(က)
“ရေနွေးကြမ်းသွားသောက်ကြမယ်ဟ” ဆိုလို့ အဘစောမူးသာတို့ အဘလုံးတုံးတို့နောက် လိုက်လာတာ ရွာ့တောင်ပိုင်း ရောက်လာပါရောလား။ သူတို့ကွေ့ဝင်လိုက်တဲ့အိမ်ရှေ့မှာ ဘေးတိုက်ထိုင်နေတဲ့ ခြင်္သေ့ရုပ်နဲ့ အလံစိမ်းကို မြင်လိုက်တော့မှ အဘစိမ်းမောင်အိမ်ဆိုတာ ရိပ်မိပါတယ်။ ပြဿနာတော့ ရှာပြီထင့်။
“လာဟေ့ မူးသာတို့ လုံးတုံးတို့ ဖေကြီးတို့ရေ . . . လာကြဟ”
အဘစိမ်းမောင်က အားရဝမ်းသာ ကြိုရှာပါတယ်။ ကွပ်ပျစ်မှာ အရပ်ကလန်ကလား ရှည်ရှည်ကိုင်းကိုင်းတယောက် ထိုင်နှင့်နေတာ မြင်ရပါတယ်။ ရေနွေးကြမ်းဝိုင်းမှာ အမြည်းက ပဲကြမ်းကို ကြက်သွန်နီနဲ့ သုပ်ထားတာ။
“အမြည်းကတော့ သိပ်မကောင်းဘူးကွာ” လို့ အဘစိမ်းမောင်ကပြောတော့ အဘစောမူးသာက ပြန်ပြောပါတယ် ခင်ဗျ။
“ဒီလိုမှန်းသိရင် ငါ ဒီနေ့ရထားတဲ့ဟာလေး ထည့်ယူလာပါတယ်ကွာ”
“ဘာရထားလို့လဲ မူးသာရဲ့”
“ဒီကောင် လုံးတုံး သူ့ရွာကယူလာတဲ့ ‘ဖွတ်သား အစိမ်း’ တွေကွ”
လုပ်ချလိုက်ပြန်ပါပြီ။ အဘစိမ်းမောင်ကော ရှည်မျောမျောပုဂ္ဂိုလ်ပါ ‘တွန့်’ ခနဲ ဖြစ်သွားတာ မြင်လိုက်ရတယ်ခင်ဗျ။ ပြီးတော့ ‘ငါတို့ ဖွတ်သားမစားဘူးကွ’ လို့ ပြိုင်တူလိုလို ထွက်လာပါတယ်။ အဘစောမူးသာတို့ကတော့ အဲသလိုဗျ။ ပြီးတော့ ရှည်ကိုင်းကိုင်းပုဂ္ဂိုလ်ကို မေးဆတ်ပြီး ပြောပါတယ်။
“ဘယ်လိုလဲ ‘လောရှည်’ ပဲတွေရဆို”
“ရတော့ရပါတယ်ကွာ ... ဒါပေမယ်လို့ မျိုးဈေး၊ ထွန်ဈေး၊ ဆေးဈေး၊ သယ်ယူပို့ဆောင်ရေး ဈေးတွေက နှစ်ဆကျော်ကျော် သုံးဆ မတန်တဆ ထိုးတက်နေတယ်ဆိုတော့ကာ မကိုက်ပါဘူးကွာ . . ဟူး”
“အဲဒါ မင်းတို့အဘ ‘လောပေ’ ကြောင့်ပေါ့ ‘လောရှည်’ ရ”
“ဟားဟား ဟားဟား ဟားဟား . . .”
စစ်ပြန်ကြီး အဘလုံးတုံးကလည်း ဝင်ပြောပါလေ၏။ အေးချမ်းသာယာနေတဲ့ ခေတ်ကောင်းအခါကို ‘လောပေ’ က ဖျက်ဆီးခဲ့လို့ အခုဆို ပြည်သူလူထုတရပ်လုံး ဒုက္ခရောက်နေရပြီး အဲသည်အကောင် ‘လောပေကြီး’ ကိုယ်တိုင်လည်း အခုဆို ‘အရူးမီးဝိုင်း’ ဖြစ်နေရပါပြီတဲ့။
“‘လောပေ’ ဆိုတာ ‘လေပေါ’ လွန်းတဲ့ ကြင်စိုး သာဝ မအလကြီးပေါ့ဟ”
“လေသာပေါတာ ခုထက်ထိ ဘာမှကိုဖြစ်မလာတဲ့ သောက်ပေါကောင်ကြီးပါ”
“ဟားဟား ဟားဟား ဟားဟား . . .”
လျှပ်စစ်ရထားလို့ လေပေါလိုက်၊ မြေအောက်ရထားလို့ လေပေါလိုက်၊ လျှပ်စစ်ကားလို့ လေပေါလိုက်နဲ့ ဘာဆိုဘာမှတော့ ဖြစ်မလာတဲ့ အယုတ်တမာ လောပေကြီးပါဆိုပြီး ဟားကြပါသဗျ။ ခက်တော့ခက်သား၊ အဘအစိမ်းတွေဆီသွားပြီး သူတို့အဘ ‘အစိမ်းကောင်ကြီး’ အကြောင်းကို ဟားကြတာဗျာ၊ အားမနာ ပါးမနာ။
အဘစိမ်းမောင်နဲ့ အဘလောရှည်တို့ကလည်း ဖိတ်ထားတဲ့သူငယ်ချင်းတွေကို သည်းခံကြပါသဗျ။ အလိုက်သင့်တော့ ပြန်ပြန်ပြောကြပါတယ်။
“နစကဥက္ကဋ္ဌကြီးက ကမ္ဘာ့အကြီးဆုံး ကျောက်ဆင်းတုတော်ကြီးအတွက် အချိန်ပေးနေရလို့ပါကွာ၊ အဲဒါပြီးရင် လျှပ်စစ်ရထားတွေ လျှပ်စစ်ကားတွေ လာပါလိမ့်မယ်”
“ဟေ . . . ဒီလိုလား စိမ်းမောင်ရ . .. . ဟ ဟ ဟ”
(ခ)
စကားဝိုင်းမှာ ကြင်စိုး သာဝ မအလခေါ် လေပေါလှသည့် ‘လောပေ’ အကြောင်းသာ ဝဲလည်နေပါ၏။ စိမ်းသရဖူစိမ်း အဘတွေကလည်း စစ်ကောင်စီဥက္ကဋ္ဌ၏ အိပ်မက်များ အကောင်အထည်ပေါ်ကို ပေါ်လာမည်ဖြစ်ကြောင်း ခံစစ်နှင့်ပြော၏။
သည်ဘက်အဘတွေကလည်း အဓမ္မကောင်ကြီး၏ အိပ်မက်များဟာ အိပ်ယာကနိုးတာနဲ့ လုံးဝကို လွင့်စင်ပျောက်ကွယ်သွားမှာ ကျိန်းသေပါပဲဟု တိုက်စစ်နှင့် ပြောကြပါလေ၏ ခင်ဗျာ။
“ဒီလောက် ‘လေပေါ’ တဲ့ကောင်၊ လေပဲရှိတဲ့ကောင်၊ လက်တွေ့ ဘာမှဖြစ်မလာတဲ့ကောင်ကြီးကို မြင်နေရတော့ ငါတို့တပ်ထဲတုန်းက ဗိုလ်ကြီးကို သတိရမိသကွ”
“လုပ်စမ်းပါအုံး လုံးတုံးရ၊ အဲသည် ဗိုလ်ကြီးလည်း မအလလို ‘လောပေကြီး’ ပဲလားဟ”
“ဟားဟား ဟားဟား ဟားဟား . . .”
အဘနှစ်ယောက် အတိုင်အဖောက်ညီညီ ရယ်နေကြပြီးသကာလ ‘ဗိုလ်ကြီးပုံပြင်’ ကို ခင်းကျင်းပါလေတော့၏ ခင်ဗျာ။
“ဒီလိုကွ မူးသာရ . . . သူက ‘အားသားရင့်’ အခြား အကြပ်တပ်သားအဆင့်ကနေ တိုက်ရည်ခိုက်ရည်နဲ့ တက်လာတဲ့ သိပ်ချစ်စရာကောင်းတဲ့ ဗိုလ်ကြီးကွ”
“သြော် . . . အေး အေး . . . ‘အားသားရင့်’ ဆိုတာ ‘အခြားအဆင့်’ ကနေလာတာပေါ့”
ဖေကြီး စိတ်ဝင်စားစွာ နားထောင်နေသလို ဟိုဘက်အဘတွေလည်း နားရွက်တွေထောင်ကာ နားစွင့် စူးစိုက်နေကြတာ မြင်ရပါလေ၏။ စစ်ပြန်ကြီး အဘလုံးတုံးဆီမှာ ‘တပ်ပုံပြင်’ တွေ အတော်များများ ရှိသေးပုံပါလေ။ သူက ဆက်ပြောပါလေ၏။
“တိုင်းရင်းသားကြီးကွ . . . သိပ်ရိုးသားတယ်။ ဗမာလိုလည်း မနည်းကြီးကို ကြိုးစားပမ်းစား အားထုတ်ပြောရရှာတယ်”
သို့ဖြင့် ‘လေပေါ’ ပုံပြင်ကိုဆက်လေရာ ထိုဗိုလ်ကြီးမှာ သူ့တောင်ပေါ်ဇာတိမြေသို့ ခွင့်ပြန်ကာ လက်ထပ်ခဲ့ပါသတဲ့။ ဇနီးသည်ကိုလည်း တခါတည်း တပ်ကိုခေါ်လာခဲ့ပြီး နေလာလိုက်တာ လေး ငါး ရှစ်လလောက် ကြာတော့ ဇနီးသည်၏ဗိုက်မှာ အတော်ကြီးကို စူထွက်လာပါသတဲ့။
ထိုဗိုလ်ကြီးမှာ ကလေးထွန်းကားတော့မည်ဆိုပြီး အပျော်ကြီးပျော်ရွှင်နေကာ ရဲဘော်တွေကို ကျွေးပါမွေးပါသတဲ့။ ရဲဘော်တွေကလည်း သူတို့ဗိုလ်ကြီးအတွက် ဝမ်းသာကာ ကျန်းမာသန်စွမ်းတဲ့ သားသမီးရတနာလေးများ မွေးဖွားပါစေလို့ တွေ့တာနဲ့ ဆုတွေတောင်းပေးကြပါသတဲ့။
“ပြီးတော့ စစ်ဆေးရုံကိုသွားပြီး မိခင်ကော ကလေးပါ ကျန်းမာရေး ဆေးစစ်ဖို့လည်း တိုက်တွန်းကြတာပေါ့ကွ”
သို့ဖြင့် တရက်မတော့ စစ်ဆေးရုံသို့ရောက်ကာ အစစ်အဆေးခံပါလေရောတဲ့။ စစ်ဆေးရုံက ဆရာဝန်မတွေလည်း သေသေချာချာ စမ်းသပ်စစ်ဆေးကြည့်ပြီးတဲ့အခါ ခေါင်းခါပြကြပါသတဲ့။ ပြီးတဲ့အခါ သည်လို ပြောပါတယ်တဲ့။
“ဗိုလ်ကြီးဇနီးမှာ ကိုယ်ဝန်မရှိပါဘူး”
“ဗျာ . . . ဘယ်လို . . . ဘယ်လို . . . ဒီလောက် ဗိုက်ကြီးပူနေတာကို”
“ဟုတ်ပါတယ် ဗိုလ်ကြီး . . ‘ကလေး’ မဟုတ်ပါဘူးရှင့်”
“‘ကလေး’ မဟုတ်ရင် ဘာဖြစ်လို့ ဗိုက်ကြီးပူနေရတာလဲ ဆရာမရဲ့”
“‘လေတွေ’ ကြောင့် ပူနေတာပါရှင့်”
ဒီလိုအဖြေလည်းကြားရရော အနှီဗိုလ်ကြီးမှာ မျက်နှာတပြင်လုံး နီရဲလာပြီး ငြီးတွား ရေရွတ်နေတော့ပါသတဲ့။
“‘လေထိုးတံကြီးဟ၊ လေထိုးတံကြီးဟ’ ပါတဲ့ ဗျား”
“ဝါး ဟားဟား ဟားဟား ဟားဟား”
“ကြင်စိုး သာဝ မအလ လေပေါကြီးလည်း ဒီလိုပါပဲ ခင်ည”
“အာဟ . . . အာဟ . . . အာဟ”
ဖေကြီး (လေရှီး)
(က)
တောင်ကျောင်းသို့ ရောက်ကြပြန်၏။ အဘစောမူးသာ၊ စစ်ပြန်ကြီးအဘလုံးတုံးတို့ ဆွမ်းချိုင့်ပို့တာ ‘လိုက်ခဲ့အုံးဟ ဖေကြီးရ’ ဟု ခေါ်ပြန်သဖြင့် စိတ်ထဲတထင့်ထင့်နှင့် လိုက်ခဲ့ရပြန်ပါ၏။ ဒီကနေ့တော့ သူတို့ငယ်ပေါင်း တောင်ကျောင်းကိုယ်တော်နှင့် သင့်မြတ်ကြပါစေဟုသာ ဆုတောင်းလာခဲ့ရပါ၏။
ကျောင်းကို လှမ်းမြင်ရတော့ နဂိုအုတ်တံတိုင်းအစိမ်းရင့်ရင့်ကြီးက အရောင်ခပ်ဖျော့ဖျော့ ပြောင်းနေတာ မြင်ရပါလေ၏။ ပြင်ပရာသီဥတုအပူဒဏ်က ပိုမိုပြင်းထန်လာသည့်အတွက် အစိမ်းရင့်ရင့်လည်း ဖျော့ဖျော့သာ စိမ်းနိုင်တော့ပြီထင့်။ ဒါသည်လည်း သင်္ခါရတွေထဲက တခုပေပဲဟု ထင်ပါ၏။
“စိမ်းသရဖူစိမ်း စိမ်းမောင်တို့ သူ့သာဝက စိမ်းလွင်တို့ ဆိုင်ကယ်တွေ မြင်သဟ” ကျောင်းတွင်းမှာ ရပ်ကျေးအစိမ်းဥက္ကဋ္ဌ အဘသိမ်းမောင်တို့ အစွန်းရောက် အစိမ်းအမာခံ အဘငြိမ်းလွင်တို့ ရောက်ရှိနေပြီဖြစ်လေရာ သည်အရွှင်အဘတွေနှင့် ဆုံပါက ဖြစ်ပေါ်လာမည့် ဇာတ်လမ်းကို ငွေရောင်ပိတ်ကားထက်တွင် ဆက်လက်ရှုစားရပေတော့မည်တကား။
“ငါတို့တွေ တိတ်တိတ်ကလေး ဝင်ကြစို့”
အဘစောမူးသာက ဆော်သြတော့ အားလုံးပြုံးကြကာ မိမိတို့၏လက်ညှိုးများကို မိမိတို့၏ နှုတ်ခမ်းများပေါ်သို့ ကန့်လန့်ကပ်ကာ အချက်ပြကြပါ၏။ ခြေသံလုံစွာ ချီတက်ခဲ့ကြလေရာ ဇရပ်အကွယ်သို့အရောက်မှာ ဇရပ်ထဲက စကားသံများကို ကြားကြရပါ၏။ စိမ်းသရဖူစိမ်း ကိုယ်တော်က ဤသို့ မိန့်လေ၏။
“နစကဥက္ကဋ္ဌကြီးတည်နေတဲ့ စကျင်ဆင်းတုတော်ကြီးကို ဗိုလ်ချုပ်မှူးကြီးသန်းရွှေ လာဖူးတယ်တဲ့ကွ”
“တင်ပါ့ . . . . တကယ့်သာသနာပြုမင်းတွေပါပဲ ဘုရား”
ဆရာတော်နှင့် တကာရှော်တွေကား တကယ့်ကို လိုက်ဖက်တဲ့ဘဝတွေပါပဲလား။
အဘစောမူးသာနှင့် အဘလုံးတုံးတို့က ပါးစပ်များကို လက်ဖဝါးများနှင့်ပိတ်ကာ အတွင်းကြိတ် ရယ်နေကြလေ၏။ ဖေကြီးလည်း အမှတ်တမဲ့ အသံထွက်သွားမည်ကို စိုးရိမ်စွာဖြင့် မနည်းကြီး ထိန်းနေရ၏။
“ဒါနဲ့ အချို့တပ်စခန်းတွေကို PDF တွေက ဝင်စီးလို့ စွန့်လွှတ်ကြရတယ်ဆိုကွ”
“တင်ပါ့ဘုရား . . . သူတို့က လူဦးရေများများ ‘သာလွန်အင်အား’ နဲ့ဆိုတော့ တပ်မတော်က အောင်မြင်စွာ စွန့်ခွာကြရတာပေါ့ ဘုရာ့”
အဘစောမူးသာက အချက်ပြလိုက်သဖြင့် ဇရပ်အကွယ်မှနေ၍ ရုတ်တရက်ထွက်လိုက်ကာ ကိုယ်ထင်ပြလိုက်ကြလေရာ ဆရာတော်နှင့် တကာရှော်တို့အဖွဲ့မှာ ပြောလက်စ စကားများကို တိခနဲ ဖြတ်ချလိုက်ကြပြီးသကာလ ရေနွေးပူပူကို ရုတ်တရက် မော့သောက်သူကသောက်၊ ကွမ်းထုတ်ဝါးသူက ဝါး၊ ဆေးလိပ်မီးညှိသူက ညှိဖြင့် အလုပ်ရှုပ်သွားကြပါလေတော့၏။
ဆရာတော်က ရာဇဣန္ဒြေကို အမြန်ဆယ်တော်မူကာ မိန့်ပါလေ၏။
“အဲ . . . မူးသာတို့ လုံးတုံးတို့ မောင်ဖေကြီးတို့ပါလားဟ . . . ဆွမ်းချိုင့်လား”
“တင်ပါ့ဘုရား . . . ပထမတော့ အရှင်ဘုရား နှစ်သက်တော်မူတဲ့ ဝက်သားသုံးထပ်သား ဆွမ်းဟင်း ချက်ကပ်မလို့ပါပဲဘုရား”
“အိမ်း . . .”
“သို့ပေမဲ့လို့ ဝက်သားဈေးက တပည့်တော်တို့ အိတ်ကပ်ထဲက ပိုက်ဆံထက် ‘သာလွန်အင်အား’ ဖြစ်နေလို့ ဘယ်လိုမှ မတတ်နိုင်တာနဲ့ ပြန်ဆုတ်ပြေးခဲ့ရတယ်ဘုရား”
“ဟေ . . .”
အဘစောမူးသာက ရုပ်တည်ကြီးနှင့် ပြောနေလေရာ ကျွန်ုပ်တို့မှာ အသာကျိတ်၍ ပြုံးကြရပါ၏။ အဘစိမ်းမောင်နှင့် အဘစိမ်းလွင်တို့ကား မကြားချင်ယောင်ဆောင်နေကြပါ၏။ ဆရာတော်ကား အခြေအနေကို ရိပ်စားမိကာ ကျောင်းပေါ်သို့ မြန်နှုန်းမြင့်အလျင်ဖြင့် ကြွသွားပါလေတော့၏။
(ခ)
အဘစိမ်းမောင်နှင့် အဘစိမ်းလွင်တို့မှာ ခံစစ်ပြင်ရန် အကြံထုတ်နေကြရလေပြီ။
အဘစောမူးသာနှင့် စစ်ပြန်ကြီး အဘလုံးတုံးတို့ကား တဦးမျက်နှာကို တဦးကြည့်ပြီးသကာလ အဓိပ္ပာယ်ပါပါ ပြုံးလိုက်ကြပါ၏။
ဖေကြီးကား နှစ်ဖက် စစ်မြေပြင်ကြားထဲမှာ သတင်းယူနေရသည့် စစ်သတင်းထောက်တဦးပမာ တထိတ်ထိတ် ရှိနေရပါလေ၏။
“ဒါနဲ့ ခုနက ‘သာလွန်အင်အား’ ဆိုတာများ ကြားလိုက်မိသလားလို့ စိမ်းမောင်ရ”
“အဲ . . . အင်း . . . ဟိုဟာကွာ . . . နိုင်ငံ့နေရာအနှံ့မှာရှိတဲ့ တပ်မတော်စခန်းတွေကို PDF တွေက ‘သာလွန်အင်အား’ နဲ့ ဝင်ဝင်စီးနေတာကို ပြောတာဟ”
“ဟေ . . . PDF တွေက ‘သာလွန်အင်အား’ ဖြစ်နေပြီဆိုတော့ မင်းတို့အဘ ကြင်စိုး သာဝ မအလရဲ့ ခါးပိုက်ဆောင်တပ်က အင်အားမရှိတော့ဘူးပေါ့၊ ဟုတ်လား”
“အဲ . . . အဲသလိုတော့ မဟုတ်ဘူးကွ၊ တပ်မတော်က အင်အား ‘လေးငါးသိန်း’ လောက်ပဲ ရှိတာလေကွာ”
“သြော် . . . အင်အား ‘လေးငါးသိန်း’ ရှိတယ်ဆိုတော့ . . . . . .”
“အေးလေကွာ . . . အခု PDF တွေက ‘သာလွန်အင်အား’ ဖြစ်နေတာလေဟာ”
“ဟားဟား ဟားဟား ဟားဟား . . . .”
သည်ဘက် အဘတွေက ရုတ်တရက် ထရယ်လိုက်လေရာ ‘မောင့်ဘဘစိမ်းတွေ’ မှာ ‘တင်း’သွားကြပုံပါပေ။
အဘလုံးတုံးက သူတို့ပြောတဲ့ ဖက်ဆစ်တပ်ထက် PDF က လူဦးရေ ပိုများနေသည် ဆိုပါလျှင် နိုင်ငံအနှံ့ နေရာအနှံ့မှာ ကြင်စိုး သာဝ မအလကို လုံးဝလက်မခံဘဲ သူ၏ ‘ခါးပိုက်ဆောင် ဖက်ဆစ်တပ်’ ကို အပြတ်ချေမှုန်းနေသည့် ပြည်သူလူထု၏ ရာခိုင်နှုန်းကို လွယ်ကူစွာ ‘တွက်’ ကြည့်လို့ရပြီဖြစ်ကြောင်း စေတနာဗရပွနှင့် ရှင်းပြကြပါ၏။
အစွန်းရောက် ‘ဘဘစိမ်း’ တို့ကား သူတို့စကားနှင့်သူတို့ ပိတ်မိနေကြပါလေ၏။ အဘစိမ်းမောင်ကား မျက်နှာကြီးနီလာ၏။ အဘစိမ်းလွင်ကား မျက်မှောင်ကြီးကြုတ်လာပြီး ဆေးပေါ့လိပ်ကို ဒေါသတကြီး ဖွာနေပါ၏။
တန်ပြန်စကားစ ရှာမရကြသေးပေ။
(ဂ)
အဘစောမူးသာနှင့် အဘလုံးတုံးတို့ကား အတိုင်အဖောက်ညီပါလေ၏။ ဘဘစိမ်းတို့ကား သတ်ကွင်းထဲမှာ ပိတ်မိနေလေပြီ ဖြစ်၏။
“လောကမှာ ‘ဓမ္မ’ နဲ့ ‘အဓမ္မ’ ဆိုတာရှိပြီး တရားမျှတမှုကို လိုလားတဲ့သူတွေ ပိုများခဲ့ရင် အကောင်းဆုံးပေါ့ စိမ်းမောင်ရာ”
“ - - - -”
စိမ်းသရဖူဆောင်းအဘတို့ကား အီးအီးအဲအဲနှင့် အိုးတိုးအတ ဖြစ်နေကြပါလေ၏။ ပြန်လည် ချေပဖို့ရာ စကားလုံး ဝါကျတော့ မတည်ဆောက်နိုင်သေးပါ။ အဘစောမူးသာနှင့် အဘလုံးတုံးတို့က ငယ်သူငယ်ချင်းကောင်းပီသစွာ ‘အခြေအနေနှင့် အချိန်အခါ’ ကို အမှန်ကန်ဆုံး သုံးသပ်ပြကြပါ၏။ သူတို့သူငယ်ချင်းတွေ အယူလွဲကာ ‘အစိမ်းသူရဲ’ ဘဝ ရောက်ကြမှာကိုတော့ စိုးရိမ်ကြပုံပါ။
အဘစိမ်းမောင်တို့ကား ဘယ်လိုမှကို နားမဝင်ပါလေ။ သူတို့ စွဲမိစွဲရာ ကြင်စိုး သာဝ မအလနှင့် သူ့နောက်လိုက် မိုက်ပြီးရင်းမိုက်နေကြသည့် ‘ခါးပိုက်ဆောင် အကြမ်းဖက်တပ်’ ကိုသာ အကောင်းထင်နေကြပါ၏။
“ဒီမှာ မူးသာ . . . ဘာပဲဖြစ်ဖြစ် အခုလို ‘သာလွန်အင်အား’ နဲ့ အနိုင်ယူတာကိုတော့ ငါတို့ လက်မခံဘူးကွ”
“ဟား ဟား ဟား ဟား ဟား ဟား”
အဘစိမ်းမောင့်စကားကို ရုတ်တရက် ဟားလိုက်ကြလေရာ ‘ဘဘစိမ်း’ တို့မှာ ရှူးရှူးရှဲရှဲတွေ ဖြစ်ကုန်ပါလေ၏။
ဟိုအဘတို့ကား နားချနေကြတုန်း။
“သည်မှာ စိမ်းမောင် . . . အခု ပြည်တွင်းမှာဆိုလည်း ပြည်သူ့ဘက်တော်သား PDF တော်လှန်ရေးသမားတွေဟာ ဖက်ဆစ်အယုတ်တမာ မအလတပ်ထက် ‘သာလွန်အင်အား’ ဖြစ်နေပြီ”
“- - - - - -”
“ပြီးတော့ ကမ္ဘာ့နိုင်ငံအသီးသီးနဲ့ ကမ္ဘာ့ကုလသမဂ္ဂကြီးမှာလည်း ကြည့်ကြည့်ကွာ . . . မင်းတို့ စောက်ရူးအဘ မအလကို ကန့်ကွက် ရှုတ်ချနေတဲ့သူတွေဟာ မင်းပြောသလို ‘သာလွန်အင်အား’ ဖြစ်နေပြီ”
“- - - - - -”
“အေး . . . အနီးကပ်ဆုံး အာဆီယံနိုင်ငံတွေကိုပဲ ကြည့်ကြည့်ကွာ . . . မအလကို အသေအလဲ ကန့်ကွက်နေတဲ့သူတွေဟာ မင်းတို့ပြောတဲ့ ‘သာလွန်အင်အား’ ဖြစ်နေပြီလကွ . . . ဟ ဟ ဟ”
ချောင်ပိတ်မိနေပြီဖြစ်သည့် အစွန်းရောက် အစိမ်းသူရဲအဘများကား မျက်နှာကြီးများ နီရာကနေ မည်းလာနေလေပြီ ဖြစ်၏။ ဒီနေ့စကားဝိုင်းခေါင်းစဉ်ကိုကား ‘သာလွန်အင်အား’ ဟု တပ်ရုံမှတပါး အခြားမရှိပြီ။
အဘစောမူးသာက စကားဝိုင်းကို လက်စသတ်ရန် ဟန်ပြင်နေလေပြီ ဖြစ်၏။ ရေနွေးခွက်ကို မော့ချလိုက်ကာ လည်ချောင်းရှင်းလိုက်၏။ ပြီးသည့်အခါ အတည်ပြုံးလေးနှင့် ဤသို့ ပြောပါ၏။
“သည်ရွာကလေးမှာပဲကြည့်ကွာ... မအလကို အရေခွံဆုတ်ချင်နေသူတွေ နုတ်နုတ်စဉ်းချင်နေသူတွေဟာ ရွာ့လူဦးရေရဲ့ ၉၉ ရာခိုင်နှုန်းရှိပြီး ဘောမတွေထက် ‘သာလွန်အင်အား’ ဆိုတာ မင်းတို့လည်း အမြင်ပါပဲဗျား”
“ဝါး ဟားဟား ဟားဟား ဟားဟား”
ဖေကြီး (လေရှီး)
