လက်ရှိ နွေဦးတော်လှန်ရေးဟာ ပြည်သူ့တော်လှန်ရေးဖြစ်တာနဲ့အညီ စစ်အာဏာရှင်ကို ဆန့်ကျင်တိုက်ပွဲဝင်နေရာမှာ ချင်းတိုင်းရင်းသားအားလုံးအနေနဲ့ အတူညီညွတ်စွာ ပူးပေါင်းပါဝင်ကြဖို့  ချင်းအမျိုးသားတပ်ဦး (CNF/CNA)က တိုက်တွန်းလိုက်ပါတယ်။

ဖေဖော်ဝါရီ ၂၀ ရက်မှာ ကျရောက်တဲ့  (၇၅) နှစ်မြောက် ချင်းအမျိုးသားနေ့ အထိမ်းအမှတ်ထုတ်ပြန် ကြေညာလိုက်တာဖြစ်ပြီး နွေဦးတော်လှန်ရေးကို  နောက်ဆုံးတိုက်ပွဲအဖြစ်မှတ်ယူကာ CNA/CNF အနေနဲ့ ဘုံနိုင်ငံရေးရည်မှန်းချက်နဲ့ ယုံကြည်ချက် တူညီတဲ့ မဟာမိတ်တို င်းရင်းသားတော်လှန်ရေးအဖွဲ့တွေ၊ NUG/PDF တပ်ဖွဲ့တွေနဲ့အတူ ပူးပေါင်းကာ တော်လှန်ရေးအဆုံးအထိ တိုက်ပွဲဝင်သွား မယ်လို့ ဆိုပါတယ်။

(၇၅) နှစ်မြောက် ချင်းအမျိုးသားနေ့အထိမ်းအမှတ်ပွဲတွေကို ပြည်တွင်းနဲ့ ကမ္ဘာ့နိုင်ငံအသီးသီးမှာ ကျင်းပနေကြသလို ကနေဒါနိုင်ငံ၊ ဗန်ကူးဗားမြို့မှာလည်း ရစ်ချ်မွန်း၊  Riverside Grand Ballroom ခန်းမမှာ ဒေသစံတော်ချိန် ဖေဖော်ဝါရီ ၁၈ ရက်က ကျင်းပသွားပါတယ်။

ဒီပွဲတော်မှာ ဗန်ကူးဗားရောက်ချင်းတိုင်းရင်းသားတွေနဲ့ မြန်မာပြည်သားတွေ တက်ရောက်ခဲ့ကြပြီး  ချင်းတိုင်းရင်းသားခေါင်းဆောင်တွေက ချင်းအမျိုးသားနေ့နဲ့ ပတ်သက်လို့ မိန့်ခွန်းတွေ ပြောကြား ခဲ့ကြပါတယ်။

ချင်းအမျိုးသားနေ့ကို ပြည်ပမှာ ပျော်ပျော်ရွှင်ရွှင်ဆင်နွှဲနေကြပေမဲ့ ချင်းပြည်နယ်မှာတော့ ချင်းပြည်သူတွေနဲ့ ရဲဘော်တွေဟာ အဆင်းရဲ အပင်ပန်းခံ အသက်ပေးနေကြရတယ်၊ နွေဦးတော်လှန်ရေးမအောင်မချင်း၊ စစ်အာဏာရှင်မင်းအောင်လှိုင် မပြုတ်ကျမချင်း ချင်းတိုင်းရင်းသားတွေနဲ့ တိုင်းရင်းသားပြည်သူအားလုံး လက်တွဲညီညီနဲ့ တော်လှန်ရေးမှာ ပါဝင်ကြဖို့တိုက်တွန်းတယ် ဗန်ကူးဗားချင်းကွန်မြူနတီ အကြံပေးပုဂ္ဂိုလ် ပူးခါရ်မန်း ကပြောပါတယ်။

“ဒီကနေ့ဒီအချိန်မှာ ရန်သူမင်းအောင်လှိုင် စစ်အစိုးရဟာ ရက်စက်ကြမ်းကြုတ်စွာနဲ့ ၊ လူမဆန်စွာနဲ့ အပြစ်မဲ့ပြည်သူတွေ၊ နေ့စဉ်နေ့တိုင်း သတ်ဖြတ်နေတယ်၊ မီးရှို့နေတယ်၊ ငါတို့ ကိုယ်ပိုင်ပြဋ္ဌာန်းခွင့် အခွင့်အရေး၊ ဒီမိုကရေစီအခွင့်အရေး၊ လူ့အခွင့်အရေးအားလုံးကိုချိုးဖောက်နေတဲ့ ဒီစစ်အစိုးရကို ဒီတော်လှန်ရေးရဲဘော်အားလုံးနဲ့ ကျနော်တို့ ချင်းပြည်သူတွေ ပူးပေါင်းပြီးတော့မှ နောက်မဆုတ်ဘဲ နဲ့ အတူတကွတိုက်ပွဲဝင်မယ်ဆိုရင် ကျနော်တို့ မကြာခင် အောင်ပွဲရတော့မှာဖြစ်ပါတယ်။ ဆိုတော့ ရှေ့တန်းကနေတဲ့ ရဲဘော်တွေအားလုံး စိတ်ဓာတ်မကျပါနဲ့၊ တိုက်လေယာဉ်ပဲလာလာ၊ ရဟတ်ယာဉ်ပဲလာလာ မကြောက်ကြပါနဲ့ ၊ ငါတို့ဟာ ရဲရင့်တဲ့ သတ္တိရှိတဲ့ ချင်းလူမျိုးတွေဖြစ်ပါတယ် ၊ အာဇာနည် စိတ်ဓာတ်နဲ့ တို့ရန်သူ မင်းအောင်လှိုင် စစ်အစိုးရကို အမြစ်ပြုတ်သည်အထိ လက်မလျှော့ဘဲနဲ့ တိုက်ပွဲဝင်ကြပါ။ နိုင်ငံခြားမှာရောက်နေတဲ့ ချင်းပြည်သူအားလုံးက နောက်တန်းကနေ ခင်ဗျားတို့အတွက် မားမားမတ်မတ် ရပ်တည်ပေးနေပါတယ်။ ခင်ဗျားတို့နဲ့ အတူတကွ တိုက်ပွဲဝင်နေပါတယ်။”

ချင်းတိုင်းရင်းသားတွေရဲ့ ကိုယ်ပိုင်လက္ခဏာတွေ၊ လူသားအဖြစ်ရပ်တည်နေထိုင်ဖို့ တိုက်ခိုက်ခံနေရပြီး ချင်းပြည်နယ်မှာ ထန်တလန်မှာ ဘေးဒုက္ခသည်တွေခံစားနေရကြောင်းနဲ့   ကိုယ်ပိုင်ပြဋ္ဌာန်းခွင့်နဲ့ ဒီမိုကရေစီရေးအခွင့်အရေးတွေပြန်ရဖို့  ချင်းလူမျိုးတွေရဲ့ သင်္ကတေ အောက်ချင်းငှက်လို သစ္စာရှိရှိ၊ စည်းလုံးညီညွတ်မှုရှိကြဖို့လည်း ကနေဒါနိုင်ငံ အကျဉ်းဦးစီးဌာနအရာရှိတဦးဖြစ်တဲ့  ပူးလျှန်းမောင်က တိုက်တွန်းပြောပါတယ်။

“ဒီကနေ့ မြန်မာပြည်မှာ အကုန်လုံးသိတဲ့ နွေဦးတော်လှန်ရေးမှာ ကျနော်တို့တိုင်းရင်းသားအချင်းချင်း စုစည်းညီညွတ်မှုနဲ့ ကျနော်တို့ တော်လှန်ကြတယ်။ ဒီဟာ လူမျိုးတမျိုးတည်းနဲ့ လုပ်လို့မရတဲ့ကိစ္စ ဖြစ်ပါတယ်၊ ထိုနည်းတူ ယူအက်စ်လိုနိုင်ငံ အီးယူ အစရှိသဖြင့် အစရှိတဲ့နိုင်ငံတွေကလည်း ကျနော်တို့ရဲ့ နွေဦးတော်လှန်ရေးကို ပံ့ပိုးကူညီကြတယ်။ ဒါကိုကြည့်ခြင်းအားဖြင့် လူမျိုးတမျိုးဟာ တချိန်တည်း တနေရာထဲမှာ ရပ်တည်လို့မရဘူး။ တခြားသောလူမျိုးတွေနဲ့ ပေါင်းပြီးတော့မှ ကျနော်တို့ဘဝကို တည်ဆောက်ကြရမယ်။”

ချင်းအမျိုးသားနေ့ပွဲမှာ  ချင်းတိုင်းရင်းသား လူငယ်မျိုးဆက်သစ်တွေက  ချင်းရိုးရာ ဝါးညှပ်အကတွေ၊ တေးသီးချင်းတွေနဲ့ သီဆိုဖျော်ဖြေခဲ့ကြပါတယ်။

နှစ်စဉ်နှစ်တိုင်းချင်းရိုးရာဓလေ့အနေနဲ့ ဗန်ကူးဗားမှာ ကိုဗစ်အချိန်ကာလကလွဲလို့ မဖြစ်မနေ ကျင်းပလေ့ရှိကြောင်းနဲ့ ရိုးရာအမွေအနှစ်တွေ မျိုးဆက်သစ်တွေကို ဆက်လက်ဖြန့်ဝေသွားစေလိုတဲ့ ရည်ရွည်ချက်နဲ့ ကျင်းပတာဖြစ်တယ်လို့  မတူပီချင်းတိုင်းရင်းသူ မိုင်မီးမီးက ပြောပါတယ်။ 

“ဒီလိုလုပ်ရခြင်းအားဖြင့် ကျမတို့ ပီတိလည်းဖြစ်တယ်၊ အရမ်းလည်းပျော်ရွှင်တယ်၊ ကျမတို့ရိုးရာ၊ ရှိသမျှ၊ ရှိသမျှရိုးရာအလှ  ရိုးရာထုံးတန်းစဉ်လာကိုပြခွင့်ရတဲ့အတွက်  ကျမတို့ စိတ်ထဲမှာ အရမ်းကြည်နူးတယ်၊ အခုတော်လှန်ရေးကာလမှာ ကျမတို့အဖြစ်ချင်ဆုံးကတော့ ဒီအရေးတော်ပုံ မြန်မြန်အောင်မြင်ပြီးတော့ လူတိုင်းပေါ့ ကျမတို့ ဒီဗန်ကူးဗားမှာ ချင်းအမျိုးသားနေ့ကို လွတ်လွတ်လပ်လပ်လုပ်ရသလို အကုန်လုံး ကိုယ့်ဘာသာ ကိုယ့်လူမျိုး အကုန်လုံး လူမျိုးအသီးသီး တိုင်းရင်းသားအသီးသီး လွတ်လွတ်လပ်လပ်နဲ့ ဒီလိုမျိုးပျော်ရွှင်နိုင်အောင် ကျမတို့လိုချင်တာပေါ့ အဓိကကတော့၊ ဒါပေမဲ့ အခုလောလောဆယ်ကြုံတွေ့နေရပေမဲ့ တနေ့ လွတ်မြောက်တဲ့ အခါကျရင် ကျမတို့အားလုံး တန်းတူ ဒီလိုမျိုးပျော်ရမှာပဲလို့ ကျမ အားပေးချင်တယ်။” 

ချင်းအမျိုးသားနေ့ပွဲတွေကို  မြန်မာပြည်တွင်းမှာသာမက နိုင်ငံတကာရောက် ချင်းလူမျိုးတွေကလည်း ချင်းတိုင်းရင်းသား ရိုးရာ ရောင်စုံဝတ်စုံ၊ အကမျိုးစုံတွေနဲ့  အလားတူ ကျင်းပလေ့ရှိတာပါ။

မြန်မာပြည်လွတ်လပ်ရေးရရှိပြီးနောက် ၁၉၄၈  ဖေဖော်ဝါရီ ၂၀ ရက်က ချင်းပြည်နယ်၊ ဖလမ်းမြို့မှာ လူထုညီလာခံကျင်းပပြီး ပဒေသရာဇ်အုပ်ချုပ်ရေးစနစ်ဟောင်းကို ဒီမိုကရေစီစနစ်နဲ့ အစားထိုးဖို့ဆုံးဖြတ်ခဲ့တဲ့ သမိုင်းဝင် နေ့ထူးနေ့မြတ်ကို ကချင်းအမျိုးသားနေ့ အဖြစ်သတ်မှတ် နှစ်စဉ် ကျင်းပတာဖြစ်ပါတယ်။

စစ်ရာဇဝတ်မှုတွေကျူးလွန်နေတဲ့ မြန်မာစစ်တပ်ကို အရေးယူပေးဖို့နဲ့ မြန်မာပြည်ရှိ အရပ်သားပြည်သူတွေကို ကာကွယ်ပေးဖို့ ကနေဒါအစိုးရကို  ကနေဒါရောက်မြန်မာတွေက  တိုက်တွန်းတောင်းဆို လိုက်ပါတယ်။

ကနေဒါနိုင်ငံ၊ ဗန်ကူးဗားမြို့၊ ဆာရေးခရစ်ယာန်ဘုရားကျောင်းမှာ ဒေသစံတော်ချိန် ဖေဖော်ဝါရီ ၁၂ ရက်က မြန်မာပြည်ဖွားတိုင်းရင်းသားပေါင်းစုံ ပါဝင်ဆင်နွှဲခဲ့ကြတဲ့  ဖယ်ဒရယ်ပြည်ထောင်စုနေ့ပွဲတော် ကျင်းပရာမှာ တောင်းဆိုလိုက်တာဖြစ်ပါတယ်။

မြန်မာနိုင်ငံတဝန်းမှာ အာဏာရှင်စစ်တပ်ရဲ့  အရပ်သားတွေကို ပစ်မှတ်ထားလေကြောင်းတိုက်ခိုက်မှုတွေ၊ လက်နက်ကြီးတွေနဲ့ ပစ်ခတ်တိုက်ခိုက်မှု၊ ကျေးရွာတွေကို မီးရှို့ဖျက်ဆီးမှုတွေကို ကနေဒါအခြေစိုက် မြန်မာလူထုအခြေပြု အဖွဲ့အစည်းတွေ အပြင်းအထန် ကန့်ကွက်ရှုတ်ချလိုက် ပါတယ်။

ဗန်ကူးဗားချင်းကွန်မြူနတီအဖွဲ့မှ ဆလိုင်းကိုအောင်က “ကျနော်တို့ရဲ့ နေ့တိုင်းလိုလို မျက်ရည်သွေးစီးကျနေတဲ့ ကျနော်တို့ပြည်သူတွေရဲ့ ဟစ်အော်သံကြီးကို ဒီကနေဒါအစိုးရအနေနဲ့ အမြဲတမ်း နားဆွံ့ပေးပြီးတော့ ကျနော်တို့အတွက် စာနာထောက်ထားပြီးတော့ အမြဲတမ်းကူညီပေးပါလို့ ပြောချင်ပါတယ်။ ကျနော်တို့ချင်းပြည်နယ်မှာတော့ နေ့စဉ်နဲ့အမျှ တိုက်ပွဲတွေ ဗုံးကြဲသံတွေ လေယာဉ်နဲ့ Fighter တိုက်လေယာဉ်နဲ့ တနေ့တခြားပိုပြီးတော့ ဆုတ်ယုတ်ကြမ်းကြုတ်လာတဲ့ အခြေအနေတွေကို ကျနော်တို့ ငိုကြွေးသံတွေ ဟစ်ကြွေးသံတွေ အမြဲတမ်းကြားနေရပါတယ်”လို့ ဒီဗွီဘီကို ပြောပါတယ်။

စစ်အာဏာသိမ်းပြီးနောက် ချင်း၊ ကချင်၊ ကရင်၊ မွန်၊ ရခိုင်၊ စစ်ကိုင်း၊ မကွေးစတဲ့ဒေသတွေမှာ စစ်တပ်က ဂျက်တိုက်လေယာဉ်တွေနဲ့ အရပ်သားပြည်သူတွေကို ပစ်မှတ်ထားတိုက်ခိုက်မှုတွေ သိသိသာသာပိုမိုများပြားလာကာ စာသင်ကျောင်းတွေ၊ ဘုရားကျောင်းတွေနဲ့ ဘာသာရေးအဆောက် အဦးတွေကိုလည်းတိုက်ခိုက်ခဲ့လို့ ကျောင်းသားကလေးငယ်တွေ အပါအဝင် အပြစ်မဲ့ပြည်သူတွေ သေဆုံးခဲ့ရသလို ထောင်ပေါင်းများစွာ နေရပ်စွန့်ခွာထွက်ပြေးနေရတာဖြစ်ပါတယ်။ 

စစ်ရာဇဝတ်မှုကျူးလွန်ရာမှာ တာဝန်ရှိတဲ့  စစ်တပ်ထိပ်ပိုင်းခေါင်းဆောင်တွေနဲ့ တိုင်းမှူးတွေ အားလုံးဟာ နယ်သာလန်နိုင်ငံ သည်ဟိတ်မြို့မှာရှိတဲ့ အပြည်ပြည်ဆိုင်ရာရာဇဝတ်မှုတရားရုံး (အိုင်စီစီ)မှာ မဖြစ်မနေ တရားစွဲခံရမယ်လို့ ကနေဒါရောက်မြန်မာတွေကဆိုပါတယ်။ 

အနာဂတ်မှာ အလားတူစစ်ရာဇဝတ်မှုတွေထပ်မဖြစ်စေအောင်နဲ့ မြန်မာပြည်သူတွေ ထိခိုက်ခံစားနေရမှုတွေ လျော့နည်းသက်သာစေဖို့အတွက် ကျူးလွန်တဲ့ စစ်အာဏာရှင်တွေ ဒဏ်ခတ်ခံရအောင် အမေရိကန်၊ ကနေဒါ၊ ယူကေ၊ ဩစတြးလျ၊ အီးယူနဲ့ ကုလသမဂ္ဂ အပါအဝင် နိုင်ငံတကာ အသိုက်အဝန်းအနေနဲ့ ဝိုင်းဝန်းဆောင်ရွက်ပေးကြဖို့လည်း ကနေဒါရောက်မြန်မာတွေက တောင်းဆိုပါတယ်။

ဒီနေ့ကျင်းပတဲ့ ဖယ်ဒရယ်ပြည်ထောင်စုနေ့ပွဲဟာ နှစ်စဉ်ပုံမှန်ကျင်းပနေတဲ့ ပြည်ထောင်စုနေ့ပွဲမျိုးမဟုတ်ဘဲ အနာဂတ်မှာ တိုင်းရင်းသားတွေ တန်းတူညီမျှအခွင့်ရေးနဲ့ ရပိုင်ခွင့်တွေရှိတဲ့ ဖယ်ဒရယ်ပြည်ထောင်စုပေါ်ထွန်းရေးအတွက် ရည်မှန်းကျင်းပတဲ့ပွဲဖြစ်တယ်၊ စစ်အာဏာရှင်ကို နည်းမျိုးစုံနဲ့ တိုက်ပွဲဝင်နေတဲ့ တိုင်းရင်းသားပြည်သူတွေတွက်  ကနေဒါရောက် မြန်မာတွေက တဖက်တလမ်းက ကူညီနေတာဖြစ်တယ်လို့ ပွဲကျင်းပရေး တာဝန်ရှိသူတဦးဖြစ်တဲ့ ဦးစိုးဦးက ပြောပါတယ်။ 

“ဖက်ဒရယ်ပြည်ထောင်စုတခု ဖြစ်လာရေးအတွက်၊ ပထမအဆင့်ကတော့ စစ်အာဏာရှင်စနစ် ချုပ်ငြိမ်းဖို့ပဲဖြစ်ပါတယ်။ စစ်အာဏာရှင်စနစ်ချုပ်ငြိမ်းသွားမှသာလျှင် ဒီမိုကရေစီနဲ့ လူ့အခွင့်အရေးကို အခြေခံတဲ့ ဖက်ဒရယ် ပြည်ထောင်စုတည်ထောင်ရေးကို ကျနော်တို့ ဆက်လက်ဆောင်ရွက်နိုင်မှာပါ။ ဒါကြောင့်မို့လို့ ပြည်တွင်းမှာရှိနေတဲ့ တိုက်ပွဲဝင်နေတဲ့ တိုင်းရင်းသားညီအစ်ကိုများ၊ နယ်စပ်မှာရှိနေတဲ့ တိုက်ပွဲဝင်တိုင်းရင်းသားညီအစ်ကိုများနဲ့ ပြည်ပမှာရောက်ရှိနေတဲ့ တိုင်းရင်းသားညီအစ်ကိုများ ကျနော်တို့ဟာ ဟန်ချက်ညီရှိနေဖို့ လိုအပ်ပါတယ်။ ကျနော်တို့ဟာလည်း  ပြည်တွင်းပြည်ပတိုင်းရင်းသားညီအစ်ကိုများနဲ့ စိတ်သဘောထားတခုတည်း ဦးတည်ချက်တခုတည်း သွားနေတယ်ဆိုတာ လက်တွေ့ဖော်ဆောင်နေတာဖြစ်ပါတယ်။ မဝေးတဲ့ အနာဂတ်မှာ ကျနော်တို့ တိုင်းရင်းသားအားလုံး နှစ်ပေါင်းများစွာတိုက်ပွဲဝင်နေတဲ့ ဖယ်ဒရယ်ပြည်ထောင်စုတခု မုချဖြစ်လာမယ်ဆိုတဲ့ ယုံကြည်ချက် ခိုင်ခိုင်မာမာရှိကြောင်းကိုလည်း ပြောကြားလိုပါတယ်။”

ဒါ့အပြင် မြန်မာနိုင်ငံမှာ ပြည်သူတွေရဲ့အသက်တွေကိုကယ်တင်ဖို့နဲ့ ဒီမိုကရေစီ၊ တရားဥပဒေစိုးမိုးမှုနဲ့ တည်ငြိမ်မှုပြန်ရဖို့  ကနေဒါအစိုးရအနေနဲ့ အမျိုးသားညီညွတ်ရေးအစိုးရ (NUG) ကို စိတ်ဓာတ်ပိုင်းဆိုင်ရာ အရရော သံတမန်ရေးနဲ့ ငွေကြေးအရပါ ထောက်ခံပံ့ပိုးပေးဖို့လည်း ကနေဒါရောက်မြန်မာတွေက တောင်းဆိုလိုက်ပါတယ်။ 

အခုလိုတောင်းဆိုတဲ့အဖွဲ့တွေထဲမှာ ကနေဒါနိုင်ငံသား မြန်မာတိုင်းရင်းသားလူမျိုးများအဖွဲ့ (BENO) ၊မြန်မာကနေဒါကွန်ရက်နဲ့ အွန်တာရီရိုမြန်မာကျောင်းသားများအဖွဲ့ (MSAO) အဖွဲ့တွေ ပူးပေါင်းပါဝင်ပါတယ်။

ဒီပွဲကို ဗီဒီယိုကနေ သတင်းစကားပါးခဲ့တဲ့ NUG ဝန်ကြီး နော်စူစန်နာလှလှစိုးက “နွေဦးတော်လှန်ရေးကနေ ခေတ်အဆက်ဆက်ကျမတို့ လိုလားတောင့်တနေတဲ့ ဖယ်ဒရယ်ပြည်ထောင်စုကြီးကိုရရှိဖို့အတွက် ဒီအချိန်မှာ အရှိန်မြှင့်ပြီးတော့ ထမ်းဆောင်နေတာဖြစ်ပါတယ်။ နိုင်ငံတဝန်းနဲ့ နိုင်ငံတကာမှ ကူညီပံ့ပိုးနေတဲ့ ကျမတို့ရဲ့ မြန်မာနိုင်ငံသားတွေကို အထူးပဲကျေးဇူးတင်ပါတယ်။ ဒီအခမ်းအနားမှာ ကျမတို့ တယောက်နဲ့တယောက်တွေ့ဆုံကြမယ်၊ ညီညွတ်ကြမယ်၊ ခိုင်မြဲတဲ့လက်တွေကိုချိတ်ဆက်ပြီးတော့ ဖက်ဒရယ်ပြည်ထောင်စုတည်ဆောက်မှာ ဆက်လက်ပြီးတော့ ညီညီညွတ်ညွတ်လုပ်ကြမယ် တိုင်းရင်းသားတွေက ကိုယ့်ရဲ့ယဉ်ကျေးမှုတွေကို ဖော်ထုတ်ကြမယ်၊ အစားအစားတွေကို လို့သိရပါတယ်၊ ဒါတွေဟာဆိုရင် ကျမတို့ရဲ့ မတူကွဲပြားတဲ့ ယဉ်ကျေးမှု မတူကွဲပြားတဲ့အလှအပတွေ ဖော်ထုတ်တဲ့နေ့ဖြစ်တဲ့အတွက်ကြောင့် အင်မတန်မှဂုဏ်ယူပါတယ်”လို့ပြောပါတယ်။

ဖယ်ဒရယ်ပြည်ထောင်စုနေ့ပွဲမှာ ကရင်၊ ချင်း၊ မွန်နဲ့ မြန်မာအပါအဝင်တိုင်းရင်းသားရိုးရာအကတွေ၊ တော်လှန်ရေးတေးသီချင်းတွေကို တိုင်းရင်းသားကလေးငယ်တွေနဲ့ ဝါသနာရှင်တွေက  သီဆိုတီးခတ် ဖျော်ဖြေခဲ့ ကြပါတယ်။

ဒါ့အပြင် နွေဦးတော်လှန်ရေး ရန်ပုံငွေရှာ ဈေးရောင်းပွဲအဖြစ်  မြန်မာရိုးရာ စားသောက်ဖွယ်ရာတွေ ကိုလည်း တည်ခင်းရောင်းချခဲ့ကြရာမှာ ဗန်ကူးဗားဒေသရောက် ရာနဲ့ချီတဲ့ မြန်မာပြည်ဖွား တိုင်းရင်းသားတွေ ပါဝင်အားပေးခဲ့ကြပါတယ်။