ဗကသများအဖွဲ့ချုပ်ရဲ့ တာဝန်ခံကျောင်းသားတယောက်ကို အကြမ်းဖက်စစ်ကောင်စီရဲ့ စစ်ခုံရုံးက မနေ့က ထောင်ဒဏ်တသက်တကျွန်း ချမှတ်လိုက်ပါတယ်။

မြောက်ဥက္ကလာပမြို့နယ်ကျောင်းသားများသမဂ္ဂ (ဗကသများအဖွဲ့ချုပ်) ရဲ့ မြေပြင်လှုပ်ရှားမှုရေးရာ တာဝန်ခံ ကိုကောင်းဆက်ပိုင်ကို စစ်ကောင်စီက မတရားစွဲဆိုထားတဲ့ ပုဒ်မ ၅၀၅(က)၊ ၅၀(ည) ပုဒ်မတို့နဲ့ မတ် ၂၂ ရက်နေ့မှာ ထောင်ဒဏ်တသက်တကျွန်း ချလိုက်တာလို့ ဗကသများအဖွဲ့ချုပ်၊ သတင်းနဲ့ ပြန်ကြားရေးဗျူရိုက ထုတ်ပြန်ပါတယ်။

အသက် ၂၀ အရွယ် ဗကသရဲဘော် ကိုကောင်းဆက်ပိုင်ဟာ ၂၀၂၂ ခုနှစ် ဒီဇင်ဘာ ၁ ရက်နေ့မှာ စစ်တပ်ရဲ့ အကြမ်းဖက် ဖမ်းဆီးခံခဲ့ရတာဖြစ်ပါတယ်။

ပြီးခဲ့တဲ့ ဖေဖော်ဝါရီ ၉ ရက်နေ့ကလည်း အထက ၁၊ မြောက်ဥက္ကလာပ ကျောင်းသားများသမဂ္ဂ (ဗကသများအဖွဲ့ချုပ်) ရဲ့ ဒုဥက္ကဋ္ဌဖြစ်သူ ကိုဟိန်းထက် (ခ) ကိုပိုပို ကို စစ်ခုံရုံးက ထောင်ဒဏ် တသက်တကျွန်း ချမှတ်ခဲ့ပါတယ်။

ဒီမိုကရေစီကို တောင်းယူရင် သဒ္ဓါသလောက်ပဲ ရရှိမှာဖြစ်ပြီး တိုက်ယူမှသာ အပြည့်အဝရရှိမှာ ဖြစ်တယ်လို့ ဗမာနိုင်ငံလုံးဆိုင်ရာကျောင်းသားများသမဂ္ဂ (ဗကသများအဖွဲ့ချုပ်)က တိုက်တွန်းနှိုးဆော်လိုက်ပါတယ်။

ပြည်သူလူထုတရပ်လုံးအနေနဲ့ စစ်ကောင်စီကပြုလုပ်မယ့် ရွေးကောက်ပွဲရဲ့ သရုပ်မှန်ကို သိရှိဖို့နဲ့ စစ်ကောင်စီထိန်းချုပ်တဲ့ မြို့နေလူထုအနေနဲ့ အဲဒီရွေးကောက်ပွဲကို ဘယ်လိုနည်းလမ်းတွေနဲ့ ဆန့်ကျင်သပိတ်မှောက်လို့ရမလဲ ဆိုတာကို ဗကသများအဖွဲ့ချုပ်က ဖေဖော်ဝါရီ ၅ ရက်မှာ ရုပ်သံဗီဒီယိုနဲ့ လှုံ့ဆော်လိုက်ပါတယ်။

စစ်အုပ်စုက ပြုလုပ်မယ့် ရွေးကောက်ပွဲဟာ အာဏာသိမ်းစစ်တပ်ရဲ့ နိုင်ငံရေးထိုးစစ် တခုမျှသာ ဖြစ်ပြီး ဒီမိုကရေစီအင်အားစုတွေနဲ့ လက်နက်ကိုင်တော်လှန်ရေးတပ်တွေကို ချေမှုန်းနိုင်တာမျိုး မရှိတဲ့အခါ နိုင်ငံရေးအရ ထိုးစစ်ဆင်လာတာဖြစ်ပြီး ဒီနိုင်ငံရေးထိုးစစ်ကို ကြံ့ကြံ့ခံ ရင်မဆိုင်နိုင်ရင်တော့ ဒီမိုကရေစီအင်အားစုတွေ ပြိုကွဲတာမျိုး၊ အုပ်စုကွဲသွားတာမျိုးတွေ ဖြစ်လာနိုင်တယ်လို့ သတိပေး ပြောကြားသွားပါတယ်။

ဗမာနိုင်ငံလုံးဆိုင်ရာ ကျောင်းသားသမဂ္ဂများအဖွဲ့ချုပ်အနေနဲ့ အခုမှမဟုတ်ဘဲ လွန်ခဲ့တဲ့ ၂၀၂ဝ ရွေးကောက်ပွဲ အပါအဝင် စစ်အုပ်စုက ရေးဆွဲထားတဲ့ ၂၀၀၈ ဖွဲ့စည်းပုံအခြေခံဥပဒေအောက်က ဘယ်ရွေးကောက်ပွဲမဆို ဆန့်ကျင်ပြီး “No vote” ပြုလုပ်ဖို့ တိုက်တွန်းခဲ့တဲ့ ဖြစ်ရပ်တွေ ရှိပါတယ်။

ဒါ့အပြင် စစ်အုပ်စု ထိန်းချုပ်ထားနိုင်သေးတဲ့ မြို့နေလူထုအနေနဲ့ ရွေးကောက်ပွဲကို အတတ်နိုင်ဆုံး မသွားဘဲ ဆန့်ကျင်သပိတ်မှောက်ရမှာဖြစ်သလို အတင်းအကျပ် ခေါ်ယူရင်လည်း ပယ်မဲဖြစ်အောင် ဖန်တီးတာမျိုးနဲ့ သပိတ်မှောက်နိုင်တယ်လို့ လမ်းညွှန်ထားပါတယ်။ ရွေးကောက်ပွဲ ဆိုတာ ဒီမိုကရေစီမဟုတ်ဘဲ ဒီမိုကရေစီရဲ့ တစိတ်တပိုင်းသာ ဖြစ်တဲ့အကြောင်းလည်း ပြောဆိုထားပါတယ်။