စီရော်နယ်ဒိုက မက်ဆီထက် ပိုကောင်းတယ်လို့ ပြောနေသူတွေဟာ ဘောလုံးအကြောင်း နားမလည်သူတွေဖြစ်တယ်လို့ ဟော်လန်ဂန္ထဝင်ကစားသမား ဗန်ဘက်စ်တန်က ပြောပါတယ်။
အသက် ၅၇ နှစ်ရှိ ဟော်လန်နည်းပြဟောင်း ဘက်စ်တန်ဟာ အိုင်းယက်စ်နဲ့အေစီမီလန်အသင်းတွေမှာ ကစားခဲ့သူပါ။
အီတလီသတင်းစာ ကော်ရီယာရီဒယ်လိုစပေါ့နဲ့ အင်တာဗျူးမှာတော့ ရော်နယ်ဒိုဟာ ကြီးကျယ်ခမ်းနားတဲ့ ကစားသမားတဦးဖြစ်ပေမယ့် မက်ဆီက ပိုကောင်းတဲ့သူဖြစ်ကြောင်း၊ ဒါပေမဲ့ သမိုင်းတလျှောက်အကောင်းဆုံးကစားသမား ၃ ဦးကတော့ ပီလီ၊ မာရာဒိုနာနဲ့ ယိုဟန်ခရိုက်ဖ်တို့ဖြစ်ကြောင်း ပြောပါတယ်။
“ခရစ္စတီယာနိုက ကြီးကျယ်ခမ်းနားတဲ့ ကစားသမားတဦးဖြစ်ပေမယ့် မက်ဆီထက် ပိုကောင်းပါတယ်လို့ ပြောသူတွေဟာ ဘောလုံးအကြောင်း မသိတဲ့သူတွေသာ ဖြစ်တယ်။ ဒါမှမဟုတ် လွဲမှားတဲ့ ယုံကြည်မှုနဲ့ ပြောနေကြသူတွေဖြစ်တယ်။ ကျနော် ကလေးဘဝတုန်းကတော့ ယိုအန်ခရိုက်ဖ်ကို ကြိုက်ခဲ့တယ်။ သူက ကျနော့်သူငယ်ချင်းလည်းဖြစ်တယ်။ ပြီးတော့ ပီလီနဲ့ မာရာဒိုနာတို့ကလည်း ထူးချွန်ကြတယ်။ ကျနော့်အတွက်တော့ သူတို့ ၃ ဦးက သမိုင်းတလျှောက် အကောင်းဆုံးကစားသမားတွေဖြစ်တယ်” လို့ ဗန်ဘက်စ်တန်က ပြောပါတယ်။
ဘက်စ်တန်ဟာ ဘလွန်းဒီအောဆုကို ၃ ကြိမ်ရရှိခဲ့ဖူးပြီး ဒဏ်ရာပြဿနာတွေကြောင့် ဘောလုံးသမားဘဝကနေ အနားယူခဲ့ရသူဖြစ်ပါတယ်။
