မကွေးလေတပ်စခန်းဌာနချုပ်ကို နိုဝင်ဘာ ၁၅ ရက် မနက်ပိုင်းမှာ KNLA နဲ့ PDF ပူးပေါင်းတပ်ဖွဲ့တွေက ရှော့တိုက်ဒုံးတွေနဲ့ ပစ်ခတ်တိုက်ခိုက်ခဲ့တယ်လို့ EPDF တပ်ဖွဲ့ကနေ သိရပါတယ်။
မကွေးလေတပ်စခန်းဌာနချုပ်ကို ဒီနေ့ နိုဝင်ဘာ ၁၅ ရက် မနက် ၆ နာရီခွဲလောက်မှာ KNLA နဲ့ PDF ပူးပေါင်းတပ်ဖွဲ့တွေက ၁၇၀ မမ ရှော့တိုက်ဒုံး ၃ လုံးနဲ့ ပစ်ခတ်တိုက်ခိုက်ခဲ့လို့ စစ်ကောင်စီဘက်က ထိခိုက်သေဆုံးသူ ရှိနိုင်တယ်လို့ EPDF တာဝန်ခံ စောဒေးဗစ်က ဒီဗွီဘီကို ပြောပါတယ်။
“အဲဒီတိုက်ခိုက်မှုဟာ ကရင်ပြည်နယ်နဲ့ ကချင်ပြည်နယ်အတွက် သွေးကြွေးကို ပြန်ယူတာဖြစ်ပြီး ပြည်သူတယောက်ကိုသတ်ရင် စစ်(...) ၁၀ ယောက်ကို ပြန်သတ်မယ်။ အပြစ်မဲ့ပြစ်သူတွေကို သတ်ဖြတ်နေတဲ့ လေယာဥ်တွေရှိတဲ့ လေတပ်စခန်းကို တိုက်ခိုက်တာဖြစ်တယ်။”
မကွေးမြို့အနီးရှိ ဆားတိုင်ကန်ကျေးရွာ ဒေသခံတယောက်ကလည်း “မကွေးလေတပ်စခန်း ဌာနချုပ်ဘက်က ပေါက်ကွဲသံ ၃ ချက် အကျယ်ကြီး ကြားလိုက်ရတယ်။ ဘာဖြစ်တာလဲတော့ သေချာမသိရဘူး။ ညနေ ၃ နာရီကျော်လောက်မှာတော့ ကျနော်တို့ရွာဘက်တွေကို စစ်ကောင်စီတပ်သားတွေ ဝင်လာတော့မှ ပစ်ခတ်တိုက်ခိုက်ခံရတယ်လို့ သိရတာ” လို့ ပြောပါတယ်။
အဲဒီပစ်ခတ်တိုက်ခိုက်မှု ဖြစ်ပြီးနောက်ပိုင်း မကွေးမြို့ဝင်မြို့ထွက်ဂိတ်၊ လမ်းဆုံလမ်းခွတွေနဲ့ တံတားထိပ်တွေမှာ လုံခြုံရေး တင်းကျပ်ထားပြီး လမ်းသွားလမ်းလာ ကား၊ ဆိုင်ကယ်တွေကို ပိတ်ဆို့စစ်ဆေးခဲ့တယ်လို့ ဒေသခံတွေဆီကနေ သိရပါတယ်။
မကွေးတိုင်း၊ မကွေးမြို့ အမှတ် ၂ ရဲစခန်းမှာ မေ ၃၁ ရက်က စစ်ကောင်စီတပ်သားတယောက်နဲ့ ရဲတပ်ဖွဲ့ဝင်တွေ ခိုက်ရန်ဖြစ်ပွားခဲ့တယ်လို့ မကွေးနယ်မြေရဲစခန်းမှ ရဲတပ်သားတယောက်က ဒီဗွီဘီကို ပြောပါတယ်။
“မကွေးလေတပ်စခန်း ဌာနချုပ်က စစ်ကောင်စီတပ်သားကို မကွေး အမှတ် ၂ နယ်မြေ ရဲစခန်းမှာ ချုပ်နှောင်ထားတာဗျ။ အဲဒါကို လေတပ်စခန်းက အရာရှိတွေက လာထုတ်တဲ့အချိန်မှာ လက်ထိတ်ဖြုတ်ပေးလိုက်တော့ စခန်းမှူး ရဲအုပ်အောင်စိုးကို အဲဒီစစ်သားက လက်သီးနဲ့ ထထိုးတာ။”
ရဲစခန်းက အကြီးဆုံးဖြစ်တဲ့ စခန်းမှူးကို စစ်သားက ထိုးတဲ့အတွက် ရဲတပ်ဖွဲ့ဝင်တွေ မခံနိုင်ဘဲ ရုန်းရင်းဆန်ခတ်ဖြစ်ပြီး အဲဒီစစ်သားကို ဖမ်းဆီးကာ သူ့တို့အရာရှိနဲ့ ပြန်လွှဲပေးလိုက်တယ်လို့ ဆိုပါတယ်။
“စစ်စည်းကမ်း ထိန်းသိမ်းရေးအရတော့ အရေးယူမှာပေါ့။ စခန်းမှူးအပါအဝင် ကျနော်တို့ စခန်းက ရဲတွေကိုလည်း စုံစမ်းစစ်ဆေးရေး ခုံရုံးဖွဲ့ပြီး စစ်ဆေးနိုင်တယ်” လို့ ပြောပါတယ်။
ဆက်လက်ပြီး အဲဒီရဲတပ်သားက “အဲဒီကောင်က မိုက်ကို မိုက်ရိုင်းတာပါဗျာ။ အသက်အရွယ်အရ ကြည့်မယ်ဆိုရင်လည်း ကိုယ့်အဖေအရွယ်လောက်ရှိတာကို ကိုယ်ထိလက်ရောက် ကျူးလွန်တယ်။ စစ်တပ်ကတော့ အာဏာမသိမ်းခင်ကတည်းက ရဲတွေကို ဖိနှိပ်အနိုင်ကျင့်တယ်။ အခု အာဏာသိမ်းလိုက်တော့ ပိုပြီး ချို (ဂျို) ကြွသွားတာပေါ့။ ရဲထဲမှာ ရဲချုပ်၊ တိုင်းမှူး၊ ခရိုင်မှူး အဆင့်ရှိတဲ့သူတွေဆိုရင် အကုန်လုံးနီးပါး စစ်တပ်က အသွင်ပြောင်းလာတာဖြစ်ပြီး ရဲစစ်စစ်က ရှားတယ်။ ကျနော်တို့လည်း စစ်အာဏာရှင်စနစ်ကို မကြိုက်ပေမဲ့ မိသားစုအခက်အခဲကြောင့် ရုန်းမထွက်နိုင်သေးတာ” လို့ ပြောပါတယ်။
အဲဒီစစ်သား အချုပ်ထဲကို ဘယ်လိုရောက်လာတယ် ဆိုတာကိုတော့ သူ့တာဝန်ချိန် မဟုတ်တဲ့အတွက် မသိကြောင်း၊ ဆိုင်ကယ်တစီးကို ၂ ယောက်စီးတဲ့ ကိစ္စကနေ ပြဿနာ စဖြစ်တယ်လို့ကြားကြောင်း၊ ရဲတွေကိုလည်း ဆိုင်ကယ် ၂ ယောက် စီးရဲစီးကြည့်ဆိုပြီး ကြိမ်းဝါးသွားကြောင်း ဆိုပါတယ်။
