ယူကရိန်းနိုင်ငံ အရှေ့တောင်ဘက်က ရုရှားထိန်းချုပ်ထားတဲ့ မက်လစ်တိုပိုလ်မြို့ကို ဒီဇင်ဘာ ၁၀ ရက် ညနေပိုင်းမှာ ယူကရိန်းဘက်က ဒုံးကျည်တွေနဲ့ တိုက်ခိုက်ခဲ့တယ်လို့ အဝေးရောက် ယူကရိန်းမြို့အာဏာပိုင်တွေက ဆိုပါတယ်။ 

ဗျူဟာအရ အချက်အချာ ကျတဲ့ မက်လစ်တိုပိုလ်မြို့မှာ ယူကရိန်းရဲ့ ဒုံးကျည်တိုက်ခိုက်မှုကြောင့် လူ ၂ ဦး သေဆုံးပြီး ၁၀ ဦး ဒဏ်ရာရခဲ့တယ်လို့ ရုရှားအစိုးရကို လိုလားတဲ့ အာဏာပိုင်တွေက ပြောခဲ့ပေမယ့် ပြည်နှင်ခံထားရတဲ့ မြို့တော်ဝန်ကတော့ ရုရှားကျူးကျော်သူ အများအပြား သေဆုံးခဲ့တယ်လို့ ဆိုပါတယ်။ 

ရုရှားလူမျိုုးတွေ စုဝေးရာ နေရာအဖြစ် ပြောင်းလဲခဲ့တဲ့ ဘုရားကျောင်းကို ဒုံးကျည်ထိမှန်ခဲ့တယ်လို့ အဝေးရောက်မြို့တော်ဝန် အိုင်ဗန် ဖက်ဒိုရော့ဖ်က သူရဲ့တယ်လီဂရမ်အကောင့်ကနေ အတည်ပြုပါတယ်။ 

ဒီတိုက်ခိုက်မှုကြောင့် ဖျော်ဖြေရေးစင်တာ မီးလောင်ခဲ့တယ်လို့  ဇာပိုရစ်ဇီယားဒေသရဲ့ ရုရှားထိန်းချုပ်ထားတဲ့အပိုင်းက ရုရှားခန့်အပ်ခံအရာရှိ ဗလာဒီမာ ရော့ဂေါ့ဖ်က ပြောပါတယ်။

ရုရှားကာကွယ်ရေးဝန်ကြီးဌာနကတော့ ပြီးခဲ့တဲ့ ၂၄ နာရီအတွင်း ဒန်ညက်စ်ခ်နဲ့ မက်လစ်တိုပိုလ်မြို့ နားမှာ ယူကရိန်းရဲ့ HIMARS ဒုံးကျည် ၅ စင်းကို ရုရှားလေကြောင်းကာကွယ်ရေးတပ်က ပစ်ချခဲ့တယ်လို့ ဒီဇင်ဘာ ၁၁ ရက်က ပြောပါတယ်။ 

ယူကရိန်းသမ္မတ  အကြံပေးဖြစ်သူ အိုလက်ခ်ဆီ အရက်စ်တိုဗစ်က ပြီးခဲ့တဲ့မတ်လက ရုရှားက သိမ်းပိုက်ထားတဲ့ မက်လစ်တိုပိုလ်မြို့ဟာ စက်မှုလုပ်ငန်းနဲ့ ပို့ဆောင်ဆက်သွယ်ရေးအတွက် အဓိက ကျတဲ့ ဗဟိုချက်ဖြစ်သလို ယူကရိန်းတောင်ပိုင်းဒေသ ကာကွယ်ရေးမှာလည်း သော့ချက်ဖြစ်တယ် လို့ ဆိုပါတယ်။ 

မက်လစ်တိုပိုလ်မြို့ ကျတာနဲ့ ခါဆွန်မြို့တလျှောက်လုံးအထိ ကာကွယ်ရေးစည်း တခုလုံး ပြိုကျ သွားနိုင်တာကြောင့် ခရိုင်းမီးယားတုန်းကလိုအဖြစ်မျိုး ယူကရိန်းတပ်တွေ တိုက်ရိုက်ကြုံ ရနိုင်တယ်လို့ သူက သတိပေးခဲ့တာပါ။ 

ဒီတိုက်ခိုက်မှုနဲ့ ပက်သက်လို့ ယူကရိန်းစစ်တပ်ဘက်က ချက်ချင်း မှတ်ချက် ပေးတာမျိုး မရှိသေးပါဘူး။ 

ယူကရိန်းလက်နက်ကိုင်တပ်ဖွဲ့ရဲ့ ဗဟိုကွပ်ကဲရေးဌာနက မက်လစ်တိုပိုလ်မြို့မှာ တိုက်ခိုက်မှုတွေ ဆောင်ရွက်ခဲ့တယ်လို့ အဲ့ဒီနေ့အစောပိုင်းမှာ ပြောပါတယ်။ 

ရုရှားကာကွယ်ရေးဌာနကလည်း ဒန်ညက်စ်ဒေသမှာရှိတဲ့ လိုင်မန်မြို့နားမှာ ထိုးစစ် စစ်ဆင်ရေးတွေ ဆက်လက်လုပ်ဆောင်ခဲ့ပြီး ယူကရိန်းရဲ့ တန်ပြန်တိုက်ခိုက်မှုတွေကို တွန်းလှန်နိုင်ခဲ့တယ်လို့ သတင်း ထုတ်ပြန်ထားပါတယ်။