ချင်းပြည်နယ်၊ မင်းတပ်မြို့နယ်မှာ မေ ၁၂ ရက် ညနေပိုင်းက စစ်ကောင်စီတပ်တွေနဲ့ CDF-မင်းတပ်တို့ တိုက်ပွဲဖြစ်ပွားခဲ့ရာ စစ်ကောင်စီဘက်က ၁၀ ယောက်ထက် မနည်းသေဆုံးပြီး အများအပြား ဒဏ်ရာရရှိခဲ့တယ်လို့ CDF-မင်းတပ်ကနေ သိရပါတယ်။

မနေ့ညနေပိုင်းမှာ မတူပီမြို့ကနေ ဆင်းလာတဲ့ အကြမ်းဖက် စစ်ကောင်စီယာဉ်တန်းတွေကို ၁၄ မိုင်ဝန်းကျင်မှာ CDF-Mindat က ပဒေသာမိုင်း ၂ ကြိမ်၊ တူမီး မောင်းပြန်တွေနဲ့ တိုက်ခိုက်ခဲ့ကြတာဖြစ်ပြီး စစ်ကောင်စီဘက်က အများအပြား ဒဏ်ရာရရှိထားတယ်လို့ ထုတ်ပြန်ချက်မှာ ဖော်ပြပါတယ်။

CDF-မင်းတပ်ရဲ့ သတင်းနှင့်ပြန်ကြားရေးတာဝန်ခံ ဆလိုင်းဟာအွမ်က “မတူပီဘက်ကနေ ဆင်းလာတဲ့ စစ်ကောင်စီယာဥ်တန်းကို CDF-မင်းတပ်က ရဲဘော်တွေ မိုင်းဆွဲတိုက်ခိုက်ခဲ့ လို့ နှစ်ဖက်ထိတွေ့တိုက်ပွဲ ပြင်းထန်ဖြစ်ပွားခဲ့တာ။ ကျနော်တို့ဘက်က ပဒေသာမိုင်း ၂ လုံး၊ တူမီးသေနတ်တွေ၊ မောင်းပြန်သေနတ်တွေနဲ့ ပစ်ခတ်တိုက်ခိုက်ခဲ့လို့ စစ်ကောင်စီတပ်သား ၁၀ ယောက်ထက် မနည်းသေဆုံးပြီး အများအပြားဒဏ်ရာ ရရှိသွားကြတာ”လို့ပြောပါတယ်။

ချင်းပြည်နယ်မှာတော့ ဒေသခံ ပြည်သူ့ကာကွယ်ရေးတပ်တွေနဲ့ အကြမ်းဖက် စစ်ကောင်စီတပ်တွေကြားတိုက်ပွဲတွေ နှစ်ချီပြင်းထန်နေတာဖြစ်ပြီး ဒီပဋိပက္ခ ဖြစ်စဉ်တွေကြောင့် နေရပ်စွန့်ခွာ ထွက်ပြေးရသူတွေလည်း မြင့်တက်နေတာ ဖြစ်ပါတယ်။

စစ်ကောင်စီယာဥ်တန်းကို အလွတ်မပေးဘဲ အပြင်းအထန်တိုက်ခိုက်နေတဲ့ ရှေ့တန်းရောက် CDF-မင်းတပ်က ရဲဘော်တွေကို မိဘပြည်သူတွေအနေနဲ့တတ်နိုင်တဲ့ဘက်ကပါဝင်ကူညီပြီး ဆုတောင်းပေးကြဖို့ မေတ္တာရပ်ခံထားပါတယ်။

မင်းတပ်-မတူပီ ကားလမ်းဘေးမှာရှိတဲ့ စစ်ဘေးရှောင်ပြည်သူတွေဟာ ဘေးလွတ်ရာ တော တောင်တွေ၊ ဘာသာရေးအဆောက်အုံတွေနဲ့ စစ်ရှောင်စခန်းတွေကို ထွက်ပြေးနေကြရပြီး မိုးရာသီရောက်တော့မှာဖြစ်လို့ အမိုးအကာတွေ အရေးတကြီး လိုအပ်နေသလို စားနပ်ရိက္ခာနဲ့ ဆေးဝါးအကူညီလိုအပ်နေတယ်လို့ ပြောပါတယ်။

စစ်ကောင်စီတပ်တွေဟာ ချင်းပြည်နယ်၊မကွေးတိုင်းနဲ့စစ်ကိုင်းတိုင်းကို ထိန်းချုပ်ဖို့ ခက်ခဲလာတာ ကြောင့် စစ်အင်အားအလုံးအရင်းနဲ့ ထိုးစစ်ဆင်တာတွေ ဆက်တိုက်ပြုလုပ်နေပြီး ပြည်သူတွေကို ဖမ်းဆီးသတ်ဖြတ်တာတွေ လူနေအိမ်တွေကို မီးရှို့ ဖျက်ဆီးတာတွေ ဆက်တိုက်ကျူးလွန်နေ တယ်လို့ ဒေသခံပြည်သူတွေရဲ့ ပြောကြားချက်အရ သိရပါတယ်။

နှစ်ဖက်တိုက်ပွဲအတွင်းမှာ စစ်ကောင်စီတပ်သား ၁၀ ယောက်ထက်မနည်း သေဆုံးပြီး အများအပြား  ဒဏ်ရာ ရခဲ့တယ်လို့ ပြန်ကြားရေးတာဝန်ခံက ပြောဆိုထားပေမဲ့ သီးခြား အတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရ သေးပါဘူး။

ချင်းပြည်နယ် မင်းတပ်မြို့မှာ ပြီးခဲ့တဲ့ ၄ ရက်အတွင်းဖြစ်ပွားခဲ့တဲ့ တိုက်ပွဲတွေမှာ အကြမ်းဖက်စစ်ကောင်စီတပ်သား အယောက်  ၅၀ ကျော် သေဆုံးခဲ့တယ်လို့ ဒေသခံ ကာကွယ်ရေးတပ်တွေထံက သိရပါတယ်။

နိုဝင်ဘာ ၃ ရက်က  သံချပ်ကာကား ၂ စီးအပါအဝင် စစ်ကား ၇၅ စီးကို ချင်းပြည်ကာကွယ်ရေးတပ် မင်းတပ်(CDF-MINDAT)က မတူပီ-မင်းတပ် လမ်းကြားတနေရာမှာ ကြားဖြတ်တိုက်ခိုက်ခဲ့ပြီး စစ်ကောင်စီဘက်က ၁၀ ယောက်လောက် သေဆုံးခဲ့သလို အဲဒီတိုက်ပွဲမှာ CDF-MINDAT က ၃ ယောက် ဒဏ်ရာရပြီး အသက် ၇၃ နှစ်အရွယ် ပညာရေးအငြိမ်းစား ရဲဘော်တယောက်ဟာ ဒဏ်ရာ ပြင်းထန်လို့ ကျဆုံးခဲ့ပါတယ်။

နိုဝင်ဘာ ၄ ရက်နေ့ မနက်ပိုင်းမှာ မင်းတပ်-မတူပီလမ်း ၆ မိုင်အကျော်မှာ စစ်ကြောင်းထိုးလာတဲ့ စစ်ကောင်စီတပ်တွေဟာ ပဒေသာမိုင်းကြောင့် ၅ ယောက်လောက်ကျဆုံးပြီး ဒဏ်ရာရသူတွေလည်း ရှိခဲ့တယ်လို့  CDF-MINDAT ကထုတ်ပြန်ပါတယ်။

နေ့လယ်ပိုင်းမှာလည်း မင်းတပ်-မတူပီ မိုင်တိုင် ၄၃ မှာ မတူပီကနေ ပြန်ဆင်းလာတဲ့ သံချပ်ကာ ၂ စီးပါတဲ့ ယာဉ်တန်းကို CDF-MINDAT က ရှေ့နောက် ညှပ် တိုက်ခိုက်ခဲ့ပြီး စစ်ကောင်စီဘက်က အယောက် ၂၀ လောက် သေဆုံးခဲ့တယ်လို့ ဆိုပါတယ်။

နောက်ဆုံးက ကားကို တိုက်ခိုက်နေချိန်မှာ စစ်ကောင်စီတပ်သားက ကားကို မောင်းပြေးတာကြောင့် ကားအောက်မှာ ဝပ်နေသူတွေ အကာအကွယ်မဲ့ပြီး အကျအဆုံးများတာလို့ ဆိုပါတယ်။

နိုဝင်ဘာ ၆ ရက် မနက်ပိုင်းမှာလည်း ၃၁ မိုင်ကိုရောက်လာတဲ့ စစ်ကောင်စီယာဉ်တန်းရှည်ကို CDF-MINDAT နဲ့ ဒေသခံရွာသားတွေ ပူးပေါင်းတိုက်ခိုက်ခဲ့ကြလို့ စစ်ကောင်စီတပ်သား ၈ ယောက်လောက် သေဆုံးခဲ့ပါတယ်။

စစ်ကောင်စီတပ်သားတွေဟာ လွန်ခဲ့တဲ့ တပတ်က မတူပီကိုလာတဲ့လမ်းမှာ ရွာသားတွေရဲ့ နွားနောက်တွေကို သတ်စားတာ၊ အိုးအိမ်တွေကို ဖျက်စီးတာတွေကြောင့် ရွာသားတွေလည်း ပါဝင်တိုက်ခိုက်လာကြတာလို့ ဆိုပါတယ်။

နိုဝင်ဘာ ၇ ရက်နေ့ မနက်ပိုင်းက မိုင်တိုင် ၂၆ ဝန်းကျင်မှာ စစ်ကောင်စီယာဉ်တန်း ရှေ့ကင်းထွက်လာသူတွေကို CDF-MINDAT က ဆီးကြိုတိုက်ခိုက်ခဲ့လို့ ၁၀ ယောက်လုံး သေခဲ့ပြီး နောက်ဘက် ယာဉ်တန်းက လက်နက်ကြီးတွေ၊ သံချပ်ကာကားက စက်သေနတ်တွေနဲ့ အပြင်းအထန် ခုခံတိုက်ခိုက်ခဲ့တယ်လို့ CDF-MINDAT က ထုတ်ပြန်ထားပါတယ်။

နေ့လယ်ပိုင်းမှာလည်း ယာဉ်တန်းကို အနီးကပ်ဝင်တိုက်ခဲ့ပြီး CDF-MINDAT ရဲ့ လက်နက်ကြီး ပစ်ခတ်တာကြောင့် စစ်ကောင်စီဘက်က ၈ ယောက်လောက်သေဆုံးတယ်လို့ ဆိုပါတယ်။ ၃၁ မိုင်ဝန်းကျင် လမ်းဘေးမှာ ရဲတယောက် အလောင်းကို မြေမြှုပ်ထားတာတွေ့ရပြီး စစ်ကြောင်းမှာ ရဲတွေ၊ မီးသတ်တွေလည်း ပါလာတယ်လို့ ယူဆကြောင်း CDF-MINDAT က ထုတ်ပြန်ပါတယ်။

ဒီမနက် ၁၀ နာရီဝန်းကျင်မှာလည်း ကလေးမြို့ ကနေ ချင်းတောင်ကိုတက်လာတဲ့ စစ်ကောင်စီကားတွေကို PDF Zoland နဲ့ CDM Siyin တို့ပူးပေါင်းဗုံးခွဲတိုက်ခိုက်ခဲ့ပြီး ထိခိုက်တဲ့အခြေအနေ အသေးစိတ်ကို မသိရသေးပါဘူး။

မင်းတပ်မြို့မှာ စစ်ကောင်စီဘက်က လေယာဉ်တွေသုံးပြီး တိုက်ခိုက်တယ်လို့ ဒေသခံတွေက ပြောဆိုပေမဲ့ အတည်ပြုလို့တော့ မရသေးပါဘူး။

ဓာတ်ပုံ -Yaw Mang