ယူကရိန်းမှာ ရုရှားကျောထောက်နောက်ခံပြု ခွဲထွက်ရေးသမားတွေက ဖမ်းဆီးတာခံရပြီး နိုင်ငံခြား ကြေးစား စစ်သားအဖြစ် စွပ်စွဲခံရတဲ့ ဗြိတိန်နိုင်ငံသားတစ်ဦး သေဆုံးသွားကြောင်း ကိုယ်ပိုင်နိုင်ငံတော်လို့ ကြွေးကြော်ထားတဲ့ ဒွန်းနက်စ်ပြည်သူ့ သမ္မတ နိုင်ငံ-ဒီပီအာရ် မှ တာဝန်ရှိသူ တစ်ဦးက ဇူလိုင် ၁၅ ရက်မှာ ပြောကြားခဲ့ပါတယ်။ 

အသက် ၄၅ နှစ်အရွယ် ပေါလ် ယူရေးရဲ့ သေဆုံးမှုကို ဗြိတိန်ပရဟိတ အဖွဲ့တစ်ခုက လူသားချင်းစာနာထောက်ထားမှုဆိုင်ရာ ဝန်ထမ်းတစ်ဦး လို့ ဖော်ပြထားပြီး သူ့မှာ စစ်ရေးနောက်ခံ မရှိကြောင်း ငြင်းဆိုထားပါတယ်။ 

ပေါလ် ယူရေးဟာ ရုရှားထိန်းချုပ်နယ်မြေကနေ ထွက်ခွာပြီး ဗြိတိန်နိုင်ငံကို ခရီးသွားဖို့ ခွင့်ပြုချက်ရထားတဲ့ အမျိုးသမီးတစ်ဦးကို ကူညီပေးဖို့လုပ်ဆောင်နေချိန် ဧပြီလနှောင်းပိုင်းက ယူကရိန်းအရှေ့တောင်ပိုင်းမှာ ဖမ်းဆီးခံခဲ့ရတာဖြစ်ကြောင်း Presidium Network မှ စစ်ဆင်ရေးဒါရိုက်တာ Dominik Byrne က ပြောကြားခဲ့ပါတယ်။ 

DPR ခွဲထွက်ရေးသမားတွေဟာ သူ့ကို စစ်ဆေးရေးဂိတ်မှာ ရပ်ခိုင်းပြီး ဖမ်းဆီးလိုက်ကာ နိုင်ငံခြားကြေးစား စစ်သား လှုပ်ရှားမှုတွေ လုပ်ဆောင်တယ်လို့ စွဲချက်တင်ခဲ့ပါတယ်။

ဗြိတိန်နိုင်ငံခြားရေးရုံးက ယူရေးရဲ့ မိသားစုကို သေဆုံးကြောင်း အကြောင်းကြားခဲ့တယ်လို့ Presidium Network က ပြောပါတယ်။ 

နိုင်ငံခြားရေးရုံးမှ မှတ်ချက်ကိုတော့ ချက်ခြင်းမရရှိခဲ့ပါဘူး။ 

ယူရေးဟာ ဆီးချိုရောဂါ နဲ့ အသက်ရှူလမ်းကြောင်း၊ ကျောက်ကပ်နဲ့ နှလုံးသွေးကြောဆိုင်ရာ ပြဿနာတွေ ခံစားနေရကြောင်း DPR မှာ လူ့အခွင့်အရေး စောင့်ကြည့်ရေးမှူး ရာထူး ရရှိထားတဲ့ ဒါရီယာ မိုရိုဇိုဗာက လူမှုမီဒီယာမှာ ပြောကြားခဲ့ပါတယ်။ 

သူတို့ဘက်ခြမ်းမှာ ရာဇ၀တ်မှု စွဲချက်ပြင်းထန်ပေမယ့်လည်း ပေါလ် ယူရေးကို သင့်လျော်တဲ့ ဆေးဘက်ဆိုင်ရာ အကူအညီတွေ ပေးခဲ့ကြောင်း၊ ဒါပေမယ့် ရောဂါရှာဖွေမှုတွေနဲ့ စိတ်ဖိစီးမှုတွေကြောင့် ဇူလိုင် ၁၀ ရက်မှာ ကွယ်လွန်သွားတာဖြစ်ကြောင်း ပြောဆိုပါတယ်။

 ဗြိတိန်နိုင်ငံခြားရေးရုံး နဲ့ ကြက်ခြေနီအဖွဲ့တို့ဟာ ယူရေး ကို ဖမ်းဆီးထားချိန်မှာ အဝေးကနေ ဖုန်းနဲ့ လူမှုဖူလုံရေးစစ်ဆေးမှုတွေ လုပ်ဆောင်နိုင်ခဲ့ကြောင်း၊ ဒါပေမယ့် သူ့ကိုဖမ်းထားသူတွေကလွဲလို့ တခြားဘယ်သူနဲ့မှ ရုပ်ပိုင်းဆိုင်ရာ ထိတွေ့မှု မရှိခဲ့ကြောင်း Byrne က ပြောပါတယ်။ 

ယူရေးရဲ့ မိသားစုကတော့ သူ့အလောင်းကို ဗြိတိန်ကို ပြန်ပို့ပေးဖို့ DPR ကို တောင်းဆိုထားကြောင်း Byrne က ပြောကြားခဲ့ပါတယ်။