အာဏာသိမ်း စစ်ကောင်စီဟာ  သူခန့်ထားတဲ့ ပြည်ထောင်စုဝန်ကြီးတချို့နဲ့ ဗဟိုဘဏ်   အကြီးအကဲတွေကို ရာထူးတာဝန်ကနေ အနားပေးတာ၊ နေရာပြောင်းရွေ့တာတွေပြုလုပ်လိုက်ပြီး ပြည်ထောင်စုအစိုးရအဖွဲ့ ပြင်ဆင်ဖွဲ့စည်းလိုက်ကြောင်း ဩဂုတ် ၁၉ ရက်မှာ ကြေညာလိုက်ပါတယ်။

လူဝင်မှုကြီးကြပ်ရေးနှင့် ပြည်သူ့အင်အားဝန်ကြီး ဦးခင်ရီ၊ ပြည်ထောင်စုအစိုးရအဖွဲ့ရုံးဝန်ကြီးဌာန (၂) ဦးချစ်နိုင်၊  နိုင်ငံတော်ဗဟိုဘဏ် ဥက္ကဋ္ဌ ဦးသိန်းညိန်းနဲ့ ဗဟိုဘဏ် ဒုဥက္ကဋ္ဌ တဦးဖြစ်တဲ့  ဦးဝင်းသော်တို့ကို တာဝန်ကနေ အနားပေးလိုက်တယ်လို့ စစ်ကောင်စီအတွင်းရေးမှူး ဒုဗိုလ်ချုပ်ကြီး အောင်လင်းဒွေး အမိန့်နဲ့ ထုတ်ပြန်လိုက်တာပါ။ 

ပြည်ထောင်စုစာရင်းစစ်ချုပ် ဒေါက်တာကံဇော်ကို ရင်းနှီးမြှုပ်နှံမှုနှင့် နိုင်ငံခြားစီးပွား ဆက်သွယ်ရေး ဝန်ကြီးအဖြစ်လည်းကောင်း၊ အလုပ်သမားဝန်ကြီး ဦးမြင့်ကြိုင်ကို လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးအဖြစ်လည်းကောင်း၊ စီးပွားကူးသန်းဝန်ကြီး ဒေါက်တာပွင့်ဆန်းကို အလုပ်သမားဝန်ကြီးအဖြစ်လည်းကောင်း၊ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီး ဦးအောင်နိုင်ဦးကို စီးပွားရေးနှင့် ကူးသန်းရောင်းဝယ်‌ရေးဝန်ကြီးအဖြစ်လည်းကောင်း ပြောင့်ရွေ့ခန့်အပ်လိုက်ပါတယ်။

ဒါ့ပြင် နိုင်ငံတော်ဗဟိုဘဏ် ဒုဥက္ကဋ္ဌ  ဒေါ်သန်းသန်းဆွေကို ဗဟိုဘဏ် ဥက္ကဋ္ဌအဖြစ် ပြောင်းလဲ  ခန့်အပ်တာဝန်ပေးလိုက်ပြီး ဒုဥက္ကဋ္ဌ အဖြစ် ဦးဇော်မြင့်နိုင်ကို ခန့်အပ်လိုက်ပါတယ်။ ဒေါ်သန်းသန်းဆွေဟာ ပြီးခဲ့တဲ့ ဧပြီလက  နေအိမ်မှာ သေနဲ့အပစ်ခံခဲ့ရပြီး အသက်မသေဘဲ ဒဏ်ရာရရှိခဲ့သူဖြစ်ပါတယ်။ 

ဘာကြောင့် အခုလို ပြောင်းလဲမှုတွေလုပ်ခဲ့တယ်ဆိုတာကိုတော့ စစ်ကောင်စီက ပြောဆိုတာမရှိပေမဲ့ နိုင်ငံတွင်းမှာ မြန်မာကျပ်ငွေတန်ဖိုး စံချိန်တင်ကျဆင်းပြီး တိုင်းပြည်စီးပွားရေး ယိုယွင်းပျက်စီး ကမောက်ကမ ဖြစ်နေချိန်မှာ  ဗဟိုဘဏ်အကြီးအကဲတွေနဲ့ စီးပွားကူးသန်းဝန်ကြီးနေရာတွေကို  အစားထိုး ခန့်အပ်လိုက်တာဖြစ်ပါတယ်။

အဂတိလိုက်စားမှုတိုက်ဖျက်ရေးကော်မရှင် ဥက္ကဋ္ဌ ဦးတင်ဦးကို စာရင်းစစ်ချုပ်အဖြစ် တာဝန်ပေးလိုက်ပြီး ပြည်ထောင်စုရာထူးဝန် ဥက္ကဋ္ဌ ဦးသန်းဆွေကို  အဂတိလိုက်စားမှုတိုက်ဖျက်ရေးကော်မရှင် ဥက္ကဋ္ဌအဖြစ် ပြောင်းလဲတာဝန်ပေးလိုက်ပါတယ်။

နေပြည်တော်ကောင်စီ ဥက္ကဋ္ဌ ဒေါက်တာမောင်မောင်နိုင်ကို  ပြည်ထောင်စုရာထူးဝန် ဥက္ကဋ္ဌ အဖြစ်ပြောင်းရွေ့တာဝန်ပေးလိုက်ပြီး နေပြည်တော်ကောင်စီ ဥက္ကဋ္ဌအဖြစ် ဦးတင်ဦးလွင်ကို ခန့်အပ်လိုက်ပါတယ်။

အားကစားနှင့် လူငယ်ရေးရာ ဝန်ကြီးဌာန ဒုဝန်ကြီးအဖြစ် ဒေါက်တာ စိုးဝင်းကို ခန့်အပ်တာဝန်ပေးလိုက်ပါတယ်။ 

ချင်းပြည်နယ်ဝန်ကြီးချုပ် ဦးငွန်ဆန်းအောင်ကို ရာထူးတာဝန်ကနေ အနားပေးလိုက်ပြီး သူ့ရဲ့နေရာမှာ ဒေါက်တာ ဝုန်ဆွန်းထန်ကို ခန့်အပ်လိုက်ပါတယ်။

ပဲခူးတိုင်း၊ မွန်ပြည်နယ်၊ ရှမ်းပြည်နယ်နဲ့ ဧရာဝတီတိုင်း လုံခြုံရေနဲ့ နယ်စပ်ရေးရာ ဝန်ကြီးတွေကိုလည်း အစားထိုးခန့်အပ်ကြောင်း ကြေညာထားပါတယ်။

အာဏာသိမ်းစစ်ကောင်စီရဲ့ ဆောင်ရွက်ချက်တွေအားလုံးဟာ တရားမဝင်သလို အသိအမှတ်မပြုတဲ့ အကြောင်း အမျိုးသားညီညွတ်ရေးအစိုးရ (NUG) က ကြေညာထားသလို ပြည်သူလူထုတွေက လည်း အာဏာသိမ်း စစ်ကောင်စီကို  လက်နက်ကိုင် ခုခံစစ်ပွဲဆင်နွှဲတာအပါအဝင် ရရာ နည်းလမ်း ပေါင်းစုံနဲ့ ဆန့်ကျင် တော်လှန်နေကြပါတယ်။

Photo- DSINFO

နိုင်ငံတော် စီမံအုပ်ချုပ်ရေးကောင်စီက မြန်မာနိုင်ငံရဲတပ်ဖွဲ့ ရဲချုပ်ကို တာဝန်ကရပ်စဲပြီး  ဗဟိုဘဏ် ဥက္ကဋ္ဌ၊ ရှေ့နေချုပ်၊ စာရင်းစစ်ချုပ်နဲ့   ပြည်ထောင်စုဝန်ကြီး ၂ ယောက်ကိုလည်း ခန့်ထားလိုက်ပါတယ်။

မနေ့က တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ဦးဆောင်တဲ့ ၁၁ ယောက်ပါ နိုင်ငံတော် စီမံအုပ်ချုပ်ရေးကောင်စီကိုဖွဲ့စည်းပြီး အတွင်းရေးမှူး ဒုတိယဗိုလ်ချုပ်ကြီး အောင်လင်းဒွေးက အမိန့်တွေ ဆက်တိုက် ထုတ်ပြန်ခဲ့တာပါ။

ပထမဆုံးအနေနဲ့ ဒေါက်တာ ဒေါ်သီတာဦးကို ပြည်ထောင်စုရှေ့နေချုပ်အဖြစ် တာဝန်ပေးပြီး ဒေါက်တာကံဇော်ကို ပြည်ထောင်စု စာရင်းစစ်ချုပ်အဖြစ်တာဝန်ပေးပါတယ်။

ဒုတိယရှေ့နေချုပ် ဦးဝင်းမြင့်ကို တာဝန်က ရပ်စဲပြီး ရဲချုပ် ဒုတိယရဲဗိုလ်ချုပ်ကြီး အောင်ဝင်းဦးကိုတော့ အငြိမ်းစားပေးပါတယ်။

ပြည်ထဲရေး ဒု ဝန်ကြီး ဗိုလ်ချုပ် စိုးတင့်နိုင်ကို ပြည်ထောင်စုအစိုးရအဖွဲ့ရုံး ဒု ဝန်ကြီးအဖြစ် ပြောင်းရွှေ့တာဝန်ပေးပြီး ဒုတိယဗိုလ်ချုပ်ကြီး သန်းလှိုင်ကို ပြည်ထဲရေး ဒု ဝန်ကြီးနဲ့ ရဲချုပ်အဖြစ် တာဝန်ပေးပါတယ်။

ပြီးတော့ ဦးသိန်းစိုး ဦးဆောင်တဲ့ ၆ ယောက်ပါ ပြည်ထောင်စု ရွေးကောက်ပွဲ ကော်မရှင်ကိုဖွဲ့စည်းခန့်အပ်ပြီး ဦးသန်းညိန်းကို ဗဟိုဘဏ် ဥက္ကဋ္ဌအဖြစ် ခန့်အပ်ပါတယ်။ ရှိပြီးသား ဗဟိုဘဏ် ဥက္ကဋ္ဌနဲ့ အဖွဲ့ဝင်တွေကို တာဝန်က ရပ်စဲတယ်ဆိုတာကိုတော့ ထုတ်ပြန်တာ မတွေ့ရပါဘူး။

သယံဇာတနဲ့ သဘာဝပတ်ဝန်းကျင်ထိန်းသိမ်းရေးဝန်ကြီးအဖြစ် ဦးခင်မောင်ရီ၊ ဆောက်လုပ်ရေးဝန်ကြီးအဖြစ် ဦးရွှေလေးကို ခန့်အပ်ပါတယ်။

ပြီးတော့ နာဂ၊ ဓနု၊ ပအိုဝ်း၊ ပလောင်၊ ကိုးကန့်နဲ့ ဝ ကိုယ်ပိုင်အုပ်ချုပ်ခွင့်ရ တိုင်းနဲ့ ဒေသတွေအတွက် စီမံအုပ်ချုပ်ရေးအဖွဲ့ဥက္ကဋ္ဌတွေကို ခန့်အပ်ပါတယ်။

ဒေါက်တာ မောင်မောင်နိုင်ကို နေပြည်တော်ကောင်စီဥက္ကဋ္ဌအဖြစ် တာဝန်ပေးပြီး ရန်ကုန်နဲ့ ဧရာဝတီတိုင်းကလွဲလို့ ကျန်တဲ့ တိုင်းနဲ့ ပြည်နယ်တွေအတွက် စီမံအုပ်ချုပ်ရေးကောင်စီဥက္ကဋ္ဌ တွေကို ခန့်အပ်ပါတယ်။

ဒီနေ့မှာတော့ နေပြည်တော် ဒု မြို့တော်ဝန်နဲ့ အဖွဲ့ဝင်တွေကို တာဝန်က ရပ်စဲတယ်လို့ ထုတ်ပြန်ပြီး ဒီကြေညာချက်တွေကို အမိန့်အရဆိုပြီး အတွင်းရေးမှူး ဒုတိယဗိုလ်ချုပ်ကြီး အောင်လင်းဒွေးက ထုတ်ပြန်နေတာပါ။