ကရင်နီ (ကယား) ပြည်နယ်အတွင်း စစ်ရှောင်စခန်းတွေမှာ ဗုံးခိုကျင်းတူးဖို့အတွက် ငွေကြေးနဲ့ နည်းပညာအကူအညီ လိုအပ်နေတယ်လို့ စစ်ရှောင်စခန်းတွေနဲ့ စာသင်ကျောင်းတွေမှာ ကူညီပေးနေတဲ့ Job for Kayah ရဲ့ တာဝန်ရှိသူက ဒီဗွီဘီကို ပြောပါတယ်။
စာသင်ကျောင်းမှာရှိတဲ့ ကလေး ၅၀ လောက်အတွက် အလျား ၁၅ ပေ၊ အနံ ၆ပေ၊ အမြင့် ၆ ပေလောက်ရှိတဲ့ ဗုံးခိုကျင်းဆောက်ဖို့ သစ်ဖိုး ၂ သိန်းခွဲလောက်၊ သံ၊ ဆာလာအိတ်၊ မိုးကာတွေနဲ့ သယ်ယူခ ဆီဖိုး စုစုပေါင်း ၄ သိန်းကျော်လောက် ကုန်ကျတယ်လို့ ဆိုပါတယ်။
စစ်ဘေးရှောင်နေရာတွေကို ဗုံးခိုကျင်း ဆောက်လုပ်ဖို့အတွက် ရန်ပုံငွေနဲ့ ဆောက်လုပ်ရ ပိုမိုလွယ်ကူတဲ့ နည်းပညာအကူညီတွေရရှိမယ်ဆိုရင် မြေပြင်မှာ ကိုယ်တိုင်သွားရောက်ကူညီပေးမယ်လို့ Job for Kayah ရဲ့ တာဝန်ရှိသူက ပြောပါတယ်။
ဗုံးခိုကျင်းဆောက်လုပ် ကူညီပေးဖို့အတွက် တနိုင်တပိုင်သာ အလှူရှင်တချိုနဲ့ လုပ်ဆောင်နေရပြီး အမျိုးသားညီညွတ်ရေးအစိုးရ (NUG) ရဲ့ အထောက်အပံ့လည်း မရရှိဘူးလို့ ဆိုပါတယ်။
အဆိုပါ အဖွဲ့က ဦးစီးပြီး စစ်ဘေးရှောင်စခန်း ၆ ခုလောက်နဲ့ စာသင်ကျောင်းတွေကို ဗုံးခိုကျင်းဆောက်လုပ်ပေးခဲ့ပြီးပြီဖြစ်ကာ လက်ရှိမှာလည်း ဗုံးခိုနည်း အသိပညာပေးမှုတွေ လုပ်ဆောင်နေသလို နောက်ထပ် နေရာအများကြီးအတွက် ကူညီဖို့ လိုအပ်နေသေးတယ်လို့ ပြောပါတယ်။
စစ်ကောင်စီတပ်က ပြည်သူတွေရဲ့ စစ်ရှောင်စခန်းတွေအပေါ် တိုက်လေယာဉ်တွေ နိမ့်နိမ့်ကပ်ပျံတာ၊ ကျွမ်းထိုးပြတာတွေ လုပ်ဆောင်ပြီး လူထုကို အကြောက်တရားသွင်းတာတွေ လုပ်နေတဲ့အတွက် စစ်ရှောင်ကလေးငယ်တွေနဲ့ အမျိုးသမီးအများစုက စိတ်ဒဏ်ရာတွေရနေပြီး ရိုးရိုးလေယာဉ်သံ ကြားရင်တောင် ကြောက်လန့်ငိုယိုနေကြတယ်လို့ စစ်ဘေးရှောင်အတွက် ကူညီနေတဲ့ အဖွဲဝင်တယောက်က ပြောပါတယ်။
အာဏာသိမ်းပြီးချိန်ကစပြီး ၂ နှစ်ကျော်အတွင်း ကရင်နီပြည်နယ်မှာ လေကြောင်းကနေတိုက်ခိုက်မှုဟာ အခုနှစ်က ခပ်စိပ်စိပ်ဖြစ်လာပြီး ပြီးခဲ့တဲ့ မတ် ၁၅ ရက်နေ့ကလည်း ပေါင် ၅၀၀ လေးတဲ့ ဗုံးသီး ၂ လုံး လာချသွားတယ်လို့ သိရပါတယ်။
ကရင်နီဒေသမှာရှိတဲ့ စစ်ကောင်စီတပ်နဲ့ တော်လှန်ရေးတပ်တွေကြား တိုက်ပွဲဖြစ်ပွားနေတဲ့ နေရာအနီးတဝိုက်မှာရှိတဲ့ ဒေသခံပြည်သူတွေအနေနဲ့ ဗုံးခိုကျင်းတွေတူးထားကြဖို့ တော်လှန်ရေး ရဲဘော်တွေက တိုက်တွန်းထားပါတယ်။
စစ်ကောင်စီက ကရင်နီဒေသရဲ့ ဒီးမော့ဆို၊ ဖရူဆို၊ ဘောလခဲ၊ ရှားတော၊ မိုးဗြဲ၊ လွိုင်ကော်နဲ့ ပင်လောင်းဒေသ အနီးနားတွေကို စစ်အင်အားအလုံးအရင်းနဲ့ အင်အားဖြည့်တင်းနေတာကြောင့် ပြည်သူတွေအနေနဲ့ ဗုံးခိုကျင်းကို တနိုင်တပိုင် တူးထားကြဖို့ KNDF, KPDF နဲ့ တခြားရဲဘော်တွေက တိုက်တွန်းကြပါတယ်။
စစ်ကောင်စီက အရပ်သားပစ်မှတ်တွေကိုပါ ဦးတည်ပြီး လက်နက်ကြီးနဲ့အပြင် လေကြောင်းကနေ ဗုံးကြဲပစ်ခတ်တိုက်ခိုက်မှုကြောင့် အပြစ်မဲ့ပြည်သူတွေ ထိခိုက်မှုမဖြစ်စေဖို့ ရည်ရွယ်ပြီး အခုလို သတိပေးထုတ်ပြန်တာ ဖြစ်တယ်လို့လည်း KPDF တပ်ဖွဲ့ ပြောရေးဆိုခွင့်ရှိသူက ပြောပါတယ်။
ကရင်နီပြည်နယ်မှာရှိတဲ့ ရှေ့တန်းရောက်ရဲဘော်တယောက်က “စစ်ပွဲက ကိုယ်နဲ့နီးလာပြီဆိုရင်ဖြစ်ဖြစ် တိုက်ပွဲဖြစ်တဲ့နေရာနဲ့ ၁၀ မိုင်အကွာလောက်မှာ ရှိနေရင် ခါးတဝက်စာ၊ ဒါမှမဟုတ် ရင်ဘတ်နားလောက်ထိ L ပုံစံ တူးစေချင်တာ၊ ပြီးရင် သစ်တုံးတွေကိုတင်ပြီး အပေါ်ကနေ သဲအိတ်တွေ ထပ်တင်ထားစေချင်တာ” လို့ ပြောပါတယ်။
တကယ်လို့ အရေးပေါ်အခြေအနေမှာဆိုရင်တော့ နှစ်ပေပတ်လည် ငုံ့ပြီး ထိုင်လိုရတဲ့ အနေအထားမျိုး တူးရင်လည်း ရတယ်လို့ ဆိုပါတယ်။
စစ်ကောင်စီဘက်က အခုလို အရပ်သားပြည်သူတွေကို ပစ်မှတ်ထား လေကြောင်းတိုက်ခိုက်တာတွေကို ဂျီနီဗာကွန်ဗန်းရှင်းနဲ့ နိုင်ငံတကာ လူသားချင်းစာနာမှုဆိုင်ရာ ဥပဒေတွေက ပိတ်ပင်တားမြစ်ထားပေမဲ့ တော်လှန်ရေးအားကောင်းတဲ့ မြိုနယ်တွေကိုတော့ စစ်ကောင်စီတပ်က လေကြောင်းသုံး တိုက်ခိုက်မှု အကြိမ်ကြိမ်ပြုလုပ်နေတာလည်း ဖြစ်ပါတယ်။
အာဏာသိမ်းပြီးချိန်ကစပြီး အခုနှစ်ဆန်းပိုင်းအထိ ကရင်နီပြည်နယ်ထဲမှာ စစ်ကောင်စီက လေကြောင်းတိုက်ခိုက်မှုပေါင်း အကြိမ် ၂၀၀ ထက်မနည်း အသုံးပြုခဲ့ပြီး ပြည်တွင်းအဖွဲ့စည်းတွေနဲ့ နိုင်ငံတကာအဖွဲ့စည်းတွေက တားမြစ်ထားပေမဲ့ ဒီနေ့ချိန်ထိ လေကြောင်းအသုံးပြု တိုက်ခိုက်နေတာလည်း ဖြစ်ပါတယ်။
