ရခိုင်ပြည်နယ်၊ စစ်တွေမြို့၊ မေယုလမ်း၊ ရခိုင်ပြည်နယ်အစိုးရအဖွဲ့ရုံးအနီးရှိ အားကစားနှင့် ကာယပညာဦးစီးဌာနပိုင် စျေးဆိုင်ခန်းများအားလုံးကို  တလအတွင်း ဖြိုဖျက်ဖို့ စစ်ကောင်စီက ညွှန်ကြားထားတယ်လို့ ဆိုင်ခန်းပိုင်ရှင်တွေထံက  သိရပါတယ်။ 

စစ်ကောင်စီလက်အောက်ခံ အား/ကာ တာဝန်ရှိသူတွေက စက်တင်ဘာ ၂၃ ရက်က စျေးဆိုင်ခန်းပိုင်ရှင်တွေကို အစည်းအဝေးခေါ်ယူပြီး ဆိုင်ခန်းတွေ ဖြိုဖျက်ခိုင်းခဲ့တာဖြစ်ပြီး ကျပ်သိန်း ရာနဲ့ချီ ဆုံးရှုံးနစ်နာဖို့ရှိတယ်လို့ စျေးဆိုင်ပိုင်ရှင်တွေက ပြောပါတယ်။

စျေးဆိုင်ခန်းပိုင်ရှင်တစ်ဦးက “စစ်တွေကို ရောက်လာတဲ့ စစ်ကောင်စီ အကြီးအကဲက အမိန့်ချခဲ့တယ်။ ဆိုင်ခန်းတွေကို မဖြစ်မနေဖြိုဖျက်ပေးရမယ်လို့ပြောတယ်။ ကျမတို့က ဒီဆိုင်ခန်းတွေကို သိန်းရာချီပေးပြီး ဝယ်ယူခဲ့ကြရတာ။ အား/ကာကိုလည်း လစာပေးရသေးတယ်။ အလွန် နစ်နာကြရမှာပါ။"လို့ ပြောပါတယ်။

စစ်တွေမြို့ မေယုလမ်းရှိ အားကစားနှင့် ကာယပညာဦးစီးဌာနပိုင် မြေနေရာတွေမှာ  လွန်ခဲ့တဲ့ နှစ်ပေါင်း ၃၀ ကျော်ကတည်းက စျေးဆိုင်ခန်းတွေကို  မြို့ခံတွေက ကိုယ့်ဖာသာဆောက် လုပ်ခဲ့ကြရတာဖြစ်ပြီး အားကစားနှင့်ကာယပညာဦးစီးဌာန ရန်ပုံငွေအဖြစ် လစာငွေပေးသွင်းကာ ရောင်းချနေကြရတာလည်း ဖြစ်ပါတယ်။

စစ်တွေဒေသခံတဦးက "ဒီဆိုင်ခန်းတွေကို အရင်ကတည်းက ဖြိုခိုင်းနေတာဖြစ်တယ်။ ဒါပေမဲ့ ဆိုင်သည်တွေက သိန်းရာချီပေးဝယ်ထားကြရတာတွေရှိနေတော အား/ကာနဲ့ ညှိနှိုင်းပြီး မဖြိုရအောင် အပေးအယူလုပ်ကြိုးစားထားကြရတာ။ အခုကတော့ မရတောဘူး။ Luminous ဆိုင်က အရောင်းစာရေးမ (---)  မုဒိန်းကျင့် ဓားထိုးခံရတဲ့ သတင်းတွေက ကမ္ဘာ့မီဒီယာတွေအထိ ပျံ့နှံသွားတော့ စစ်ကောင်စီကမဖြစ်မနေ ဖြိုခိုင်းလိုက်တာ။"လို့ ပြောပါတယ်။

မေယုလမ်းမှာရှိတဲ့ အားကစားနှင့် ကာယပညာဦးစီးပိုင်မြေနေရာမှာ ဆောက်လုပ်ထားတဲ့ ဆိုင်ခန်းပေါင်း ၁၅ လောက်ရှိပါတယ်။ 

အရောင်းစာရေးမသေဆုံးမှုနဲ့ ပတ်သက်ပြီး တရားခံပေါ်ပေါက်နိုင်ရေး စစ်ကောင်စီကရော ရက္ခိုင့်တပ်တော်ကပါ စစ်ဆေးနေရာမှာ ရက္ခိုင့်တပ်တော်ဘက်က တရားခံဖော်ထုတ်နိုင်ပြီဖြစ်ကြောင်း တရားဝင်ထုတ်ပြန်ထားပါတယ်။

တရားခံဖြစ်သူဟာ အဆိုပါ ပလတ်စတစ်မျိုးစုံနဲ့ လူသုံးကုန်ပစ္စည်းရောင်းဝယ်ရေးဆိုင် Luminous ဆိုင်တာဝန်ခံ မျိုးမြင့်ဇော်ဖြစ်ကြောင်း အေအေ ပြောရေးဆိုခွင့်ရှိသူ ခိုင်သုခက ပဥ္စမအကြိမ် သတင်းစာရှင်းလင်းပွဲမှဦ ပြောဆိုထားတာပါ။

စစ်ကောင်စီဘက်ကတော့ Luminousဆိုင်ပိုင်ရှင် လင်မယားကို စစ်ဆေးခဲ့ပေမဲ့ လက်ရှိ စစ်တွေမြို့ Luminous ဆိုင်ခန်းအနီးရှိ Sittwe Gas ဂတ်စ်ဆိုင်မှာ အလုပ်လုပ်နေတဲ့ မောင်မျိုးချစ်စိုးကို ဖမ်းဆီးကာ လူသတ်မှုပုဒ်မ ၃၀၂ နဲ့  စစ်တွေမြို့နယ် တရားရုံးမှာ အမှုဖွင့်ထားပါတယ်။

တနင်္သာရီတိုင်းဒေသကြီး၊ မြိတ်မြို့နယ် စန္ဒဝတ်ကျေးရွာအုပ်စု  ရွှေဒူးကျေးရွာရှိ ဆုတောင်းပြည့်ဘုရားမုခ်ဦးဟောင်းကို ဖြိုဖျက်ရာမှ ပြိုကျပြီး  အလုပ်သမားတစ်ဦး သေဆုံးခဲ့တယ်လို့ မြို့နယ်ရဲတပ်ဖွဲ့မှုးရုံးက  သိရပါတယ်။

“အလုပ်သမား ငါးယောက်က မုခ်ဦးကို ဖြိုချ‌နေတုန်း  ပြိုကျတာပါ။ တစ်ဦးကအခင်းဖြစ်နေရာမှာပဲ ဆုံးသွားပြီး  နှစ်ဦး သာမန် ထိခိုက်ဒဏ်ရာရတယ်” လို့ မြိတ်မြို့နယ်   ရဲတပ်ဖွဲ့မှူးရုံး တာဝန်ကျ ရဲအရာရှိတစ်ဦးက ပြောပါတယ်။

မြိတ်မြို့နယ် စန္ဒဝတ်ကျေးရွာအုပ်စု ရွှေဒူးကျေးရွာ ကားလမ်းနံဘေး ဆုတောင်းပြည့်စေတီမုခ်ဦးအသစ်  ပြန်လည်တည်ဆောက်ဖို့ မနေ့ မနက် ၁၁ နာရီလောက်မှာ လုပ်သား ၅ ဦးက မုခ်ဦးအဟောင်းကို ဖြိုဖျက်နေစဥ် မုခ်ဦးဟောင်းပြိုကျခဲ့တာဖြစ်ပြီး  လုပ်သားချစ်မိုးဦး (၁၈ နှစ်) အပေါ် ကွန်ကိရစ်အစိတ်ပိုင်းတွေ ပိကျရာမှ သေဆုံးခဲ့တာလို့ ဆိုပါတယ်။

လူသေဆုံးမှုနဲ့ ပတ်သက်ပြီး မြိတ်မြို့မရဲစခန်းမှာ သေမှုသေခင်းအမှတ်စဉ် ၃ /၂၀၂၁ နဲ့ အမှုဖွင့်လှစ်ထားကာ ဓမ္မတာအတိုင်း သေဆုံးခြင်း ဟုတ် မဟုတ် စစ်ဆေးဆောင်ရွက်ထားတယ်လို့ သိရပါတယ်။

ရဲထွဋ်