မန်ယူအသင်းဟာ အငှားစာချုပ်နဲ့ခေါ်ယူထားတဲ့ တိုက်စစ်မှူး ဗက်ဟော့စ်ကို အပြီးသတ်ခေါ်ယူခြင်း မပြုဘဲ ဘန်လေအသင်းဆီပြန်လွှတ်ဖို့ ဆုံးဖြတ်ခဲ့ပါတယ်။

ဟော်လန်တိုက်စစ်မှူးဟာ ပြီးခဲ့တဲ့ဇန်နဝါရီအပြောင်းအရွှေ့တုန်းက အသင်းကနေ ထွက်ခွာသွားတဲ့ စီရော်နယ်ဒိုရဲ့နေရာမှာ အစားထိုး ရောက်လာခဲ့တာပါ။ 

ယူနိုက်တက်အသင်း တိုက်စစ်က ဗက်ဟော့စ်နဲ့ မာစီယယ်တို့ဟာ အသင်းမှာ ခြေစွမ်းပြနိုင်ခြင်းမရှိတာကြောင့် လာမယ်ရာသီမှာ တိုက်စစ်မှူးသစ်တစ်ဦးခေါ်ယူဖို့ပဲ မန်ယူအသင်းက စီစဉ်ထားတာပါ။ 

ဗက်ဟော့စ် ဟာ ယူနိုက်တက်နဲ့ ပြိုင်ပွဲစုံ၂၆ ပွဲမှာ နှစ်ဂိုးသာသွင်းယူနိုင်ခဲ့ပြီး ပရီးမီးယားလိဂ်မှာတော့ ဂိုးသွင်းယူနိုင်ခြင်း မရှိသေးပါဘူး။

ဗက်ဟော့စ်ကို ခြောက်လအငှားစာချုပ်နဲ့ခေါ်ယူခဲ့မှုအတွက် မန်ယူအသင်းက မိခင်ကလပ် ဘန်လေအသင်းကို ပေါင် ၂ သန်းခွဲပေးချေခဲ့ရတာပါ။

ယူနိုက်တက် အနေနဲ့ လာမယ့်ရာသီအတွက် စပါးတိုက်စစ်မှူးဟယ်ရီကိန်းနဲ့ နာပိုလီတိုက်စစ်မှူး အိုဆမ်ဟမ်တို့ကို ပစ်မှတ်ထားနေတယ်လို့သိရပါတယ်။

တိုက်စစ်မှူးဗက်ဟော့စ်ဟာ ဟော်လန်အသင်းမှာကော မန်ယူအသင်းမှာပါ ကစားဖို့ လုံလောက်မှုမရှိကြောင်း ဟော်လန်ဂန္ထဝင်ကစားသမားကြီး ရုဒ်ဂူးလစ်က ဝေဖန်သွားပါတယ်။

ဗက်ဟော့စ်ဟာ မန်ယူအသင်းမှာ သွင်းဂိုးနှစ်ဂိုးသာရသေးပြီး ပရီးမီးယားလိဂ်မှာတော့ ဂိုးမရသေးပါဘူး။ 

ဟော်လန်နဲ့ ဂျီဘရော်တာအသင်းတို့ ကစားခဲ့တဲ့ ပွဲစဉ်မှာတော့ ဂိုးကန်သွင်းခွင့် ၉ ကြိမ်အထိရခဲ့ပေမဲ့ ဂိုးမသွင်း နိုင်ခဲ့တဲ့အပေါ်မှာ ရုဒ်ဂူးလစ်ကဝေဖန်စကားဆိုခဲ့တာပါ။

ဗက်ဟော့စ်က ကမ္ဘာ့အကောင်းဆုံးအသင်းမှာပါဝင်ခဲ့ဖူးလို့ ချီးကျူးစရာဖြစ်ခဲ့ပေမဲ့ လက်ရှိခြေစွမ်းအရ မန်ယူအသင်းမှာတင်မဟုတ်ဘဲ ဟော်လန်အသင်းမှာပါ ကစားဖို့ လုံလောက်တဲ့ စွမ်းဆောင်ရည်မရှိကြောင်း ဂူးလစ်ကဝေဖန်ခဲ့တာပါ။

ဗက်ဟော့စ်ကတော့ ဂျီဘရော်တာကို ၃ ဂိုး ဂိုးမရှိနဲ့ အနိုင်ရခဲ့ပေမဲ့ အဲဒီပွဲစဉ်က သူ့ရဲ့ခြေစွမ်းက လက်ခံနိုင်စရာမရှိကြောင်း ဝန်ခံထားပါတယ်။