အင်တာနက်ဖြတ်တောက်ခံထားရတဲ့ ဖားကန့်မြို့နယ် ကန်ဆီးရွာနားက စစ်တပ်ပိုင် Mytel တာဝါတိုင်ကို နိုဝင်ဘာ ၂၁ ရက် ညပိုင်းက ဖောက်ခွဲဖျက်ဆီးခံရတယ်လို့ ဒေသခံတွေထံက သိရပါတယ်။
"မနေ့ည ၉ နာရီလောက်က ဖောက်ခွဲဖျက်ဆီးလိုက်တာ။ ဒီရက်ပိုင်း ဖားကန့်မြို့က တချို့နေရာတွေမှာ Mytel operator တခုပဲ အင်တာနက် နည်းနည်းသုံးလို့ ရနေတယ်။ messenger သုံးလို့ရတယ်။ Facebook news feed နည်းနည်းတက်တယ်။ Tiktok တွေ နည်းနည်းကြည့်လို့ ရတယ်။ ကျန်တဲ့ ဖုန်းလိုင်းတွေတော့ ဘာမှ မရဘူး" လို့ ဒေသခံတစ်ဦးက ပြောပါတယ်။
ဖားကန့်မြို့နယ်မှာ စုစုပေါင်း Mytel တာဝါတိုင် ၅ တိုင်ဖောက်ခွဲဖျက်ဆီးခံရပြီး ဖြစ်ပါတယ်။ ဖားကန့်မြို့နယ်ကို ဩဂုတ် ၂၀ ရက် ည ၈ နာရီကစပြီး အင်တာနက်ဖြတ်တောက်ထားတာ အခုဆို ၃ လကျော်ရှိလာပြီလည်း ဖြစ်ပါတယ်။
မွန်ပြည်နယ်၊ သထုံမြို့နယ်၊ နောင်ဘိုနဲ့ မရမ်းကုန်းကျေးရွာကြားက ဓာတ်ငွေ့ပိုက်လိုင်းတစ်ခု နိုဝင်ဘာ ၁၁ ရက် ည ၆ နာရီခွဲလောက်က ဖောက်ခွဲဖျက်ဆီးခံလိုက်ရတယ်လို့ ဒေသခံတွေက ဒီဗွီဘီကို ပြောပါတယ်။
အဲဒီဓာတ်ငွေ့ပိုက်လိုင်းကို အမည်မသိ လူတစ်စုက မိုင်းထောင် ဖောက်ခွဲတာ ဖြစ်ပြီး လူထိခိုက်ဒဏ်ရာ ရတာ မရှိဘူးလို့ ဆိုပါတယ်။
ဒေသခံတွေအဆိုအရ အဲဒီဓာတ်ငွေ့ပိုက်လိုင်းဟာ ထားဝယ်ကနေ ရန်ကုန်ကို ဆက်သွယ်ထားတဲ့ ပိုက်လိုင်း တစ်ခုဖြစ်ပြီး မိုင်းထောင်ခွဲဖျက်ဆီးခံရပြီးနောက် ည ၁၀ နာရီလောက်မှာ ဓာတ်ငွေ့ယို့စိမ့်မှု ရပ်သွားခဲ့တယ်လို့ ပြောပါတယ်။
စစ်ကောင်စီပိုင် ဓာတ်ငွေ့ပိုက်လိုင်း ဖောက်ခွဲဖျက်ဆီးတာဟာ သူတို့ လက်ချက်ဖြစ်တယ်လို့ သထုံမြို့နယ် ပြည်သူ့ကာကွယ်ရေးတပ်ဖွဲ့ TPDF ထုတ်ပြန်ပါတယ်။
အဲဒီဓာတ်ငွေ့ပိုက်လိုင်း ဖျက်ဆီးမှုကို ကရင်အမျိုးသား လွတ်မြောက်ရေးတပ်မတော် KNLA တပ်မဟာ ၁ တပ်ဖွဲ့ဝင်တွေ၊ သထုံပြောက်ကျားများတပ်ဖွဲ့နဲ့ သထုံမြို့နယ် ပြည်သူ့ကာကွယ်ရေးတပ်ဖွဲ့တို့က ပူးပေါင်း ဆောင်ခဲ့တာလို့ ထုတ်ပြန်ထားပါတယ်။
ဓာတ်ငွေ့ပိုက်လိုင်း ဖောက်ခွဲဖျက်ဆီးမှုနဲ့ ပတ်သက်ပြီး KNU တပ်မဟာ ၁ အတွင်းရေးမှူး ပဒိုစောစိုးမြင့်ကို ဒီဗွီဘီက ဆက်သွယ်မေးမြန်းခဲ့ပေမယ့် အောက်ခြေတပ်ဖွဲ့ဝင်တွေနဲ့ အဆက်အသွယ် မရသေးလို့ အတည်ပြုမပေးနိုင်ဘူးလို့ ဆိုပါတယ်။
သထုံ PDF ဟာ ပြီးခဲ့တဲ့ နိုဝင်ဘာ ၆ ရက်နေ့ကလည်း သထုံနဲ့ ဘီးလင်း ကမာစိုင်ကွက်သစ်အနီးမှာ စစ်ကောင်စီ ယာဉ်တန်းကို မိုင်းဆွဲတိုက်ခိုက်ထားပါတယ်။
အဲဒီမိုင်းဆွဲတိုက်ခိုက်မှုကြောင့် စစ်ကောင်စီဘက်က ၃ ဦး သေဆုံးပြီး ၄ ဦး ဒဏ်ရာ ရရှိခဲ့တယ်လို့ သထုံ PDF က ထုတ်ပြန်ထားပါတယ်။
