ်းစိမ်းကြီးနဲ့ ကြိုဆိုနေပါသဗျ။ ကျောင်းခေါင်မိုးအစိမ်းရောင်ကြီးကတော့ အစိမ်းဆရာတော် ဦးအစိမ်းတရဲ့ တပည့်သာဝကတွေဖြစ်တဲ့ စိမ်းသရဖူစိမ်း အဘစိမ်းမောင်နဲ့ အဘစိမ်းလွင်တို့ အမြဲအစိမ်းတပ်ဖွဲ့ရဲ့ အလှူရေစက်တွေ ဖြစ်ပါသတဲ့။

“စိမ်းသရဖူစိမ်း . . . စိမ်းသရဖူစိမ်းရယ် .. .  အစိမ်းမှာသတင်းကြီးတဲ့ အစိမ်းရောင်အစွဲကြီး ‘မောင့်ဘဘစိမ်း’ ရယ် . . . .”

အဘစောမူးသာက တွံတေးသိန်းတန်ကီးနဲ့ အသံနေအသံထားနဲ့ ဋ္ဌာန်ကရိုင်းကျကျ မေးလေးများရိုက်ရိုက်ပြီး ဟစ်လိုက်ပါတယ်ခင်ဗျ။ ကျောင်းထဲရောက်နေနှင့်သူတွေအကုန်လုံး ကောင်းကောင်းကြီး ကြားရမှာပါ။

“တမင်စိမ်းချင်လို့များ ပင်စိမ်းပင်မှာ မွေးလေသလား . . . အား ဟာ . . .”

“လုပ်ထားကွ . . ‘တွံတေးမူးသာ’ ကွ”

“ဟား ဟား ဟား ဟား ဟား ဟား . .”

ပြောရင်း ဆိုရင်း ရယ်ရင်း ဟားရင်းကနေ ကျောင်းထဲကို ခြေအချမှာတော့ ကျောင်းဇရပ်ဘေး ခရေပင်ကြီးအောက်က စိမ်းစိမ်းကြီး လှမ်းကြည့်နေကြတဲ့ စိမ်းသရဖူစိမ်း ဆရာတော်နဲ့ စိမ်းသဖူစိမ်း ဒကာကျော်တို့ကို မြင်ကြရပါတယ်။

“မူးသာတို့ နောက်ကျနေပါလားဟ . .”

“တင်ပါ့ . . . နောက်ကျဆို မြဝတီ TV သတင်းတွေ ကြည့်နေလို့ပါ ဘုရာ့”

“ဟေ . . .”

‘မြဝတီ’ဆိုတာနဲ့ ဆရာတော်နဲ့အဖွဲ့မှာ အံ့သြတဲ့မျက်နှာတွေနဲ့အတူ ကျေနပ်သွားကြတဲ့ မျက်လုံးတွေကိုပါ မြင်လိုက်ရပါတယ်။ ဆရာတော်က မြဝတီကြည့်ဖို့ အမြဲတမ်း တိုက်တွန်းတတ်တာကိုး ခင်ဗျ။

“အေးကွ မူးသာတို့ လုံးတုံးတို့ရ . . . မင်းတို့ စလောင်းက သတင်းတွေချည်း ကြည့်မနေဘဲ အခုလို မြဝတီပါကြည့်တော့ ‘အမှန်တရား’ ကို သိရတာပေါ့ကွ”

“တင်ပါ့ဘုရား . . အခု လာသာလာရတာ၊ ကိုယ်တော် ပြန်မှရောက်သေးရဲ့လားလို့ တွေးနေခဲ့ကြတာ ခင်ဗျ”

“အမ် . . . ငါက ဘယ်သွားနေလို့လဲဟ”

“သိဘူးလေဘုရာ့ . . နေပြည်တော်ကိုဖိတ်ကြားခံရလို့ စစ်ရေးပြကွင်းမှာ စစ်သမီးတွေကို အမွှေးနံ့သာရည်တွေ ဖျန်းလိုက်၊ ပန်းကုန်းတွေစွပ်လိုက် လုပ်နေကြတဲ့ ကိုယ်တော်တွေကြားမှာ များလားလို့ပါ”

“အမ် . . . . . .”

“ခုနက မြဝတီ TV သတင်းမှာတောင်မှ တပည့်တော်တို့ ရှာကြည့်ကြပါသေးတယ်။ ငါတို့ကိုယ်တော် ဘယ်နေရာမှာလဲလို့”

“- - - - - -”

အဘစောမူးသာကတော့ တကယ်ပါပဲဗျာ။ ရောက်တဲ့နေရာကနေ ရတဲ့အခြေအနေကနေပြီး ရအောင်ပြောတတ်ပါပေရဲ့။ ဆရာတော်ကား နှုတ်ဆွံ့တော်မူသွားပြီးသကာလ ခဏလေးအတွင်းမှာ ကိုယ်ပါပျောက်သွားပါလေတော့၏ ခင်ဗျာ။

(ခ)

တောင်ကျောင်းကိုယ်တော်မှာ ကုဋီပဲသွားတက်သလိုလို ရေပဲသွားချိုးတော်မူသလိုလို ဆွမ်းပဲ သွားဘုဉ်းပေးသလိုလို အထာမျိုးနဲ့ ကိုယ်ဖျောက်သွားတာပါ။

အဘစိမ်းမောင်တို့ သူ့သားကြီး လေမောင်တို့ အဘစိမ်းလွင်တို့နဲ့ ဆက်လက်၍ စခန်းသွားကာ လာရင်းကိစ္စကို ပြောကြဆိုကြ တိုင်ပင်ကြဖို့ပဲ ရှိတော့တာပေါ့ ခင်ဗျာ။

“ဒါနဲ့ စိမ်းမောင်ရေ . . . TV ထဲမှာ တော်လှန်ရေးနေ့ ပရိတ်လျှောက်တာ မိန်းမတွေ ပိုများနေသလိုပဲကွ”

“‘မိန်းမ’ မဟုတ်ဘူး၊ ‘စစ်သမီး’ လို့ခေါ်ရတယ်ဟ”

အဘစောမူးသာ့စကားကို အဘစိမ်းမောင်က ဤကဲ့သို့ တုံ့ပြန်ပါလေ၏။ စစ်ပြန်ကြီး အဘလုံးတုံးကား ပြုံးတုံးတုံးကြီး ခင်ဗျ။ အဘလုံးတုံး တပ်ကြပ်ကြီးလူထွက်ကား အနှီကဲ့သို့ တော်လှန်ရေး Parade ကို ကိုယ်တိုင်ပါဝင်လျှောက်ဖူးသူဟု ကြားသိဖူးပါ၏။

“ဟုတ်တယ်ကွ မူးသာရ။ စိမ်းမောင်ပြောသလိုပဲ ‘စစ်သမီး’ လို့ ခေါ်ဟ”

“အေးပါကွာ . . . ငါ TV ထဲမှာ သေသေချာချာကြည့်မိတော့ ‘စစ်သမီး’ တွေဟာ ထူးခြားနေတာ တွေ့ရတယ်ကွ”

“ဘယ်လိုထူးခြားနေတာလဲဟ မူးသာရ”

အဘစောမူးသာက ပြောသည်မှာ အနှီ ‘စစ်သမီးတွေ’ ဟာ တကယ့်စစ်သမီးက နည်းနည်းလေးဖြစ်ပြီး တပ်တွင်း နောက်တန်းက စစ်သားမိန်းမတွေက များများဖြစ်လိမ့်မယ်လို့ သူတို့တွေရဲ့ ပုံပန်းတွေကို ကြည့်ရှုလေ့လာပြီး မှတ်ချက်ပေးနေတာပါ။

အဲဒါကို စစ်ပြန်ကြီး အဘလုံးတုံးကလည်း ‘အမှန်ပဲ’ လို့ ထောက်ခံချက် ပေးပါသဗျ။ အဲဒါနဲ့ဆက်စပ်ပြီး စစ်တပ်မှာ တော်လှန်ရေးပရိတ် လျှောက်ဖို့တောင်မှ လူအင်အား နည်းပါးနေပြီဖြစ်လို့ တပ်ထဲက ဇနီးမယားတွေ၊ ရဲမေတွေကိုတောင်မှ အစားထိုးကာ အသုံးပြုနေရပြီဖြစ်တဲ့ အခြေအနေလို့ မှတ်ချက်ပေးပါတယ်။ အဘစိမ်းမောင်တို့ကတော့ သိပ်ပြီးလက်မခံတဲ့ အနေအထားပါ။

“ဘာပဲဖြစ်ဖြစ်ကွာ . . . ၇၈ နှစ်မြောက် တပ်မတော်နေ့ကြီးဟာ သိပ်ကို စည်စည်ကားကား အောင်အောင်မြင်မြင်ကြီးပါ”

“အောင်မြင်မှာပေါ့ဟ . . . မင်းတို့ ငါတို့လို ပြည်သူတွေရဲ့ ဘဏ္ဍာငွေတွေကို စိတ်ကြိုက်သုံးပြီး ‘ဝုန်း’ ထားတာကိုးဟ”

“ဟားဟား ဟားဟား ဟားဟား . . . .”

ထရယ်ကြတော့ ဘဘစိမ်းတွေက သိပ်ကြည်ပုံမရ။ မျက်မှောင်တွေကြုတ်ကာ ခပ်တင်းတင်း ကြည့်ကြ၏။ ဆရာတော်ကား ပြန်လည်၍ ကိုယ်ထင်ပြတော်မမူသေး။

“ဒါနဲ့ လုံးတုံးရ . . မင်းတို့တွေ ရန်ကုန်က တော်လှန်ရေးပန်းခြံမှာ Parade လျှောက်ခဲ့ကြတုန်းက သတိရစရာလေးတွေရှိရင် ပြန်ပြီး ပြောပြပါအုံးဟ”

“အေး . . . ရှိတာပေါ့ မူးသာရ၊ ဟိုးအရင်က တော်လှန်ရေးနေ့ Parade လျှောက်ရင် ‘ဗိုလ်ရွေးအဖွဲ့’ လာပြီး ပန်းကုန်းစွပ်ခဲ့ကြတာကွ”

“ဘယ်လို . . . . ‘ဗိုလ်ရွေးအဖွဲ့’ လာကြတယ် . . . ဟုတ်လား”

“ဟား ဟား ဟား ဟား ဟား ဟား . . . အခုလို စစ်သမီးတွေကို ရေမွှေးဖျန်း၊ ပန်းကုန်းစွပ်ကြတဲ့ ‘ဘုန်းဘုန်း’ တွေနေရာမှာ ဟိုတုန်းကတော့ စစ်ဗိုလ်ချုပ်သမီးတွေ၊ တူမတွေ၊ ညီမတွေ၊ ခယ်မတွေ အပြည့်ပေါ့ဟာ”

အဘလုံးတုံးက ပြောပြသည်မှာ အဲသည်နေ့ဆို ခုနကပြောတဲ့ မာတုကာမတွေဟာ သူတို့မျက်စိကျရာ ‘အရာရှိငယ်’ ကို ပန်းကုန်းစွပ်ကာ ရွေးကြပါသတဲ့။ အနှီ အရာရှိလေးတွေကို ဤကဲ့သို့ ‘စွပ်’ ခြင်းကို ‘ဗိုလ်ရွေးသည်’ ဟုဆိုတာဖြစ်ကြောင်း ခပ်ရွှင်ရွှင် ပြောပြပါလေ၏။

“အခု တော်လှန်ရေးနေ့မှာတော့ ‘အတုတွေ’ အများကြီး မြင်တွေ့ခဲ့ရသဟ”

“ဘာ ‘အတုတွေ’ လဲဟ လုံးတုံးရ”

“ဘာအတုတွေဖြစ်ရမလဲ မူးသာရ၊ ‘စစ်သမီးအတု’ နဲ့ ‘ဘုန်းကြီးအတု’ တွေပေါ့ ဟကောင်တွေရ”

“ဟားဟား ဟားဟား ဟားဟား . . . .”

(ဂ)

အဘစိမ်းမောင်တို့ အစွန်းရောက်အစိမ်းအုပ်စုကား မကြည်မလင် မျက်နှာများနှင့်။ ချေပဖို့ရာ စကားလုံး ဝါကျများ ရှာနေသလို ပုံစံတွေပါ။ ခဏအကြာမှာ စကားစလာပါလေ၏ ခင်ဗျာ။

“ဘာပဲဖြစ်ဖြစ်ကွာ . . . ဗိုလ်ချုပ်မှူးကြီး မင်းအောင်လှိုင်ဟာ တုံးတိုက်တိုက် ကျားကိုက်ကိုက် စိတ်ဓာတ်နဲ့ ခေါင်းဆောင်ကွ”

“ဝါး ဟားဟား ဟားဟား ဟားဟား . .”

“မင်းတို့ ဘာရယ်တာလဲ . . . အခုဆို သူ တပ်မတော်နေ့မိန့်ခွန်းမှာ ရဲရဲတောက်ကို ပြောချသွားတာ မင်းတို့အမြင်ပဲမဟုတ်လား”

“ဘာကိုလဲ ဟကောင် စိမ်းမောင်ရ . . .”

“ဘာရမလဲဟ . . . မင်းတို့ PDF နဲ့ တိုင်းရင်းသားအဖွဲ့တွေကို အပြတ်ချေမှုန်းပစ်မယ်လို့ ကမ္ဘာသိ ပြောသွားတာလေ”

“ဝါး ဟားဟား ဟားဟား ဟားဟား . .”

အရွှင်အဘတွေက ဝါးကနဲ ထရယ်ကြပြန်ပြီး အဲသလိုပြောလာတာ ၂ နှစ်တောင်မှ ရှိပြီဖြစ်ကြောင်းနဲ့ သူမိန့်ခွန်းပြောနေချိန်မှာပဲ သူ့ဖက်ဆစ်တပ်စခန်းတွေကို ပြည်သူ့ကာကွယ်ရေးတပ် PDF တွေက နေရာအနှံ့မှာ သိမ်းပိုက်နေပြီး ဖက်ဆစ်အလောင်းတွေ မြင်မကောင်းအောင် များပြားလှကြောင်း ပြောပြကြပါ၏။ ပြီးတော့ ဖက်ဆစ်တပ်တွေ လှူဒါန်းတဲ့ လက်နက်ခဲယမ်းတွေဆိုတာလည်း တောင်ပုံရာပုံဟု ဆိုကြပါ၏။

ကမ္ဘာမှာကော အာဆီယံမှာပါ လူရာမဝင်တဲ့ ‘တိုက်တိုင်းရှုံး’ ကြင်စိုး သာဝ မအလဟာ ‘စောက်ပြောကြီး ငပု’ ဖြစ်ပုံ၊ သူနဲ့ သူ့ရဲ့ခါးပိုက်ဆောင် ဖက်ဆစ်တပ်ဟာ သုံးလေးလ အတွင်းမှာပင် ဇာတ်သိမ်းတော့မယ့်အကြောင်းကို လက်ရှိ မြေပြင်အခြေအနေနဲ့ ထင်ဟပ်ကာ သေသေချာချာ သုံးသပ်ပြီး ကောက်ချက်ဆွဲပြကြပါတယ် ခင်ဗျ။

“မဖြစ်နိုင်ပါဘူးကွာ”

“အေးလေ . . . မင်းတို့ မအလဘောမတွေ မယုံရင် စောင့်ကြည့်ကြ။ မအလနဲ့ အပေါင်းပါတွေ ဘယ်လိုဘယ်ပုံ နိဂုံးချုပ်မလဲဆိုတာ မကြာခင် တွေ့ကြရမှာ”

ငြင်းသာငြင်းနေရတယ် . . မအလဘောမ ဘဘစိမ်းတို့တွေရဲ့ မျက်လုံးတွေထဲမှာလည်း သူတို့အဘ မအလကြီးရဲ့ အခြေအနေမကောင်းတော့ပုံကို သိနေကြသလိုလို ပုံစံအနေအထား အရိပ်အရောင်တွေနဲ့ပါ။

ဒီနေ့ ကျောင်းကိုလာပြီး ‘သင်္ကြန်’ တရားပွဲကိစ္စလည်း မဆွေးနွေးဖြစ်ခဲ့ကြပါဘူး။ ဒါပေမယ်လို့ ပြန်ခါနီးကျမှ ‘သင်္ကြန်’ နဲ့ ပတ်သက်တာလေး ပြောဖြစ်ပါတော့တယ်။

“ဒီမယ် စိမ်းမောင် . . မင်းတို့အဘ မအလ ဆိုတဲ့အကောင်ဟာ ‘လေ’ သမားကွ။ သူ့မှာ ‘လေ’ ပဲရှိတယ်။ ‘လေသံ’ ပဲရှိတော့တယ်။ ‘သင်္ကြန်အမြောက်’ ဆိုတဲ့ ဗမာစကား ကြားဖူးတယ် မဟုတ်လား”

“- - - - - - - -”

“မအလမှာ ‘အသံ’ ပဲရှိတယ်။ ‘အဆံ’ မရှိဘူး။ အသံကတော့ ကျယ်မယ်။ ‘အဆံ’ ကတော့ ဗလာနတ္ထိပဲ”

“- - - - - - - -”

“အေး . . . ခွေးလို ချောင်ပိတ်မိနေပြီဖြစ်တဲ့ ကြင်စိုး သာဝ မအလဟာ ခွေးကျ ကျပြီး ခွေးလိုအူကာ ခွေးရူးဇာတ်သိမ်းတော့မယ်ဆိုတာ ကမ္ဘာ့ TV ဖန်သားပြင်တွေပေါ်မှာ များမကြာခင် မြင်ကြရတော့မှာကွ . . . အာဟ . . . အာဟ”

ဖေကြီး (လေရှီး)