ရန်ကုန်၊ တာမွေ အရှေ့မြင်းပြိုင်ကွင်းလမ်းမပေါ်က ယာဥ်ထိန်းရဲတပ်ဖွဲ့ မတ်လ ၂၈ ရက် ဒီနေ့ မနက် ၁၀ နာရီကျော်က ဗုံးနဲ့အပစ်ခံရပြီး အမျိုးသမီး ယာဉ်ထိန်းရဲ ဒုတပ်ကြပ်တစ်ဦး ဒဏ်ရာရခဲ့တယ်လို့ အနီးနားမှာနေထိုင်သူတွေဆီက သိရပါတယ်။
အရှေ့မြင်းပြိုင်ကွင်းလမ်းမပေါ်က ယာဥ်ထိန်းရဲအဖွဲ့ကို တာမွေခုံးကျော်တံတားပေါ်ကနေ လက်လုပ်ဗုံးနဲ့ပစ်သွားတာလို့ ရပ်ကွက်နေသူတစ်ဦးက ပြောပါတယ်။
"ယာဥ်ထိန်းအဖွဲ့က သုံးယောက် အလူမီနီယမ်မှန်ဆိုင်ရှေ့မှာ ယာဥ်တွေစစ်နေတာ၊ ခုံးတံတားပေါ်ကနေ ပစ်သွားတာ တစ်ဦးဒဏ်ရာရတယ်။”
ဗုံးနဲ့ပစ်ခတ်ခံရပြီးနောက် စစ်ကောင်စီတပ်နဲ့ ရဲတွေရောက်လာကာ အခင်းဖြစ်ရာနေရာကို စစ်ဆေးပြီး ဒဏ်ရာရသူ ဒုတပ်ကြပ်အမျိုးသမီးကို ရွှေဂုံတိုင်ဆေးရုံကို ခေါ်သွားတယ်လို့ ရပ်မိရပ်ဖတစ်ဦးက ပြောပါတယ်။
"ယာဥ်ထိန်းရဲမေထိတာ အဆင့်က ဒုတပ်ကြပ် သေတော့မသေဘူး ဒဏ်ရာတော့ ပြင်းထန်တယ်၊ စစ်တပ်က လူနာတင်ယာဥ်နဲ့ဆေးရုံခေါ်သွားတယ်"လို့ ပြောပါတယ်။
လတ်တလော တာမွေ ခုံးကျော်တံတားနဲ့ အရှေမြင်းပြိုင်ကွင်းတလျှောက်မှာ စစ်ကောင်စီတပ်နဲ့ရဲတွေက စစ်ဆေးနေတယ်လို့ ရပ်ကွက်နေသူတွေဆီက သိရပါတယ်။
မနေ့ကလည်း ထန်းတပင်၊ လှည်းကူး၊ မင်္ဂလာဒုံနဲ့ မှော်ဘီမြို့နယ်တွေမှာ စစ်တပ်ပိုင် Mytel တာဝါတိုင်သုံးတိုင်နဲ့ မြွေဆိပ်ဖြေဆေးထုတ်လုပ်ရေးဌာန ဗုံးခွဲတိုက်ခိုက်ခံရပါတယ်။
ရန်ကုန်တိုင်း၊ မြောက်ဥက္ကလာပမြို့နယ်၊ ဃ ရပ်ကွက်၊ နွယ်နီ ၅ လမ်းပေါ်ရှိ ဃ ရပ်ကွက် အုပ်ချုပ်ရေးမှူးရုံး မတ်လ ၁၆ ရက် ဒီနေ့ နေ့လယ် ၂ နာရီက ဗုံးနဲ့ ပစ်ခတ်တိုက်ခိုက်ခံရတယ်လို့ ရပ်ကွက်နေသူတွေဆီက သိရပါတယ်။
“ရုံးမှာ ဗုံးပေါက်တာ ရပ်ကွက်ထဲမှာ အကုန်လန့်သွားတယ်။ ခေမာသီနဲ့ မေဓာဝီဘက် အတော်လေးစစ်တယ်။ သေတာတို့ ဒဏ်ရာရတာတို့တော့ မကြားဘူး။”
ဃ ရပ်ကွက်အုပ်ချုပ်ရေးမှူးရုံးကို ဒီနေ့ နေ့လယ် ၃ နာရီဝန်းကျင်က အမည်မသိ အမျိုးသားတဦးက ဗုံးနဲ့ လာရောက်ပစ်ခတ်ခဲ့ပြီး ပေါက်ကွဲခဲ့တာဖြစ်တယ်လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။
“သေတယ်လို့တော့ မကြားဘူး။ စစ်တပ်ကတော့ ပိတ်ပြီးစစ်နေတာတွေ ရှိတယ်။ ဆိုင်ကယ်တွေကို ရပ်ခိုင်းပြီး တူးဘောက်တွေ ဖွင့်ခိုင်းတယ်။ ဆိုင်ကယ်တွေဆို ပိုက်ဆံပေးမှ ပြန်လွှတ်တယ်။”
လတ်တလောမှာ စစ်ကောင်စီတပ်၊ ရဲနဲ့ ယာဥ်ထိန်းတွေက ခြောက်ကွေ့၊ မေဓာဝီ၊ ခေမာသီနဲ့ သုံးလမ်းဆုံဘက်မှာ ဆိုင်ကယ်နဲ့ ကားတချို့ကို စစ်ဆေးနေတယ်လို့ မြို့ခံတွေဆီက သိရပါတယ်။
ဒီနေ့ ဃ ရပ်ကွက် အုပ်ချုပ်ရေးမှူးရုံး ဗုံးခွဲတိုက်ခိုက်မှုကို Yangon Underground Force (YUF) နဲ့ Freeland Attack Force (FlA)၊ Emerald Girls Army (EGA) တို့ ပူးပေါင်းပြုလုပ်ခဲ့တာ ဖြစ်တယ်လို့ ထုတ်ပြန်ချက်အရ သိရပါတယ်။
ရန်ကုန်မှာ ပြီးခဲ့တဲ့လတွေကလည်း ပစ်ခတ်တိုက်ခိုက်မှုတွေရှိပြီး စစ်ကောင်စီတပ်၊ ရဲနဲ့ အုပ်ချုပ်ရေးအဖွဲ့က သေဆုံးသူနဲ့ ဒဏ်ရာရသူတွေ ရှိပါတယ်။
