တရုတ်နဲ့ ဘီလာရုစ် နှစ်နိုင်ငံသမ္မတတွေဟာ နှစ်နိုင်ငံအကြား ဘက်စုံဗျူဟာမြောက် မိတ်ဖက် သဘောတူညီချက်တပ်တိုးတက်ရေး ခိုင်မြဲစေဖို့ ပူးတွဲ ကြေညာချက်ကို မတ် ၁ ရက်က လက်မှတ်ရေးထိုးခဲ့ပါတယ်။
အပြန်အလှန် ဆက်ဆံရေးကို တည်ငြိမ်မှုရှိရှိ တိုးတက်အောင်တိုးမြှင့်ဖို့ ဘီလာရုစ်နဲ့အတူ ပူးပေါင်း ဆောင်ရွက်ဖို့ တရုတ်က လိုလားတယ်လို့ တရုတ်သမ္မတ ရှီကျင့်ဖျင်က ပြောခဲ့တဲ့ အကြောင်း အစိုးရ ရုပ်သံက ဖော်ပြပါတယ်။
အဓိက အကျိုးစီးပွားကို ကာကွယ်ပေးဖို့ တရုတ်နဲ့ ဘီလာရုစ်တို့ဟာ တနိုင်ငံကို တနိုင်ငံက ကူညီသင့်တယ် ပြည်တွင်းရေးမှာ ပြည်ပအင်အားစုတွေက ကြားဝင်စွက်ဖက်တာကို ဆန့်ကျင် သင့်တယ်။ နှစ်နိုင်ငံရဲ့ နိုင်ငံရေး လုံခြုံမှုနဲ့ အချုပ်အခြာအာဏာကို ဘေးကင်းအောင် စောင့်ရှောက်သင့်တယ်လို့လည်း သမ္မတ ရှီက ပြောပါတယ်။
တရုတ်နဲ့ ဘီလာရုစ်တို့ဟာ စီးပွားရေး ကုန်သွယ်ရေး စက်မှုလုပ်ငန်း စိုက်ပျိုးရေး သိပ္ပံနဲ့ နည်းပညာ ကျန်းမာရေး ခရီးသွားလုပ်ငန်းနဲ့ အားကစားနယ်ပယ်တွေမှာ အပြန်အလှန် ပူးပေါင်းဆောင်ရွက်ရေး စာရွက်စာတမ်းတွေကို လက်မှတ်ရေးထိုးခဲ့ကြတယ်လို့ တရုတ်အစိုးရမီဒီယာဆင်ဟွာက ဖော်ပြပါတယ်။
ဒါ့အပြင် နှစ်နိုင်ငံခေါင်းဆောင်တွေဟာ ယူကရိန်း အကျပ်အတည်းအပေါ် အမြင်တွေကို ဖလှယ်ခဲ့ကြပါတယ်။
တရုတ်ရဲ့ ရပ်တည်ချက်က ငြိမ်းချမ်းရေး ဆွေးနွေးပွဲတွေကို အသားပေးဖို့ ဖြစ်ပြီး ဟန်ချက်ညီညီ ထိရောက်ပြီး ရေရှည်တည်တံ့မယ့် ဥရောပလုံခြုံရေး ဗိသုကာတရပ် တည်ဆောက်ဖို့၊ နိုင်ငံအားလုံးက စိုးရိမ်မှုဖြစ်တဲ့ တရားဝင် လုံခြုံရေးကို လေးစားဖို့၊ စစ်အေးခေတ် စိတ်ဓာတ်ကို စွန့်လွှတ်ဖို့နဲ့ နိုင်ငံရေး အခြေအနေ ဦးတည်ချက် ကို ချဉ်းကပ်ဖို့ မရှိမဖြစ် အရေးကြီးတယ်လို့ ရှီက ပြောခဲ့ပါတယ်။
ဘီလာရုစ် သမ္မတဟာ တရုတ်သမ္မတရဲ့ ဖိတ်ကြားချက်အရ ဖေဖော်ဝါရီ ၂၈ ရက်ကနေ မတ် ၂ ရက်ထိ တရုတ်နိုင်ငံကို နိုင်ငံတော် ခရီးစဉ်နဲ့ လာရောက် လည်ပတ်ခဲ့တာ ဖြစ်ပါတယ်။
သမ္မတရှီနဲ့ သမ္မတ လူကာရှန်ကို တို့ဟာ အပြန်အလှန် ဆက်ဆံရေး ခြေတလှမ်းတိုးဖို့ ရာသီစုံ ဗျူဟာမြောက် မဟာမိတ်ကို မနှစ်က စက်တင်ဘာမှာ ပထမဆုံး ကြေညာခဲ့တာပါ။
တရုတ်ဟာ ဘီလာရုစ်ရဲ့ နီးကပ်တဲ့ မဟာမိတ် ရုရှားနဲ့လည်း ယူကရိန်းကို မကျူးကျော်ခင် လေးတင်မှာ ကန့်သတ်ချက်မဲ့ မဟာမိတ်အဖြစ် လက်မှတ်ရေးထိုးခဲ့ပါတယ်။
