ဗင်နီဇွဲလားသမ္မတ နီကိုလက်စ်မာဒူရိုက အတိုက်အခံခေါင်းဆောင် ဟွမ်ဂွိုင်ဒိုကို ဖမ်းဆီးမယ့် ဝရမ်း ထုတ်ပြန်ဖို့ စီစဉ်နေတယ်လို့ ဟွမ်ဂွိုင်ဒိုက ဧပြီ ၂ ရက်မှာ စွပ်စွဲပြောဆိုလိုက်ပါတယ်။

သတင်းမီဒီယာတွေဆီ ပေးပို့ထားတဲ့ ကိုယ်ပိုင် ယူကျုအကောင့်ပေါ်က ဗီဒီယိုထဲမှာ ဂွိုင်ဒိုက မာဒူရိုဟာ တခြားအတိုက် အခံခေါင်းဆောင်တွေကိုပါ ဖမ်းဆီးဖို့ ကြံစည်နေတယ်လို့ ပြောဆိုခဲ့ပါတယ်။ 

"တကယ်လို့ ငါ့ကိုသာ ဖမ်းဆီး လိုက်မယ်ဆိုရင် ကမ္ဘာကြီးတစ်ခုလုံးက အာဏာရှင်တစ်ယောက်လို ရှုမြင်နိုင်တယ်ဆိုတာ မင်းသိမှာပါ" လို့  ဂွိုင်ဒိုက သမ္မတကို ဗီဒီယိုထဲမှာ တိုက်ရိုက်ရည်ညွှန်း ပြောဆိုသွားတာပါ။ 

ဒီနှစ်အစောပိုင်းတုန်းကလည်း ဗင်နီဇွဲလားအတိုက်အခံအစိုးရက ကြားဖြတ်အစိုးရဟောင်းရဲ့ ခေါင်းဆောင်အဖြစ် ဂွိုင်ဒိုကို အစားထိုးခန့်အပ်ခဲ့သလို စင်ပြိုင် ဥပဒေပြုလွှတ်တော် အတွက်လည်း လူ ၃ ဦးပါ ခေါင်းဆောင်မှုအသစ်တစ်ရပ်ကို အဆိုပြုရွေးချယ်ခဲ့ပါတယ်။

ဗင်နီဇွဲလားအစိုးရက အများပြည်သူဆိုင်ရာရာထူး တာဝန်ထမ်းဆောင်ခြင်း မပြု ဖို့  ဂွိုင်ဒိုကို တားဆီးထားပေမယ့်လည်း လာမယ့်အောက်တိုဘာလ အကြိုရွေးကောက်ပွဲ မှာ ဝင်ပြိုင်ချင်တယ် လို့ ဂွိုင်ဒိုဘက်က ထုတ်ဖော်ပြောကြားထားပါတယ်။ 

ဗင်နီဇွဲလားနိုင်ငံမှာ ငွေကြေးဖောင်းပွမှုကခန့်မှန်းခြေ  ၃၀၀ ရာခိုင်နှုန်း တက်လာပြီးနောက် ဇန်နဝါရီ ၁၆ ရက်က ဗင်နီဇွဲလား မြို့ကြီး ၆ မြို့ထက်မနည်းမှာ ကျောင်းဆရာ၊ ဆရာမတွေ၊ အငြိမ်းစားတွေနဲ့ သမဂ္ဂတွေဟာ လစာတွေ ပိုပြီးကောင်းကောင်းပေးဖို့  အစိုးရကို ချီတက် တောင်းဆိုခဲ့ကြပါတယ်။

မြို့တော် ကာရာကက်စ်မှာ ဆိုင်းဘုတ်တွေကိုင်ဆောင်ထားတဲ့ ဆန္ဒပြသူတွေဟာ  “ပြည်သူတွေက ငတ်ပြတ်နေပြီ၊ သူတို့တွေက နားမထောင်ကြဘူး” လို့ အိုးခွက်တွေတီးပြီး ကြွေးကြော်သံတွေကိုလည်း ဟစ်ကြွေးကာ အစိုးရရှေ့နေရုံး အဆောက်အအုံကို ချီတက်ခဲ့ကြတာပါ။

ဗင်နီဇွဲလား အစိုးရကျောင်းဆရာတဦးအတွက် အနိမ့်ဆုံး လစဉ်လခဟာ ၁၀ ဒေါ်လာလောက် ဖြစ်ပြီး တက္ကသိုလ်ပါမောက္ခတွေက ဒေါ်လာ ၆၀ နဲ့ ၈၀ ကြား ရရှိကြတာလို့ ကရာကာ့စ် ဆရာများသမဂ္ဂခေါင်းဆောင် ဂရစ်ဆဲလ်ဒါ ဆန်းချက်ဇ်က ပြောပါတယ်။

“ဒီနေ့ခေတ်မှာ ဆရာတွေတင်မကဘဲ ပြည်သူ့ဝန်ထမ်းအားလုံး ရှားပါးမှုအောက်မှာ နေထိုင်နေကြရတာ” လို့ ပြည်သူ့ဝန်ထမ်း ဟိုဆေးကာဒီက ပြောပါတယ်။

သမ္မတနဲ့ သူ့အဖွဲ့က အကောင်းဆုံး စားသောက်ဆိုင်တွေမှာ စားနေတဲ့အချိန်မှာ ပြည်သူတွေက ကြက်ခြေထောက်နဲ့ ကြက်လည်ပင်းကို စားနေရတာဖြစ်ပြီး သူတို့တွေ ဖာရာရီကားစီးပြီး လာ့စ်မာစီဒီးစ် စီးပွားရေးစင်တာတွေ သွားနေချိန်မှာ ပြည်သူ‌တွေက ဘတ်စ်ကားလက်မှတ်ဖိုးတောင် မတတ်နိုင်ကြဘူးလို့ ဆိုပါတယ်။

သမ္မတ နိကိုလပ်စ် မာဒူရိုရဲ့ အစိုးရဟာ ငွေကြေးဖောင်းပွမှုကို တိုက်ဖျက်ဖို့ ကြိုးပမ်းရာမှာ အသစ်တဖန် စိန်ခေါ်မှုတွေနဲ့ ရင်ဆိုင်နေရတာပါ။

ဗင်နီဇွဲလားနိုင်ငံရဲ့ ငွေကြေးဖောင်းပွမှုဟာ မနှစ်က ၃၀၅ ရာခိုင်နှုန်းအထိ ရောက်ရှိခဲ့ကြောင်း ပြင်ပ စီးပွားရေးပညာရှင်တွေအဖွဲ့က တရားဝင်အချက်အလက် မရရှိဘဲ အညွှန်းကိန်းတွေကို တွက်ချက်ပြီး ပြောဆိုထားပါတယ်။

အစိုးရဟာ မနှစ် မတ်လကတည်းက အစိုးရဝန်ထမ်းတွေရဲ့ လစာကို ညှိနှိုင်းပေးခြင်းမရှိဘဲ ဗင်နီဇွဲလားမှာ ငွေကြေးဖောင်းပွမှုကနေ ရုန်းထွက်နိုင်စေဖို့ အသုံးစရိတ်တွေ လျှော့ချဖို့နဲ့ အခွန်တွေ တိုးကောက်ခံဖို့ တစိတ်တပိုင်း လုပ်ဆောင်ခဲ့တာပါ။

ဒါပေမဲ့ မနှစ်က ဒုတိယနှစ်ဝက်မှာ နိုင်ငံခြားငွေ ဝယ်လိုအားဟာ ဗဟိုဘဏ်ကထုတ်ပေးတဲ့ အပတ်စဉ် ဒေါ်လာထောက်ပံ့မှုထက် ကျော်လွန်သွားခဲ့ပြီးတော့ ဘိုလီဗာ ငွေကြေးတန်ဖိုးက ပိုကျဆင်းသွားပါတယ်။

သီတင်းပတ်ကုန်ချိန်ကတော့ အစိုးရဟာ ခန့်မှန်းတွက်ချက်ထားတဲ့ ငွေလဲနှုန်းအတိုင်း ၂၉ ဒသမ ၈၀ ဒေါ်လာနဲ့ညီမျှတဲ့ ဘောနပ်စ် ဆုကြေးငွေကို ပြည်သူ့ဝန်ထမ်းတွေကို ပေးခဲ့ပါတယ်။