ချင်းပြည်နယ်၊ မင်းတပ်မြို့ကို သင်္ကြန်အတက်နေ့ ဧပြီ ၁၆ ရက် မနေ့ညနေပိုင်းမှာ စစ်ကောင်စီက လေကြောင်းကနေအကြမ်းဖက် တိုက်ခိုက်ခဲ့လို့ ကလေးငယ်တယောက်၊ သက်ကြီးရွယ်အိုတယောက်နဲ့ မိန်းကလေးငယ်တယောက် သေဆုံးသွားပါတယ်။

စစ်ကောင်စီတပ်ရဲ့ ဂျက်တိုက်လေယာဉ်နဲ့ ညနေ ၄ နာရီလောက်မှာ မင်းတပ်မြို့နယ်၊ တိုက်နယ် ၁၊ ပန်းပါရွာကို ၆ ကြိမ်လာရောက်တိုက်ခိုက်ပြီး ဗုံး ၁၇ လုံးကြဲချတာလို့ CDF Mindat ရဲ့ သတင်းပြန်ကြားရေးနဲ့ မှတ်တမ်းဌာနက ထုတ်ပြန်ထားတာပါ။

အဲဒါကြောင့် အသက် ၇၀ အရွယ် အဘွားအိုတယောက်၊ အသက် ၄ နှစ်အရွယ် ကလေးငယ်တယောက် သေဆုံးသွားပြီး အမျိုးသမီး ၅ ယောက်နဲ့ အမျိုးသား ၂ ယောက်တို့ ဒဏ်ရာရခဲ့တယ်လို့ ဆိုပါတယ်။

ညဘက်မှာ ဒဏ်ရာရိထားတဲ့အထဲက အသက် ၁၇ နှစ်အရွယ် မိန်းကလေးငယ်တယောက် ထပ်ပြီးသေဆုံးခဲ့တယ်လို့ CDF Mindat က ဒီမနက်မှာ ထုတ်ပြန်လာပါတယ်။

စစ်တပ်က ဗုံးကြဲတိုက်ခိုက်လို့ လူနေအိမ် ၉ လုံးလည်း မီးလောင်ပျက်စီးခဲ့ပြီး မင်းတပ်မြို့မှာရှိတဲ့ ခလရ ၂၇၄ ကလည်း ကျေးရွာတွေဘက်ကို လက်နက်ကြီးတွေနဲ့ ပစ်ခတ်နေတယ်လို့ ထုတ်ပြန်ထားပါတယ်။

အကြမ်းဖက်စစ်တပ်ဟာ လေကြောင်းကနေတိုက်ခိုက်တာကို ပိုအားထားသုံးလာပြီး ပြီးခဲ့တဲ့ ဇန်နဝါရီကနေ မတ်လအတွင်း နိုင်ငံတဝန်း လေကြောင်းကတိုက်ခိုက်တာ၊ ပစ်ကူတာ ၄၇ ကြိမ်လုပ်ခဲ့ပါတယ်။

ချင်းပြည်နယ်၊ မင်းတပ်မြို့နယ်ကိုလည်း ဇန်နဝါရီ ၇ ရက်ကနေ ၂၃ ရက်အထိ လေကြောင်းတိုက်ခိုက်မှု ၈ ကြိမ်ပြုလုပ်ခဲ့ပါတယ်။

အန်အယ်လ်ဒီအစိုးရလက်ထက်က ထုတ်ချေးထားခဲ့တဲ့ငွေတွေကို ပြန်ဆပ်ဖို့ မလိုသေးဘူးလို့ ချင်းပြည်နယ် မင်းတပ်မြို့နယ် ပြည်သူ့အုပ်ချုပ်ရေးအဖွဲ့က  အသိပေး ကြေညာလိုက်ပါတယ်။

မြစိမ်းရောင်ချေးငွေ၊ မိုးရာသီ စိုက်ပျိုးစရိတ်ချေးငွေ၊ သမဝါယမချေးငွေဘဏ်ချေးငွေ စတဲ့ အစိုးရချေးငွေ အမျိုးအစားအားလုံးကို ပြန်ဆပ်ဖို့  စစ်ကောင်စီက ဖိအားပေးခြိမ်းခြောက်နေတာကို သိရပြီး ဒီအချိန်ဟာ အကြမ်းဖက်စစ်အုပ်စုက မတရားအာဏာသိမ်းတာကို နိုင်ငံတဝန်း ပြည်သူတရပ်လုံးက တခဲနက်တော်လှန်နေချိန်ဖြစ်တယ်လို့ ဆိုပါတယ်။

ချေးငွေယူထားတဲ့ မင်းတပ်မြို့နယ်က ပြည်သူတွေအနေနဲ့ တရားမဝင်စစ်ကောင်စီနဲ့ချိတ်ဆက် ဆောင်ရွက်ပြီး ချေးငွေတွေပေးဆပ်စရာ မလိုအပ်တဲ့အကြောင်းနဲ့ နွေဦးတော်လှန်ရေးပြီးဆုံးလို့ ပြည်သူ့အစိုးရ တရပ်ပေါ်ပေါက်လာတဲ့ အခါမှပဲ ချေးငွေတွေပြန်လည်ပေးဆပ်ဖို့ ညှိနှိုင်းဆွေးနွေးရမယ်လို့ ကြေညာပါတယ်။

ပြီးတော့ အခကြေးငွေနဲ့ မွေးမြူထိန်းကျောင်းဖို့ အပ်ထားတဲ့ နွားနောက်တွေနဲ့ ပတ်သက်ပြီးလည်း မွေးမြူရေးနဲ့ ကုသရေးဌာနက Non CDM ဝန်ထမ်းတွေရဲ့ စွက်ဖက် ပြောဆိုတာကို အလေးမထားဖို့လည်း ပြည်သူ့အုပ်ချုပ်ရေးအဖွဲ့က ကြေညာပါတယ်။

ဒီနွားနောက်တွေကို အန်အယ်လ်ဒီအစိုးရလက်ထက်က ဒေသခံတွေဆီမှာ မွေးမြူထိန်းကျောင်းဖို့ အပ်ထားတာဖြစ်ပြီး အခုတော့ မင်းတပ်မြို့နယ် ပြည်သူ့အုပ်ချုပ်ရေးအဖွဲ့ပိုင်အဖြစ် သိမ်းဆည်းလိုက်ပြီဖြစ်သလို မွေးထားသူတွေအနေနဲ့လည်း ကိုယ်ကျိုးအတွက် မသုံးကြဖို့ အသိပေးထားပါတယ်။

မင်းတပ်မြို့နယ် ပြည်သူ့အုပ်ချုပ်ရေးအဖွဲ့ဟာ စစ်ကောင်စီကို ဆန့်ကျင်တော်လှန်ပြီးနောက်ပိုင်း ပထမဆုံးဖွဲ့စည်းခဲ့တဲ့ ပြည်သူ့အုပ်ချုပ်ရေးအဖွဲ့တွေထဲက တခုဖြစ်ပါတယ်။