စစ်အာဏာရှင်တော်လှန်ရေးကာလ ၂ နှစ်အတွင်းမှာ ချင်းကာကွယ်ရေးတပ် CDF-မင်းတပ်နဲ့ စစ်ကောင်စီတပ်တို့ တိုက်ပွဲ အကြိမ်ရေ ၂၁၈ ကြိမ်ဖြစ်ပွားခဲ့ပြီး စစ်တပ်က ၄၅၄ ယောက်နဲ့ CDF ရဲဘော် ၅၅ ယောက် ကျဆုံးခဲ့တယ်လို့ ဧပြီ ၂၄ ရက် CDF-မင်းတပ်ရဲ့တော်လှန်ရေး ၂ နှစ်ပြည့်နေ့မှာ ထုတ်ပြန်လိုက်ပါတယ်။
CDF-မင်းတပ်အနေနဲ့ စစ်အာဏာရှင် အမြစ်ပြတ်ပျက်သုဥ်းရေးအတွက် ၂၀၂၁ နှစ် ဖေဖော်ဝါရီ ၄ ရက် ညက စတင်ပြီး လမ်းမပေါ်တွေမှာ Spray Campaign ပြုလုပ်ကာ ဖေဖော်ဝါရီ ၈ ရက် မှာ ငြိမ်းချမ်းစွာဆန္ဒဖော်ပြခဲ့ကြတာဖြစ်ပါတယ်။
မင်းတပ်မြို့ ဗိုလ်ချုပ်ရေးရုပ်အရှေ့မှာ ၂၀၂၁ ခုနှစ် ဧပြီ ၂၄ ရက်က "NUG"စာတန်း ရေးသားကာ လူမဲ့သပိတ်လုပ်ဖို့ စာရေးနေသူ ၇ ယောက်ကို ဖမ်းဆီးခဲ့တာကြောင့် ရရာလက်နက် စွဲကိုင်တော်လှန်ခဲ့တာ အခုဧပြီ ၂၄ ရက်ဆိုရင် ၂ နှစ်ပြည့်ခဲ့ပြီလို့ ဆိုပါတယ်။
ဆန္ဒပြသူတွေကို စစ်ကောင်စီဘက်က အကြမ်းဖက် ဖြိုခွင်း၊ ဖမ်းဆီးတာတွေ လုပ်လာမယ်ဆိုရင် ချင်းရိုးရာ ဓလေ့ထုံးစံနဲ့ ပြန်လည်ခုခံ လက်တုံ့ပြန်သွားမယ်လို့ သပိတ်မိန့်ခွန်းတွေမှာ အကြိမ်ကြိမ် ပြောကြားခဲ့တယ်လို့ ဆိုပါတယ်။
CDF-မင်းတပ်အနေနဲ့ တော်လှန်ရေးမဟာမိတ်အင်အားစုတွေနဲ့ လက်တွဲပူးပေါင်းကာ ခုခံ တော်လှန် တိုက်ပွဲဝင်သွားမယ်လို့ ထုတ်ပြန်ချက်မှာ ဖော်ပြထားပါတယ်။
ထုတ်ပြန်ချက်နဲ့ ပတ်သက်လို့ CDF-မင်းတပ်ရဲ့ ပြန်ကြားရေးတာဝန်ခံ ဆလိုင်းဟာအွမ်ကို ဆက်သွယ်ခဲ့ပေမယ့် လေကြောင်းရန်အန္တရာယ်ရှိနေဆက်သွယ်လို့ မရသေးပါဘူး။
ချင်းပြည်နယ်၊ မင်းတပ်မြို့နယ်မှာ ဧပြီ ၁၈ ရက်ညပိုင်း တိုက်ပွဲမဖြစ်ဘဲ ပြည်သူနေအိမ်တွေကို စစ်ကောင်စီတပ်က ဂျက်တိုက်လေယာဉ်၊ ဗုံးကြဲလေယာဥ်နဲ့ ၃ ကြိမ်ခန့် ဗုံးကြဲတိုက်ခိုက်ခဲ့တယ်လို့ CDF - Mindat ကနေ သိရပါတယ်။
မနေ့ည ၉ နာရီ ၁၅ မိနစ်လောက်မှာ စစ်ကောင်စီရုံးစိုက်ရာ နေပြည်တော်လေတပ်ကနေ ဂျက်ဖိုက်တာတစီးက ပျံသန်းလာခဲ့ပြီး မင်းတပ်မြို့နယ် တိုက်နယ် ၂ ဘက်က ကျေးရွာတွေကို ဗုံး ကြဲတိုက်ခိုက်ခဲ့တာဖြစ်ပါတယ်။
CDF-Mindat သတင်းပြန်ကြားရေးနှင့် မှတ်တမ်းဌာန တာဝန်ရှိသူတဦးက “ မင်းတပ်မြို့ တိုက်နယ် ၂ ဘက်ကို ကြဲတာပါ။ အဲဒီနားမှာက ကာကွယ်ရေးတပ်ဖွဲ့တွေ မရှိဘူး၊ တိုက်ပွဲလည်း မဖြစ်ပွားဘူး။ ပြည်သူတွေပဲ နေတာ။ အဲဒါကို ဗုံးကြဲတိုက်ခိုက်ခဲ့တာပါ။”
စစ်ကောင်စီရဲ့ လေယာဥ်သုံး ဗုံးကြဲတိုက်ခိုက်မှုကြောင့် ကျေးရွာနေလူထု ပျက်စီးဆုံးရှုံးမှု များနိုင်ပေမဲ့ ပျက်စီးရှုံးဆုံးမှုတွေတော့ အတည်ပြုလို့မရသေးဘူးလို့ဆိုပါတယ်။
CDF-Mindat က တာဝန်ရှိသူတဦးက “၂၀၂၂ ဇူလိုင် ၇ ရက်နေ့ ကနေစပြီး မင်းတပ်မြို့ထဲကို ဆက်တိုက်ဆိုသလို ကြဲနေတာ ဒီနေ့အထိပါပဲ။ နောက်ပြီး သူတို့တွေက ကာကွယ်ရေးတပ်စခန်း တည်နေရာတွေ မဟုတ်တဲ့ ပြည်သူတွေနေတဲ့ နေရာကိုပဲ ရွေးပြီး ကြဲနေတာပါ။ ပြည်သူတွေလည်း အထိတ်တလန့်နဲ့ ဘေးလွတ်ရာကို ထွက်ပြေးနေရပြီး ဒီတခေါက် ပျက်စီးဆုံးရှုံးမှုက များနိုင်တယ်ဗျ” လို့ ပြောပါတယ်။
လက်ရှိမှာတော့ စစ်ကောင်စီက မြန်မာနိုင်ငံအနှံ့အပြားကို လေကြောင်းကနေ အကြမ်းဖက် ထိုးစစ်ဆင်နေပြီး ကန့်ဘလူ၊ ပဇီကြီးကျေးရွာကို လေကြောင်းကနေ ဗုံးကြဲတိုက်ခိုက်မှုကြောင့် အသက် ၆ လအရွယ် ကလေးငယ်ကနေ အသက် ၆၇ နှစ်အရွယ် သက်ကြီးရွယ်အို၊ ကိုယ်ဝန်သည်တွေ အပါအဝင် လူဦးရေ ၁၇၀ လောက် သေဆုံးခဲ့ပါတယ်။
ဧပြီ ၁၈ နေ့မှာပဲ မြိုင်နယ် မန်ကျည်းကန်ရွာကို စစ်သုံး Mi35၊ Mi17 အမျိုးအစားလေယာဥ်နဲ့ ပစ်ခတ်တိုက်ခိုက်ခဲ့ပြီး ကျေးရွာတွင်းကို စစ်ကြောင်းထိုးဝင်ရောက်ကာ သက်ကြီးရွယ်အိုတွေနဲ့ ဒေသခံတချို့ကို ဓားစာခံအဖြစ် ဖမ်းဆီးသွားခဲ့ပါသေးတယ်။
