မန္တလေးမြို့ ချမ်းမြသာစည်မြို့နယ် ကျွန်းလုံးဥသျှောင်ရပ်ကွက်မှာ နိုဝင်ဘာ ၂၈ ရက် ညနေပိုင်းက ဗုံးပေါက်ကွဲမှု ၂ ကြိမ်ဖြစ်ခဲ့တယ်လို့ သိရပါတယ်။
ကျွန်းလုံးဥသျှောင်ရပ်ကွက် အုပ်ချုပ်ရေးမှူးရုံးမှာ ညနေ ၃ နာရီကျော်အချိန်က လက်လုပ်ဗုံးနဲ့ ပစ်ခံရပြီး ပေါက်ကွဲမှုဖြစ်ခဲ့ပေမယ့် ပျက်စီးတာတော့ မရှိခဲ့ပါဘူး။
ညနေ ၄ ရီကျော်အချိန်မှာလည်း ကျွန်းလုံးဥသျှောင်ရပ်ကွက် အုပ်ချုပ်ရေးမှူးရုံးအနီး မီးသတ်ရုံးရှေ့မှာ ထပ်မံပေါက်ကွဲမှုဖြစ်ခဲ့ပြီး အနီးနားရှိ ပြည်သူ ၁ ဦး ထိခိုက်ဒဏ်ရာရခဲ့တယ်လို့ သိရပါတယ်။
ရပ်ကွကနေပြည်သူတစ်ဦးက “ညနေပိုင်းမှာတင် ဗုံးနှစ်လုံးကွဲတ။ နှစ်လုံးစလုံးက ရပ်ကွက်ရုံးနားကွဲတာ။ ဒုတိယ အလုံးကွဲတော့ ဘေးနားက ဆိုင်ကယ်ကယ်ရီသမား တစ်ယောက် နည်းနည်းဒဏ်ရာရတယ်။ မစိုးရိမ်ရပါဘူး။ နောက်ပြီး ကားတချို့လည်း ဗုံးအစအန မှန်တာရှိတယ်လို့ ကြားတယ်” လို့ ဆိုပါတယ်။
ဒီလို ဗုံးပေါက်ကွဲမှု နှစ်ကြိမ်ဖြစ်တဲ့အတွက် စစ်ကောင်စီတပ်သားတွေဟာ အနီးအနားပတ်ဝန်းကျင်မှာ စစ်ဆေးမေးမြန်းတာတွေလုပ်ခဲ့တယ်လို့ သိရပါတယ်။
ဧရာဝတီတိုင်း၊ မအူပင်မြို့နယ်မှာ အောက်တိုဘာလ ၂၇ ရက်နေ့ ညပိုင်းက ခရိုင်ကညနရုံးရှေ့ ဗုံးပေါက်ကွဲခဲ့တယ်လို့ သိရပါတယ်။
မြို့ရှောင်လမ်းမှာရှိတဲ့ ခရိုင်ကညနရုံးရှေ့ ည ၇ နာရီကျော်လောက်က ဗုံးပေါက်ကွဲခဲ့တာဖြစ်ပြီး ဒါဟာ တပတ်အတွင်း ၂ ကြိမ်တိုင် ပေါက်ကွဲခဲ့တာဖြစ်တယ်လို့ ဒေသခံတွေက ပြောပါတယ်။
“မတရားသဖြင့် ဆိုင်ကယ်တွေကိုဖမ်း၊ လိုင်စင်တွေသိမ်း၊ ဆိုင်ကယ်တွေကိုသိမ်း၊ ပြီးရင် ပိုက်ဆံအများကြီးတောင်းပြီး ပြန်ရွေးခိုင်းတာတွေလုပ်နေတယ်၊ အဲ့ဒါကြောင့် ဖောက်ခွဲခဲ့တာ” လို့ မအူပင် PDF တပ်ဖွဲ့ဝင်တဉီးက ပြောပါတယ်။
ခရိုင်ကညနရုံးရှေ့ ဒုတိယအကြိမ် ဗုံးခွဲမှုကိုတော့ ငန်းနက်အဖွဲ့က ဖောက်ခွဲခဲ့တာဖြစ်ပြီး ညပိုင်းလုပ်တာကြောင့် လူထိခိုက်တာမျိုးတော့ မရှိဘူးလို့ ဆိုပါတယ်။
ဗုံးပေါက်ကွဲပြီးနောက်ပိုင်းမှာ အာဏာသိမ်းစစ်ကောင်စီတပ်သားတွေက လမ်းမပေါ်မြင်သမျှ လိုက်လံဆဲဆိုပစ်ခတ်တာတွေ ပြုလုပ်ခဲ့တယ်လို့ သိရပါတယ်။
မအူပင်မြို့မှာ စစ်တပ်အာဏာသိမ်းပြီးနောက်ပိုင်း စစ်အုပ်စုနဲ့ သက်ဆိုင်တဲ့နေရာကို တော်လှန်ရေးအင်အားစုတွေက ၁၂ ကြိမ်ထက်မနည်း ဗုံးခွဲတိုက်ခိုက်ခဲ့တယ်လို့ ဒေသခံတွေက ပြောပါတယ်။
