စစ်ကိုင်းတိုင်း၊ ဗန်းမောက်မြို့နယ်မှာ ပြည်သူ့ကာကွယ်ရေးအဖွဲ့က ဖမ်းဆီးထိန်းသိမ်းထားတဲ့ Non-CDM ပညာရေးဝန်ထမ်း အမျိုးသမီး ၂ ယောက်ကို ဒေသတွင်းကာကွယ်ရေး PDF အဖွဲ့က ဧပြီ ၂၆ ရက်မှာ ပြန်လွှတ်ပေးခဲ့တယ်လို့ နီးစပ်တဲ့ အသိုက်အဝန်းကနေ သိရပါတယ်။

ဒေသခံ အမျိုးသားတဦးက "Non-CDM ပညာရေးဝန်ထမ်း ၂ ယောက်ကို ဧပြီ ၄ ရက်က ဖမ်းဆီးခဲ့ပြီး ၁ လနီးပါး ထိန်းသိမ်းထားတာ ၂၆ ရက် နေ့လယ်က ပြန်လွှတ်ပေးခဲ့တာ"လို့ ပြောပါတယ်။

အမည်နဲ့ နေရပ်ကိုတော့ လုံခြုံရေးအရ မဖော်ပြဖို့ ကာယကံရှင်တွေက တောင်းဆိုထားပါတယ်။

ဗန်းမောက်မြို့နယ်အတွင်း တိုက်ပွဲ မကြာခဏဖြစ်ပွားရာမှာ စစ်တပ်က လေကြောင်းက‌နေ ပစ်ခတ်လေ့ ရှိတယ်လို့ ဒေသခံတွေက ပြောပါတယ်။

စစ်ကိုင်းတိုင်း ဗန်းမောက်မြို့နယ် အနောက်ဘက်ခြမ်း ဗန်းမောက်မြို့နဲ့ ၉ မိုင်အကွာက  ပင်ဟင်းခါး သာယာကုန်းရွာပတ်ဝန်းကျင်မှာ ဧပြီ ၁၂ ရက် မနက် ၁၁ နာရီဝန်းကျင်လောက်မှာ ဗန်းမောက်ပြည် သူ့ကာကွယ်ရေးတပ်ဖွဲ့တွေက မိုင်းဆွဲတိုက်ခိုက်ခဲ့တာကြောင့် စစ်ကောင်စီတပ်သား ၁၀ ဦးဝန်း ကျင်သေဆုံးခဲ့ပြီး ဗန်းမောက် ပြည်သူ့ကာကွယ်ရေးတပ်ဖွဲ့က ပြောပါတယ်။

မိုင်းဆွဲခံရတာကြောင့် စစ်ကောင်စီက ညနေ ၁ နာရီခွဲလောက်မှာ ပင်ဟင်းခါး သာယာကုန်းရွာကို ဂျက်တိုက်လေယာဉ်နဲ့ ဗုံးကြဲတိုက်ခိုက်ခဲ့သလို နေ့လယ် ၂ နာရီဝန်းကျင်လောက်မှာလည်း ရဟတ်ယာဉ်နဲ့ ထပ်မံဗုံးကြဲတိုက်ခိုက်ခဲ့တာကြောင့် အမျိုးသမီးတဦး အသက်ဆုံးရှုံးခဲ့ရပြီး နေအိမ်တွေ ပျက်စီးခဲ့တယ်လို့ ဆိုပါတယ်။

“ဗန်းမောက်မြို့ဘက်ကနေ ထွက်လာတဲ့ စစ်ကြောင်းကို ပင်ဟင်းခါး သာယာကုန်း မရောက်ခင်မခင်မှာ မိုင်းဆွဲလိုက်တော့ (-) တွေ ၁၀ ကောင်လောက်ကျတယ်။ အဲတာနဲ့ ည ၁ နာရီလောက် ဂျက်နဲ့လာပစ်တယ်၊ ၂ နာရီလောက်မှာထပ်ပြီး ရဟတ်ယာဉ်နဲ့ ပြန်လာပစ်တယ်” လို့ ဗန်းမောက် ပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။

ပထမအကြိမ် ဂျက်တိုက်လေကြောင်းတိုက်ခိုက်မှုမှာ ဗုံး ၈ လုံးကြဲချတာကြောင့် ဘုန်းကြီးကျောင်းနဲ့ နေအိမ် ၆ လုံး ပျက်စီးခဲ့ပြီး နေအိမ်တလုံးကတော့ မီးလောင်ကျွမ်းသွားတယ်လို့ သိရပါတယ်။ 

ဂျက်တိုက်လေယာဉ်နဲ့ ပစ်ခတ်တိုက်ခိုက်တာကြောင့် ပြည်သူ ၄ ဦး ထိခိုက်ဒဏ်ရာရရှိခဲ့ပြီး တဦးကတော့ ဒဏ်ရာပြင်းထန်ကြောင်း၊ ဒုတိယအကြိမ် ရဟတ်ယာဉ်နဲ့ ပစ်ခတ်တာကြောင့် ပြည်သူ ၂ ဦးထပ်မံထိမှန်ခဲ့ပြီး အသက် ၇၀ ကျော် အမျိုးသမီးတဦး အသက်ဆုံးရှုံးခဲ့ရတယ်လို့ သိရပါတယ်။

မိုင်းဆွဲတိုက်ခိုက်ခံရတဲ့ စစ်ကောင်စီ စစ်ကြောင်းဟာ ပြည်သူ့ကာကွယ်ရေးတပ်ဖွဲ့တွေ ထိန်းချုပ်ထားတဲ့ မှန်ယူကြီးရွာဘက်ကို အင်အားလာဖြည့်တဲ့ စစ်ကြောင်းဖြစ်ပြီး ကြားဖြတ်တိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ဝင်က ပြောပါတယ်။

“မှန်ယူကြီးဘက် တကြောင်းမှာ SNAရယ်၊ စကစရယ် ပေါင်းပြီး အရင်က သူတို့ ဆုံးရှုံးလိုက်တဲ့ ဒေသတွေကို ပြန်ပြီး ထိုးစစ်ဆင်နေတာကြာပြီ၊ တလကျော် နှစ်လထဲရောက်လာပြီးပေါ့။ အခုမိုင်းဆွဲခံရတဲ့ (-) စစ်ကြောင်းကလည်း အဲကို စစ်ကူသွားဖို့ ဖြစ်မယ်” လို့ ပြောပါတယ်။

ဗန်းမောက်မြို့နယ် အနောက်ဘက်ခြမ်းမှာ စစ်ကောင်စီနဲ့ SNA ပူးပေါင်းတပ်ဖွဲ့တွေရဲ့ ထိုးစစ်ကြောင့် ကျေးရွာအများအပြားက ပြည်သူတွေ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။

ဗန်းမောက်မြို့နယ် မြောက်ဘက်ခြမ်းမှာလည်း စစ်ကောင်စီတပ်ဖွဲ့တွေနဲ့ ပြည်သူကာကွယ်ရေးတပ်ဖွဲ့တွေကြားထိတွေ တိုက်ပွဲတွေ ဖြစ်နေသလို အင်းတော်မြို့ပေါ်က စစ်ကောင်စီရဲ့လက်နက်ကြီး တပ်စခန်းတွေကနေ မြို့နယ်နဲ့တောင်ဘက်ခြမ်းကို မကြာခဏလက်နက်ကြီးတွေနဲ့ ပစ်ခတ်လေ့ရှိတယ်လို့ သိရပါတယ်။

စစ်ကိုင်းတိုင်းအထက်ပိုင်း ဗန်းမောက်မြို့နယ်မှာ အမည်မသိ လက်နက်ကိုင်အဖွဲ့က မြို့မိမြို့ဖ တဦးအပါအဝင်  အမျိုးသားငါးဦးကို ဖမ်းဆီးသွားတယ်လို့ ဒေသခံတွေက ပြောပါတယ်။

ဧပြီ ၁၁ ရက်က စက်တောကျေးရွာ မင်္ဂလာဆောင်မှာ အမည်မသိ လက်နက်ကိုင်အဖွဲ့က ဖမ်းဆီးသွားတာလို့ ဒေသခံတဦးက ပြောပါတယ်။

"စက်တော မင်္ဂလာဆောင် ခန်းမရှေ့မှာပဲ လာဖမ်းသွားတာ။  သေနတ်တွေနဲ့ ဘယ်အဖွဲ့အစည်းမှန်းလဲ မသိဘူး။ မင်္ဂလာဆောင် ခန်းမရှေ့မှာပဲ မြို့မိမြို့ဖကို လက်ပြန်ကြိုးတုတ်ပြီး ကားထဲထည့်ခေါ်သွားတယ်။ ကျန်တဲ့သူတွေကိုတော့ လက်ပြန်ကြိုးမတုတ်ဘူး။ ဘာကြောင့် ဖမ်းသွားတာလဲ ဆိုတာတော့ မသိရဘူးဗျာ့။" 

အမည်မသိ လက်နက်ကိုင်အဖွဲ့က ဗန်းမောက် မြို့မိမြို့ဖ ဦးအောင်ရွှေထူး အပါအဝင် ဦးကျော်မြင့်၊ ဦးမြင့်နိုင်၊ ဦးမောင်ဦး နဲ့ အမျိုးသားလူငယ်တဦးကို ဖမ်းဆီးခဲ့တာဖြစ်ပြီး ဘယ်နေရာကို ခေါ်ဆောင်သွားတယ်ဆိုတာမသိရဘဲ အဆက်အသွယ်မရသေးဘူးလို့လည်း ဆိုပါတယ်။                

စက်တောကျေးရွာမှာ ပြီးခဲ့တဲ့ ဧပြီ ၄ ရက်နေ့ကလည်း အထက်တန်းကျောင်းအုပ်ဆရာမတဦးနဲ့ ကျောင်းစာရေးမတဦးကို အမည်မသိလက်နက်ကိုင် အဖွဲ့က လာရောက်ဖမ်းဆီးသွားပြီး မိသားစုတွေနဲ့ အခုအချိန်ထိ အဆက်အသွယ်မရသေးပါဘူး။