မန္တလေးတိုင်း၊ ကျောက်ပန်းတောင်းမြို့နယ်၊ လက်ပံပျားရွာနားမှာ ဧပြီ ၂၄ ရက် နေ့လယ်ပိုင်းက ဘုရားဖူးယာဉ်တစ်စီး အပူရှိန်မြင့်တက်ကာ တာယာပေါက်ကွဲပြီး မီးလောင်မှုဖြစ်ပွားခဲ့တယ်လို့ မြို့ခံ ကယ်ဆယ်ရေးအသင်းက ပြောပါတယ်။

ကားပေါ်မှာ ယာဉ်မောင်းအပါ ၄၅ ဦးနဲ့ ရန်ကုန်မှ ပုဂံကို ဘုရားဖူးထွက်လာကြတာဖြစ်ပြီး နံနက်ပိုင်း ပုဂံက ပြန်ထွက်လာကတည်းက ‌ကားလေအိတ်ပေါက်ကာ ဘရိတ်ရှုးငြိ လာတာလို့ သိရပါတယ်။ 

ကျောက်ပန်းတောင်းအရောက်မှာ ကားပိုင်ရှင်ဖြစ်သူက ကားတာယာကို ရေလောင်းလိုက်ရာမှ တာယာပွင့်ထွက်ပြီး ကား တစ်စီးလုံး မီးလောင်သွားခဲ့တာပါ။ 

မြို့ခံကယ်ဆယ်ရေးအသင်းက "ကားကတော့ ရန်ကုန်ဘက်က ဘုရားဖူးနဲ့ ခရီးသည်တွေပါ၊ ပုဂံညောင်ဦးဘက်ကနေ အပြန် ကားက လေအိတ်ပေါက်လာတာကို ဘရိတ်ရှူးတွေက ညှိနေတော့ ပိုင်ရှင်ကဆင်းကြည့်ခိုင်းတာ၊ သူက နားမလည်တော့ တာယာတွေ ပူနေတယ်ဆိုပြီး ရေလောင်းချလိုက်တာ၊ တာယာက ထပေါက်ပြီးတော့ ကားတစ်စီးလုံး လောင်သွားတော့တာ " လို့ ပြောပါတယ်။

မီးလောင်မှုကြောင့် ခရီးသည်တွေရဲ့ အသုံးအဆောင်ပစ္စည်းတွေ ပျက်စီးသွားတဲ့အပြင် ကားပေါ်ပါ ကလေး ၁၂ ဦးအနက် ၁ ဦးမှာ ပွန်းပဲ့ဒဏ်ရာ မစိုးရိမ်ရ ရရှိပြီး ကျန်ခရီးသည်နဲ့ ယာဉ်မောင်းတွေမှာ ထိခိုက်ဒဏ်ရာ မရရှိဘူးလို့ သိရပါတယ်။

လက်ပံပျားတိုက်နယ်မီးသတ်ဌာနနဲ့ ကယ်ဆယ်ရေးအသင်းတွေက မီးငြှိမ်းသတ်ခဲ့ကြတာကြောင့် နေ့လယ် ၁၁ နာရီ ၅၃ မိနစ်မှာ မီးငြိမ်းခဲ့ပြီး ပျက်စီးဆုံးရှုံးမှုတန်ဖိုးကို တွက်ချက်နေဆဲပါ။                                                        

ကားပိုင်ရှင်နဲ့ ယာဉ်မောင်းဖြစ်သူကို ကျောက်ပန်းတောင်းမြို့နယ်ရဲစခန်းက စစ်ဆေးနေပြီး ခရီး သည်တွေ ရန်ကုန်ပြန်နိုင်ရေးအတွက် ကားစီစဉ်နေတယ်လို့ သိရပါတယ်။

ထိုင်း-မြန်မာနယ်စပ်၊ ရေး-ဘုရားသုံးဆူ နယ်မြေဘက်မှာ မတ် ၅ ရက် တပေါင်းလပြည့်နေ့ ညနေ ၄ နာရီလောက်က တောင်အိုဘုရားထီးတင်ပူဇော်ပွဲကနေ ပြန်လာတဲ့ ဘုရားဖူးယာဥ် တစီး တိမ်းမှောက်ခဲ့တဲ့ ခရီးသည် ၂၀ ကျော်လောက် ဒဏ်ရာလို့ ဆေးရုံကိုပို့လိုက်ရတယ်လို့   ဒေသခံတွေထံက သိရပါတယ်။

ယာဥ်တိမ်းမှောက်ခဲ့ရာမှာ ဘုရားဖူး ၁၈ ယောက်လောက် ရေးမြို့ပြည်သူ့ဆေးရုံကို အရေးပေါ် ပို့ဆောင်ခဲ့ရပြီး မော်လမြိုင်ပြည်သူ့ဆေးရုံကိုတော့ ဒီမနက်အထိ ၅ ယောက် အရေးပေါ် ပို့ဆောင်ထားရတယ်လို့ ဆိုပါတယ်။

ဘုရားဖူးခရီးသည်တွေထဲကတဦးက “ဘုရားထီးတင်ပွဲကနေ အပြန်မှာ တောင်တက်လမ်းကနေ ကားတစီးက အရင်ပျက်လို့ ကားပေါ်က ဘုရားဖူးတွေကို နောက်ကားတစီးက ကူညီတင်‌ဆောင်လာရာမှာ လူကများပြီး တောင်ဆင်းလမ်း ဖြစ်တဲ့အတွက် အရှိန်မထိန်းနိုင်ဘဲ ယာဥ်တိမ်းမှောက်ခဲ့တာ” လို့ ပြောပါတယ်။

ဘုရားဖူးကားက ဝယ်ပေါင်ကျေးရွာကကားဖြစ်ပြီး ရေးကွမ်ဒူကျေးရွာက ဘုရားဖူး ၁၁ ယောက်လည်း ထိခိုက်ဒဏ်ရာရကြပြီး ရေး အနမ်းပုန်း ကျေးရွာဘက်က ဘုရားဖူးတွေ ဖြစ်ကြပါတယ်။

စစ်အုပ်ချုပ်ရေး သတ်မှတ်ထားခံရတဲ့ ရေးမြို့နယ်မှာ တပေါင်းလပြည့်နေ့က ဘာသာရေးအခမ်းအနား၊ လူမှုရေးအခမ်းအနားတွေနဲ့ စည်ကားနေပေမဲ့ အရင်နှစ်တွေကလိုတော့ အသွားအလာ သိပ်မရှိကြဘူးလို့ ဒေသခံတွေထံက သိရပါတယ်။