စစ်ကိုင်းတိုင်း၊ မြောင်မြို့နယ်အတွင်း ကျေးရွာတွေမှာ ဘဏ်ချေးငွေ ပြန်လည်ပေးဆပ်ဖို့ လုပ်ဆောင်နေသူတွေကို မြင်းမူလျှပ်စီးပြောက်ကျားအဖွဲ့က စက်တင်ဘာ ၃၀ ရက်က သတိပေးလိုက်ပါတယ်။

“ပြည်သူများ စားဝတ်နေရေး ကျပ်တည်းပြီး အခက်အခဲဖြစ်နေချိန် ဘဏ်ချေးငွေပြန်လည်ပေးဆပ်ဖို့ လုပ်ဆောင်သူတွေအနေနဲ့ ပြည်သူကို သတ်ဖြတ်ဖို့အတွက် အကြမ်းဖက်စစ်ကောင်စီကို ကျည်ဆန်ဖိုး သင်ပေးတော့မှာလား၊ ရိက္ခာပြတ်လပ်နေသော စခများ ကျေးရွာတွေ ဖျက်ဆီး၊ ဝင်ချင်တိုင်းဝင် ထွက်ချင်တိုင်းထွက်ပြီး ရိက္ခာများ သယ်ဆောင်နေတာ မမြင်လေရော့သလား၊ ခင်များတို့အိမ်/မိသားစု မဟုတ်သေးလိုလား၊ ခင်များခံယူချက်က ကောက်ရိုးမီးပဲလား၊ အထက်ပါမေးခွန်များကို သေချာစဉ်းစားပါ” ဆိုပြီး သတိပေးချက်မှာ ဖော်ပြထားပါတယ်။

မြောင်မြို့နယ်မှာ ဘဏ်ချေးငွေပြန်လည်ပေးဆပ်ဖို့ လုပ်ဆောင်နေသူတွေကို စစ်ကောင်စီ အလိုတော်ရိတွေအဖြစ် ကြေညာပြီး အကြမ်းဖက်စစ်ကောင်စီကို အမြစ်ဖြုတ်သလို ချေမှုန်း သွားမယ်လို့ သတိပေးထားပါတယ်။

ဒါအပြင် ချေငွေအတင်းအဓမ္မ တောင်းခံနေတာကို ရပ်တန်းက ရပ်ဖို့နဲ့ ချေးငွေဆပ်သူနဲ့ လိုက်လံကောက်ခံသူတွေရဲ့ အသက်အတွက် အာမမခံကြောင်း၊ ပြည်သူတွေအနေနဲ့ ချေငွေအတင်းအဓမ္မ တောင်းနေတာကို သိရှိကြဖို့ မြင်းမူလျှပ်စီးပြောက်ကျားအဖွဲ့ကို သတင်းပေးဖို့ ဖော်ပြထားပါတယ်။

မြင်းမူလျှပ်စီးပြောက်ကျားအဖွဲ့ကို  သတင်းပေးသူတွေရဲံ လုံခြုံရေးအတွက် အပြည့်အဝ တာဝန်ယူမှာဖြစ်ပြီး ပြည်သူနဲ့အတူ စစ်ကောင်စီ အလိုတော်ရိတွေကို အမြစ်ဖြုတ်သွားမယ်လို့ ထုတ်ပြန်ထားပါတယ်။

ပြန်ဆပ်ချိန်စေ့နေတဲ့ ဘဏ်ချေးငွေတွေကို အချိန်အမီ ပေးသွင်းပေးကြဖို့  မြန်မာနိုင်ငံ ဘဏ်များအသင်းက တိုက်တွန်းနှိုးဆော်ထားပါတယ်။

အများပြည်သူက ဘဏ်တွေကို ယုံကြည်လို့ အပ်နှံထားတဲ့ငွေတွေကို ပြန်လည်ထုတ်ပေးရာမှာ အဆင်ပြေစေဖို့အတွက် အခုလို တိုက်တွန်းတာဖြစ်တယ်လို့ သိရပါတယ်။

ဘဏ်ချေးငွေဆပ်ဖို့ အချိန်စေ့တဲ့သူတွေအနေနဲ့ ချေးငွေ အတိုး၊ အရင်းကို ပြန်ပေးဆပ်ရာမှာ ငွေသားနဲ့ ပေးသွင်းနိုင်သလို၊ စာရင်းပြောင်းနည်း၊ စာရင်းရှင်းနည်းတို့နဲ့လည်း ပေးဆပ်နိုင်တယ်လို့ မြန်မာနိုင်ငံ ဘဏ်များအသင်းက ထုတ်ပြန်ထားပါတယ်။

မြန်မာနိုင်ငံမှာ ကိုဗစ်-၁၉ ကြောင့် လူမှုစီးပွားတွေအပေါ် ဆိုးကျိုးသက်ရောက်မှုတွေ ရှိခဲ့သလို စစ်တပ် အာဏာသိမ်းမှုရဲ့ နောက်ဆက်တွဲ အခြေအနေတွေကြောင့်လည်း လူမှုရေး၊ စီးပွားရေးအပြင် အဘက်ဘက်က ယိုယွင်းကျဆင်းလာတာ၊ အလုပ်လက်မဲ့ လူဦးရေ များပြားလာတာတွေကို တွေ့ကြုံခံစားနေရပါတယ်။

ဒါကြောင့် ဘဏ်တွေအနေနဲ့ ပြန်ဆပ်ချေးငွေတွေ အချိန်မီ အပြည့်အဝ ပြန်လည်ရရှိနိုင်ဖို့ သိပ်မလွယ်ကူနိုင်ဘူးလို့ လုပ်ငန်းရှင်တစ်ဦးက သုံးသပ်ပါတယ်။

ဘဏ်တွေကတော့  ချေးငွေထုတ်ချေးရာမှာ ဗဟိုဘဏ်ရဲ့ ထိန်းချုပ်မှုအောက်မှာ ထုတ်ချေးရတာ ဖြစ်ပါတယ်။ ဘဏ်တွေရဲ့ ရပ်တည်မှုခိုင်မာဖို့နဲ့ အများပြည်သူက ဘဏ်အပ်နှံငွေတွေ ပြန်လည်တောင်းခံချိန်မှာ အလွယ်တကူထုတ်ပေးနိုင်ဖို့အတွက် ဗဟိုဘဏ်ကချေးငွေနဲ့ အပ်ငွေအချိုးတွေကို သတ်မှတ်ပေးထားတာပါ။

ဘဏ်တွေဟာ အများပြည်သူ အပ်နှံထားတဲ့ အပ်ငွေစုစုပေါင်းရဲ့ ရာခိုင်နှုန်းတစ်ခုကို ဗဟိုဘဏ်မှာ ထားရှိရထားဖြစ်ပြီးတော့၊ ဒီသတ်မှတ်ရာခိုင်နှုန်းအောက်ကို  မရောက်အောင်  ဗဟိုဘဏ်က စောင့်ကြည့်ပြီး ကြီးကြပ်စစ်ဆေးတာတွေ လုပ်ဆောင်တာဖြစ်ပါတယ်။

ဒါပေမဲ့ လက်ရှိ မြန်မာနိုင်ငံရေး အခြေအနေတွေကြောင့် ပြည်တွင်းဘဏ်လုပ်ငန်းတွေနဲ့ မြန်မာကျပ်ငွေအပေါ် လူထုရဲ့ ယုံကြည်မူတွေ ဆက်လက်လျော့နည်းကျဆင်းနေပြီး ပြန်အပ်ငွေ ပြန်လည်ထုတ်ယူသူတွေလည်း ဆက်လက်ရှိနေဆဲ ဖြစ်ပါတယ်။