အမေရိကန်ပြည်ထောင်စုရှိ ဆီလီကွန်ဗယ်လီဘဏ် (SVB) ပြိုကျမှုကြောင့် ပြင်သစ်နဲ့ ဘယ်လ်ဂျီယံဘဏ်တွေမှာ ကူးစက်ပြိုလဲမယ့်အန္တရာယ် မရှိကြောင်း နှစ်နိုင်ငံ ဘဏ္ဍာရေးဝန်ကြီးတွေက မတ်လ ၁၃ ရက် ဘရပ်ဆဲလ်မှာကျင်းပနေတဲ့ Eurogroup ဘဏ္ဍာရေးဝန်ကြီးများ အစည်းအဝေးမှာ ပြောပါတယ်။

ပြင်သစ်အတွက် အထူးတလည် အန္တရာယ်ရှိတယ်လို့ မမြင်တွေ့ရတာကြောင့် ရင်းနှီးမြှုပ်နှံသူတွေ စိတ်အေးအေးထားကြဖို့လိုပါကြောင်း ပြင်သစ်ဘဏ္ဍာရေးဝန်ကြီး ဘရူနိုလီမဲရ်က အလေးပေး ပြောကြားပါတယ်။

ဘယ်လ်ဂျီယံဘဏ္ဍာရေးဝန်ကြီး ဗင်းဆင့်ဗန်ပေးတိဂမ်ကလည်း အခြေအနေကို နာရီအလိုက် စောင့်ကြည့်အကဲဖြတ်နေကြောင်းနဲ့ အခုလောလောဆယ် ဘယ်လ်ဂျီယံဘဏ်တွေအပေါ် သက်ရောက်မှုရှိတဲ့ ဘာအန္တရာယ် အရိပ်အယောင်မှ မရှိကြောင်း ပြောပါတယ်။

ဥရောပနဲ့ ဘယ်လ်ဂျီယံ စည်းမျဉ်းဘောင်မှာလည်း အခြေအနေ ဘယ်လိုရှိတယ်ဆိုတာ ရှင်းရှင်းလင်းလင်း သိနိုင်တာကြောင့် ဘဏ်လုပ်ငန်းစနစ်ကို ယုံကြည်စိတ်ချဖို့နဲ့ ကူညီပေးကြဖို့လည်း ဆိုပါတယ်။

ပြီးခဲ့တဲ့သီတင်းပတ် နှောင်းပိုင်းက ဆီလီကွန်ဗယ်လီဘဏ် (SVB) နဲ့ Signature Bank တို့ ပြိုကျခဲ့ပြီးနောက်မှာ အမေရိကန် ဘဏ်လုပ်ငန်းစနစ် ဘေးကင်းရေးအတွက် လိုအပ်သမျှ အရေးယူဆောင်ရွက်ပေးမယ်လို့ သမ္မတ ဂျိုးဘိုင်ဒင်က ကတိပြုထားပေမဲ့လည်း တနင်္လာနေ့မှာတော့ ကမ္ဘာတဝန်းရှိ ဘဏ်စတော့တွေ ကျဆင်းခဲ့ပါတယ်။

ပြင်သစ်အစိုးရရဲ့ထိပ်တန်း စိန်ခေါ်မှုက ငွေကြေးဖောင်းပွမှုပဲလို့ ပြင်သစ်သမ္မတ အီမန်နျူယယ် မက်ခွန်းရဲ့ လက်စွဲဘဏ္ဍာရေးဝန်ကြီး ဘရူနိုလွေမဲက မေ ၂၁ ရက်မှာ ပြောလိုက်ပါတယ်။

ဧပြီလမှာ သမ္မတအဖြစ် ပြန်ရွေးကောက် တင်မြှောက်ခံရတဲ့ ဗဟိုဝါဒီ မက်ခွန်းဟာ စီးပွားရေး ပြုပြင်ပြောင်းလဲမှုတွေ အပေါ် အာရုံစိုက်ခဲ့တဲ့ ပထမသက်တမ်းနဲ့ မတူခြားနားတဲ့နည်းလမ်းကို သုံးပြီး ပြင်သစ်နိုင်ငံကို အုပ်ချုပ်ဖို့ ကတိပြုခဲ့တာပါ။

ပထမသက်တမ်းက ကျင့်သုံးတဲ့ စီးပွားရေး ပြုပြင်ပြောင်းလဲမှုတွေကြောင့် မဲရှင်တွေ အများအပြား မကျေမနပ် ဖြစ်ခဲ့ကြပါတယ်။

ဒီပြုပြင်ပြောင်းလဲမှုတွေကနေ ခက်ခက်ခဲခဲ ရထားတဲ့ အကျိုးကျေးဇူးတွေကို ကိုဗစ်-၁၉ ကပ်ရောဂါနဲ့ တဟုန်ထိုးတက်နေတဲ့ ငွေကြေးဖောင်းပွမှုတွေက နောက်ကြောင်းပြန်ဆွဲနေပါတယ်။

ဒါကြောင့် မက်ခွန်းဟာ ဇွန်လ လွှတ်တော် ရွေးကောက်ပွဲတွေမှာ စိတ်ပျက်ကြောင်းပြဖို့ ပြင်နေတဲ့ မဲရှင်တွေကို နှစ်သိမ့်ဖို့ လိုအပ်နေတယ်လို့ ရိုက်တာသတင်းဌာနက သုံးသပ်ထားပါတယ်။