စစ်ကိုင်းတိုင်း ကလေးခရိုင်၊ မင်းကင်မြို့နယ်အတွင်း စစ်ကြောင်းထိုးလာတဲ့ စစ်ကြောင်းကို စက်တင်ဘာ ၂၉ ရက်နဲ့ ၃၀ ရက်တွေက မိုင်းဆွဲတိုက်ခိုက်ခဲ့တယ်လို့ မင်းကင်းဒေသခံတွေက ပြောပါတယ်။

အဲဒီစစ်ကြောင်းဟာ မင်းကင်းမြို့ပေါ်ကို စစ်ကိုင်းတိုင်းရဲ့စစ်ကောင်စီခန့် တာဝန်ရှိသူ ဗိုလ်ချုပ် မြတ်ထွန်ဦး စက်တက်ဘာ ၂၉ ရက်က လာရောက်တာကို လုံးခြုံရေး လုပ်ပေးပြီး ခရီးစဉ်ပြီးဆုံး သွားပြီးနောက် မင်းကင်းမြို့နယ်ကို စစ်ကြောင်းထိုးနေတာလို့ မင်းကင်းမြို့နယ်ဒေသခံ တဦးက ပြောပါတယ်။

“နှစ်ဘက်လုံး ပစ်နေတာလား။ စစ်ကောင်စီက ပစ်နေတာလားတော့ မပြောနိုင်ဘူး။ အသက် မသေအောင် ထွက်နေရတာ ဒီနေ့ဆို ၃ ရက်ရှိပြီ။ အခုလည်း ထုံးမန်းရွာကို မီးရှို့တာ အဝေးက တွေ့ရတယ်။ ရွာသားတွေ အကုန်ထွက်ပြေးနေရတယ်။”

အခုစစ်ကောင်စီ စစ်ကြောင်းထိုးနေတာကြောင့် မင်းကင်းမြို့နယ်အတွင်းက လင်းလု၊ ဖက်ထုပ်၊ ညောင်ကိုင်း၊ ထုံးမန်း၊ ပသေး၊ အင်းဒေါင်း၊ အထက်စသာရွာက ဒေသခံ ထောင်နဲ့ချီ စစ်ဘေး ရှောင်နေရတယ်လို့ သိရပါတယ်။

မင်းကင်းတပ်ရင်း ၂ တာဝန်ရှိသူက “စစ်အင်အား ၂၀၀ ကျော် နဲ့  ကျနော်တို့ တပ်ရင်း ၂ ပိုင်နက် နယ်မြေထဲ ဝင်လာတယ်။ အဲဒီလို ဝင်လာလို့ ထုံးမန်းရွာနားမှာ တိုက်မိုင်းထောင်ထားခဲတာကို သူတို့ မိသွားတယ်။ ၄ ယောက် သေတယ်။ ၂ ယောက် ဒဏ်ရာရသွားတယ်။”

စက်တင်ဘာ ၃၀ ရက် ညနေ ၃ နာရီလောက်မှာ စစ်ကောင်စီတပ်က စက်လက်၊ ၆၀ မမ၊ ၁၂၀ မမတွေ ပစ်ခတ်ပြီး ထိုးစစ်ဆင်လာတာကြောင့် ခံစစ်နဲ့ လက်နက်ခြင်းမမျှလို့ နောက်ဆုတ်ခဲ့တာကြောင့် အထိအခိုက် မရှိခဲ့ဘူးလို့ သိရပါတယ်။

အောက်တိုဘာ ၁ ရက်မှာလည်း စစ်ကောင်စီတပ်ဟာ တပ်ဆုတ်တဲ့ဘက်ကို ထိုးစစ်နဲ့ လိုက်လာတာကြောင့် တိုက်မိုင်းထိပြီး ၁၀ ယောက်ထက်မနည်း သေဆုံးခဲ့တယ်လို့ မင်းကင်းတပ်ရင်း ၂ တာဝန်ရှိသူက ပြောပါတယ်။

မင်းကင်းမြို့နယ်အတွင်းမှာ စစ်ကောင်စီတပ်တွေကို ပြည်သူ့ကာကွယ်ရေးအဖွဲတွေရဲ့ အကြိမ်ကြိမ် တိုက်ခိုက်လို့ စက်တင်ဘာအတွင်း စခန်းမှူးအဆင့်ရှိသူ တယောက်အပါဝင် စစ်သား၊ပျူစောထီး အများအပြား ကျဆုံးခဲ့တယ်လို့ ဒေသခံတွေက ပြောပါတယ်။

မင်းကင်းမြို့နယ်အတွင်း စက်တင်ဘာ ၂၉ ရက်ကနေ အောက်တိုဘာ ၁ ရက်ထိဖြစ်ပွားခဲ့တဲ့ တိုက်ပွဲနဲ့ ကျဆုံးဒဏ်ရာရ စာရင်းကို စစ်ကောင်စီက မထုတ်ပြန်သေးသလို ဒီဗွီဘီအနေနဲ့လည်း သီးခြားအတည် မပြုနိုင်သေးပါဘူး။

မုံရွာ-ကလေးဝကားလမ်းအတိုင်း တောင်တွင်းဒေသ အထက်ပိုင်း ဆန်တက်လာတဲ့ စစ်ကောင်စီတပ်အင်အား ၁၀၀ လောက်နဲ့ ကားလမ်းမိုင်တိုင်အမှတ် ၆၈ မိုင်မှာ ဒေသခံ PDF ပူးပေါင်းတပ်တွေ ထိတွေ့ တိုက်ပွဲ ဖြစ်ပွားခဲ့ပါတယ်။

မင်းကင်းမြို့နယ်၊ ကြာပင်ရွာမှာ တပ်စွဲထားတဲ့ စစ်ကောင်စီတပ်ဟာ ဖေဖော်ဝါရီလ ၁၈ ရက်နေ့က ကြာပင်ရွာက စတင်ထွက်ခွာလာပြီး လမ်းတစ်လျှောက် ရွာခြင်းဆက်လမ်းတွေနဲ့ ကားလမ်းမပေါ်အတိုင်း ချီတက်ခဲ့ပြီး လက်ပန်တောရွာ ဘုန်းကြီးကျောင်းတွင်တစ်ည၊ ထုံးကြီးရွာစာသင်ကျောင်းမှာတစ်ည၊ စစ်လျှင်ချောင်းရွာ ဘုန်းတော်ကြီးကျောင်းမှာ တစ်ည ညအိပ်နားခဲ့ကြပြီး ကျေးရွာတွေက ဈေးဆိုင်တွေ၊ နေအိမ်တွေကို သော့ဖျက်ပြီး ပစ္စည်းတွေ၊ ရွှေငွေတွေ ယူဆောင်သွားကြကာ ကြက်တွေကိုလည်း သတ်စားသွားတယ်လို့ ဒေသခံတွေက ပြောပါတယ်။

အဲဒီစစ်ကောင်စီတပ်ကို ဖေဖော်ဝါရီ ၂၀ ရက်နေ့ မနက်ပိုင်း မိုင်တိုင်အမှတ် ၆၈ မိုင် အနောက်ဘက်မှာ တောင်တွင်းဒေသခံ PDF နဲ့ လာပို့ (ကနီမြို့နယ်) PDF ပူးပေါင်းတပ်တွေက မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၁၈ ဦး သေဆုံးခဲ့တယ်လို့ တိုက်ပွဲမှာ ကိုယ်တိုင်ပါဝင်ခဲ့တဲ့ PDF တပ်ဖွဲဝင်တစ်ဦးက ပြောပါတယ်။

“ကျနော်တို့က သူတို့တက်လာတာကြားကတည်း သူတို့လာရာလမ်းကြောင်းမှာ အသင့်စောင့်ပြီး မိုင်းဆွဲတိုက်ခိုက်တာ ၁၈ ယောက်လောက်က နေရာမှာပဲ ပွဲချင်းပြီးသေတယ်။ အထိနာသွားတော့ ဆက်မတက်တော့ပဲ နောက်ကြောင်းပြန်အဆုတ်မှာ နောက်က တောက်လျှောက်လိုက်ပြီးတော့ ပူးပေါင်းအဖွဲ့တွေနဲ့ အချိတ်အဆက်မိမိနဲ့ စစ်လျှင်ချောင်းရွာ မရောက်ခင်မှာ နှစ်ဖက်ညှပ်ပြီး ထပ်ပစ်ကြတာ အဲဒီမှာလည်း သူတို့ဘက်က ထပ်ကျတယ်။ ဒဏ်ရာရတဲ့သူတွေလည်း များတယ်။ တစ်ချို့က တောင်ဝှေးနဲ့ တွဲလျှောက်သွားကြရတဲ့သူတွေလည်း မြင်နေရတယ်။” 

စစ်ကောင်စီ တပ်ဖွဲ့ဝင်တွေဟာ မိုင်းခွဲတိုက်ခိုက်ခံရပြီးနောက် ရှေ့ဆက်ချီတက်ခြင်း မပြုတော့ဘဲ လာရာလမ်းအတိုင်း ပြန်လည်ဆုတ်ခွာလာရာ စစ်လျှင်ချောင်းရွာမရောက်ခင် ၄ ဖာလုံခန့်အကွာမှာ မင်းကင်းကနေ စစ်ကူလာတဲ့ PDF တပ်ဖွဲ့ဝင်တွေနဲ့ ထိတွေ့တိုက်ပွဲ ဆက်လက်ဖြစ်ပွားခဲ့တယ်လို့ ဆိုပါတယ်။

စစ်ကောင်စီတပ်ကို တောင်းတွင်းဒေသ PDF၊ မင်းကင်း PDF၊ ဆယ်ရွာ (ကနီမြို့နယ်) PDF တပ်တွေ ပူးပေါင်းပြီး တိုက်ခိုက်ခဲ့ကြတာဖြစ်ပြီး တိုက်ပွဲမှာ PDF ဘက်က ထိခိုက်ကျဆုံးတာမရှိဘဲ ဒေသခံ စစ်လျှင်ချောင်းရွာသားတစ်ဦးကတော့ ဦးခေါင်းနဲ့ ပေါင်မှာ (မစိုးရိမ်ရ) ဒဏ်ရာရရှိခဲ့တယ်လို့ သိရပါတယ်။

စစ်ကောင်စီတပ် ချီတက်ရာ လမ်းတစ်လျှောက်က ဒေသခံတွေ ၇၀၀၀ လောက် ဘေးလွတ်ရာ တိမ်းရှောင်နေကြရပြီး တိုက်ပွဲတွေ ထပ်မံဖြစ်ပွားမှာနဲ့ ကျေးရွာတွေ မီးရှို့ခံရမှာကို စိုးရိမ်နေကြပါတယ်။

စစ်ကောင်စီတပ်ဟာ သုံးလတစ်ကြိမ် ကနီမြို့နယ်၊ လာပို့ရွာရှိ  ဆက်သွယ်ရေးအစောင့်တပ်ဆီ ရိက္ခာသွားပို့လေ့ရှိပြီး ဆိုင်တွေက ဆန်၊ ဆီနဲ့ အစားအသောက်တွေ အတင်းယူဆောင်တာတွေ ရှိတယ်လို့ ဒေသခံတွေက ပြောပါတယ်။

ပြီးခဲ့တဲ့ ၂၀၂၁ ခုနှစ် ဒီဇင်ဘာကလည်း အခုလို တိုက်ပွဲများ ဖြစ်ပွားခဲ့ပြီး ကားလမ်းဘေးရှိ ဈေးဆိုင်တွေ၊ လူနေအိမ်တွေ မီးရှို့ခံခဲ့ရတယ်လို့ သိရပါတယ်။