ရန်ကုန်မြို့မှာ အခုရက်ပိုင်းအတွင်း ညဘက်လျှပ်စစ်မီးပျက်တဲ့ချိန်ကို ပစ်မှတ်ထားကာ အုပ်စုဖွဲ့ ဖောက်ထွင်းမှုကျူးလွန်တာတွေရှိလာတယ်လို့ မြို့ခံတွေက ပြောပါတယ်။ 

ဧပြီ ၂၀ ရက် မနက် ၄ နာရီ ဝန်းကျင်လောက်က တာမွေမြို့နယ်၊ သီတာလမ်းမှာ ဖွင့်လှစ်ထားတဲ့ ပြည်တွင်း ဖြစ်ချည်လက်လီလက္ကား ဖြန့်ချိရေးဆိုင်တဆိုင် ဖောက်ထွင်းခံရပြီး ကျပ် သိန်း ၁၀၀ ကျော်တန်ဖိုးရှိတဲ့ ချည်ထည်မျိုးစုံပါဝင်တဲ့အထည် ၅၀၀ ကျော်လောက် ပါသွားခဲ့ပါတယ်။ 

ဆိုင်ရှင်အမျိုးသမီးက “ပုံမှန်ဆိုရင်တော့ ဆိုင်မှာ လူရှိတယ်၊ အဲ့နေ့က အစောင့်လည်း မရှိဘူး။ ပြီးတော့ ဆိုင်ပြောင်းဖို့ ပစ္စည်းတွေကို အကုန်ထုပ်ပြီး ထားခဲ့လိုက်တာ။ မနက် ၄ နာရီခွဲ ဝန်းကျင် မှာ ယူသွားတယ်။ မီးတွေကလည်း ပျက်နေတော့ CCTV တွေလည်း ပြန်ကြည့်လို့မရဘူး၊ အနောက်လမ်းကြားထဲကနေ ဝင်ခိုးသွားတာ။ လူ ၆ ယောက်ပါတယ်။ ကားနဲ့ လာခိုးသွားတာ၊ ကျမတို့လမ်းထဲက ပါတိတ်ဆိုင်တွေကိုလည်း လွန်ခဲ့တဲ့ နှစ်ပတ်က ဖောက်ထွင်းဖို့ ကြိုးစားတာတွေ ရှိခဲ့တယ်” လို့ ပြောပါတယ်။ 

ဧပြီ ၂၁ ရက် ညပိုင်းမှာလည်း တာမွေမြို့နယ်၊ သမိန်ဗရမ်းလမ်းထဲမှာ ဖွင့်ထားတဲ့ အထည်ဆိုင်ရဲ့ တံခါးနှစ် ဆင့်လုံးကို ချိုးဖောက်ပြီး ကာလတန်ဖိုး မြန်မာငွေ သိန်း ၃၀၀ ဝန်းကျင်ရှိ အထည်ရေ ၄၀၀၀ ကျော် ဖောက်ထွင်းခံခဲ့ရတယ်လို့ သိရပါတယ်။ 

တာမွေမြို့နယ်က ဆိုင်ဖောက် ထွင်းခံခဲ့ရသူ အမျိုးသမီးက “ချည်ထိုးတီရှပ် ဒီဇိုင်းအစုံရယ်၊ အင်ဗာတာ၊ ဘထ္တရီအိုးပါ အကုန်ခိုးသွားတာ။ ပြန်အမ်းဖို့ထားထားတဲ့အကြွေေတွေ၊ CCTV record စက်နဲ့ အဝတ်ချင်းတွေရော အကုန် ခိုးသွားတယ်။ သူခိုးက အုပ်စုလိုက်လာတာဖြစ်လို့ တခြားဆိုင်ပိုင်ရှင်တွေအနေနဲ့ လုံခြုံရေးကို တင်းတင်းကျပ်ကျထားကြပါ” လို့ ပြောပါတယ်။ 

စစ်အာဏာသိမ်းပြီးနောက် နိုင်ငံအနှံ့အပြားမှာ အုပ်စုဖွဲ့လုယက်မှုတွေ ၊ ဓားပြတိုက်မှုတွေ ၊ အွန်လိုင်း ကနေတဆင့် ငွေကြေးလိမ်လည်မှုစတဲ့ ဒုစရိုက်မှုမျိုးစုံ ရှိနေပေမယ့်  အရေးယူ ဖြေရှင်းနိုင်ခြင်း မရှိသေးပါဘူး။ 

ရေစကြိုမြို့နယ်အတွင်းက စစ်မှုထမ်းဟောင်းတွေကို တာဝန်ပြန်ထမ်းခိုင်းနေပြီး မထမ်းဆောင်သူတွေကို ပင်စင်လစာ မပေးတော့ကြောင်း အကြောင်းကြားလာတယ်လို့ စစ်မှုထမ်းဟောင်းများနဲ့ နီးစပ်သူတွေဆီက သိရပါတယ်။

စီးပွားရေး အဆင်ပြေတဲ့ စစ်မှုထမ်းဟောင်းတွေအတွက် တာဝန်မထမ်းဆောင်ဖို့ ရွေးချယ်ကြပေမယ့် စီးပွားရေးအဆင်မပြေတဲ့ မိသားစုတွေအတွက်ကတော့ တာဝန်ထမ်းဆောင်ဖို့ ငြင်းဆန်ရ ခက်ခဲတဲ့ အခြေအနေဖြစ်နေတယ်လို့ ဆိုပါတယ်။

စစ်မှု ထမ်းဟောင်းတစ်ဦးက “ပင်စင်လစာကိုမှီခိုပြီး အခုနေအချိန်ခါက စားသောက်နေထိုင်နေရတာ၊ တာဝန်ပြန်ထမ်းဆောင်ရမယ် မဟုတ်ရင် ပင်စင်လစာမပေးဘူးလို့ ဆိုတော့ ဘာလုပ်စားရမလဲ မသိဘူး။ အဆင်ပြေတဲ့သူတွေက ဟုတ်တယ်လေ၊ သူတို့ပင်စင်မရလည်း နေလို့ရတယ်။ ကျုပ်တို့လို လူတွေကျတော့ ပင်စင်ကို အမှီပြုပြီး စားသောက်နေရတာ လက်နက်တချို့ပေးထားတာတော့ရှိပါတယ်။ ဒါပေမယ့် အရည်အသွေးမှီတာမျိုးကို ပေးထားတာမဟုတ်ဘူး။ အဲ့ဒီတော့ တကယ်တိုက်ရရင် ကိုယ်ပဲသေမှာပေါ့။ စစ်မှုထမ်းဟောင်းဖြစ်နေပါတယ်ဆို ချိုကျိုးနားရွက်ပဲ့တွေ ချည်းပဲ အကောင်းလည်းတစ်ယောက်မှ မပါပါဘူး။ ငယ်တာရွယ်တာလည်း တစ်ယောက်မှ မရှိပါဘူး။ လစာပေးမယ်တော့ ပြောတယ်၊ ဒါပေမယ့် မလုပ်ရဲပါဘူးဗျာ။ ဘာလုပ်လို့ ဘာစားရမယ်ဆိုတာလည်း မသိပါဘူး” လို့ ပြောပါတယ်။

ဒေသခံပျူစောထီးတွေကိုလည်း အကြမ်းဖက်စစ်ကောင်စီက G3 နဲ့ တစ်လုံးထိုး သေနတ်တွေကို ပေးထားပြီး မြို့နယ်အတွင်း ပစ်ခတ်မှုတွေ ပြုလုပ်နေတယ်လို့ စစ်မှုထမ်းဟောင်း အသိုင်းအဝိုင်းက သိရပါတယ်။

နိုဝင်ဘာ ၂၂ရက်နေ့ ညပိုင်းကလည်း ည ၈ နာရီကျော် အပြင်မထွက်ရအမိန့် ထုတ်ပြန်ထားပြီး ကင်းလှည့်ပျူစောထီးများက ရေစကြိုမြို့မကြီးဈေး အပြင်ဘက်တန်းက ဈေးဆိုင်ခန်းတွေကို ဖောက်ထွင်းပြီး ပစ္စည်းတွေယူဆောင်သွားတယ်လို့လည်း မြို့ခံတွေဆီက သိရပါတယ်။

ဖောက်ထွင်းခံရမှုမှာ ၁၀ ပိဿာ ဆီပုံး ၂၀ ကျော် အခိုးခံခဲ့ရပြီး ရေစကြိုမြို့ပေါ်မှာ ပစ္စည်းပျောက်တာတွေ၊ ဖောက်ထွင်းခံရမှုတွေ မကြာခဏ ဖြစ်ပေါ်နေပါတယ်။

မြို့ခံတစ်ဦးက “အိမ်က ဆိုင်ကယ် အခိုးခံရတုန်းက ကိုယ့်ဆိုင်ကယ်မှန်း သိလျက်သားနဲ့ကို စခန်းမှာ ငွေပေးပြီး ပြန်ရွေးရတယ်။ အဲ့လိုပဲ သူတို့ အဲ့ခွေးတွေ ကင်းလှည့်တဲ့အချိန်တိုင်းမှာ ပျောက်တယ်၊ ပစ္စည်းပျောက်တယ်၊ အဖိုးတန်တွေပျောက်တယ်။ အခု ခိုးမှုမှာလည်း သူတို့ကင်းလှည့်တဲ့အချိန်ပဲ ဖောက်ထွင်းခံရတာပဲ။ ဆိုင်သော့ကိုတောင် ဖျက်ဝင်တယ်၊ ညဘက်မထွက်ရအမိန့် ထုတ်ထားတာက သူတို့ခိုးချင်သလိုခိုးဖို့ဖြစ်နေတာ” လို့ ပြောပါတယ်။

ရေစကြိုမြို့ပေါ်မှာ ည ၈ နာရီမှ မနက် ၄ နာရီအတွင်း အပြင်မထွက်ရအမိန့်ထုတ်ထားပြီး ပျူစောထီး အဖွဲ့ဝင်တွေသာ ညဘက်အချိန် မြို့လုံခြုံရေးကို အကြောင်းပြုကာ မြို့အနှံ့ သေနတ်ပစ်ဖောက်ရမ်းကားမှုတွေ ပြုလုပ်နေကြတယ်လို့ သိရပါတယ်။