ရန်ကုန်တိုင်းဒေသကြီး၊ လှိုင်သာယာမြို့နယ်၊ သမကုန်းမှတ်တိုင်နဲ့ အဝေးပြေးကာကွင်းကြားမှာ အောက်တိုဘာ ၂၂ ရက် မနက် ၁၁ နာရီဝန်းကျင်လောက်က ဗုံး ၄ လုံးပေါက်ကွဲခဲ့ပြီး လှိုင်သာယာမြို့နယ်ပြည်သူ့ကာကွယ်ရေးတပ်ဖွဲ့ CGF HTY ရဲ့ လုပ်ဆောင်ချက်ဖြစ်တယ်လို့ ဒေသခံတွေဆီက သိရပါတယ်။
ဗုံးဖောက်တာနဲ့ပတ်သက်ပြီး သမကုန်းမှတ်တိုင်နဲ့ အဝေးပြေးကားဝင်းကြားလမ်းမှာ ဗုံး ၇ လုံး ထောင်ကာ အချိန်ကိုက် သေချာလုပ်ဆောင်ခဲ့ပေမဲ့ အမှိုက်ကောက်သူတစ်ယောက်ကြောင့် လုပ်ဆောင်ချက် ပျက်စီးခဲ့ရတယ်လို့ CGF HTY က သိရပါတယ်။
“ဒီနေ့ ကျနော်တို့ သတင်းရထားလို့ ဗုံး ၇ လုံးချထားခဲ့ပေမဲ့ အမှိုက်ကောက်သမား တစ်ယောက်က ပစ္စည်း တစ်ခုကို ကောက်ပြီး စစ်ကောင်စီတပ်ဖွဲ့ဝင်တွေဆီ ပေးလိုက်တယ်။ အဲ့ဒီ ကစပြီး သူတို့ သိသွားတယ်။ လမ်းပိတ်ရှာဖွေမှုတွေလုပ်တော့ ဗုံး ၂ လုံးထပ်ပြီး အသိမ်းခံလိုက်ရတယ်။ လမ်းပိတ်လိုက်တော့ အနီးဝန်းကျင်က လူတွေက လှည့်မပြန်ဘဲ ရပ်ကြည့်နေကြတယ်။ အပြစ်မဲ့ ပြည်သူတွေထိမှာဆိုးလို့ ဘာမှမလုပ်လိုက်ရတော့ဘူး။ ပြည်သူနဲ့လွတ်တဲ့ နေရာမှာပဲ ပစ္စည်းတွေ ထပ်ပြီး အသိမ်းမခံရအောင် အဝေးထိန်းနဲ့ ကျန်တဲ့ ဗုံး ၄ လုံးကို တစ်ပြိုင်တည်း ခွဲလိုက်ရတယ်။ ဒီနေ့ကိစ္စနဲ့ပတ်သက်ပြီးလည်း ကျနော်တို့ Page ကနေ ကြေညာချက်ထုတ်ပြန်သွားမှာပါ" လို့ CGF HTY တာဝန်ရှိသူတစ်ဦးက ပြောပါတယ်။
လှိုင်သာယာမှာ စစ်တပ်က အာဏာသိမ်းပြီး တော်လှန်ရေးကာလအလွန် အဖွဲ့အစည်းအသီးသီးက စစ်ကောင်စီ ကျဆုံးရေး လုပ်ဆောင်ချက်တွေ ရှိနေသလို CGF HTY (လှိုင်သာယာ ပြည်သူ့ ကာကွယ်ရေးတပ်ဖွဲ့) ကလည်း စစ်ကောင်စီတပ်ဖွဲ့တွေကို ဗုံးခွဲတိုက်ခိုက်မှုတွေ မကြာခဏ ပြုလုပ်တိုက်ခိုက်နေတယ်လို့ သိရပါတယ်။
ဧရာဝတီတိုင်း၊ ကျိုက်လတ်မြို့မှာ ဇွန် ၂၉ ရက်နေ့က ဗုံး ၄ လုံးပေါက်ပြီးနောက်ပိုင်း လူပေါင်း ၁၀၀ ထက်မနည်းကို အကြမ်းဖက်စစ်တပ်က ဖမ်းဆီးထားတယ်လို့ ဒေသခံတွေကပြောပါတယ်။
မနေ့ကတော့ ဖမ်းခံထားရသူတွေထဲက ၉ ယောက်ပြန်လွတ်လာပြီး လုပ်ငန်းရှင်တချို့အပါအဝင် လူ ၃၀ ဝန်းကျင်ကို ထပ်ဖမ်းသွားတယ်လို့ ဆိုပါတယ်။
“ဇွန် ၃၀ ရက်နေ့အထိ ဖမ်းထားတာ ၇၀ ကျော်။ ထပ်ဖမ်းတာနဲ့ဆို ၁၀၀ ကျော်ပြီ။ အမှတ် ၄ ရပ်ကွက်က များတယ်။ တခြားရပ်ကွက်ကလည်း ပါတယ်။ PDF ကို ထောက်ပံ့လှူဒါန်းသူလို့ ထင်ရတဲ့ သူတွေကို လိုက်ဖမ်းပါတယ်။ ရွှေဆိုင်ပိုင်ရှင်၊ ဆေးဆိုင်ပိုင်ရှင်တွေ၊ လုပ်ငန်းရှင်တွေ ပါပါတယ်” လို့ ဒေသခံတယောက်က ပြောပါတယ်။
ဖမ်းခံထားရသူတွေကို စစ်တပ် တပ်စွဲထားတဲ့ ဧည့်ရိပ်သာမှာ စစ်ဆေးနေပြီး ရိုက်နှက်တာတွေ ရှိတယ်လို့လည်း သိရကြောင်း သူက ပြောပါတယ်။ သံသယရှိသူတွေကိုဖမ်းဆီးသလို သူတို့နဲ့ ဆက်စပ်သူတွေကိုလည်း လိုက်လံဖမ်းဆီးနေတာလို့ ဆိုပါတယ်။
“တချို့ မိသားစုလိုက် ဖမ်းခံရတယ်။ အခုဆို မြို့နေလူတွေအတွက် နေ့ရောညပါ မလုံခြုံတဲ့ ဘဝတွေနဲ့ ရင်ဆိုင်နေရပါတယ်။ ဘယ်အချိန် ငါ့ကိုလည်း လာခေါ်မလဲဆိုပြီး တွေးပူနေကြရပါတယ်” လို့ ဒေသခံတယောက်က ပြောပါတယ်။
ဇွန် ၂၉ ရက်နေ့က အထက ၁ ကျောင်းနားမှာ ဗုံး ၂ ကြိမ်ပေါက်ကွဲခဲ့ပြီး ပညာရေးမှူးရုံးနဲ့ မြို့အဝင်ဂိတ်နားမှာ တကြိမ်စီ ပေါက်ကွဲခဲ့တာပါ။
ဒါဟာ သူတို့ဖောက်ခွဲတာလို့ ကျိုက်လတ်ပြည်သူ့ကာကွယ်ရေးတပ်ဖွဲ့က ထုတ်ပြန်ထားပြီး အဲဒီနေ့မှာပဲ အကြမ်းဖက်စစ်ကောင်စီဟာ သူတို့စိတ်ထင်သလို လိုက်လံဖမ်းဆီးနေတာဖြစ်ပါတယ်။
