ရန်ကုန်၊ တာမွေမြို့နယ်၊ နတ်မောက်ရပ်ကွက်၊ ဖိုးစိန်လမ်းရှိ မြို့နယ်လျှပ်စစ်ရုံးကို ဒီဇင်ဘာ ၂ ရက် ညနေ ၄ နာရီလောက်က အမည်မသိအမျိုးသားတယောက်က ဗုံးနဲ့ လာရောက် ပစ်ခဲ့ပေမဲ့ ပေါက်ကွဲမှုမရှိခဲ့ဘူးလို့ ဒေသခံတွေထံက သိရပါတယ်။
ရပ်ကွက်နေသူ တဦးက "လေးနာရီကျော်လောက်က ဖြစ်သွားတာ။ ဗုံးနဲ့ပစ်တာ မပေါက်ဘူး။ စစ်တပ်က ရောက်လာပြီး ၅ နာရီလောက်မှာ ဖောက်ခွဲခဲ့တယ်။”လို့ ပြောပါတယ်။
နတ်မောက်လမ်းအတိုင်း လမ်းလျှောက်လာတဲ့လူငယ် တယောက်က တရုတ်နိုင်ငံထုတ် လက်ပစ်ဗုံးနဲ့ ပစ်ခဲ့တာလို့ အုပ်ချုပ်ရေးနဲ့ နီးစပ်သူ တဦးက ပြောပါတယ်။
"ရုံးဝင်းထဲတော့ ဗုံး ရောက်ပေမဲ့ မပေါက်ဘူး။ စစ်တပ်က အကာအရံတွေနဲ့ ဖောက်ခွဲ လိုက်တာ။"
ဗုံးနဲ့ပစ်ခံရပြီးနောက် နတ်မောက်လမ်းနဲ့ ဖိုးစိန်လမ်းကို ခေတ္တပိတ်ကာ ဗုံးပစ်သူကို စစ်ကောင်စီ တပ်က ရှာဖွေခဲ့ပေမဲ့ ဖမ်းဆီးရမိတာ မရှိဘူးလို့ ရပ်ကွက်နေသူတွေဆီက သိရပါတယ်။
ရန်ကုန်တိုင်းက မြို့နယ်တချို့မှာ နိုဝင်ဘာလအတွင်း ပစ်ခတ်မှုနဲ့ ဗုံးပေါက်ကွဲမှု ၁၆ ကြိမ်ဖြစ်ခဲ့ပြီး ၈ ဦးသေဆုံးကာ ၉ ဦးဒဏ်ရာ ရခဲ့ပါတယ်။
မန္တလေးမြို့ မဟာအောင်မြေမြို့နယ် သံလျက်မော် အနောက်ရပ်ကွက်မှာ အသစ်ပြန်ဆောက် နေတဲ့ ရပ်ကွက်အုပ်ချုပ်ရေးမှူးရုံး စက်တင်ဘာ ၁၆ ရက် ညနေပိုင်းက ဗုံးနဲ့ ပစ်ခံရတယ်လို့ ရပ်ကွက်နေသူတဦးက ပြောပါတယ်။
သံလျက်မော် အနောက်ရပ်ကွက် အုပ်ချုပ်ရေးမှူးရုံးဟာ မေလ ၁ ရက် ညပိုင်းက မီးလောင်ခဲ့တာကြောင့် အခုအခါ ပြန်လည်ဆောက်လုပ်နေတာဖြစ်ပြီး ဗုံးပေါက်ကွဲမှုကြောင့် လူအထိအခိုက်မရှိဘူးလို့ ဆိုပါတယ်။
အသစ်ပြန်ဆောက်နေတဲ့ ရပ်ကွက်အုပ်ချုပ်ရေးမှူးရုံးကို ဘယ်အဖွဲ့က ဗုံးဖောက်ခွဲတယ်ဆိုတာတော့ မသိရသေးပါဘူး။
ရပ်ကွက်အုပ်ချုပ်ရေးမှူးရုံး အသစ်ဆောက်တာနဲ့ ပတ်သက်လို့ ရပ်တန့်ပေးဖို့ GZP ပြည်သူ့ကာကွယ်ရေးအဖွဲ့က သတိပေးထုတ်ပြန်ထားပါတယ်။
