တရုတ်နိုင်ငံက လှူဒါန်းထားတဲ့ Sinopharm ကိုဗစ်-၁၉ ကာကွယ်ဆေး ၅ သိန်း လက်ခံရရှိခဲ့ပြီဖြစ်တယ်လို့ ဗီယက်နမ်ကျန်းမာရေးဝန်ကြီးဌာနက ထုတ်ပြန်လိုက်ပါတယ်။
ဗီယက်နမ်နိုင်ငံဟာ တရုတ်ထုတ် Sinopharm ကိုဗစ်-၁၉ ကာကွယ်ဆေးကို အ ရေးပေါ်အဖြစ် အသုံးပြုနိုင်ဖို့ အခုလအစောပိုင်းက အတည်ပြုခဲ့တာပါ။
ဒီကာကွယ်ဆေးတွေကို ဗီယက်နမ်မှာနေထိုင်တဲ့ တရုတ်နိုင်ငံသားတွေ၊ တရုတ်နိုင်ငံကို ပညာသင်ကြားဖို့ ဒါမှမဟုတ် အလုပ်လုပ်ကိုင်ဖို့ သွားရောက်ကြမယ့် ဗီယက်နမ်နိုင်ငံသားတွေနဲ့ တရုတ်နိုင်ငံနဲ့ ထိစပ်နေတဲ့ နယ်စပ်မှာ နေထိုင်ကြသူတွေစတဲ့ အုပ်စု ၃ စုခွဲ ထိုးနှံပေးမှာဖြစ်တယ်လို့ ကျန်းမာရေးဝန်ကြီးဌာန ထုတ်ပြန်ချက်မှာ ဖော်ပြပါတယ်။
ပြီးခဲ့တဲ့ မတ်လကတည်းက စတင်ခဲ့တဲ့ ဗီယက်နမ်နိုင်ငံရဲ့ ကိုဗစ်-၁၉ ကာကွယ် ဆေးထိုးနှံရေးအစီအစဉ်ဟာ AstraZeneca ကာကွယ်ဆေး ၄ သန်းနီးပါးအပေါ်မှာ များစွာ မှီခိုနေရတာ ဖြစ်ပါတယ်။
အစိုးရရဲ့ တရားဝင် ကိန်းဂဏန်းအချက်အလက်တွေအရ ဗီယက်နမ်နိုင်ငံမှာ လူဦးရေ ၁၁၅,၃၁၅ ယောက်သာ ကိုဗစ်-၁၉ ကာကွယ်ဆေး အပြည့်အဝထိုးနှံခဲ့ပြီးဖြစ်ကာ ၂ ဒသမ ၄ သန်းနီးပါးကတော့ ကာကွယ်ဆေး ၁ ကြိမ်သာ ထိုးနှံနိုင်သေးတယ်လို့ ဆိုပါတယ်။
ပြီးခဲ့တဲ့ ရက်ပိုင်းကလည်း ဗီယက်နမ်နိုင်ငံကို ဂျပန်နိုင်ငံက AstraZeneca ကိုဗစ်-၁၉ ကာကွယ်ဆေး ၁ သန်းလှူဒါန်းခဲ့ပါသေးတယ်။
ဗီယက်နမ်နိုင်ငံတဝန်းမှာတော့ လက်ရှိအချိန်ထိ ကိုဗစ်-၁၉ ရောဂါကူးစက်ခံရသူ ပေါင်း ၁၃,၀၀၀ ကျော်နဲ့ သေဆုံးသူ ၆၄ ယောက် ရှိနေတာ ဖြစ်ပါတယ်။
