ကယား(ကရင်နီ) ပြည်နယ်၊ ဘောလခဲမြို့၊ နန်းဖဲရွာအနီးမှာ မေ ၂၃ ရက်က တိုက်ပွဲဖြစ်ပွားခဲ့ပြီး စစ်ကောင်စီဘက်က ၁ဝ ယောက်သေဆုံးကာ KNDF ဘက်က တယောက် ကျဆုံးတယ်လို့ ကရင်နီ အမျိုးသားကာကွယ်ရေးတပ်က ထုတ်ပြန်ပါတယ်။
ဘောလခဲမြို့ကို ထောက်ပို့သွားတဲ့ စစ်ကောင်စီတပ်နဲ့ KA ၊ KNDF တပ်ရင်း ၁၆ တို့ကြား တိုက်ပွဲပြင်းထန်လို့ KNDF တပ်ရင်း ၂ နဲ့ KPDF တို့က ဝင်ရောက်ကူညီ တိုက်ခိုက်ပေးခဲ့တာကြောင့် စစ်ကောင်စီတပ်ဘက်က ၁၀ ဦးသေဆုံးပြီး ယာဉ်တစီး ပျက်စီးခဲ့ရသလို အထိအခိုက်များခဲ့တယ်လို့ သိရပါတယ်။
ကရင်နီပြည်သူ့ကာကွယ်ရေး တပ်ဖွဲ့ဝင်တဦးက "စစ်ကောင်စီတပ်က ဘောလခဲမြို့ဘက်ကို လမ်းမကြီးအတိုင်း ကားအစီး ၂၀ နဲ့ ရိက္ခာတွေတင်ပြီး ထွက်လာတာ။ ကျနော်တို့က ကြားဖြတ်တိုက်ခိုက်တဲ့သဘောပါ။ စစ်ကားတွေရဲ့ ရှေ့ကနေ ခြေလျင်စစ်ကြောင်းထိုးလာတဲ့ စစ်ကောင်စီ တပ်ဖွဲ့ဝင်တွေနဲ့ ထိတွေ့တိုက်ပွဲဖြစ်ပြီး အဲ့မှာတင် စစ်ကောင်စီတပ်သား ၆ ဦးသေပြီး သူတို့ကားတစီးလည်း ပျက်စီးသွားတယ်။ စစ်ကောင်စီဘက်က လက်နက်ကြီးတွေနဲ့ ဆက်တိုက်ပစ်ခဲ့လို့ KNDF ရဲဘော်တဦး ကျဆုံးသွားတယ်" လို့ ဒီဗွီဘီကို ပြောပါတယ်။
အဲဒီတိုက်ပွဲအတွင်း ကရင်နီအမျိုးသားကာကွယ်ရေးတပ် KNDF ပူးပေါင်းတပ်ဖွဲ့ဘက်က ရဲဘော်တယောက်လည်း ကျဆုံးခဲ့တဲ့အပြင် လူနေအိမ် ၃ လုံးလည်း စစ်ကောင်စီရဲ့ ဖျက်ဆီးမီးရှို့ ခံလိုက်ရတယ်လို့ ထုတ်ပြန်ချက်ထဲမှာ ဖော်ပြထားပါတယ်။
ဘောလခဲမြို့မှာ အထိုင်စခန်းချထားတဲ့ ကရင်နီအမျိုးသားကာကွယ်ရေးတပ်ရင်း ၁၆ မှာ လမ်းပန်းဆက်သွယ်ရေးနဲ့ ဖုန်းလိုင်းအခက်အခဲတွေကြောင့် လက်နက်ခဲယမ်းနဲ့ စားနပ်ရိက္ခာ အခက်အခဲတွေရှိနေလို့ ပြည်သူတွေအနေနဲ့ ထောက်ပံ့ပေးစေချင်ပါတယ်လို့ ကရင်နီပြည်သူ့ကာကွယ်ရေးတပ် KPDF ရဲဘော်တဦးက တောင်းဆိုထားပါတယ်။
ကရင်နီ (ကယား) ပြည်နယ်၊ ဘောလခဲမြို့နယ်ဘက်ကို ရိက္ခာသွားပို့တဲ့ စစ်ကောင်စီယာဉ်တန်းကို ကရင်နီပူးပေါင်းတပ်တွေက တိုက်ခိုက်ခဲ့လို့ ယာဉ်နှစ်စီး ပျက်စီးသွားပါတယ်။
ရိက္ခာပို့သွားတဲ့ စစ်ကောင်စီယာဉ်တန်းကို ကရင်နီ ပူးပေါင်းတပ်တွေက မေ ၄ ရက် ဒီကနေ့မနက် ၆ နာရီလောက် ချုံခိုတိုက်ခိုက်ခဲ့တာကြောင့် ယာဉ်နှစ်စီး ပျက်စီးသွားခဲ့ပေမဲ့ ထိခိုက်ဒဏ်ရာရရှိမှု အသေးစိတ်ကို မသိရသေးဘူးလို့ ကရင်နီအမျိုးသားတိုးတက်ရေးပါတီ (ကေအန်ပီပီ) အတွင်းရေးမှူး ၁ ခူးဒယ်နီရယ်က ပြောပါတယ်။
“ဘောလခဲဘက်မှာကတော့ သူတို့ ရိက္ခာပို့ဖို့ လုပ်နေတယ်။ အဲဒါကို ရိက္ခာပို့တဲ့ လမ်းကြောင်းပေါ်မှာပဲ တိုက်ပွဲတွေဖြစ်တယ်၊ မိုင်းတွေထိတယ်။ ဒီမနက် ၆ နာရီတုန်းကပဲ။ ဖြစ်တာတော့ နန်းဖဲကျေးရွာ အနီးအနားမှာပဲလို့ ပြောတယ်။ ကားနှစ်စီးကတော့ ပျက်သွားတယ်။ ပျက်သွားတယ်ဆိုတာ သူတို့ မီးရှို့ပစ်လိုက်တာပေါ့နော်။ ဒါပေမဲ့ လက်နက်ခဲယမ်းရတယ်၊ ရိက္ခာတွေရတယ်၊ ထိခိုက်မှုကတော့ မသိရဘူး။”
မေ ၃ ရက် မနက် ၁၀ နာရီကျော်ကလည်း ဖရူဆိုမြို့နယ် ဒေါပိုရှေ့နဲ့ ထားလဲကျေးရွာအကြားမှာ စစ်ကောင်စီတပ်နဲ့ ကရင်နီ ပူးပေါင်းတပ်တို့အကြား ၁ နာရီကြာ တိုက်ပွဲဖြစ်ပွားခဲ့ပါသေးတယ်။
အဲဒီတိုက်ပွဲအတွင်း စစ်ကောင်စီဘက်က နှစ်ယောက်ထက်မနည်း သေဆုံးခဲ့ပြီး အများအပြား ထိခိုက်ဒဏ်ရာရရှိခဲ့တယ်လို့ KNDF B-15 က ထုတ်ပြန်ထားပါတယ်။
အဆိုပါတိုက်ပွဲအတွင်း စစ်ကောင်စီတပ်က လက်နက်ကြီးတွေနဲ့ ပစ်ခတ်ခဲ့တာကြောင့် ဒေါပိုရှေ့ကျေးရွာကို ကျရောက်ခဲ့ပြီး နေအိမ်နှစ်လုံး ပျက်စီးသွားတယ်လို့ ဒေသခံတွေဆီက သိရပါတယ်။
