ရှမ်းပြည်နယ်အရှေ့ပိုင်း၊ မိုင်းဖြတ်မြို့နယ်မှာ ဧပြီ ၂၄ ရက် ဒီနေ့မနက်က ဘုရားဖူးထွက်လာတဲ့ အိမ်စီးကားတစ်စီး ချောက်ထဲကို ပြုတ်ကျခဲ့လို့ အမျိုးသမီး ၃ ဦးသေဆုံးပြီး ၃ ဦး ဒဏ်ရာရသွားတယ်လို့ မြို့ခံကယ်ဆယ်ရေးအသင်းက ပြောပါတယ်။
တာချီလိတ်ကနေ မိုင်းယောင်းမြို့ကို ဘုရားဖူးထွက်လာတဲ့ Vigo အဖြူရောင်ကားဟာ နမ့်နန်းကျေးရွာအကျော် ၃ ဖာလုံ၊ မိုင်းယောင်းလမ်းမဘေးရှိ မိုင်းယောင်းအတက်လမ်းမှာ ပြန်လှိမ့်ကျကာ ပေ ၂၀ လောက် အနက်ရှိတဲ့ ချောက်ထဲကို ပြုတ်ကျခဲ့တာပါ။
ကားပေါ်ပါ လူ ၆ ဦးအနက် အသက် ၅၀ ကျော် အမျိုးသမီး ၃ ဦး ဆေးရုံပို့ဆောင်တဲ့လမ်းမှာ သေဆုံးသွားပြီး ယာဉ်မောင်းအမျိုးသားကတော့ ခေါင်းကွဲဒဏ်ရာ၊ အမျိုးသမီး ၁ ဦးမှာ စိုးရိမ်ရဒဏ်ရာနဲ့ အမျိုးသမီး ၁ ဦးမှာ မစိုးရိမ်ရဒဏ်ရာ ရရှိခဲ့ပါတယ်။
မြို့ခံကယ်ဆယ်ရေးအသင်းတာဝန်ရှိသူတဦးက "တာချီလိတ်ကနေ မိုင်းယောင်းဘက်သွားတာ၊ အားလုံး ၆ ယောက်ပါ၊ တောင်အတက်လမ်းမှာ မတက်နိုင်ဘဲ ပြန်ထိုးကျတာ၊ လူနာက ယာဉ်မောင်း ၁ ဦး၊ အမျိုးသမီး ၅ ဦးမှာ ဆေးရုံအရောက်မှာ မ ၃ ဦးသေဆုံး၊ ကျန်အမျိုးသမီး ၁ ဦး စိုးရိမ်ရပါ " လို့ ဆိုပါတယ်။
ကားပေါ်ပါသူတွေဟာ တာချီလိတ်မြို့က ဖြစ်တာကြောင့် သေဆုံးသူ ရုပ်အလောင်းနဲ့ ဒဏ်ရာရရှိသူတွေကို မိုင်းဖြတ်မြို့နယ်ဆေးရုံကနေ တာချီလိတ်ဆေးရုံပို့ဆောင်ပေးခဲ့ပါတယ်။
ပြီးခဲ့တဲ့ ဧပြီ ၂၀ ရက်ကလည်း မိုင်းဖြတ်မြို့နယ် တာကျောက်ရွာအနားမှာ လူ ၂၅ ဦးပါ ခရီးသည်တင်ကား ချောင်းထဲပြုတ်ကျတာကြောင့် ၃ ဦးသေဆုံး၊ ၂၂ ဦး ထိခိုက်ဒဏ်ရာရရှိခဲ့တယ်။
ဧရာဝတီတိုင်း၊ ကြံခင်းမြို့နယ်မှာ ဧပြီ ၂၉ ရက်က အကောက်တောင်ဘုရားကို လာတဲ့ ဘုရားဖူးကား ၁ စီး တိမ်းမှောက်ပြီး ၃ ဦး သေဆုံးခဲ့တယ်လို့ ဒေသခံတွေက ပြောပါတယ်။
ကြံခင်းဘိလပ်မြေစက်ရုံကနေ အကောင်တောင်ဘုရားကို လာတဲ့ ကားဟာ မနက် ၇ နာရီလောက် တောင်တက်လမ်းတဝက်မှာ ချောက်ထဲကျပြီး ၃ ဦးသေဆုံးခဲ့တာလို့ ဆိုပါတယ်။
“ကားမှာ အကုန် ၁၁ ဦးပါလာတာ၊ ကလေးတွေလည်းပါတယ်။ တောင်တက်လမ်း တဝက်လောက်ရောက်မှ ချောက်ထဲကျတာ။ အဲ့နေရာမှာ အမျိုးသမီး ၂ ဦးသေတယ်၊ အမျိုးသား ၁ ဦးက ဆေးရုံရောက်မှသေတယ်” လို့ ဒေသခံတဦးက ပြောပါတယ်။
ကားချောက်ထဲထိုးကျချိန်မှာ အမျိုးသမီး ၂ ဦး နေရာမှာ သေဆုံးခဲ့ပြီး ဒဏ်ရာရတဲ့သူတွေကို ဆိပ်သာ တိုက်နယ်ဆေးရုံ ပို့ဆောင်ပေးချိန်မှာ အမျိုးသား ၁ ဦး ထပ်မံသေဆုံးခဲ့တာလို့ ဆိုပါတယ်။
ဒဏ်ရာပြင်းထန်တဲ့ အမျိုးသားလူနာ ၂ ဦး၊ အမျိုးသမီးလူနာ ၁ ဦးနဲ့ ကလေး ၁ ဦးကို ဆိပ်သာဆေးရုံကနေ ဟင်္သာတဆေးရုံကို လွှဲပြောင်းကုသပေးနေရပြီး စိုးရိမ်နေရတယ်လို့ သိရပါတယ်။
အကောက်တောင်ပေါ်ရှိ ဘုရားကိုလာတဲ့ကားလမ်းမှာ တောင်တက်လမ်းဖြစ်ပြီး လမ်း ကြမ်းတမ်းတာကြောင့် ကားမောင်းတော်တော်ကျမ်းကျွင်တဲ့ သူမျိုးနဲ့သာ လာသင့်တဲ့လမ်း ဖြစ်တယ်လို့ ဒေသခံတွေက သတိပေး ပြောဆိုပါတယ်။
