စပါးအသင်းမှာ ကိုဗစ်ကူးစက်ပျံ့နှံ့မှုတွေ များပြားနေတာကြောင့်ဘရိုက်တန်နဲ့ပွဲစဉ်ကို ရွှေ့ဆိုင်းဖို့ ပရီးမီးယားလိဂ်အဖွဲ့ချုပ်က ဆုံးဖြတ်ပါတယ်။
အသင်းရဲ့ လေ့ကျင့်ခန်း မပြုလုပ်နိုင်တာကြောင့် ဒီဇင်ဘာ ၁၂ ရက်နေ့ ကစားမယ့် ဘရိုက်တန်နဲ့ အဝေးကွင်းပွဲစဉ်ကို ရွှေ့ဆိုင်းဖို့ စပါးအသင်းက တောင်းဆိုခဲ့တာပါ။
စပါးအသင်းဟာ မနေ့ညက ကစားရမယ့် ရင်းနက်စ်နဲ့ ယူရိုကွန်းဖရန့်လိဂ်ပွဲစဉ်ကိုလည်း ရွှေ့ဆိုင်းခဲ့ရပါတယ်။
ကျန်းမာရေးတာဝန်ရှိသူတွေရဲ့ အကြံပြုချက်အရ ကစားသမားတွေနဲ့ အသင်းဝန်ထမ်းတွေရဲ့ ကျန်းမာရေးက ပထမဦးစားပေးဖြစ်တဲ့အတွက် ပရီးမီးယားလိဂ်ဘုတ်အဖွဲ့က ပွဲရွှေ့ဆိုင်းဖို့သဘောတူခဲ့ကြောင်း စပါးအသင်းက သတင်းထုတ်ပြန်ခဲ့ပါတယ်။
စပါးအသင်းအနေနဲ့ လာမယ့်ကြာသပတေးနေ့ ကစားရမယ့် လက်စတာနဲ့ ပရီးမီးယားလိဂ်ပွဲစဉ်ကိုလည်း ကစားခွင့်ရဖို့ မသေချာသေးဘဲ ဆက်ပြီးစောင့်ကြည့်သွားရဖို့ရှိပါတယ်။
ပြီးခဲ့တဲ့ရက်ပိုင်းက စပါးအသင်းသား ၇ ဦးမှာ ကိုဗစ်ပိုးတွေ့ရှိခဲ့ပြီးနောက် နောက်ထပ်ပိုးတွေ့ရှိသူတွေ နေ့စဉ်ရှိခဲ့တာဖြစ်ပါတယ်။