ရန်ကုန်၊ မြောက်ဥက္ကလာပမြို့နယ်၊ ရွှေပေါက္ကံမြို့သစ်၊ ၁၃  ရပ်ကွက်၊ ကျောက်ဆည်လမ်းရှိ လူနေလိုင်ခန်းမှာ မေလ ၁၁ ရက် ညပိုင်းက ဗုံးပေါက်ကွဲပြီး လူငယ် အမျိုးသား တယောက် သေဆုံးသွားကာ ဒဏ်ရာရရှိတဲ့ တယောက်ကိုတော့ စစ်ကောင်စီတပ်က ဖမ်းဆီးခဲ့တယ်လို့ ရပ်ကွက်နေသူတွေဆီက သိရပါတယ်။

လိုင်းခန်းအတွင်း အမျိုးသားနှစ်ယောက် ငှားရမ်းနေထိုင်တဲ့ အခန်းမှာ မနေ့ည ၈ နာရီဝန်းကျင်က ဗုံးပေါက်ကွဲခဲ့တာဖြစ်တယ်လို့ ရပ်ကွက်နေသူတစ်ဦးကပြောပါတယ်။

"အဲ့လိုင်းခန်းမှာ ဗုံးပေါက်တာ အသံအကျယ်ကြီး၊ လိုင်းခန်းကလူတွေလည်း အပြင်ကိုပြေးထွက်ကုန်တယ်။ စစ်တပ်နဲ့နီးတော့ စစ်တပ်က ကားနဲ့ရောက်လာတာ။ ဒဏ်ရာရတာတစ်ယောက်၊ သေတာတစ်ယောက်။ ခြေထောက်ထိတဲ့ကောင်လေးကို စစ်တပ်က ဖမ်းသွားတယ်။”

ဗုံးပေါက်ကွဲလို့ သေဆုံးသူမှာ ရန်နိုင်ဖြစ်ပြီး  ဒဏ်ရာနဲ့ ဖမ်းဆီးခံရသူကတော့  အောင်မြင့်မြတ်ဖြစ်တယ်လို့  အုပ်ချုပ်ရေးနဲ့နီးစပ်သူတစ်ဦးက ပြောပါတယ်။

"ဗုံးပေါက်တာတော့မဟုတ်ဘူး။ လက်လုပ်မိုင်းကွဲတာဖြစ်မယ်။ မိတဲ့ကောင်လေးဆီမှာ သေနတ်နဲ့ ကျည်တွေ တွေ့တယ်လို့လည်း ပြောတယ်။   သေချာတော့ မသိသေးဘူး။”

ဒဏ်ရာရရှိတဲ့လူငယ်ကို စစ်ကောင်စီတပ်က မင်္ဂလာဒုံတပ်နယ်မှူးရုံးကို  ဖမ်းဆီးခေါ်ဆောင်သွားပြီး ပေါက်ကွဲမှုဖြစ်ခဲ့တဲ့  လိုင်းခန်းကို စစ်ဆေးနေတယ်လို့ ရပ်ကွက်နေသူတွေဆီက သိရပါတယ်။ 

ရန်ကုန်မြို့၊ ဗဟန်းမြို့နယ်၊ ဝင်္ကပါလမ်းရှိ မြန်မာနိုင်ငံ ရုပ်ရှင်အစည်းအရုံးအနီးမှာ ဒီနေ့ မေ ၆ ရက်၊ မနက် ၁၀ နာရီ ၅၆ မိနစ်အချိန်မှာ ဗုံးပေါက်ကွဲမှု ဖြစ်ပွားခဲ့ပြီး ဗုံးပေါက်ကွဲသံကို ဗဟန်းမြို့နယ် နေရာတော်တော်များများမှာ ကြားသိလိုက်ရတယ်လို့ မြို့ခံတွေဆီက သိရပါတယ်။

ရန်ကုန်မြို့ခံတဦးက "အခြေအနေကတော့ ရုပ်ရှင်အစည်းအရုံး ဗုံးပေါက်တယ်လို့ ကနဦး သိရတယ်။ ပေါက်ကွဲမှု ဖြစ်စဉ်အပြီးတော့ ရွှေဂုံတိုင်မီးပွိုင့်ဘက်မှာ စစ်ဆေးမှုတွေ ရှိခဲ့တယ်"လို့ ပြောပါတယ်။

လတ်တလောမှာတော့ ဗုံးပေါက်ကွဲမှုကြောင့် ဘယ်လောက် ထိခိုက် ပျက်စီးတယ်ဆိုတာ မသိရသေးဘဲ ဘယ်အဖွဲ့က လုပ်ဆောင်တယ်ဆိုတာ ထုတ်ပြန်တာ မရှိသေးပါဘူး။ 

ဒီကနေ့ မေ ၆ ရက်မှာ စစ်ကောင်စီက နေပြည်တော်၊ မြို့တော်ခန်းမအနီး လဟာပြင် ကဇာတ်ရုံမှာ မြန်မာ့ရုပ်ရှင်ထူးချွန်ဆုပေးပွဲ ကျင်းပဖို့ ပြင်ဆင်နေပါတယ်။ ဒီပွဲဟာ အာဏာသိမ်း စစ်ကောင်စီ လက်ထက်မှာ ၃ နှစ်စာ ပေါင်းပြီး ကျင်းပတာပါ။

တော်လှန်ရေး အင်အားစုတွေကတော့ စစ်ကောင်စီရဲ့ အကယ်ဒမီပေးပွဲကို ပြည်သူတွေ မကြည့်ရှုဖို့ သပိတ်မှောက်ဖို့ တိုက်တွန်းထားပြီး စစ်ကောင်စီကလည်း အနုပညာရှင်တွေကို ဖိအားပေး တက်ခိုင်းတာ၊ မက်လုံးပေး စည်းရုံး တက်ခိုင်းတာတွေ ရှိနေပါတယ်။