မက္ကဆီကိုမြောက်ပိုင်း နူဗိုလီယွန်ပြည်နယ်ရဲ့ မြို့တော် မွန်ထာရေမှာ ၂၀၁၁ ခုနှစ်က ဖြစ်ပွားခဲ့တဲ့ ကာစီနို လူသတ်ပွဲအတွင်း သေဆုံးခဲ့ရသူတွေရဲ့ ဆွေမျိုးသားချင်းတွေကို မက္ကဆီကိုအစိုးရ တာဝန်ရှိသူတွေက သြဂုတ် ၃၁ ရက်မှာ လူသိရှင်ကြား တောင်းပန်စာ ထုတ်ပြန်ခဲ့ပါတယ်။

ဒီတောင်းပန်မှုဟာ သေဆုံးသူတွေကို အမှတ်ရစေတဲ့အပြင် မိသားစုတွေရဲ့ အမှန်တရားကို အသိအမှတ်ပြုဖို့နဲ့ အစုလိုက်အပြုံလိုက် သတ်ဖြတ်မှုအတွက် ကျူးလွန်သူ တာဝန်ရှိသူတွေကို အပြစ်ပေး အရေးယူဖို့ လိုအပ်ကြောင်း ထိပ်တန်းလူ့အခွင့်အရေးအရာရှိ အလက်ဂျန်ဒရို အန်စီနာစ်က ပြောကြားခဲ့ပါတယ်။

အခမ်းအနားအတွင်း နှင်းဆီဖြူတွေ ကိုင်ဆောင်ထားတဲ့ ပရိသတ်တွေထဲမှာ ထိုင်နေကြတဲ့ မိသားစုဝင်တွေနဲ့ ကျူးလွန်ခံခဲ့ရသူတွေကို ရုပ်သံဗွီဒီယိုမှာ ပြထားပါတယ်။

၂၀၁၁ ခုနှစ် သြဂုတ် ၂၆ ရက်က ကာစီနိုရွိုင်ရယ်မှာ နေ့ခင်းကြောင်တောင် လူတဒါဇင်လောက် ရောက်ရှိလာပြီးတော့ ဓာတ်ဆီနဲ့ ပက်ဖျန်းပြီး သုံးမိနစ်အတွင်း မီးတင်ရှို့ခဲ့တာပါ။

မီးရှို့တိုက်ခိုက်မှုကြောင့် ကိုယ်ဝန်ဆောင်အပါအဝင် အမျိုးသမီးအများစု ပါဝင်တဲ့ လူပေါင်း ၅၂ ယောက် သေဆုံးသွားခဲ့ရကြောင်း မီဒီယာတွေမှာ ဖော်ပြခဲ့ပါတယ်။

အခင်းဖြစ်ပွားပြီး မိနစ်ပိုင်းအကြာမှာ မက္ကဆီကိုတပ်ဖွဲ့ဝင်တွေ ရောက်ရှိလာခဲ့ပါတယ်။ မီးလောင်မှုကြောင့် လူတဒါဇင်ကျော် ဒဏ်ရာရခဲ့ပြီး လူ ၃၅ ‌ယောက်ထက်မနည်း နာရီပေါင်းများစွာ ပိတ်မိနေခဲ့ပါသေးတယ်။

မွန်ထာရေပြည်နယ်အစိုးရက မြို့တော်ရဲ့ မြို့ပြဖွံ့ဖြိုးတိုးတက်ရေးရုံးနဲ့ နူဗိုလီယွန်ပြည်နယ် မြို့ပြကာကွယ်ရေး အာဏာပိုင်တွေဟာ ကာစီနိုမှာ ကြေကွဲဖွယ်ဖြစ်စေခဲ့တဲ့ လုံခြုံရေးစည်းမျဉ်းတွေကို လိုက်နာခြင်းနဲ့ပတ်သက်တဲ့ သူတို့ရဲ့ တာဝန်ဝတ္တရားတွေကို မကျေပွန်ခဲ့တာကြောင့် ခွင့်လွှတ်ပေးဖို့ မိသားစုတွေရဲ့ ခွင့်လွှတ်မှုကို တောင်းဆိုထားတဲ့ တောင်းပန်စာကိုလည်း ထုတ်ပြန်ခဲ့ပါတယ်။

မက္ကဆီကိုအစိုးရဟာ အမေရိကန်နိုင်ငံ တက္ကဆက်ပြည်နယ်နဲ့ နယ်စပ်ချင်းထိနေတဲ့ နွေဗိုလီယွန် နယ်စပ်က အဝေးပြေးလမ်းမှာ ဇွန်လ ၂၇ ရက်ကစပြီး ရဲနဲ့ စစ်တပ်အင်အားကို တိုးမြှင့်ချထားလိုက်ပါတယ်။

ပြီးခဲ့တဲ့ လနည်းနည်းအတွင်း လမ်းပေါ်မှာ ခရီးသွားနေတဲ့ လူဒါဇင်ချီ ပျောက်ဆုံးခဲ့အပြီး လူပျောက်မှုနဲ့ လုယက်မှုတွေကို ဟန့်တားဖို့ ခုလို တပ်ချတာလို့ ဆိုပါတယ်။

 မက္ကဆီကိုရဲ့ စက်မှုလုပ်ငန်း အချက်အချာ မွန်တေရီမြို့နဲ့ နယ်စပ်မြို့ နွေဗိုလာရေဒိုမြို့တွေမှာ မူးယစ်ဂိုဏ်းတွေ ကြီးစိုးနေလို့ အဲဒီမြို့ ၂ မြို့ကြားက လမ်းမှာ လက်နက်ကိုင် စစ်သားတွေနဲ့ ရဲအရာရှိတွေ ကင်းလှည့်နေပါတယ်။

အရင်လက ဒီလမ်းပေါ်မှာ ခရီးသွား ၄၁ ယောက် ပျောက်ဆုံးခဲ့ပါတယ်။ ၁၇ ယောက်ကတော့ တိုက်ခိုက်ခံရပြီး သူတို့ရဲ့ ကားတွေကို လမ်းပိတ်ထားတဲ့ ရာဇဝတ်အုပ်စုတွေက လုယူခဲ့တယ်လို့ နွေဗိုလီယွန်မြို့ အာဏာပိုင်တွေက ပြောပါတယ်။

အဝေးပြေးလမ်းပေါ်မှာ လုံခြုံရေးနဲ့ ရဲအင်အား တိုးမြှင့်ချထားဖို့ ပူးတွဲအစီအစဉ်ကို နွေဗိုလေယွန်နဲ့ တာမောင်လီပတ်စ် ပြည်နယ်အစိုးရတွေက ပူးပေါင်းဆောင်ရွက်ခဲ့ပါတယ်။ 

နွေဗိုလာရေဒိုမြို့ကို ဇီးတပ်စ် မူးယစ်မှောင်ခိုဂိုဏ်း အကြွင်းအကျန်တွေဖြစ်တဲ့ နော့သ်အိစ် မူးယစ်ဂိုဏ်းက ကြီးစိုးနေတာ ကြာပါပြီ။

ထောင်ချီတဲ့ ခရီးသည်တွေဟာ အမေရိကန်နိုင်ငံ တက္ကဆက်ပြည်နယ် လာရေဒိုမြို့ နယ်စပ်ကို ဖြတ်ကူးဖို့ ဒီလမ်းကြောင်းကို သုံးနေကြတာပါ။