နေပြည်တော် လယ်ဝေး၊ ဇမ္မူသီရိ၊ စလင်း၊ နတ်မောက်၊ ရွှေတောင်နဲ့ ဓနုဖြူမြို့နယ်တို့မှာ ဧပြီ ၂၁ ရက်မှ ၂၃ ရက်အတွင်း မိုးရွာသွန်းပြီး လေပြင်းတိုက်ခတ်ခဲ့လို့ လူ ၆ ဦး သေဆုံးကာ ၁၀၉ ဦး ဒဏ်ရာရရှိခဲ့ကာ လူနေအိမ် လူနေအိမ် ၁၂၃၅ လုံး ပျက်စီးခဲ့တယ်လို့ အုပ်ချုပ်ရေးနဲ့ နီးစပ်သူတွေဆီက သိရပါတယ်။

ပဲခူးတိုင်းဒေသကြီး ရွှေတောင်မြို့နယ်မှာ မနေ့ ည၆ နာရီကျော်က မိုးသည်းထန်စွာရွာသွန်းပြီး လေပြင်းတိုက်ခတ်ခဲ့ရာ အထည်ချုပ်စက်ရုံအပါအဝင် နေအိမ် ၅၄ လုံးပြို ကျပျက်စီးခဲ့တယ်လို့ ဒေသခံတစ်ဦးက ပြောပါတယ်။

"ရွာဘက်တွေကတော့ နေအိမ်တွေပြိုကျတာ မြို့ပေါ်ကအမိုးလန်တာပဲရှိတာ သရက်တော၊ ကျီးသဲ၊ သာစီကုန်း၊ ဆယ်ကြီးကုန်း၊ နွားခြံကုန်း၊ အဲ့ရွာဘက်မှာ နေအိမ်တွေပြိုကျတယ်။”

ဧရာဝတီတိုင်း ဓနုဖြူမြို့နယ်မှာ ဧပြီ ၂၁ ရက်က မိုးရွာသွန်းပြီး လေပြင်းတိုက်ခတ်ခဲ့ရာ လူနေအိမ် အလုံး ၃၀ ကျော်  ကျော်ပြိုကျပျက်စီးခဲ့ရာ စစ်ကောင်စီက တအိမ်ထောင်လုံး ပြိုကျလျှင် ကျပ် ၁ သိန်းနဲ့ ပျက်စီးတဲ့ အိမ်တွေကိုတော့ တအိမ်ကို ကျပ် ၃၀၀၀၀ ပေးတယ်လို့ သိရပါတယ်။

ဒေသခံတစ်ဦးက "ခမရ ၁၀၈ က အိမ်ပျက်စီးသွားလို့ဆိုပြီး သုံးသောင်းလာပေးတယ်။ အကုန်ပြိုကျသွားရင် တစ်သိန်းပေးတယ်။ အိမ်ထောင်စု ၃၇ ရှိတယ်။ ပြိုကျတာက ၁၉ အိမ် ပျက်စီးတာက၁၈ အိမ်"လို့ ပြောပါတယ်။

စလင်းမြို့နယ်မှာတော့  ဧပြီလ ၂၂ နေ့လယ်က  လေပြင်းတိုက်လို့ ရပ်ကွက်တချို့နဲ့ ကျေးရွာ ၉၄ ရွာမှာ နေအိမ် ၆၃၈ လုံး ဘုန်းကြီးကျောင်း စာသင်ကျောင်းတွေပျက်စီးခဲ့ တယ်လို့ မြို့ခံတစ်ဦးက ပြောပါတယ်။

နေအိမ်က ၆၃၈ လုံး၊ စာသင်ကျောင်း ၅ ကျောင်း၊ ဘုန်းကြီးကျောင်း ၃ ကျောင်း၊ ဓမ္မာရုံ ၁ ခု၊ ဌာနဆိုင်ရာရုံး ၂ လုံး၊ ဝန်ထမ်းအိမ်ရာ ၂ ခန်း အပြင် လမ်းမီးတိုင်တွေပါ ပြိုလဲကျခဲ့တယ်လို့ ပြောပါတယ်။

နတ်မောက်မြို့နယ်မှာလည်း ဧပြီ ၂၂ ရက်က လေပြင်းတိုက်ခတ်ခဲ့လို့ မြို့ပေါ် ရပ်ကွက် ၇ ရပ်ကွက်နဲ့ ကျေးရွာ ၂၀ လောက်ရှိ  လူနေအိမ် ၂၉၆ လုံးပြိုကျပျက်စီးခဲ့ပါတယ်။

နေပြည်တော် ဇမ္မူသီရီမြို့နယ်မှာ ဧပြီ ၂၂ ရက် ညနေ ၅ နာရီလောက်က  လေပြင်းတိုက်ခတ်ခဲ့လို့ စည်ပင်သာယာကျေးရွာ၊ မွန်းတည့်ခွင်းတောင်ရွာနဲ့ မြောက်ရွာ၊ ချောင်ကန်းကြီးကျေးရွာတို့မှာ နေအိမ် အလုံး ၃၀ ကျော်ပျက်စီးသွားပါတယ်။

လယ်ဝေးမြို့နယ်မှာလည်း ဧပြီ ၂၁ ရက်ညနေက မိုးသည်းထန်စွာရွာပြီး လေပြင်းတိုက်လို့ တံတားဦးကျေးရွာနဲ့ အောင်မြင်ကုန်းကျေးရွာမှာ အိမ်ပေါင်း ၂၂၂ လုံးပျက်စီးကြောင်း လယ်ဝေးမီးသတ်ဦးစီးဌာနကနေ သိရပါတယ်။

လေပြင်းတွေကြောင့် တံတားဦးကျေးရွာနေ ဒေါ်တင်မြ၊ ဒေါ်မာမာစိုးနဲ့ အောင်မြင်ကုန်းကျေးရွာနေ ကိုကျော်စွာမြင့်၊ ကိုဝင်းထွန်း၊ ဒေါ်ကြွေနဲ့ ဒေါ်အေးရီတို့ သေဆုံးခဲ့ပြီး ၁၀၉ ဦးဒဏ်ရာရရှိကာ လယ်ဝေးမြို့နယ်ဆေးရုံနဲ့ ဇမ္မူသီရိ ခုတင် ၁၀၀၀ ဆေးရုံတို့မှာ ပို့ဆောင်ကုသပေးထားရပါတယ်။

မကွေးတိုင်း၊ မကွေးမြို့၊ ဆူးကောက်စမ်းကျေးရွာ မြောက်ဘက်လယ်ကွင်းမှာ ဧပြီ ၂၂ ရက် ညနေ ၅ နာရီခွဲလောက်က မိုးကြိုး ပစ်ခံရလို့ သားအဖနှစ်ဦး နေရာတင် ပွဲချင်းပြီး သေဆုံးခဲ့တယ်လို့ နယ်ခံပရဟိတ အသင်းနဲ့ ရွာခံတွေထံက သိရပါတယ်။ 

ရောင်စုံမေတ္တာလူမှူကူညီရေးအသင်းတာဝန်ရှိသူက "ည ၁၀ နာရီလောက်မှ ဖုန်းဆက် အကူအညီ တောင်းတာ။ မကွေးမြို့နဲ့ဆို ဆယ်မိုင်လောက်ဝေးတယ်။ သေဆုံးသူအမည်တော့ မသိရသေးဘူ” လို့ ဆိုပါတယ်။

မိုးကြိုးပစ်ခံရလို့ အဖေဖြစ်သူ ၅၈ နှစ်၊ သားဖြစ်သူ ၃၅ နှစ်နဲ့အတူပါလာသော ခွေးတကောင်လည်း လယ်ကွင်းအတွင် သေဆုံးခဲ့ကာ ရုပ်အလောင်းတွေကို မကွေးမြို့ ပြည်သူ့ဆေးရုံကြီး ရင်ခွဲရုံသို့ပို့ဆောင်ပေးခဲ့တယ်လို့ ဆိုပါတယ်။

"ဖြစ်တာက ညနေ ၅ နာရီကျော်လောက်ထဲက။ ရပ်ရွာလူကြီး အကြောင်းကြားပြီး ရဲတွေ စောင့်နေရတာနဲ့ကြာသွားတာ။ သူတို့ စစ်ချက်ယူပြီးမှ ပရဟိတအသင်းတွေကို အကြောင်းကြားပြီး ဆေးရုံပို့တော့ ညည့်နက်ချိန်ရောက်သွားတာ”လို့ ရွာခံ တဦးက ပြောပါတယ်။

မြန်မာနိုင်ငံတဝန်း အပူချိန်မြင့်တက်နေပြီး အချိန်အခါမဟုတ် မိုးကြီးခြင်း လေပြင်းတိုက်ခိုက်ခြင်း မိုးကြိုးပစ်တာတွေ ဖြစ်ပေါ်ခဲ့ကာ ဧပြီ ၂၁ရက် ညနေပိုင်းက နေပြည်တော် လယ်ဝေးမြို့နယ် ကျေးရွာ ၃ ရွာမှာ လေပြင်းတိုက်ခံရပြီး ၆ ဦး သေဆုံးခဲ့ပါတယ်။

Photo ရောင်စုံ မေတ္တာ လူမှူကူညီရေးအသင်း