ထိုင်းနိုင်ငံ၊ စမွတ်ပရာကန်ခရိုင်၊ ဘန်ဖီမြို့နယ်မှာ ဧပြီလ ၁၄ ရက်က ထိုင်းရောက်မြန်မာ မြန်မာနိုင်ငံသားတွေနဲ့ ဖွဲ့စည်းထားတဲ့ Generations -Z အဖွဲ့ က ဦးဆောင်ပြီး ရန်ပုံငွေရှာ ဘောလုံးပြိုင်ပွဲ ကျင်းပခဲ့ပါတယ်။
မြန်မာပြည်တွင်းမှာ နွေဦးတော်လှန်ရေးအတွက်ရှေ့တန်းကနေ တိုက်ပွဲဝင်နေတဲ့ PDF ရဲဘော်တွေနဲ့ စစ်ဘေးရှောင်တွေကို ထောက်ပံ့ပေးနိုင်ဖို့ ရန်ပုံငွေရှာတဲ့ အနေနဲ့ ဘောလုံးပွဲကျင်းပတာဖြစ်ပြီး မြန်မာရွှေ့ပြောင်းအလုပ်သမားများ တက်ရောက်အားပေးခဲ့ကြပါတယ်။
Generations- Z အဖွဲ့က တာဝန်ရှိသူတစ်ဦးက "ဘောလုံးပွဲကို လာရောက်အားပေးတဲ့ ပရိတ်သတ်တွေနဲ့ သီးခြားအလှူငွေထည့်ချင်သူတွေအတွက် အလှူခံပုံး စီစဉ်ပေးထားပြီး ပါဝင်ယှဉ်ပြိုင်မယ့် ဘောလုံးအသင်းတွေကိုတော့ တစ်သင်းကို ဘတ် ၄၀၀၀ နှုန်းနဲ့ ဝင်ကြေးသတ်မှတ်ပေးထားပါတယ်။
ဒီပြိုင်ပွဲကို ထိုင်းနိုင်ငံ နေရာအနှံ့ပြားမှာရောက်ရှိနေတဲ့ ဘောလုံးဝါသနာရှင်လူငယ်တွေက စုဖွဲ့ထားတဲ့ ဘောလုံးအသင်း ၁၉ သင်း အထိ ပါဝင်ယှဉ်ပြိုင်ခဲ့ကြပါတယ်။
ဒီကရလာတဲ့ ရန်ပုံငွေတွေကို လာရောက်အားပေးတဲ့ ပရိတ်သတ်တွေနဲ့ ဘောလုံးသမားတွေအတွက် ဧည့်ခံကျွေးမွေးစရိတ်ဖယ်ပြီး ကျန်တဲ့ငွေတွေအားလုံးကို ပြည်သူ့ကာကွယ်ရေးတပ်ဖွဲ့ PDF တွေကို အဓိက လှူဒါန်းသွားမယ်လို့ ပွဲစီစဉ်သူက ဒီဗွီဘီကိုပြောပါတယ်။
အဆိုပါပွဲမှာ ပါဝင်ယှဉ်ပြိုင်ခဲ့တဲ့ ဘောလုံးသမားတစ်ဦးက " ကျနော်ကတော့ ဒီအာဏာသိမ်းမှုကို နည်းနည်းလေးမှ လက်ခံမှာမဟုတ်ဘူး ။ ဒီမှာလည်း ကျနော်တို့ မိသားစုတွေက လက်မခံလို့ အခုလို စည်းကားသိုက်မြိုက်စွာနဲ့ ရန်ပုံငွေရှာပွဲ ကျင်းပတယ်။ ဘောလုံးကန်ရင်း တော်လှန်တယ် ။မဲနှိုက်ရင်း တော်လှန်တယ်။ တော်လှန်ရေးနဲ့ပတ်သက်လာရင် အမျိုးမျိုး ကျနော်တို့ တော်လှန်နေမှာပါ။ PDF တွေကိုလည်း အားတင်းထားပါ။ ကျနော်တို့ကလည်း တတ်နိုင်တဲ့ ဘက်ကနေ တော်လှန်ရေးအတွက် ကြိုးစားပေးနေပါတယ်လို့ ပြောပါတယ်။
Generations -Z အဖွဲ့ဟာပြီးခဲ့တဲ့နှစ် မေလ ၂ ရက်မှာ စတင်ဖွဲ့စည်းခဲ့ပြီး တော်လှန်ရေးရန်ပုံငွေရှာတဲ့ ဘောလုံးပွဲ ၃ ပွဲကျင်းပခဲ့သလို တစ်လ နှစ်ကြိမ် မြန်မာပြည်သားတွေအ များဆုံးစုဝေးတဲ့ဈေးတွေ အလုပ်ရုံတွေမှာ အလှူငွေကောက်ခံနေပါတယ်။
