အမေရိကန်နိုင်ငံ၊ ကင်တပ်ကီပြည်နယ် လူးဝစ်ဗီးလ်မြို့လယ်မှာ ရိုင်ဖယ်သေနတ် ကိုင်ဆောင်ထားတဲ့ ဘဏ်ဝန်ထမ်းတဦးဟာ ဧပြီ ၁၀ ရက်မှာ လုပ်ဖော်ကိုင်ဖက် ၄ ဦးကို ပစ်သတ်ပြီး တခြားသူ ၉ ဦး ဒဏ်ရာရရှိသွားခဲ့တဲ့ သူ့ရဲ့တိုက်ခိုက်မှုကို ဖေ့စ်ဘွတ်ခ်ကနေ တိုက်ရိုက်ထုတ်လွှင့်ခဲ့ပါတယ်။
တိုက်ခိုက်သူဟာ အခင်းဖြစ်ပွားရာ နေရာမှာပဲ သေနတ်ထိမှန် သေဆုံးသွားခဲ့တယ်လို့ ရဲတပ်ဖွဲ့က ပြောပေမဲ့ ရဲက သေနတ်နဲ့ ပစ်ခတ်လို့လား သူ့ဖာသာသူ ဒဏ်ရာရရှိ သေဆုံးသွားတာလား ဆိုတာတော့ ရှင်းရှင်းလင်းလင်း မသိရသေးပါဘူး။
သေနတ်သမားဟာ အသက် ၂၃ နှစ်အရွယ် ကွန်နာစတားဂျွန်ဖြစ်ကြောင်း ဌာနက ဖော်ထုတ်နိုင်ခဲ့ပြီး သူဟာ မနှစ်က အိုးလ်ဒ်နေရှင်နယ်ဘဏ်အဟောင်းရဲ့ မြို့လယ်ဘဏ်ခွဲကို အချိန်ပြည့်ဝန်ထမ်းအဖြစ် လုပ်ကိုင်လာသူဖြစ်ပါတယ်။
စလပ်ဂါ ဖှီးလ်ဒ်ဘေ့စ်ဘောကွင်းအနီးရှိ ဘဏ်ရုံးမှာ မနက် ၈ နာရီခွဲလောက်က တိုက်ခိုက်သူ တယောက်နဲ့ပတ်သက်တဲ့ သတင်းပေးပို့ချက်တွေကို ရဲတပ်ဖွဲ့က မိနစ်ပိုင်းအတွင်း သွားရောက် တုံ့ပြန် ဆောင်ရွက်ခဲ့ကြောင်း ပြောပါတယ်။
တိုက်ခိုက်သူဟာ သူ့ရဲ့တိုက်ခိုက်မှု ဗီဒီယိုကို အင်တာနက်ပေါ်မှာ တိုက်ရိုက်ထုတ်လွှင့်ခဲ့ကြောင်း ရဲချုပ် ဂျက်ကလင်းန်ဂွင်းန် ဗီလာရိုဝလ် က သတင်းထောက်တွေကို ပြောပါတယ်။
ရိုင်ဖယ်သေနတ် ကိုင်ဆောင်ထားတဲ့ သေနတ်သမားကို ရဲအရာရှိတွေက ပစ်ခတ်ခဲ့တယ်လို့လည်း သူက ဆိုပါတယ်။ သေဆုံးသူတွေဟာ ဘဏ်ရဲ့ အကြီးတန်းဒုတိယဥက္ကဋ္ဌ အဲလိယော့ထ် အပါအဝင် အသက် ၄၀ မှ ၆၄ နှစ် အကြား သူ့ရဲ့လုပ်ဖော်ကိုင်ဖက် ၄ ယောက် ဖြစ်ကြောင်း ရဲတပ်ဖွဲ့က အတည်ပြုထားပါတယ်။
တိုက်ခိုက်မှုအတွင်း ရဲအရာရှိ ၂ ဦးအပါအဝင် ဒဏ်ရာရရှိသူ ကိုးဦးကို လူးဝစ္စ်ဗီးလ် တက္ကသိုလ်ဆေးရုံမှာ ကုသထားကြောင်း ဆေးရုံ ပြောရေးဆိုခွင့်ရှိသူတစ်ဦးက ပြောကြားခဲ့ပါတယ်။ ရဲအရာရှိ ၂ ဦးထဲမှာ မကြာသေးခင်ကမှ ရဲသင်တန်းကျောင်းမှ ဆင်းလာတဲ့ အသက် ၂၆ နှစ်အရွယ် ရဲအရာရှိတစ်ဦးဟာ ဦးခေါင်းကို ထိမှန်ခဲ့ပြီး တနင်္လာနေ့မှာတော့ ဦးနှောက် ခွဲစိတ်ကုသမှုခံယူပြီးနောက် စိုးရိမ်ရတဲ့ အခြေအနေမှာ ရှိနေကြောင်း ရဲတပ်ဖွဲ့က ပြောပါတယ်။
တခြား သေဆုံးသူ နှစ်ဦးကလည်း စိုးရိမ်ရတဲ့ အခြေအနေမှာ ရှိနေပါတယ်။ လူးဝစ္စ်ဗီးလ် ဘဏ်တိုက်ခိုက်မှုကို တုံ့ပြန်တဲ့အနေနဲ့ သမ္မတ ဂျိုးဘိုင်ဒန် က ကွန်ဂရက်အနေနဲ့ သေနတ်တွေကို ဘေးကင်းလုံခြုံစွာ သိုလှောင်မှု၊ သေနတ်ရောင်းချမှု အားလုံးအတွက် နောက်ခံစစ်ဆေးမှုနဲ့ သေနတ်ထုတ်လုပ်သူတွေရဲ့ တာဝန်ယူမှုကနေ ပြစ်ဒဏ်ကင်းလွတ်ခွင့်တွေကို ဖယ်ရှားပေးဖို့ လိုအပ်တဲ့ ဥပဒေတွေကို အတည်ပြုဖို့ သူ့ဆန္ဒကို ထပ်လောင်း ပြောကြားခဲ့ပါတယ်။
အကြမ်းဖက် စစ်ကောင်စီဩဇာခံ မြန်မာ့နိုင်ငံခြားကုန်သွယ်မှုဘဏ် ဒုတိယအထွေထွေမန်နေဂျာ၊ လက်ထောက်အထွေထွေမန်နေဂျာတွေ အပါအဝင် အမှုထမ်း အရာထမ်း ၂၀၀ ကျော်ကို အမည်ပျက်စာရင်း သွင်းပြီး ဝန်ထမ်းအဖြစ်မှ ထုတ်ပယ်လိုက်ကြောင်း အမျိုးသားညီညွတ်ရေးအစိုးရ (NUG) က ကြေညာလိုက်ပါတယ်။
NUG အစိုးရ စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှု ဝန်ကြီးဌာန ပြည်ထောင်စုဝန်ကြီး ဦးတင်ထွန်းနိုင်က ဒီကနေ့ မတ် ၂၃ ရက် ရက်စွဲနဲ့ လက်မှတ်ရေးထိုး ထုတ်ပြန်လိုက်တာဖြစ်ပြီး ဝန်ကြီးဌာနအနေနဲ့ မတရားတဲ့ အမိန့်အာဏာ ဖီဆန်ရေးလှုပ်ရှားမှု (CDM) ပြုလုပ်နေကြတဲ့ နိုင်ငံ့ဝန်ထမ်း သူရဲကောင်းတွေရဲ့ လူမှုဖူလုံရေး၊ လုံခြုံဘေးကင်းရေးနဲ့ ဖိအားကင်းစင်စေရေးတို့အတွက် အလေးထား ဆောင်ရွက်နေတယ်လို့ ဖော်ပြထားပါတယ်။
ဒါကြောင့်မို့ တရားမဝင် အာဏာသိမ်းစစ်ကောင်စီ လက်အောက်မှာ ဆက်လက် တာဝန်ထမ်းဆောင်နေပြီး CDM ဝန်ထမ်းတွေကို ဖိနှိပ်တာ၊ ခြိမ်းခြောက်တာ၊ ရာထူးမှထုတ်ပယ်တာ၊ ဝန်ထမ်းအဖြစ်မှ ထုတ်ပစ်တာ၊ ပြည်သူ့အစိုးရက ပြန်လည်ပေးဆပ်ဖို့ မလိုကြောင်း ထုတ်ပြန်ထားတဲ့ ၂ လစာ ချေးငွေတွေကို ပြန်လည်တောင်းခံတာတွေ အပါအဝင် အမျိုးမျိုးသော ဖိနှိပ်မှုတွေကို ကျူးလွန်နေတဲ့အပြင် ပြည်သူလူထုကို အကြမ်းဖက် နှိပ်စက်နေတဲ့ စစ်ကောင်စီယန္တရား လည်ပတ်နိုင်ရေးအတွက် ပူးပေါင်းပါဝင် ဆောင်ရွက်နေကြတဲ့ မြန်မာ့နိုင်ငံခြားကုန်သွယ်မှုဘဏ်က ဖော်ပြပါ အရာထမ်း၊ အမှုထမ်း ၂၁၂ ယောက်တို့ကို အမည်ပျက်စာရင်း သွင်းလိုက်ပြီး ဝန်ထမ်းအဖြစ်မှ ထုတ်ပစ်လိုက်တယ်လို့ ကြေညာထားတာပါ။
မြန်မာနိုင်ငံမှာ ပြီးခဲ့တဲ့ ၂၀၂၁ ခုနှစ်၊ ဖေဖော်ဝါရီ ၁ ရက်က စတင်ကာ စစ်ကောင်စီက နိုင်ငံတော်အာဏာကို သိမ်းယူခဲ့တဲ့ ကာလဟာ ၁ နှစ်ကျော် ကြာမြင့်ခဲ့ပြီ ဖြစ်ပါတယ်။
ဒီကာလတွေအတွင်း နိုင်ငံတဝန်း စစ်အာဏာရှင် ဆန့်ကျင်ရေး ဆန္ဒပြပွဲတွေမှာ ပြည်သူတွေ မြို့ရွာအနှံ့ ပါဝင်နေခဲ့ကြပြီး စစ်တပ်နဲ့ ရဲတပ်ဖွဲ့ဝင်တွေက အကြမ်းဖက် ပစ်ခတ်နှိမ်နင်းမှုတွေနဲ့ ကျဆုံးမှုတွေ၊ ဖမ်းဆီးထိန်းသိမ်း တရားစွဲဆိုခံရတာတွေနဲ့အတူ အခြေအနေတွေ ပိုမိုတင်းမာလာနေတာပါ။
အမျိုးသားညီညွတ်ရေးအစိုးရကတော့ ပြီးခဲ့တဲ့ ၂၀၂၁ ခုနှစ်၊ စက်တင်ဘာ ၇ ရက်မှာ စစ်အာဏာရှင်ဆန့်ကျင်ရေး ခုခံတွန်းလှန်စစ် စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ ကြေညာခဲ့ပြီး နိုင်ငံတဝန်း စစ်ကောင်စီတပ်တွေနဲ့ ဒေသခံ ပြည်သူ့ကာကွယ်ရေး တပ်တွေကြား တိုက်ပွဲတွေလည်း ပြင်းထန်နေပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ်ပြန်ချက်အရ လက်ရှိအချိန်ထိ စစ်တပ်က အကြမ်းဖက်ပစ်ခတ်သတ်ဖြတ်မှုကြောင့် အပြစ်မဲ့ ကျဆုံးပြည်သူ ၁,၇၀၀ နီးပါးနဲ့ မတရား ဖမ်းဆီးထိန်းသိမ်းခံရသူပေါင်း ၁၂,၈၇၅ ယောက်ထိ ရှိခဲ့ပြီလို့ သိရပါတယ်။
