ဂျပန်နိုင်ငံရဲ့ မြို့တော်တိုကျိုက ပိုလန်သံရုံးထဲမှာ ခိုလှုံနေတဲ့ ဘီလာရုစ် အိုလံပစ် အားကစားမယ်ကို ဂျပန်ရဲတွေက စောင့်ရှောက်ပေးထားတယ်လို့ ရိုက်တာသတင်းဌာနက သြဂုတ် ၃ ရက်မှာ ပြောပါတယ်။
အိုလံပစ် အားကစားပြိုင်ပွဲကို မဝင်ခိုင်းဘဲ အိမ်ပြန်ဖို့ သူ့အဖွဲ့က အမိန့်ပေးတာကို ငြင်းဆန်အပြီး ဘီလာရုစ် အားကစားမယ်ဟာ ဂျပန်လေဆိပ်မှာ ရဲတွေဆီ အကူအညီတောင်းခံခဲ့ပြီးတဲ့နောက် ပိုလန်သံရုံးထဲမှာ ခိုလှုံခဲ့ပါတယ်။
သူ့ကို ပိုလန်အစိုးရက လူသားချင်းစာနာမှုဆိုင်ရာ ပြည်ဝင်ခွင့်ပေးခဲ့လို့ ပိုလန်နိုင်ငံဆီကို သြဂုတ် ၄ ရက်နေ့ ထွက်ခွာမှာ ဖြစ်ပါတယ်။
ဘီလာရုစ် အားကစားမယ် စပရင်တာ ခရစ်စီနာ စီမာနောင်စကာယာဟာ သူ့အသင်း အုပ်ချုပ်သူ ဝန်ထမ်းတယောက်ကို ဝေဖန်အပြီး ဘဲလာရုစ် အရာရှိတွေက သူ့ဆန္ဒကို ဆန့်ကျင်ရင်း လေဆိပ်ဆီကို သူ့ကို ခေါ်လာခဲ့တယ်လို့ ပြောပါတယ်။ သူက ဘဲလာရုစ်နိုင်ငံကို ပြန်ဖို့ကိုလည်း ငြင်းဆန်ခဲ့ပါတယ်။
သြဂုတ် ၂ ရက်မှာ တိုကျိုမြို့တော်က ပိုလန်သံရုံးကို ရောက်လာပြီး မီဒီယာတွေရဲ့ စိတ်ဝင်စားမှု ခံခဲ့ရပါတယ်။
နိုင်ငံရေးအမြင်ကြောင့် ထောင်ချခံ၊ ဖယ်ထုတ်ခံ အားကစားသမားတွေကို ထောက်ပံ့ကူညီနေတဲ့ ဘီလာရုစ် ညီညွတ်သွေးစည်းရေး ဖောင်ဒေးရှင်းက သတင်းရင်းမြစ်တရပ်ကတော့ အားကစားမယ်ဟာ ဂျာမနီ ဒါမှမဟုတ် သြစတြီးယားမှာ ခိုလှုံခွင့်တောင်းခံဖို့ စီစဉ်ထားတယ်လို့ ပြောခဲ့ပါတယ်။
