ကချင်ပြည်နယ်၊ မချမ်းဘောမြို့နယ်၊ နမ်ဘူယာန်ကျေးရွာမှာ လေပြင်းတိုက်ခတ်ပြီး နေအိမ် အဆောက်အအုံတချို့ ပျက်စီးခဲ့တဲ့အတွက် အကူအညီတွေ လိုအပ်နေတယ်လို့ ဒေသခံတွေထံက  သိရပါတယ်။

မေလ ၇ ရက် ညပိုင်းမှာ လေပြင်းတိုက်ခတ်ခဲ့လို့ သစ်ပင်တွေကျိုးကျပြီး နေအိမ် အဆောက်အအုံ ၁၀ လုံးထက်မနည်း ပျက်စီးခဲ့တဲ့အတွက် အကူအညီ လိုအပ်နေတာဖြစ်ပါတယ်။

ဒေသခံတစ်ဦးက “လေမုန်တိုင်းတိုက်တော့ ည ၁၁ နာရီလောက်ဖြစ်နေပြီ။ သစ်ပင်တွေကျိုး၊ အိမ်ခေါင်မိုးတွေလန် ဖြစ်သွားတယ်။ ဘုရားကျောင်းတခုလည်း ပျက်စီးသွားတယ်။ နေလို့မရအောင် ပျက်စီးသွားတာက ၅ လုံးလောက် ရှိတယ်။ သီးနှံစားပင်တွေလည်း ပါသွားတယ်။ ခုကာလနဲ့ဆိုတော့ အိမ်ပြန်ဆောက်ဖို့က မလွယ်ဘူး။ ဈေးနှုန်းတွေက နှစ်ဆမက မြင့်နေတယ်။ အိမ်ပျက်စီးတာတွေ ပြန်လည်ပြုပြင်ဖို့ အကူအညီတော့ လိုအပ်နေတာပဲ” လို့ ပြောပါတယ်။

ဘင်္ဂလားပင်လယ်အော်မှာဖြစ်ပေါ်နေတဲ့ လေမုန်တိုင်းအရှိန်ကြောင့် မြန်မာနိုင်ငံ ပြည်နယ်နဲ့ တိုင်းတချို့မှာ လေပြင်းတိုက် မိုးသည်းထန်စွာရွာသွန်းနိုင်တယ်လို့ မိုးဇလဌာနက ကြိုတင် ကြေညာထားပါတယ်။ 

ပူတာအိုခရိုင်အတွင်းမှာ ပါဝင်တဲ့  နမ်ဘူယာန်ကျေးရွာမှာ အိမ်ခြေ ၆၀ လောက်သာရှိပြီး အင်တာနက်လိုင်းမရှိတဲ့အတွက် မိုးလေဝသနဲ့ မုန်တိုင်းသတင်း ကြိုတင်သတိပေးချက်များ မသိခဲ့ရဘူးလို့ ဒေသခံတွေက ပြောပါတယ်။

လေပြင်းတိုက်တာ ၁၀ မိနစ်ဝန်းလောက်ကြာခဲ့ကာ  အဆောက်အအုံ ၁၀ လုံးနဲ့ သီးပင်စားပင်တွေ ထိခိုက်ပျက်စီးတာတွေရှိခဲ့ပေမဲ့ လူနဲ့ တိရစ္ဆာန်တွေ ထိခိုက်သေဆုံးတာ မရှိခဲ့ပါဘူး။

အန်အယ်လ်ဒီအစိုးရလက်ထက်တုန်းကတော့ သဘာဝဘေး ထိခိုက်ပျက်စီးမှုတွေအတွက် ဒုက္ခရောက်တဲ့ မိသားစုတွေကို အကူညီတွေပေးတဲ့ အစီအစဉ်တွေရှိခဲ့ပါတယ်။ 

ကချင်ပြည်နယ် ပူတာအိုမြို့နဲ့ မချမ်းဘောမြို့က ရဲတပ်ဖွဲ့ဝင် ၄ ဦးဟာ မတ်လ ၃ ရက်နဲ့ ၄ ရက်နေ့တွေမှာ မိမိတို့သဘောဆန္ဒအလျောက် CDM လှုပ်ရှားမှုမှာ ပူးပေါင်းပါဝင်ခဲ့ကြပါတယ်။

ဌာနကို တင်ပြထားတဲ့ စာတွေနဲ့အတူ သူတို့ရဲ့ Facebook စာမျက်နှာကနေ ကြေညာလိုက်တာဖြစ်ပြီး

ရဲတပ်သား ၄ ဦးစလုံးဟာ ဒေသခံတိုင်းရင်းသားတွေဖြစ်ကြပြီး အမျိုးသား ၃ ဦးနဲ့ အမျိုးသမီး တစ်ဦးတို့ ဖြစ်တယ်လို့ သိရပါတယ်။

အခုလို ရဲတပ်ဖွဲ့ဝင်တွေ CDM မှာ ပါဝင်လာတာနဲ့ပတ်သက်ပြီး ဒေသခံပြည်သူတစ်ဦးက "ဒါက လက်ကမ်းကြိုဆိုရမဲ့ကိစ္စ ဖြစ်ပါတယ်။ ကျန်နေသေးတဲ့ ကျနော်တို့ တိုင်းရင်းသား ညီအစ်ကိုဝန်ထမ်းတွေအနေနဲ့လည်း ဒီညီလေးညီမလေးတွေကို နမူနာယူပြီး အမြန်ဆုံး ရုန်းထွက် စေချင်တယ်။ အဲ့လိုမှမဟုတ်ရင် ပြည်သူကျိန်စာစူးပြီး သမိုင်းတရားခံတွေဖြစ်ကုန်လိမ့်မယ်။ အဲ့ဒီတော့ သတ္တိရှိရှိ ရုန်းထွက်ခဲ့ကြပါလို့ တိုက်တွန်းချင်ပါတယ်။ နောက်ပြီးတော့ ကျနော်တို့ဒေသက ထိလွယ်ရှလွယ်ဒေသဖြစ်တယ်။ အဲ့ဒီတော့ ပြည်သူတွေကလည်း CDM လုပ်ထားတဲ့ ပြည်သူ့ဝန်ထမ်းစစ်စစ်တွေကို ကာကွယ်စောင့်ရှောက်ပေးကြဖို့ လိုတယ်။ အခုကလေး ၄ ယောက်ကတော့ လောလောဆယ် လုံခြုံစိတ်ချရတဲ့ နေရာတွေမှာ တိမ်းရှောင်နေကြတယ်လို့ သိရတယ်"လို့ ပြောပါတယ်။

ပူတာအိုမြို့မှာ ဆန္ဒထုတ်ဖော်တဲ့ပြည်သူတွေကို ရဲတပ်ဖွဲ့က ဖိအားပေးတားမြစ်တာတွေ ရှိနေတယ်လို့ သိရပါတယ်။